ተግሣጽና ቅድስና

«ከቅድስናው እንድንካፈል ለጥቅማችን ይቀጣናል» (ዕብራውያን 12:10)። «ማንም ራሱን... ቢያነጻ፥ ለክብር የሚሆን የተቀደሰም ለጌታውም የሚጠቅም ለበጎም ሥራ ሁሉ የተዘጋጀ ዕቃ ይሆናል» (2ኛ ጢሞቴዎስ 2:21)።

አንድን ነገር መቀደስ ለእግዚአብሔርና ለአገልግሎቱ መለየት፣ መወሰን ማለት ነው። በኢየሩሳሌም የነበረው መቅደስ ቅዱስ ነበረ፤ ይኸውም ለእግዚአብሔር ማደሪያ ሆኖ ያገለግለው ዘንድ ለእርሱ የተወሰነና የተለየ ነበረ። የመቅደሱ ዕቃዎች ለመቅደሱ አገልግሎት የተሰጡ ስለ ነበሩ ቅዱሳን ነበሩ፤ ካህናቱም እግዚአብሔርን ለማገልገል የተመረጡና ለእርሱ ለመሥራት የተዘጋጁ ስለ ነበሩ ቅዱሳን ነበሩ። እንዲሁም ክርስቲያን ደግሞ የተቀደሰ፣ በጌታ እጅ ያለ፣ «ለበጎም ሥራ ሁሉ የተዘጋጀ» ሊሆን ይገባዋል።

የእስራኤል ሕዝብ ከግብፅ በወጡ ጊዜ ጌታ ቅዱስ ሕዝብ አድርጎ ለአገልግሎቱ ጠየቃቸው። ፈርዖንንም፦ «ያገለግሉኝ ዘንድ ሕዝቤን ልቀቅ» (ዘጸአት 7:16) አለው። ከከባዱ ባርነታቸው ነፃ የወጡት የእስራኤል ልጆች ወዲያውኑ ወደ እግዚአብሔር አገልግሎት እንዲገቡና ደስተኞች አገልጋዮቹ እንዲሆኑ ግዴታ ነበረባቸው። ነፃ መውጣታቸው ወደ ቅድስናቸው የሚያደርስ መንገድ ነበረ።

ዛሬም ደግሞ እግዚአብሔር ለራሱ ቅዱስ ሕዝብን እያዘጋጀ ነው፤ ኢየሱስም ነፃ የሚያወጣን ከእነርሱ ወገን እንድንሆን ነው። እርሱ «ከዓመፅ ሁሉ ይቤዠን ዘንድ፥ መልካም ሥራንም የሚቀና የገዛ ገንዘቡ የሚሆን ሕዝብን ለራሱ ያነጻ ዘንድ ስለ እኛ ራሱን ሰጠ» (ቲቶ 2:14፣ የተሻሻለው ትርጉም)። ሰይጣን በባርነት ሊይዘን የሚሻበትን ሰንሰለት የሚሰብር ጌታ ነው። እርሱን እናገለግለው ዘንድ ነፃ፣ ፈጽሞ ነፃ እንድንሆን ይሻል። ከአካላችን ብልቶች እያንዳንዱ ለእርሱ እንዲቀደስና ያለ ገደብ በእጁ እንዲሆን ሊያድነን፣ ነፍስንም ሥጋንም ነፃ ሊያወጣ ይፈቅዳል።

ብዙ ክርስቲያኖች ይህን ሁሉ ገና አያስተውሉም፤ ነፃ የወጡበት ዓላማ እንዲቀደሱና አምላካቸውን ለማገልገል እንዲዘጋጁ መሆኑን እንዴት እንደሚቀበሉት አያውቁም። ሕይወታቸውንና ብልቶቻቸውን ለራሳቸው እርካታ ይጠቀሙበታል፤ ስለዚህም ፈውስን በእምነት ለመለመን ነፃነት አይሰማቸውም። ስለዚህ ጌታ ሰይጣን ሕመምን እንዲያመጣባቸውና በእርሱም ታስረውና ተማርከው እንዲቆዩ የሚፈቅደው ሊቀጣቸው፣ ቅድስናንም እንዲመኙ ሊያደርጋቸው ነው (ሉቃስ 13:11, 16)። እግዚአብሔር «ከቅድስናው እንድንካፈል ለጥቅማችን» ይቀጣናል፤ እንድንቀደስና «ለጌታውም የሚጠቅም» እንድንሆንም ይቀጣናል (ዕብራውያን 12:10፣ የተሻሻለው ትርጉም፤ 2ኛ ጢሞቴዎስ 2:21)።

ሕመምን የሚያመጣው ተግሣጽ ታላቅ በረከትን ይዞ ይመጣል። ለታመመው ሰው ቆም ብሎ እንዲያስብ የሚቀርብ ጥሪ ነው፤ እግዚአብሔር በእርሱ ጉዳይ እንደሚጠመድና ገና ከእግዚአብሔር የሚለየውን ነገር ሊያሳየው እንደሚሻ እንዲያይ ይመራዋል። እግዚአብሔር ይናገረዋል፤ መንገዱን እንዲመረምር፣ ቅድስና እንደ ጐደለው እንዲያምን፣ የቅጣቱም ዓላማ ከቅድስናው ተካፋይ ሊያደርገው እንደ ሆነ እንዲገነዘብ ይጠራዋል። እስከ ዛሬ ድረስ ሕይወቱ እግዚአብሔር ከእርሱ ከሚፈልገው ቅዱስ ሕይወት እጅግ የራቀ የራስ ፈቃድ ሕይወት እንደ ነበረ በግልጽ ይረዳ ዘንድ፣ እስከ ልቡ ጥልቅ ማዕዘን ድረስ በመንፈስ ቅዱስ የመብራት ምኞትን በውስጡ ያነሣሣል። ኃጢአቶቹን እንዲናዘዝ፣ ለጌታ ለኢየሱስ አደራ እንዲሰጣቸው፣ አዳኙም ከእነርሱ ሊያድነው እንደሚችል እንዲያምን ይመራዋል። ለእርሱ እንዲገዛ፣ ሕይወቱን ለእርሱ እንዲቀድስ፣ ለእግዚአብሔርም ይኖር ዘንድ ለራሱ እንዲሞት ያበረታታዋል።

ቅድስና አንተ ራስህ ልትፈጽመው የምትችለው ነገር አይደለም፤ እግዚአብሔርም እንኳ ልትይዘውና በራስህ ውስጥ ልትመለከተው እንደምትችል ነገር አድርጎ በአንተ ሊያስገኘው አይችልም። አይደለም፤ ቅድስናውን ሊያካፍልህና ዘወትር ሊያድስልህ የሚችለው መንፈስ ቅዱስ፣ የቅድስና መንፈስ የሆነው እርሱ ብቻ ነው። ስለዚህ «ከቅድስናው» ተካፋይ ልትሆን የምትችለው በእምነት ነው። ኢየሱስ ከእግዚአብሔር ዘንድ ቅድስና እንደ ሆነልህ (1ኛ ቆሮንቶስ 1:30)፣ በምድር ላይ በሕይወቱ የተገለጠውን ቅድስናውን ለአንተ ማካፈል የመንፈስ ቅዱስ ሥራ እንደ ሆነ ተረድተህ፣ ያን ሕይወት ከሰዓት ወደ ሰዓት እንድትኖር ያስችልህ ዘንድ ራስህን በእምነት ለእርሱ አሳልፈህ ስጥ። ጌታ በመንፈሱ ወደዚህ የቅድስናና ለእግዚአብሔር አገልግሎት የመቀደስ ሕይወት እንደሚያስገባህና በእርሱም እንደሚጠብቅህ እመን። እንዲሁ ዘወትር ድምፁንና የመንፈሱን አመራር እያደመጥህ በእምነት መታዘዝ ኑር።

ይህ የአባት ተግሣጽ የታመመውን ሰው ወደ ቅድስና ሕይወት ካመራው ጊዜ ጀምሮ እግዚአብሔር ዓላማውን አግኝቷል፤ በእምነትም የሚለምነውን ይፈውሰዋል። ምድራዊ ወላጆቻችን «ለጥቂት ቀን ይቀጡን ነበር.... ቅጣት ሁሉ ለጊዜው የሚያሳዝን እንጂ ደስ የሚያሰኝ አይመስልም፥ ዳሩ ግን በኋላ ለለመዱት የሰላምን ፍሬ እርሱም ጽድቅን ያፈራላቸዋል» (ዕብራውያን 12:10, 11፣ የተሻሻለው ትርጉም)። አዎን፣ አማኙ ከቅጣቱ ሊፈታ በሚችልበት ሁኔታ ላይ የሚገኘው ይህን የሰላም የጽድቅ ፍሬ በሕይወቱ ሲያገኝ ነው።

ኦ፣ ፈውስ የታመመው ሰው መቀደሱን ፈጥኖ እንደሚከተል አማኞች በእውነት ሊያምኑ የማይችሉት፣ ቅድስና ማለት ፈጽሞ ለእግዚአብሔር መሰጠት መሆኑን ገና እጅግ ጥቂት ስለሚያስተውሉ ነው። መልካም ጤና ለእነርሱ ብዙ ጊዜ እንደ ፈቃዳቸው ሊጠቀሙበት የሚችሉት የግል ምቾትና ደስታ ጉዳይ ብቻ ነው፤ እግዚአብሔር ግን ራስ ወዳድነታቸውን እንዲህ ሊያገለግል አይችልም። እግዚአብሔር ልጆቹ «የተቀደሰም ለጌታውም የሚጠቅም» እንዲሆኑ እንደሚፈልግ ይበልጥ ቢያስተውሉ ኖሮ፣ ብልቶቻቸውን ሁሉ በእጁ ማኖርን ለተማሩትና በመንፈስ ቅዱስ ለመቀደስና በአገልግሎቱ ለመሠራት ፈቃደኞች ለሆኑት ፈውስንና የታደሰ ብርታትን ሲሰጥ ባዩት ጊዜ ባልተደነቁ ነበር። የፈውስ መንፈስ የቅድስናም መንፈስ ነው።