የ«መውቃት» ስብከት

በጁን 1850 የአሌጌኒን ተራሮች ለሁለተኛ ጊዜ ተሻገርሁ። በጉዞው ላይ ክፉኛ ታመምሁ፤ ፒትስበርግ በደረስሁ ጊዜም ቀና ብዬ መቀመጥ እንኳ አልቻልሁም ነበር። ወዳጆቼ በኃይለኛ ትኩሳት ተይዤ ሲያገኙኝ ሐኪም ጠሩልኝ፤ ሕመሜ እየባሰ ስለ ሄደም ሌላ ሐኪም ደግሞ ጠሩ። ለሦስት ሳምንት በሕይወት እተርፋለሁ ብሎ ተስፋ ያደረገ አልነበረም፤ በመጨረሻ መሻል በጀመርሁ ጊዜም ጤናዬ ሙሉ በሙሉ እስኪመለስ ድረስ ብዙ ወራት ፈጀ። በዚህ ጽኑ መከራ ውስጥ ጸጋ በሚያስደንቅ ሁኔታ ደገፈኝ። ጌታ ይባረክ!

ለጤናዬ ይበጃል ተብሎ በኦሃዮ ወንዝ ወደ ታች እንድወርድ ተመከርሁ። ስለዚህ እንደ ቻልሁ ወዲያውኑ ወደ ሲንሲናቲ ተነሣሁ። በዚያም ጆንስ ከሚባሉ ወዳጆች ጋር ብዙ ሳምንታት ተቀመጥሁ። ጌታም እጅግ ስላበረታኝ በጥቂት ወራት ውስጥ ሥራዬን እንደ ገና ለመቀጠል ቻልሁ።

በኦክቶበር ወደ ኮሎምበስ ሄድን። በዚያና በአካባቢው ለተወሰነ ጊዜ አገለገልን፤ በተራዘመው የመነቃቃት ስብሰባችንም ቍጥራቸው ቀላል ያልሆነ ሰዎች ተለወጡ። በዚያ ቀድሞ የመቀደስን በረከት አግኝተው እንደ ነበር የተናገሩ፣ በዚያን ጊዜ ግን በልምምዳቸው ግልጽ ያልነበሩ ሦስት ሰዎች ነበሩ። ኦ፣ ለሙሉ መዳን የሚቆሙ ምንኛ ጥቂቶች ናቸው! አንዳንዶች ተቃውሞ በሌለበት ጊዜና ስፍራ እውነትን ሁሉ በአፋቸው ይመሰክራሉ፤ ነገር ግን ስለ እውነት ሲሉ ሞኞች መሆን ግድ ሲሆንባቸው ከስሕተት ጋር ይደራደራሉ። እንደነዚህ ያሉት ቅዱሳን በምድር ላይ ወደሚያገኙት ፍጹም ዕረፍትና ርስት አልደረሱም፤ አይደርሱምም።

በኤፕሪል 1851 ቺሊኮቲን ጎበኘን፤ በዚያም እጅግ የከበሩ ስብሰባዎች ነበሩን። በየሌሊቱ ብዙ ሕዝብ ይሰበሰብ ነበር፤ መሠዊያውም መዳናቸውን በጭንቀት በሚሹ ሰዎች ተጨናንቆ ነበር። የነጮቹ የባፕቲስት ቤተ ክርስቲያን አንዳንድ ዲያቆናት በቤተ ክርስቲያናቸው እንድሰብክ ጋበዙኝ፤ እኔ ግን ሴቶች መስበካቸውን አጥብቆ ይቃወም በነበረው በእረኛቸው ተቃውሞ ምክንያት እምቢ አልሁ። እርሱም ይህን ነገርና እንድሰብክ የፈለጉትን አባላት እጅግ ስለ ተቃወመ፣ አባላቱ የቤተ ክርስቲያን ጉባኤ ጠርተው በመጨረሻ እንዳሰናበቱት ሰማሁ።

የነጮቹ ሜቶዲስቶች እንድናገርላቸው ጋበዙኝ፤ ነገር ግን ጥቁሮች በስብሰባው እንዲገኙ አልፈለጉም። እኔ እንዲህ ያለውን ዝግጅት ልቀበል አልፈቀድሁም፤ ስለዚህም አልተናገርሁላቸውም። ጭፍን ጥላቻ የመቅደሳቸውን በር በዚያ ስፍራ በሚኖሩ ጥቁሮች ላይ ዘግቶ ነበር፤ ይህም በተግባር «ወንጌል ለሁሉ ነጻ አይሆንም» እንደ ማለት ነበር። ቸሩ ጌታችንና መድኃኒታችን ግን «ወደ ዓለም ሁሉ ሂዱ ወንጌልንም ለፍጥረት ሁሉ ስበኩ» ብሏል።

በኦሃዮ የምትገኘውን ዜንስቪልን ጎበኘን፤ በዚያም ለነጮችም ለጥቁሮችም አገለገልን። የነጮቹ ሜቶዲስቶች ጥቁሮች እንዲገቡ ቤታቸውን ለመጀመሪያ ጊዜ ከፈቱ። በየስብሰባው መግባት ያልቻሉ በመቶ የሚቈጠሩ ሰዎች ተመልሰው ይሄዱ ነበር፤ ቤቱም እንዲህ ተጨናንቆ ሳለ ፍጹም ሥርዓት ሰፍኖ ነበር። በወንዙም ማዶ ስብሰባዎችን አደረግን። በእነዚህ ስብሰባዎች ሁሉ እግዚአብሔር መንፈስ ቅዱስ በኃይል ተገለጠ። እኔም ብዙ ምሕረት ተቀበልሁ፤ በልዩ ልዩ መንፈሳዊ ትግሎችም አለፍሁ። በሁሉም ውስጥ የእግዚአብሔርን እጅ ማየት፣ ይበልጥ በሚያስፈልገኝም ጊዜ ሁሉ መለኮታዊ ርዳታን መጠየቅ ቻልሁ። ያስፈለገኝን ሁሉ በእምነት አገኘሁ። ክብር! ክብር!! እግዚአብሔር ሕያው እስከ ሆነና ኢየሱስ በቀኙ እስከ ተቀመጠ ድረስ፣ እምነትን በንጹሕ ሕሊና አጥብቄ ከያዝሁ የሚሳነኝ ነገር የለም።

በ27ኛው ቀን ሚሺጋን ወደምትገኘው ወደ ዲትሮይት ሄድን። በመንገድ ላይ እኅት ጆንሰን በጽኑ የወባ ትኩሳት ተያዘች፤ ሕመሙም ለብዙ ሳምንታት ቆየ። በዚህ ስፍራ ስሠራ ነፍሴ ለእግዚአብሔር ታላቅ ነጻነት ነበራት።

አንድ ቀን በአካባቢው እጅግ ተሰሚነት የነበረው፣ ነገር ግን ኃጢአተኛ የሆነ አንድ ሰው ሊጠይቀኝ መጣ፤ ስለ ነፍሱ ደኅንነትም በጥልቅ የተጨነቀ ይመስል ነበር። «የጽዮን ልጅ ሆይ፥ ተነሥተሽ ውቂ» ወዘተ ከሚለው ከሚክያስ 4:13 እንድናገር አጥብቆ ለመነኝ። ልመናውን ወደ ጌታ አቀረብሁ፤ ከዚያ ክፍልም በዚህ መንገድ እንድናገር ተፈቀደልኝ፦ ከክርስቶስ ልደት በፊት በ710 ዓመት በምሥራቃውያን ዘንድ እህል የሚወቃው በበሬዎች ወይም በፈረሶች ነበር፤ እነርሱም ያልታሰሩ ነዶዎች በተሞላ አውድማ ዙሪያ ይነዱ ነበር። ያለማቋረጥ በመርገጣቸውም እህሉ ከገለባው ይለይ ነበር። ይህም ይበልጥ በሚገባ ይከናወን ዘንድ ጥቅሱ በእነዚህ እንስሳት እግር ላይ ባለው የተፈጥሮ ቀንድ ላይ ጭማሪ እንደሚሰጥ ተስፋ ሰጠ፤ ቀንዱን ብረት፣ ሰኮናውንም ናስ በማድረግ።

እኛ ዘንድ ግን እህል በዚህ መንገድ አይወቃም፤ የሚወቃው በመውቂያ በትር ነው። ስለዚህ ጥቂቱን ቃላት በዘመናችን ይበልጥ በምናውቃቸው ቃላት ብለውጥ የጥቅሱን መንፈስ አልጎዳም ብዬ አስባለሁ። ክፍሉ የወንጌልን ዘመን ይስላል፤ በጠባብ ትርጉሙ ግን ለቃሉ ሰባኪዎች ይሠራል። ቢሆንም ተነሥተው እንዲወቁ ለታዘዙትና ለሚታዘዙት ለእግዚአብሔር ሕዝብ ሁሉ በቀጥታ ይናገራል። ለኢየሱስ ክብር ይሁን! ይህ ትንቢት አሁን ተፈጽሟል — ኢዮኤል 2:28-29። ደግሞም ቀንዳቸውን ብረት ሰኮናቸውንም ናስ በማድረግ ለሥራቸው ብቁ ሊያደርጋቸው ወደሚችለው ወደ እግዚአብሔር ብቻ እንዲሄዱ ታዝዘዋል። ጌታ ለታማኞቹ ከተፈጥሮ በላይ የሆነ ርዳታ በመስጠት፣ በራሳቸው ደካማና ያለ ርዳታ ኃይል ፈጽሞ ሊፈጽሙት የማይችሉትን አገልግሎት ለእርሱ እንዲፈጽሙ፣ ለራሱ መለኮታዊ ሥራ ጽናትንና ዘላቂነትን ሊሰጥ ወደደ። ከዚህም በላይ ቅዱሳን ለማጥቃትም ለመከላከልም የሚሆን የጦር መሣሪያ እንደ ተሰጣቸው ማወቃቸው ያበረታታቸዋል።

የመውቂያው መሣሪያ ከመጀመሪያው ዓይነት — ማለትም የማጥቂያ — ነው። ሕያው ከሆነውና ከሚሠራው፥ ሁለትም አፍ ካለው ሰይፍ ሁሉ ይልቅ የተሳለ ከሆነው ጋር አንድ ዓይነት ነው። «ስለዚህ የዲያብሎስን ሥራ እንዲያፈርስ የእግዚአብሔር ልጅ ተገለጠ»፤ ይህም ቸር ዓላማውን ለመፈጸም በሕዝቡ እጅ ከሚጠቀምባቸው የጦር መሣሪያዎች አንዱ ነው፤ ብዙ አሕዛብንም እንደሚያደቅቁ ተስፋ ተሰጥቷቸዋል። ኢሳይያስ 23:18፤ 60:6-9።

የወንጌል መውቂያ በተሳካ ሁኔታ የተሠራባቸው ብዙ ምሳሌዎች አሉ፤ በእርሱም ዲያብሎስ ከኃጢአተኞች ተወቅቶ ይወጣል። ኃጢአተኛ ሆይ፣ በእግዚአብሔር ርዳታ የዚህ መውቂያ የሚያቃጥል ምት ባልተዋረደችው ነፍስህ ላይ ምን እንደሚያደርግ ልሞክር ቈርጫለሁ። ይህም የመንፈስ ሰይፍ ይባላል፤ በእውነትም የእግዚአብሔር ቃል ነው።

እንዲህ ያለው የጦር መሣሪያ በሥጋዊ ሰው ዓይን የተናቀ ሊመስል ይችላል፤ ነገር ግን በኃይል ሲሠራበት ውጤቱ ሁልጊዜ ብርቱና ፈዋሽ ነው። እግዚአብሔር ይባረክ! የራእይ ጸሐፊው እንዲህ ይላል፦ «እነርሱም ከበጉ ደም የተነሣ ከምስክራቸውም ቃል የተነሣ ድል ነሡት፥ ነፍሳቸውንም እስከ ሞት ድረስ አልወደዱም።» ስርየት ከሁሉ የሚበልጥ የጦር መሣሪያ ነው። ኃይሉን በመፈተን ትንንሽ ልጆች ወላጆቻቸውን ምሕረት ለማግኘት ጮኸው እንዲለምኑ አድርገዋል፤ ነገር ግን በየትኛውም ሁኔታ የሰማያዊ ውበቱና የኃይሉ ብዙው ክፍል በሚሠራበት መንገድ ላይ የተመሠረተ ነው።

ይህ የወንጌል መውቂያ በደግና በፍቅር መንፈስ ሊነሣ ይገባዋል። ብዙዎች መውቂያውን ሲያዩ ይሸማቀቃሉ፤ ከእኛም አንዳንዶቻችን የሚያቃጥለው ምቱ በመንፈስ ቅዱስ ኃይልና መገለጥ ሲያርፍ ልብን ራሱ እንደሚያቈስልና እንደሚያሳምም በተባረከ ልምምድ እናውቃለን። ንስሐ የምትገባ ነፍስ ሆይ፣ ተግሣጹን ተቀበል፤ ከዚያም በኋላ እንዲህ ለማለት ትነሣሣለህ፦ «አሁን ልሰቀል፤ ይህም የዲያብሎስ ሥራ — በውስጤ ያደረው ኃጢአት — ይሙት፤ ክርስቶስ ያለ ተቀናቃኝ በውስጤ ይኑር ይንገሥም።»

ለዚህ ንግግር ጥቅሱን የሰጠኝ ያ ያልተለወጠ ሰው እኛ ከዲትሮይት ሳንወጣ ከሌሎች ብዙዎች ጋር ልቡን ለእግዚአብሔር እንደ ሰጠ ለእግዚአብሔር ክብር ልናገር እወዳለሁ። ከዓመታት በኋላም በደስታ እንደ ሞተ ተነገረኝ። ስለ ሙሉና ነጻ መዳን ጌታ ይመስገን! አንባቢ ሆይ፣ ይህ መዳን — ሁልጊዜ የሚፈስስ ምንጭ — በነፍስህ ውስጥ አለህን? እግዚአብሔር ይስጥህ። አሜን!