የምልጃ ጸሎት

«እርስ በርሳችሁ በኃጢአታችሁ ተናዘዙ። ትፈወሱም ዘንድ እያንዳንዱ ስለ ሌላው ይጸልይ፤ የጻድቅ ሰው ጸሎት በሥራዋ እጅግ ኃይል ታደርጋለች» (ያዕቆብ 5:16፣ የተሻሻለው ትርጉም)።

ያዕቆብ በመጀመሪያ ስለ ቤተ ክርስቲያን ሽማግሌዎች ጸሎት ይነግረናል፤ እዚህ ግን፦ «ትፈወሱም ዘንድ እያንዳንዱ ስለ ሌላው ይጸልይ» ብሎ ለአማኞች ሁሉ ይናገራል። ስለ መናዘዝና ስለ ይቅርታ አስቀድሞ ከተናገረ በኋላ እንኳ፦ «እያንዳንዱ ስለ ሌላው ይጸልይ» ብሎ ይጨምራል።

ይህም ፈውስን የሚለምነው የእምነት ጸሎት ለብቻው የቆመ የአንድ አማኝ ጸሎት እንዳልሆነ፣ ነገር ግን የክርስቶስን አካል ብልቶች በመንፈስ ኅብረት አንድ ሊያደርጋቸው እንደሚገባ ያሳየናል። እግዚአብሔር የእያንዳንዱን ልጁን ጸሎት በሕያው እምነት ወደ እርሱ እንደ ቀረበ ወዲያውኑ በእርግጥ ይሰማል፤ ነገር ግን የታመመው ሰው ሁልጊዜ እንዲህ ያለ እምነት የለውም። ስለዚህ መንፈስ ቅዱስ መጥቶ በኃይል እንዲሠራ፣ ብዙውን ጊዜ መገኘቱን በአንድነት የሚለምኑ የክርስቶስ አካል የሆኑ የብዙ ብልቶች ኅብረት ያስፈልጋል።

በወንድሞቻችን ላይ ያለን ይህ መደገፍ በሁለት መንገድ ሊፈጸም ይገባዋል። በመጀመሪያ ለበደልናቸው ሰዎች ሁሉ ጥፋታችንን መናዘዝና ከእነርሱ ይቅርታን መቀበል አለብን። ከዚህም በተጨማሪ፣ የታመመው ሰው በሠራው በዚህ ወይም በዚያ ኃጢአት ውስጥ የሕመሙን ምክንያት ለማየትና በዚያም የእግዚአብሔርን ቅጣት ለማወቅ ከደረሰ፣ እንዲህ ባለ ጊዜ ስለ እርሱ በሚጸልዩት ሽማግሌዎች ወይም በክርስቶስ ባሉ ወንድሞች ፊት ኃጢአቱን ሊናዘዝ ይገባዋል፤ እነርሱም በዚህ በበለጠ ብርሃንና በበለጠ እምነት ለመጸለይ ይችላሉ። እንዲህ ያለው መናዘዝ ደግሞ የንስሐውን ቅንነት የሚፈትን መፈተኛ ድንጋይ ይሆናል፤ ኃጢአታችንን ለሰው ከመናዘዝ ይልቅ ለእግዚአብሔር መናዘዝ ይቀላልና። ይህን ከማድረጉ በፊት ራሱን ማዋረዱ እውነተኛ፣ ንስሐውም ቅን መሆን ግድ ነው። ውጤቱም በታመመውና ስለ እርሱ በሚማልዱት መካከል የቀረበ ኅብረት ይሆናል፤ እምነታቸውም እንደ ገና ይነቃቃል።

«ትፈወሱም ዘንድ እያንዳንዱ ስለ ሌላው ይጸልይ።» ይህ ብዙ ጊዜ ለሚሰማው ለዚህ ንግግር ግልጽ መልስ አይሰጥምን፦ በስዊዘርላንድ ወዳለው ወደ አቶ ዜለር፣ በአሜሪካ ወዳለው ወደ ዶክተር ኩሊስ፣ ወይም በለንደን ወዳለው ወደ ቤትሻን መሄድ ምን ይጠቅማል? ጌታ ጸሎትን በየትኛውም ስፍራ ቢቀርብ አይሰማምን? አዎን፤ በሕያው እምነት የሆነ ጸሎት ወደ እግዚአብሔር በወጣበት ስፍራ ሁሉ ፈውስን ለመስጠት ዝግጁ ሆኖ እንደሚያገኘው ምንም ጥርጥር የለውም፤ ነገር ግን ቤተ ክርስቲያን ይህን እውነት ማመንን እጅግ ቸል ስላለች፣ በዚህ ዘመን እንዲህ ለመጸለይ የሚችሉ ክርስቲያኖችን ማግኘት ብርቅ ነገር ሆኗል። ስለዚህ አንዳንድ አማኞች ሕይወታቸውን በከፊል ለመለኮታዊ ፈውስ እውነት ምስክርነት እንዲቀድሱ ምኞትን በልባቸው ስላሳደረ ጌታን ብናመሰግነው አይበዛበትም። ቃላቸውና እምነታቸው ያለ እነርሱ እርዳታ ፈጽሞ ወደ እምነት ሊደርሱ በማይችሉ በብዙ ድውያን ልብ ውስጥ እምነትን ያነቃሉ። ለሰው ሁሉ ሁልጊዜ፦ «ጌታ በየስፍራው ይገኛል» የሚሉት እነዚሁ ሰዎች ናቸው። ክርስቲያኖች ከአምላካቸው ድንቅ ኃይል ትንሿን ክፍል እንኳ ቸል እንዳይሉ ይማሩ፤ እርሱም ሁልጊዜ «ፈዋሽህ እግዚአብሔር እኔ ነኝ» (ዘጸአት 15:26) የሚለው እርሱ መሆኑን ለሁሉ ሊገልጥ ይችላል። የእግዚአብሔርን ቃል ለመታዘዝ፣ እርስ በርሳችን ለመናዘዝ፣ እንድንፈወስም ዘንድ እያንዳንዳችን ስለ ሌላው ለመጸለይ እንጠንቀቅ።

ያዕቆብ እዚህ ለሚሰማ ጸሎት ሌላ አስፈላጊ ሁኔታን ደግሞ ይጠቅሳል፤ ይኸውም የጻድቅ ጸሎት መሆን አለበት። «የጻድቅ ሰው ጸሎት በሥራዋ እጅግ ኃይል ታደርጋለች።» መጽሐፍ፦ «እርሱ [ኢየሱስ] ጻድቅ እንደ ሆነ ጽድቅን የሚያደርግ ጻድቅ ነው» (1ኛ ዮሐንስ 3:7) ይለናል። ያዕቆብ ራሱ ስለ መንፈሳዊ ኑሮውና ስለ ሕሊናው ስሱነት «ጻድቁ» ተብሎ ተጠርቶ ነበር። «ሽማግሌ» ቢሆንም ተራ አማኝ ቢሆንም፣ ሰው ስለ ወንድሞች ፍሬያማ በሆነ ሁኔታ ሊጸልይ የሚችለው ፈጽሞ ራሱን ለእግዚአብሔር ከሰጠና ለፈቃዱ በመታዘዝ ከኖረ በኋላ ብቻ ነው። ዮሐንስም ይህንኑ ይላል፦ «ትእዛዙንም የምንጠብቅና በፊቱ ደስ የሚያሰኘውን የምናደርግ ስለሆንን የምንለምነውን ሁሉ ከእርሱ እናገኛለን» (1ኛ ዮሐንስ 3:22)። ስለዚህ «እጅግ ኃይል ታደርጋለች» የተባለችው ከእግዚአብሔር ጋር በቅርብ ኅብረት የሚኖር ሰው ጸሎት ናት። እግዚአብሔር ለሌሎች ልጆቹ ሊሰጥ የማይችለውን መልስ የሚሰጠው ለእንዲህ ያለች ጸሎት ነው።

«የጻድቅ ሰው ጸሎት እጅግ ኃይል ታደርጋለች» የሚለው ቃል ሲጠቀስ ብዙ ጊዜ እንሰማለን፤ ነገር ግን ከዐውዱ ጋር አያይዞ የሚመለከተው፣ ወይም እዚህ የሚነገረው በተለይ ስለ መለኮታዊ ፈውስ መሆኑን የሚያስታውስ እጅግ ጥቂት ነው። ኦ፣ ጌታ ኢየሱስን የድውያን መለኮታዊ ፈዋሽ አድርጎ ለማክበር ሊጠቀምባቸው የሚችለውን፣ በሕያው እምነት የተነቃቁ ብዙ እንደነዚህ ያሉ ጻድቃንን በቤተ ክርስቲያኑ ውስጥ ያስነሣ!