በእምነት መበርታት

አንድ ቀን ሐኪሙ ሲገባ ሶፋው ላይ አገኘኝ፤ በሰው እርዳታ ደረጃውን ወርጄ እንደ መጣሁ ሲሰማም ተገረመ። «አሁን» አለ፣ «ልታደርገው የምትችለው ከሁሉ የሚሻለው ነገር ለጉዞው አቅም እንዳለህ በተሰማህ ጊዜ ወዲያውኑ ወደ ገጠር መሄድ ነው። ጤናህንና ጉልበትህን በበቂ መጠን መልሰህ እስክታገኝ ድረስ በገጠር መቆየት አለብህ፤ ሥራህን ቶሎ ብትጀምር ውጤቱ አሁንም አደገኛ ሊሆን ይችላልና።» እርሱ ከሄደ በኋላ፣ እጅግ ደክሜ ሶፋው ላይ ተኝቼ ሳለሁ፣ ሁሉንም ነገር ለጌታ ዝም ብዬ ነገርሁት፤ ለጸሎት መልስ ብቻ ከእርሱ ራሱ እርዳታ በመቀበል እምነቴ እንዲበረታ ስል፣ ፍላጎቴን ለማሟላት ደስ የሚላቸውን ሰዎች ሁኔታዬን ከማሳወቅ እንደ ተቈጠብሁም ነገርሁት። ምን ማድረግ ነበረብኝ? መልሱንም ጠበቅሁ።

እንደገና ወደ መርከብ ኩባንያው ቢሮ ሄጄ ማውጣት ስላልቻልሁት ደመወዝ እንድጠይቅ ወደሚለው መደምደሚያ አእምሮዬን እየመራው ያለ መሰለኝ። ለመጓጓዣ መክፈል እንደማልችል፣ ገንዘቡን ማግኘቴም ፈጽሞ የሚመስል ነገር እንዳልሆነ ለጌታ አሳሰብሁት፤ ይህ ግፊት የእርሱ አመራርና ትምህርት ሳይሆን የራሴ የአእምሮ ሂደት፣ እንደሚሰጥም ሰው ገለባ መጨበጥ ብቻ እንዳይሆንም ጠየቅሁት። ነገር ግን ከጸሎትና እግዚአብሔርን እንደገና ከመጠበቅ በኋላ ወደ ቢሮው እንድሄድ የሚያስተምረኝ እርሱ ራሱ እንደ ሆነ ያለኝ እምነት ጸና።

የሚቀጥለው ጥያቄ፦ «እንዴት ልሂድ?» የሚል ነበር። ደረጃውን ለመውረድ እንኳ እርዳታ መጠየቅ ግድ ሆኖብኝ ነበር፤ ስፍራው ደግሞ ቢያንስ ሁለት ማይል ይርቅ ነበር። አብ ስለ ወልድ እንዲከበር በክርስቶስ ስም ከእግዚአብሔር የምለምነው ሁሉ እንደሚደረግ፣ ማድረግ ያለብኝም ለረጅሙ የእግር መንገድ ኃይልን መለመን፣ በእምነት መቀበልና ጉዞውን መጀመር እንደ ሆነ የሚገልጽ ማረጋገጫ በልቤ ውስጥ በግልጽ ተቀረጸ። ኃይሉን ቢሰጠኝ በእግሬ ለመሄድ ፍጹም ፈቃደኛ እንደ ሆንሁ ያለ ማመንታት ለጌታ ነገርሁት። ኃይሉ ወዲያውኑ እንዲሰጠኝ በክርስቶስ ስም ለመንሁ፤ ሠራተኛዪቱንም ባርኔጣዬንና በትሬን ከክፍሌ እንድታመጣልኝ ልኬ፣ በእግሬ ለመሄድ ልሞክር ሳይሆን ወደ ቺፕሳይድ በእግሬ ልሄድ ተነሣሁ።

በእምነት እንደ በረታሁ ጥርጥር ባይኖረውም፣ በዚያ ጉዞ ላይ እንዳደረግሁት ለሱቅ መስኮቶች ያን ያህል ትኩረት ሰጥቼ አላውቅም። በየሁለተኛው ወይም በየሦስተኛው እርምጃ በመስኮቱ መስታወት ላይ ጥቂት ተደግፌ፣ ከማለፌ በፊት በመስኮቶቹ ውስጥ ያሉትን ዕቃዎች በዝግታ መመልከት ደስ ይለኝ ነበር። ፋሪንግደን ጎዳና ግርጌ ስደርስ አድካሚውን የስኖው ሂል አቀበት ለመውጣት ልዩ የእምነት ጥረት አስፈለገኝ፤ በዚያን ዘመን የሆልበርን ድልድይ አልነበረም፤ አቀበቱንም መውጣት ግድ ነበር። እግዚአብሔርም በሚያስደንቅ ሁኔታ ረዳኝ፤ በጊዜውም ቺፕሳይድ ደረስሁ፤ ቢሮው ወደሚገኝበት ወደ ጎን ጎዳና ታጥፌ፣ ወደ መድረሻዬ ወደ አንደኛው ፎቅ በሚያወጡት ደረጃዎች ላይ እጅግ ደክሜ ተቀመጥሁ። ሁኔታዬ ትንሽ እንግዳ እንደ ሆነ ተሰማኝ — እንዲህ ፈጽሞ ዝዬ በደረጃዎቹ ላይ ተቀምጬ — ደረጃውን በችኮላ የሚወጡና የሚወርዱ ጨዋ ሰዎችም በጠያቂ ዓይን ይመለከቱኝ ነበር። ጥቂት ካረፍሁና እንደገና ለጥቂት ጊዜ ከጸለይሁ በኋላ ግን ደረጃውን መውጣት ቻልሁ፤ እስከዚያ ጊዜ ድረስ በዚህ ጉዳይ ስነጋገረው የነበረውን ፀሐፊ በቢሮው ውስጥ በማግኘቴም ተጽናናሁ። ገርጥቼና ደክሜ ሲያየኝ ስለ ጤንነቴ በደግነት ጠየቀኝ፤ እኔም ከባድ ሕመም እንደ ያዘኝና ወደ ገጠር እንድሄድ እንደ ታዘዝሁ፣ ነገር ግን ዋናው መኮንን ወደ ወርቅ ማውጫ ስፍራዎች ስለ መኮብለሉ ምናልባት ስሕተት ተፈጽሞ እንደ ሆነ አስቀድሜ መጥቼ እንደገና መጠየቅ መልካም እንደ መሰለኝ ነገርሁት። እርሱም፦ «ኦ፣ በመምጣትህ እጅግ ደስ ብሎኛል፤ የኮበለለው ተመሳሳይ ስም ያለው አንድ ተራ መርከበኛ እንደ ነበር ታውቋልና። ዋናው መኮንን አሁንም በመርከቡ ላይ ነው፤ መርከቡ ገና ግሬቭዘንድ ደርሷል፤ በቅርቡም ወደዚህ ይመጣል። እስከ ዛሬ ያለውን የደመወዙን እኩሌታ ልሰጥህ ደስ ይለኛል፤ በአንተ በኩል ቢሆን ለሚስቱ ይበልጥ በሰላም እንደሚደርስ ጥርጥር የለውምና። ሰዎቹ ከባሕር ጉዞ ወደ አገራቸው ሲመለሱ ምን ዓይነት ፈተናዎች እንደሚከብቧቸው ሁላችንም እናውቃለን» አለ።

ገንዘቡን ከመስጠቱ በፊት ግን ወደ ውስጥ ገብቼ ምሳውን እንድካፈል አጥብቆ ለመነኝ። በእርግጥ የሚያሟላልኝ ጌታ እንደ ሆነ ተሰማኝ፤ ግብዣውንም በምስጋና ተቀበልሁ። ከበላሁና ካረፍሁ በኋላ ሁኔታውን የሚገልጽ ጥቂት መስመሮች ለሚስቱ እንድጽፍ አንድ ወረቀት ሰጠኝ። በምመለስበትም መንገድ በቺፕሳይድ ለእርሷ ለሚገባው ቀሪ ገንዘብ የገንዘብ ማዘዣ አውጥቼ በፖስታ ላክሁላት፤ ወደ ቤትም ስመለስ ኦምኒባሱ እስከሚያደርሰኝ ድረስ መሳፈሬ አሁን ፍጹም ተገቢ እንደ ሆነ ተሰማኝ።

በማግሥቱ ጠዋት እጅግ ተሽሎኝ፣ ልጨርሳቸው የሚገቡኝን ጥቂት ጉዳዮች ካከናወንሁ በኋላ፣ ያከመኝ ሐኪም ወደሚሠራበት የሕክምና ክፍል ሄድሁ፤ አጎቴ ሒሳቡን ለመክፈል ዝግጁ ቢሆንም፣ አሁን በእጄ ጥቂት ገንዘብ ስላለኝ ሒሳቡን ራሴ መጠየቅ እንደሚገባኝ ተሰምቶኝ ነበር። ደጉ ቀዶ ሐኪም ግን የሕክምና ተማሪ በመሆኔ ስላደረገልኝ ክትትል ምንም እንድከፍል አልፈቀደልኝም፤ ነገር ግን ኩዊኒን ሰጥቶኝ ስለ ነበር ለእርሱ ስምንት ሽልንግ ያህል እንድከፍል ፈቀደልኝ። ያን ከከፈልሁ በኋላ የቀረው ገንዘብ ወደ ቤቴ ለመሄድ ልክ የሚበቃ መሆኑን አየሁ፤ ነገሩ ሁሉ እግዚአብሔር ለእኔ ሲል ያደረገው አስደናቂ ጣልቃ ገብነት መሰለኝ።

ቀዶ ሐኪሙ ተጠራጣሪ እንደ ሆነ አውቅ ነበር፤ ስለዚህ ቅር ሳይለው ቢሆን በግልጽ ላነጋግረው እጅግ እንደምፈልግ ነገርሁት፤ ከእግዚአብሔር በታች ሕይወቴን ለደግ እንክብካቤው ባለ ዕዳ እንደ ሆንሁ፣ እርሱም ራሱ እኔ ያለኝ የዚያው የክብር እምነት ተካፋይ እንዲሆን ከልቤ እንደምመኝ ገለጽሁለት። ስለዚህ በለንደን ያለሁበትን ምክንያት፣ ሁኔታዬን፣ የአባቴንም ሆነ ምናልባት ከእርሱ ጋር ተያይዤ ወደ ቻይና የምሄድበትን ማኅበር ኃላፊዎች እርዳታ ለምን እንዳልተቀበልሁ ነገርሁት። እግዚአብሔር በቅርቡ በመግቦቱ ያደረገልኝን ነገር ነገርሁት፤ ወደ ገጠር እንድሄድ ባዘዘኝ ጊዜ፣ በፊተኛው ቀን፣ ፍላጎቴን ካልገለጽሁ በቀር — ይህንም ላለማድረግ ቆርጬ ነበር — ሁኔታዬ ምን ያህል ተስፋ ቢስ ይመስል እንደ ነበርም ገለጽሁለት። ያለፍሁበትን የአእምሮ ትግል ተረክሁለት፤ በእርግጥ ከሶፋው ተነሥቼ ወደ ቺፕሳይድ በእግሬ እንደ ሄድሁ ስጨምርበት ግን ባለማመን ተመለከተኝና፦ «የማይቻል ነው! እኔ እኮ ከሰው ይልቅ ምትሐት መስለህ በዚያ ተኝተህ ትቼህ ነበር» አለ። እኔም በእምነት በርትቼ ያን የእግር መንገድ በእርግጥ እንደ ሄድሁ ደጋግሜ ማረጋገጥ ነበረብኝ። የቀረልኝን ገንዘብና መክፈል የነበረብኝን ክፍያዎችም ነገርሁት፤ በመንገድ ለሚያስፈልገኝ ምግብና በመጨረሻ ለኦምኒባስ ጉዞ ጨምሮ ወደ ዮርክሻየር ወደ ቤቴ የሚያደርሰኝ ልክ በቂ ገንዘብ እንደ ቀረልኝም አሳየሁት።

ደጉ ወዳጄ ፈጽሞ ልቡ ተሰበረ፤ ዓይኖቹም እንባ አቅርረው፦ «እንደ አንተ ያለ እምነት ለማግኘት ዓለምን ሁሉ እሰጥ ነበር» አለ። እኔ በበኩሌ ያለ ገንዘብና ያለ ዋጋ እንደሚገኝ የመንገር ደስታ አገኘሁ። ከዚያ በኋላ ዳግመኛ አልተገናኘንም። ጤናዬንና ኃይሌን መልሼ አግኝቼ ወደ ከተማ ስመለስ፣ ስትሮክ ገጥሞት ወደ ገጠር እንደ ሄደ ሰማሁ፤ ቆይቶም ፈጽሞ እንዳላገገመ ተረዳሁ። በተወሰደ ጊዜ የነፍሱ ሁኔታ ምን እንደ ነበር ምንም ወሬ ማግኘት አልቻልሁም፤ ነገር ግን ያን ምስክርነት ለእግዚአብሔር የመስጠት አጋጣሚ በማግኘቴና አጋጣሚውንም በመጠቀሜ ሁልጊዜ እጅግ አመስጋኝ ሆኛለሁ። ጌታ ራሱ ከእኔ ጋር ባደረገው ነገር በኩል እየተናገረው እንደ ነበር፣ በሚበልጠውም አገር እንደገና እንደማገኘው ተስፋ ከማድረግ በቀር አልችልም። የራሴ አገልግሎት ባበቃ ጊዜ እርሱ ቢቀበለኝ ትንሽ ደስታ አይሆንም።

በማግሥቱ በውድ ወላጆቼ ቤት ነበርሁ። ጌታ ስለ ረዳኝና ስላዳነኝ የተሰማኝ ደስታ እጅግ ታላቅ ስለ ነበር ለራሴ ብቻ ይዤ ልቆይ አልቻልሁም፤ ወደ ለንደን ከመመለሴ በፊትም ውድ እናቴ ላለፈው ጊዜ ስኖርበት የነበረውን የሕይወቴን ምስጢር አወቀች። እንደገና ወደ ከተማ ስመለስ ከሕመሜ በፊት በነበረው የቍጠባ አኗኗር እንድኖር እንዳልተፈቀደልኝ — በእርግጥም እንዲያ ለመኖር ብቁ እንዳልነበርሁ — መናገር አያስፈልገኝም። አሁን ተጨማሪ ያስፈልገኝ ነበር፤ ጌታም አሟላልኝ።