በልዩ ልዩ ስፍራዎች የተሠራ ሥራ

በ1849 ጁን 18 ቀን እናቴንና ቤተሰቤን ተሰናብቼ እንደ ገና ወደ ተልእኮዬ ተነሣሁ። በኒው ዮርክ ቆምሁ፤ በዚያም እኅት አን ኤም. ጆንሰን ተቀላቀለችኝ፤ የጉዞ ጓደኛዬም ሆነች። ወደ ፊላደልፊያ ሄድን፤ በዚያም ወንድም ሊና እኅት ሊ አስተናገዱን። እነዚያ የተወደዱና ደጋግ ወዳጆች በፍቅር ተቀበሉን። እኅት ጆንሰን ከመዘመር፣ ከመጸለይና ልምዷን ከመተረክ በቀር በሕዝብ ፊት ለማገልገል አልተነሣሣችም። እኔ በዚህች ከተማ ሳለሁ ከቤተ ክርስቲያን ወደ ቤተ ክርስቲያን እየሄድሁ ያለ ማቋረጥ አገለገልሁ።

በ28ኛው ቀን ወደ ስኖው ሂል ሄድን፤ በዚያም አንድ እሑድ አሳለፍን። ፌዘርስቪልን፣ ቦርደንታውንን፣ ዌስትቼስተርንና ዌስትታውንን ጎበኘን፤ ሁሉም ለእግዚአብሔር ክብር ሆነ። የተወደደው መንፈስ ቅዱስ በእነዚህ ስፍራዎች ሁሉ ሕዝቡን በሚያስደንቅ ሁኔታ ጎበኘ ማለት አለብኝ። ብዙዎች ተለወጡ፤ አልፎ አልፎም አንድ ሰው ወደሚያነጻው ምንጭ ይገባ ነበር።

ጁላይ 20 ቀን በበርሊንግተን፣ በትሬንተን፣ በፕሪንስተን፣ በራዌይ፣ በብረንስዊክና በኒውአርክ እየቆምን ወደ ኒው ዮርክ ተነሣን። በእያንዳንዱ በእነዚህ ስፍራዎች ብዙ ቀናት አሳለፍን፤ ይህም ለእኛ ታላቅ መጽናናት፣ ለአብያተ ክርስቲያናቱም በግልጥ የሚታይ ጥቅም ሆነ። ኦገስት 3 ቀን ኒው ዮርክ ከተማ ደረስን፤ በመርከብም ወደ ብሪጅፖርት (ኮነቲከት) ሄድን። በዚያ የነበረችውን ቤተ ክርስቲያን በአለማመን ምክንያት እጅግ በተናወጠ ሁኔታ አገኘናት። ቀጥሎም ወደ ኒው ሄቨን ሄድን፤ በዚያም ውድ ስብሰባዎች አደረግን። በሮድ አይላንድ ፕሮቪደንስም በሥራችን ላይ የእግዚአብሔርን በረከት ተቀበልን።

በዚህ ጊዜ አሁን የአፍሪካ ሜቶዲስት ኤፒስኮፓል ቤተ ክርስቲያን ኤጲስ ቆጶስ ከሆኑት ከቄስ ዳንኤል ኤ. ፔይን ባልቲሞርን እንድጎበኝ አጥብቆ የሚለምን ግብዣ ደረሰኝ፤ እኔም ተቀበልሁት። በዚያ በደረስን ጊዜ ነጻ ስለ መሆናችን በጥብቅ ተጠየቅን፤ ኮብላዮች ሆነን ብንገኝ ለመለየት እንዲያስችላቸውም በሰውነታችን ላይ ያሉ ምልክቶችን በጥንቃቄ መረመሩ። በዚያ ሳለን ከምንኖርባት ሴት ሴቶች ልጆች አንዲቱ ራሱን ጌታዋ ብሎ ከሚጠራው ሰው ኰብልላ ሄደች። እርሱም ከሌሎች ጋር ሆኖ በእኩለ ሌሊት ወደ እናቷ ቤት መጣ፤ ምንም ሳያስፈቅድ በሩን ሰብሮ ገባ፤ ልጅቱ በቤቱ ውስጥ ተሸሽጋለች ብሎ ማለ፤ ሞታም ሆነ በሕይወት እንደሚወስዳት ተናገረ። ይህንንም ለብዙ ሌሊቶች ደጋገሙ። ብዙ ጊዜ ወደ አልጋችን እየመጡ የሚፈልጓት ከእኛ ጋር እንደ ሆነች ለማየት መብራታቸውን በፊታችን ላይ ያበሩ ነበር። እናቲቱ በእርግጥ በታላቅ ጭንቀት ውስጥ ነበረች። ልጅቱን ከቶ መልሰው እንዳላገኟት አምናለሁ። ባርነት የተባለው ጭራቅ በሁሉም መልኩ ገና ያልሞተ ቢሆንም፣ አሁን እንዲህ ያለውን ውርደት መቀበል ስለሌለብን ለተወደደው ጌታ ምስጋና ይሁን።

በባልቲሞር ለተወሰነ ጊዜ ቆየን፤ በአብዛኛው በወንድም ፔይን ኃላፊነት ሥር ባለው ጉባኤ አገለገልን። ከዚያም ጉባኤያችን ወደሚካሄድበት ወደ ዋሽንግተን ዲ.ሲ. ሄድን። ስብሰባዎቹ እጅግ መልካም ነበሩ፤ ታላቅ በጎ ነገርም እየተሠራ ነበር፤ በዚያ ጊዜ ግን ጉባኤውን ሁሉ በሐዘን የሸፈነ አንድ ነገር ደረሰ። አንድ ቀን ብዙ አገልጋዮች፣ እኅት ጆንሰንና እኔ ከወንድሞች በአንዱ ቤት ምሳ እየበላን ሳለን፣ አንድ ባሪያ አሳዳሪ መጥቶ ያመለጠ ባሪያ ለማግኘት ቤቱን በረበረ። አንድ ሰው በሌላው ሰው ላይ ፍጹም ሥልጣን እንዲኖረው ማድረግ ምንኛ አስከፊ ነገር እንደ ሆነ ይበልጥ እየተረዳን ሄድን።

ለክርስቶስ እየሠራን በዋሽንግተን ጥቂት ሳምንታት ቆየን። በዚያ ጊዜ ሰይጣን በዚያ ስፍራ ፍጹም ገዥ የሆነ ቢመስልም፣ እግዚአብሔር ጽድቁ በብዙ ልቦች ውስጥ እየተመሠረተ እንደ ሆነ እንድናውቅ አደረገን። ለከበረው ስሙ ክብር ይሁን።

ያለፈው ዓመት አብዛኛው ክፍል የጽኑ ፈተና ጊዜ ነበረ፤ ሆኖም አንድን ዓመት በክርስቶስ ከዚያ ዓመት ይበልጥ በሙላት የዘጋሁበት ጊዜ እንዳለ አላስታውስም። መለስ ብዬ ስመለከተው ለራሴ ዝቅ ለማለትም ለማመስገንም ታላቅ ምክንያት አገኘሁ። ጌታ ከእኔ ጋር ባደረገው ነገር ረካሁ፤ ብዙዎች በቀኝና በግራ ወድቀው ሳሉ አእምሮዬ በሰላም ተጠበቀ፤ የቤዛውን ዓላማ ተሸክመው የሚቆሙ ጥቂቶች እንኳ በመትረፋቸው አመሰገንሁ።

ወደ መለኮታዊው ጌታዬ የወይን ቦታ መጀመሪያ ከገባሁበት ጊዜ ጀምሮ ብዙ ኮከብ ሲወድቅ፣ ብዙ የሚያበራ ብርሃንም ሲጠፋና ወደ ጨለማ ሲሰጥም አይቻለሁ። በእግዚአብሔር ዘንድ በተለየ ሁኔታ የተቀበሉና የተባረኩ ብዙዎች በፈተና ቀን ዓላማውን ትተው ሄደዋል፤ እኔ ግን በተትረፈረፈው ጸጋው ተጠብቄአለሁ። እኔን፣ እኔን እንኳ ከኃጢአት ሁሉ ለሚያነጻኝ ለደሙ ጠባቂ ኃይል ክብር ይሁን!