ጤናና ድኅነት በኢየሱስ ስም

የሐዋርያት ሥራ 3:16፤ 4:10, 12 ከበዓለ ኀምሳ በኋላ ሽባው በመቅደስ ደጅ በጴጥሮስና በዮሐንስ አማካይነት በተፈወሰ ጊዜ፣ «ተነሣና ተመላለስ» ያሉት «በናዝሬቱ በኢየሱስ ክርስቶስ ስም» ነበር፤ ሕዝቡም ተደንቀው ወደ እነርሱ በአንድነት እንደ ሮጡ ወዲያው ጴጥሮስ ሰውየውን እንዲህ ፈጽሞ የፈወሰው የኢየሱስ ስም እንደ ሆነ ተናገረ።

ከዚህ ተአምርና ከጴጥሮስ ንግግር የተነሣ ቃሉን ከሰሙት ብዙዎች አመኑ (የሐዋርያት ሥራ 4:4)። በማግሥቱም ጴጥሮስ እነዚህን ቃላት በሸንጎው ፊት ደገመ፦ «... በናዝሬቱ በኢየሱስ ክርስቶስ ስም ይህ ደኅና ሆኖ በፊታችሁ እንደ ቆመ»፤ ቀጥሎም «እንድንበት ዘንድ የሚገባን ለሰዎች የተሰጠ ስም ከሰማይ በታች ሌላ የለምና» ብሎ ጨመረ። ይህ የጴጥሮስ ቃል የኢየሱስ ስም የሚፈውስም የሚያድንም እንደ ሆነ ይነግረናል። በዚህ ለመለኮታዊ ፈውስ እጅግ ታላቅ ትርጕም ያለው ትምህርት አለን።

ፈውስና ጤና የክርስቶስ ድኅነት ክፍል እንደ ሆኑ እናያለን። ጴጥሮስ በሸንጎው ፊት ባደረገው ንግግር ስለ ፈውስ ከተናገረ በኋላ ወዲያው በክርስቶስ ስለሚገኘው ድኅነት ወደ መናገር በመሸጋገር ይህን በግልጽ አይናገርምን? (የሐዋርያት ሥራ 4:10, 12)። በሰማይ ሥጋችን እንኳ በድኅነት ድርሻ ይኖረዋል፤ ሥጋችን የክርስቶስን ሙሉ ቤዛነት እስኪደሰትበት ድረስ ድኅነት ለእኛ ፍጹም አይሆንም። እንግዲያስ በዚህ የቤዛነት ሥራ እዚህ በምድር ስለ ምን አናምንም? አሁን እዚህ በምድር እንኳ የሥጋችን ጤና ኢየሱስ ያስገኘልን የድኅነት ፍሬ ነው።

ደግሞም ጤና እንደ ድኅነት በእምነት የሚገኝ መሆኑን እናያለን። የሰው ተፈጥሮአዊ ዝንባሌ ድኅነቱን በሥራው ለማስገኘት ነው፤ በእምነት ሊቀበለው የሚመጣውም በብዙ ችግር ብቻ ነው፤ የሥጋ ፈውስ ጉዳይ ሲሆን ደግሞ ይህን ለመጨበጥ ይበልጥ ይቸገራል። ድኅነትን በተመለከተ፣ የሰማይን ደጅ በሌላ በምንም ሊከፍት ስለማይችል በመጨረሻ ይቀበለዋል፤ ለሥጋ ግን የታወቁ መድኃኒቶችን ይጠቀማል። ታዲያ መለኮታዊ ፈውስን ስለ ምን ይፈልጋል? ይህ የእግዚአብሔር ፈቃድ መሆኑን የሚያስተውል ብፁዕ ነው፤ እግዚአብሔር የኢየሱስን ኃይል ሊገልጥ፣ አባታዊ ፍቅሩንም ሊገልጥልን፣ እምነታችንን ሊያለማምድና ሊያጸና፣ የቤዛነትንም ኃይል በነፍስ እንደ ሆነ በሥጋም እንድንለማመድ ሊያደርገን ይወዳል። ሥጋ የማንነታችን ክፍል ነው፤ ሥጋ እንኳ በክርስቶስ ድኗል፤ ስለዚህ አባታችን የቤዛነትን ኃይል ሊገልጥ፣ ኢየሱስም ሕያው መሆኑን ሰዎች እንዲያዩ ሊያደርግ የሚወደው በሥጋችን ነው። ኦ፣ በኢየሱስ ስም እናምን! ለአንካሳው ሰው ፍጹም ጤና የተሰጠው በኢየሱስ ስም አልነበረምን? «እምነትህ አድኖሃል» የሚለውስ ቃል የተነገረው ሥጋ በተፈወሰ ጊዜ አልነበረምን? እንግዲያስ መለኮታዊ ፈውስን ለማግኘት እንፈልግ።

መንፈስ በኃይል በሚሠራበት ስፍራ ሁሉ መለኮታዊ ፈውስን ያደርጋል። ተአምራት ትርፍ የሆኑበት ጊዜ ቢኖር በበዓለ ኀምሳ ነበር የሚያሰኝ አይደለምን? በዚያን ጊዜ የሐዋርያት ቃል በብርቱ ይሠራ ነበርና፣ የመንፈስ ቅዱስም መፍሰስ የተትረፈረፈ ነበርና። እንግዲህ የመንፈስ አሠራር በሥጋ ላይ መታየቱ ግድ የሆነው መንፈስ በኃይል ስለ ሠራ ነው። በዘመናችን መለኮታዊ ፈውስ እምብዛም የማይታይ ከሆነ፣ መንፈስ በኃይል ስለማይሠራ ነው ከማለት በቀር ሌላ ምክንያት ልንሰጠው አንችልም። የዓለማውያን አለማመንና የአማኞች የቅንዓት ማጣት ሥራውን ያቆማሉ። እግዚአብሔር እዚህም እዚያም የሚሰጣቸው ፈውሶች ተስፋ የተሰጡን መንፈሳዊ ጸጋዎች ሁሉ ቀዳሚ ምልክቶች ናቸው፤ እንዲህ ያሉትን ፈውሶች ለማድረግ የኢየሱስን ስም ሁሉን ቻይነት የሚገልጠውም መንፈስ ቅዱስ ብቻ ነው። ስለ መንፈስ ቅዱስ አጥብቀን እንጸልይ፤ ያለ አንዳች ገደብ ራሳችንን ከአመራሩ በታች እናስገዛ፤ ድኅነትን ለመስበክም ሆነ ለፈውስ ሥራ በኢየሱስ ስም ባለን እምነት ጽኑዎች ለመሆን እንፈልግ።

እግዚአብሔር ፈውስን የሚሰጠው የኢየሱስን ስም ለማክበር ነው። ስሙ ይከበር ዘንድ በኢየሱስ ለመፈወስ እንፈልግ። የስሙ ኃይል ምን ያህል ጥቂት እንደሚታወቅ፣ የስብከትና የጸሎት ዓላማ የሚሆነውም ምን ያህል ጥቂት እንደ ሆነ ማየት ያሳዝናል። ክርስቲያኖች በእምነታቸውና በቅንዓታቸው ማነስ ራሳቸውን የሚያሳጡት የመለኮታዊ ጸጋ መዝገቦች በኢየሱስ ስም ውስጥ ተሰውረዋል። ልጁን በቤተ ክርስቲያን ማክበር የእግዚአብሔር ፈቃድ ነው፤ እምነትንም ባገኘበት ስፍራ ሁሉ ይህን ያደርጋል። በአማኞች መካከልም ሆነ በአሕዛብ መካከል፣ ሕሊናዎችን ለማንቃትና ልቦችን ወደ መታዘዝ ለማምጣት ከላይ በሆነ ኃይል ተዘጋጅቷል። እግዚአብሔር የልጁን ሁሉን የሚችል ኃይል ለመግለጥ፣ ይህንንም በነፍስ እንደ ሆነ በሥጋም በሚያስደንቅ መንገድ ለማድረግ ዝግጁ ነው። ለራሳችን እንመነው፤ ለሌሎች፣ በዙሪያችን ላሉት አማኞች ማኅበር፣ በዓለም ሁሉ ላለችውም ቤተ ክርስቲያን እንመነው። በኢየሱስ ስም ኃይል በጽኑ እምነት ለማመን ራሳችንን እንስጥ፤ በተስፋ ቃሉ ላይ ተደግፈን በስሙ ታላላቅ ነገሮችን እንለምን፤ እግዚአብሔርም በቅዱሱ ልጁ ስም ዛሬም ድንቅ ነገሮችን ሲያደርግ እናያለን።