Sentensi Kuu Kuliko Zote Iliyopata Kuandikwa

“Mungu ni upendo.”—1 Yohana 4:8.

Somo langu ni sentensi kuu kuliko zote zilizopata kuandikwa. Bila shaka, sentensi hiyo imo katika Biblia. Sentensi zote kuu kuliko zote zimo katika Kitabu kile kimoja. Biblia ina namna ya kuweka katika sentensi moja zaidi ya yale ambayo waandishi wengine wanaweza kuyaweka katika kitabu kizima. Hata hivyo wapo watu ambao wangetuambia kwamba Biblia si Kitabu cha Mungu zaidi kuliko vitabu vingine. Ama hawajaisoma Biblia, ama wameisoma huku macho yao yamefumbwa.

Sentensi hii ina maneno matatu tu. Katika Kiingereza kila neno lina silabi moja tu. Neno moja lina herufi nne, jingine tatu, na jingine mbili tu; hata hivyo herufi hizi tisa, zinazounda maneno hayo matatu ya silabi moja, zimebeba kweli nyingi mno kiasi kwamba ulimwengu umekuwa ukiitafakari kwa karne kumi na nane, na bado haujaufikia kina chake. Vitabu vizima vimetolewa kwa ajili ya kuifafanua sentensi hii ya ajabu—maelfu ya vitabu.

1 Yohana 4:8, “Mungu ni upendo.” Hiyo ndiyo sentensi kuu kuliko zote zilizopata kuandikwa. Sentensi hiyo ndiyo kiini cha mikutano hii ya injili inayoanza leo. Kila kitu mtakachosikia katika wimbo au katika neno kwa muda wa majuma manne yajayo katika mikutano hii kinazunguka kweli ile moja kuu, “Mungu ni upendo.” Hiyo inajumlisha yaliyomo yote ya Biblia. Kama ningeombwa sentensi ya kuchapisha kwa herufi za dhahabu nje ya jalada la Biblia yetu, sentensi inayojumlisha yaliyomo yote ya Kitabu hicho, ingekuwa hii, “Mungu ni upendo.” Hilo ndilo somo la sura ya kwanza ya Mwanzo, ndilo somo la sura ya mwisho ya Ufunuo, na ndilo somo la kila sura iliyo kati yake.

Biblia ni hadithi ya upendo wa Mungu tu, hadithi ya upendo wa Mungu aliye mtakatifu kwa ulimwengu wenye dhambi. Hilo ndilo jambo la kushangaza kuliko yote katika Biblia. Watu hutuambia kwamba Biblia imejaa mambo yasiyowezekana kuaminiwa. Mimi sijui jambo jingine lisilowezekana kuaminiwa kama hili, kwamba Mungu mtakatifu aupende ulimwengu wenye dhambi, na awapende watu kama wewe na mimi, kama Biblia isemavyo kwamba anawapenda. Lakini ingawa ni vigumu kuliamini, ni kweli. Kuna nguvu kuu katika sentensi hiyo moja fupi, nguvu ya kuuvunja moyo ulio mgumu kuliko yote, nguvu ya kuwafikia wanaume na wanawake mmoja mmoja waliozama chini katika dhambi, na kuwainua juu hata wafae kupewa nafasi kando ya Bwana Yesu Kristo juu ya Kiti cha Enzi.

Bw. Moody alipoanzisha kanisa lile la Chicago ambalo mimi ni mchungaji wake, alikuwa na shauku kubwa mno kwamba kila mtu aisikie kweli hii moja daima, na aliogopa sana kwamba huenda mhubiri fulani angekuja akasahau kuieleza, hata akaiandikisha kwa taa za gesi juu kabisa ya mimbari, ili kitu cha kwanza ambacho ungekiona ukiingia humo jioni kiwe andiko lile likiangaza kwa herufi za moto.

Usiku mmoja wa dhoruba, kabla ya wakati wa mkutano, mlango ulikuwa wazi kidogo. Mtu mmoja aliyekuwa amelewa kiasi aliuona wazi, akafikiri kwamba angeweza kuingia apate joto. Hakujua ni mahali pa namna gani, lakini alipousukuma mlango ukafunguka aliliona andiko likiwaka, “Mungu ni upendo.” Akauvuta mlango ukafungwa, akaondoka akijinung’unikia. Akasema, “Mungu si upendo. Kama Mungu angekuwa upendo, angenipenda mimi. Mungu hampendi mtu duni kama mimi.” Lakini liliendelea kuwaka likishuka ndani ya nafsi yake, “Mungu ni upendo! Mungu ni upendo! Mungu ni upendo” Baada ya muda alirudi nyuma, akaingia na kuketi pembeni. Bw. Moody aliposhuka baada ya mkutano, alimkuta mtu yule akilia kama mtoto. “Kuna nini?” akauliza. “Ni nini katika mahubiri kilichokugusa?” “Sikusikia hata neno moja la mahubiri yako.” “Basi, kuna nini?” “Andiko lile pale juu.” Bw. Moody aliketi, na kutoka katika Biblia yake akamwonyesha njia ya uzima, naye akaokoka.

Natumaini litaivunja mioyo ya baadhi yenu. Sitawaambia ninavyofikiri mimi juu ya upendo wa Mungu. Nitawapa maneno ya wazi ya Biblia juu yake. Wapo watu wanaoanza na andiko hili kama msingi, kisha wanajenga juu yake jengo la makisio linalopingana na mafundisho ya wazi ya Kitabu kile kile ambacho kutoka kwake wamelitwaa jiwe lao la msingi. Basi, hakuna kitu kinachoweza kuwa kinyume cha akili kuliko hicho. Mojawapo ya mambo mawili kwa hakika ni kweli. Ama Biblia ni kweli, ama si kweli. Kama Biblia si kweli, hatuna ushahidi kwamba Mungu ni upendo, hivyo mipango yote hii ya Kiuniversalisti, iliyojengwa juu ya msingi kwamba “Mungu ni upendo,” inabomoka. Kama Biblia ni kweli, mipango hii inayopingana na mafundisho yake ya wazi ni ya uongo. Mwaweza kushika upande wowote wa tatizo hili mpendao. Upande wowote mtakaoushika, Uuniversalisti huu usio na kina wa siku hizi unabomoka.

Biblia inatuambia nini juu ya jinsi Mungu anavyoonyesha upendo wake?

1. Kwamba Mungu Huonyesha Upendo Wake kwa Kusamehe Dhambi.—Isaya 55:7: “Mtu mbaya na aache njia yake, na mtu asiye haki aache mawazo yake; na amrudie Bwana, naye atamrehemu; na arejee kwa Mungu wetu, naye atamsamehe kabisa.” Mungu anatuambia waziwazi katika Neno lake kwamba yu radhi kumsamehe mwenye dhambi yeyote aliye hai, haijalishi amezama chini kiasi gani, ikiwa tu atageuka kuiacha dhambi na kumgeukia Yeye; naye atamsamehe papo hapo afanyapo hivyo. Bila shaka, Mungu hawezi kumsamehe mtu wakati angali anaishikilia dhambi yake, na bado aidumishe tabia yake mwenyewe ya kimaadili.

Nina mvulana. Nampenda mvulana huyo, na ningetoa mengi ili nimwone sasa hivi. Naamini hakuna jambo ambalo mvulana huyo angeweza kulitenda ambalo, kama angetubu na kuliacha, nisingemsamehe. Lakini nisingeweza kumsamehe kama angeendelea kuishikilia njia yake mbaya. Ningeweza kuendelea kumpenda na kutafuta kumwokoa, lakini nisingeweza kumsamehe. Na Mungu hawezi kutusamehe, na kubaki alivyo—Mungu mtakatifu—mpaka tuwe tayari kuiacha dhambi yetu. Lakini dakika ile tuwapo tayari, ataturehemu, naye atatusamehe kabisa. Kama mwanamume au mwanamke mwovu kuliko wote katika Edinburgh angekuwa ameingia hapa usiku huu—nami natumaini wameingia—na angegeuka hapa sasa hivi kuiacha dhambi, dakika ile ile wafanyapo hivyo, Mungu angefuta kila dhambi waliyopata kuitenda.

Nilimjua milionea mmoja katika Jiji la New York aliyeipa kisogo biashara yake yote na kazi ya kutafuta fedha ili awaokoe wanaopotea. Alipokuwa akipita katika mojawapo ya mitaa usiku mmoja, mwanamke mmoja maskini alitoka katika pango la aibu lililo chini ya ardhi, akapiga kite alipokuwa akipita. Rafiki yangu alimkaribia akamweleza habari za upendo wa Mungu. Mwanzoni hakutaka kuamini, lakini alimshawishi kwamba Mungu alimpenda. Akampa mahali pa kukaa. Hakuishi muda mrefu—miaka miwili hivi tu—lakini kabla hajafa, Nellie Conroy alisimama mbele ya kusanyiko kubwa katika Cooper State, akawaeleza jinsi Mungu alivyomwokoa. Machozi yalikuwa yakitiririka katika nyuso za wote. Muda mfupi baadaye alikuwa amelala akikaribia kufa, na rafiki yangu alipoingia chumbani, alisema: “Mjomba Charlie—hakuwa mjomba wake, lakini alimwita hivyo kwa sababu ya upendo aliokuwa nao kwake “Hivi karibuni, baada ya saa chache, nitamwona Florence mdogo, nami nitamwona Yesu.” Na Nellie Conroy, mwenye dhambi aliyesamehewa na kuoshwa kwa damu, alipanda juu kwenda kumtazama Mfalme. Hakuna mwanamume wala mwanamke katika Edinburgh ambaye Mungu hatamwokoa dakika ile ile wageukapo kuiacha dhambi yao.

2. Mungu Huonyesha Upendo Wake kwa Kuitilia Maanani Dhambi, na Kuiadhibu.—Waebrania 12:6: “Maana yeye ambaye Bwana ampenda, humrudi, naye humpiga kila mwana amkubaliye.” Watu hudhani kwamba Mungu ataiacha dhambi iendelee bila kuzuiwa, bila kukemewa, bila kuadhibiwa. “Mungu ni upendo” na kwa hiyo huitilia maanani dhambi na kuiadhibu. Wapo akina baba walio na ubinafsi kiasi kwamba hawawaadhibu watoto wao inapobidi kwa faida yao. Inawaumiza hisia zao, kama inavyowaumiza akina baba wote wa kweli; nao wana ubinafsi kiasi kwamba wanaitoa kafara hali njema ya watoto ili kuziepusha hisia zao wenyewe. Huo si upendo bali ni ubinafsi uliopita kiasi.

Mmoja wa watoto wangu aliniasi. Nikajiambia, “Mtoto huyo lazima aadhibiwe.” Lo, jinsi nilivyojitahidi kutafuta njia ya kuepuka, lakini sikuweza. Nilijua kwamba kwa ajili ya faida kuu ya mtoto, adhabu ilipaswa kutolewa, na mtoto akaadhibiwa. Niliumia zaidi sana kuliko mtoto, lakini nilimpenda mtoto kiasi cha kuzitoa kafara hisia zangu kwa ajili ya faida ya mtoto. Mungu huumia wewe na mimi tuadhibiwapo; lakini anatupenda sana, hata tunapohitaji kuteseka Yeye mwenyewe ndiye hutuletea mateso hayo.

Bwana mmoja ambaye nilikuwa nikikaa kwake aliniambia siku moja, “Ungependa tutoke kwa gari tukatembee?” Tulitoka tukaenda makaburini, tukafika mahali palipokuwa na makaburi matatu. Moja lilikuwa refu; lilikuwa la mtu mzima, na ndani yake alizikwa mkewe. Katika yale makaburi mawili mafupi ilikuwamo miili ya binti zake wawili, ndio wote aliokuwa nao isipokuwa mtoto mchanga wa kiume. Tulipiga magoti tukaomba kando ya makaburi. Tulipokuwa tukirudi mjini kwa gari, bwana yule alisema, “Namhurumia mtu ambaye Mungu hajamrudi.” Alimaanisha nini? Alimaanisha kwamba alikuwa mtu wa kidunia, mtu mnyofu, lakini si Mkristo. Usiku mmoja aliporudi nyumbani mkewe alisema, “Porter, mmoja wa watoto ni mgonjwa.” Baada ya siku chache alikuwa baridi, amekufa; na, alipokuwa amelazwa jenezani, alipiga magoti akamwahidi Mungu kwamba atamkubali Kristo kuwa Bwana na Mwalimu wake. Lakini alimwongopea Mungu, akasahau kabisa azimio lake. Muda fulani baadaye alirudi nyumbani tena, na mkewe akasema, “Porter, yule mtoto mwingine ni mgonjwa.” Baada ya siku chache naye pia alilala baridi, amekufa. Kwa mara nyingine tena alipiga magoti akamwahidi Mungu kwamba atakuwa Mkristo, na kulishika neno lake. Furaha zote za maisha zilizo takatifu zaidi, za ndani zaidi, na safi zaidi zilikuwa zimetokana na huzuni yake kuu.

Je, uko katika huzuni? Ni kwa sababu Mungu anakupenda. Je, wapo hapa wengine wanaopinga maombi ya rehema na neema ya Mungu? Nawasihi mtubu. Natetemeka kwa ajili ya wanaume na wanawake fulani, kwa ajili ya wale wanaoijua njia ya uzima, ambao Mungu anashindana nao kwa Roho wake Mtakatifu, lakini hawataki kuja kwake. Natetemeka kwa ajili yao, kwa sababu najua kwamba Mungu anawapenda. Mnadhani hiyo ni sababu ya ajabu sana ya kumtetemekea mtu. La, najua Mungu anakupenda, tena anakupenda kiasi kwamba, ikiwa hawezi kukuleta kwa njia nyingine yoyote, atakuleta kwa huzuni na maumivu ya moyo.

Rafiki yangu mmoja huko Chicago, Kanali Clark, alitumia mali yake yote kuwaokoa waliopotea. Alikwenda kila usiku kuhubiri Injili katika kituo cha misheni. Palikuwa na mtu mmoja aliyekuwa akihudhuria na kuyapinga maombi ya rehema ya Mungu kwa muda mrefu; na usiku mmoja alipokuwa akipita Kanali Clark alisema, “George, usipoiacha dhambi upesi, naamini Mungu atakuondolea mkeo na mtoto wako, na atakufungia gerezani.” Mtu yule alikasirika sana, akasema, “Kanali Clark, shughulika na mambo yako; nami nitashughulika na yangu.” Mwezi mmoja tangu usiku ule George aliamka sakafuni katika Gereza la Rochester. Mkewe alikuwa amekufa, mtoto wake alikuwa ameondolewa kwake ili awekwe mikononi mwa watu bora kuliko yeye. Papo hapo alimpokea Kristo kuwa Mwokozi wake, na sasa yeye ni mhubiri wa Injili. Kumbuka, Mungu anakupenda, na “yeye ambaye Bwana ampenda, humrudi.”

3. Mungu Huonyesha Upendo Wake kwetu kwa Kutuhurumia.—Isaya 63:9: “Katika mateso yao yote aliteswa naye.” Hiyo ni mojawapo ya sentensi za ajabu za kitabu hiki. Nabii anazungumza habari za wana wa Israeli. Mateso yao yalikuwa ya kutisha, tena yalikuwa matokeo ya moja kwa moja ya dhambi yao wenyewe, hukumu iliyoletwa na mkono wa Mungu, na hata hivyo nabii alisema kwamba Mungu aliteseka pamoja nao katika huzuni yao. Ni kweli. Hakuna mwanamume wala mwanamke hapa aliye katika taabu ambaye Mungu hamhurumii. Huenda taabu hiyo imekujia kwa njia yoyote ile, lakini ukiwa na taabu yoyote Mungu anakuhurumia katika taabu hiyo.

Baadhi yenu huenda mnajua ilivyo kuwa na mtoto mgonjwa kwa muda mrefu. Mwanzoni rafiki walikuja wakakuhurumia, lakini huruma yao imepoa; na, ulipokuwa ukikesha mchana na usiku kando ya uhai ule unaofifia umesema: “Hakuna anayenihurumia.” La, yupo. Mungu anakuhurumia. Wapo wanaume na wanawake walio na huzuni ya namna ambayo hawawezi kuieleza sikio la mwanadamu yeyote; nao husema: “Hakuna anayeijua. Hakuna anayenihurumia.” La, yupo Mmoja anayeijua, naye anakuhurumia—Mungu.

4. Mungu Huonyesha Upendo Wake kwa Vipawa Vyake.—Siwezi kukaa sana juu ya jambo hilo. Nataka tu kusema juu ya kipawa kimoja. 1 Yohana 3:1, 2: “Tazameni, ni pendo la namna gani alilotupa Baba, kwamba tuitwe wana wa Mungu.” Lo, kipawa hicho cha ajabu ambacho Mungu ametujalia wewe na mimi, kwamba wanaume na wanawake kama sisi tuitwe watoto wa Mungu! Lo, upendo ulioje! Tuseme siku ya kutawazwa kwake Mfalme Edward, baada ya sherehe zote kwisha, angepanda gari lake la kifalme, na kwenda hadi East End ya London, akamwona mvulana fulani aliyevaa matambara, duni, mwenye kukufuru, asiye na elimu kabisa na aliyeharibika kimaadili. Tuseme moyo wake mkuu wa upendo ungemwendea mvulana yule, na, akimkaribia yule mzururaji maskini, angesema: “Nakupenda. Nitakupeleka katika gari langu hadi ikulu. Nitakuvika mavazi yanayomfaa mwana wa mfalme, nawe utajulikana kama mwana wa Mfalme Edward wa Saba.” Je, lisingekuwa jambo la ajabu? Lakini lisingekuwa la ajabu kama hili, kwamba Mungu aliye mtakatifu pasipo kikomo atutazame chini wewe na mimi katika uchafu wetu na matambara yetu na upotovu wetu, na kwamba atupende hivyo hata atujalie kuitwa wana wa Mungu.

5. Mungu Huonyesha Upendo Wake kwa Dhabihu Aliyoitoa kwa ajili Yetu.—Dhabihu; hatimaye hicho ndicho kipimo kikuu cha upendo. Watu watakuambia kwamba wanakupenda, lakini huwezi kujua kama kweli wanakupenda mpaka nafasi ifike ya wao kujitolea dhabihu kwa ajili yako. Nina rafiki mmoja chuoni. Tulithaminiana sana; lakini sikujua jinsi alivyonipenda. Miaka mingi baadaye, usiku mmoja nilipokuwa safarini nikihubiri, rafiki huyu alifika nyumbani kwangu akaanza kuzungumza na mke wangu. Aliuliza maswali mengi ya kudadisi, na hatimaye akampata aseme kwamba nilikuwa katika hali ambayo nilihitaji dola elfu moja na mia tano. Hakusema zaidi wakati ule, lakini siku iliyofuata alinijia akasema: “Unafikiri kufanya hivi na hivi.” “Ndiyo.” “Hilo linagharimu fedha!’ “Nina mpango wa kuzipata.” “Ni upi?” “Nina mipango.” “Basi, ni ipi?” Sikudhani kwamba ni shauri lake, lakini hatimaye nilimwambia. Akasema: “Haitafanikiwa hata kidogo. Sikiliza. Niruhusu tu nikupe dola hizo elfu moja na mia tano!” “Basi,” nikasema, “sitamruhusu mtu yeyote anipe dola elfu moja na mia tano.” “Lo, waweza kuzirudisha.” “Sijui juu ya hilo.” “Nitajihatarisha.” Alisisitiza, wala hakukubali “La” kuwa jibu; alinipa dola zile elfu moja na mia tano, nami nimezirudisha, lakini yeye hakujua kwamba ningezirudisha. Hapo nilijua kwamba mtu yule alinipenda. Mungu amethibitisha upendo wake. “Mungu aliupenda ulimwengu hata akatoa”—akatoa nini?—Mwanawe pekee”—kilicho bora alichokuwa nacho, kipenzi cha upendo wake wa milele—akamtoa ateseke na kufa juu ya msalaba ule katili kwa ajili yako na mimi.

Mungu aliutazama chini ulimwengu huu uliopotea, akakutazama wewe na mimi. Aliona kwamba kulikuwa na gharama moja tu ambayo ingetuokoa; wala hakusita mbele ya dhabihu ile. Maana “jinsi hii Mungu aliupenda ulimwengu, hata akamtoa Mwanawe pekee, ili kila mtu amwaminiye asipotee, bali awe na uzima wa milele.” Hilo ndilo jambo la kushangaza kuliko yote katika Biblia. Wewe na mimi wakati mwingine tunatafakari upendo wa Kristo, kwa kuiacha Mbingu kwa ajili yetu. Tunamtazama katika ua wa Pilato, amefungwa kwenye nguzo ya kuchapia, mgongo wake ukiwa wazi kwa mjeledi wa askari wa Kirumi. Tunamtazama mjeledi ukiukata mgongo wake tena na tena, na tena, mpaka umeraruka wote na kuvuja damu. Lo, jinsi anavyotupenda! Lakini akitazama chini kutoka kiti kile cha enzi mbinguni alikuwako Mungu; na kila pigo la mjeledi lililoukata mgongo wa Kristo liliukata moyo wa Mungu. Tunawaona askari wakiwa na taji ya miiba, wakiikandamiza juu ya kipaji chake, na tunaiona damu ikitiririka chini. Lo, jinsi alivyotupenda! Lakini kila mwiba uliochoma kipaji chake uliuchoma pia moyo wa Mungu.

Katika giza la jioni la siku ile ya kutisha tunamwona msalabani. Tunasikia kilio cha mwisho, “Mungu wangu, Mungu wangu, mbona umeniacha?” Tunaona jinsi alivyotupenda. Lakini kule, akitazama chini kutoka kiti cha enzi cha nuru na utukufu, alikuwako Mungu; na kila msumari uliotoboa mikono na miguu yake uliutoboa moyo wa Mungu, kwa sababu alikupenda wewe, na wewe, na wewe, kila mmoja wenu. “Kwa maana jinsi hii Mungu aliupenda ulimwengu, hata akamtoa Mwanawe pekee.” Lo, lilikuwa jambo la ajabu! Mtafanya nini juu ya upendo huu?

Wakati mmoja nilisikia hadithi iliyonipa mwono wa upendo wa Mungu ambao sikuwahi kuwa nao kabla. Sijui kama ni ya kweli au la. Mtu mmoja aliwekwa kulinda daraja la reli linalofunguka juu ya mto. Alilifungua akaziacha meli zipite. Akasikia filimbi ya gari moshi likija kwenye reli, akarukia wenzo ili kulirudisha daraja mahali pake, na alipokuwa akifanya hivyo kwa bahati mbaya alimsukuma mvulana wake mtoni. Akasikia kilio, “Baba, niokoe; ninazama.” Afanye nini? Mtu yule alisimama mahali pake pa wajibu, akalirudisha daraja ili gari moshi lipate kupita salama. Kisha akaruka mtoni kumwokoa mvulana wake, lakini ilikuwa imekwisha kuchelewa. Alimtoa kafara mvulana wake ili atimize wajibu wake. Niliposikia hadithi ile nilijiuliza, kama angekuwa mvulana wangu, ningefanya nini. Mtu yule alikuwa na deni kwa wale waliokuwa katika gari moshi, deni la kufanya alichofanya. Mungu hakuwa na deni lolote kwako wala kwangu. Tulikuwa waasi wenye hatia dhidi yake, lakini “jinsi hii Mungu aliupenda ulimwengu, hata akamtoa Mwanawe pekee, ili kila mtu amwaminiye asipotee, bali awe na uzima wa milele.”

Mtafanya nini na upendo wake? Mtaupokea, au mtaukanyaga chini ya miguu? Mpokeeni Kristo, nanyi mnaupokea upendo huo; mkataeni Kristo, nanyi mnaukanyaga upendo huo chini ya miguu. Siwezi kuelewa jinsi mwanamume au mwanamke yeyote mwenye akili timamu awezavyo kuufanya moyo wake kuwa mgumu dhidi ya upendo wa Mungu.

Nakumbuka usiku mmoja mwishoni mwa ibada yetu tulikuwa na mkutano wa baadaye. Waimbaji walikuwa bado wameketi, na mwimbaji mkuu wa sauti ya juu alikuwa hajaokoka—msichana wa kidunia kabisa. Mama yake alisimama katika mkutano, akasema, “Ningependa mniombee binti yangu.” Sikugeuka kutazama, lakini nilijua moyoni jinsi msichana yule alivyoonekana wakati ule. Nilihakikisha nakutana naye alipokuwa akitoka, nikasema, “Habari za jioni, Cora.” Macho yake yalimeta kwa hasira na mashavu yakawaka; alikuwa amekasirika sana. Akasema, “Mama yangu angepaswa kujua vizuri zaidi. Anajua kwamba itanifanya tu kuwa mbaya zaidi.” Nikasema, “Keti”; nikafungua Isaya 53:5: “Bali alijeruhiwa kwa makosa yetu, alichubuliwa kwa maovu yetu; adhabu ya amani yetu ilikuwa juu yake, na kwa kupigwa kwake sisi tumepona.” Sikusema neno jingine. Halikuhitajika. Hasira ilitoweka katika macho yale, na machozi ya moto ya toba yakatiririka mashavuni mwake. Siku iliyofuata nilisafiri, na niliporudi mtu mmoja alisema, “Cora ni mgonjwa.” Nilimkuta mgonjwa sana, lakini akifurahi katika Yesu. Siku chache baadaye kaka yake alikuja akasema, “Tunadhani Cora anakufa.” Nilikwenda mara moja, nikatazama uso uliopauka kuliko yote niliyopata kuona. Hakuwa amefumbua macho yake asubuhi yote; lakini, baada ya mimi kumaliza kuomba, yakatoka katika midomo ile—bado bila kufumbua macho yake—maombi ya ajabu kuliko yote niliyopata kusikia. Alimshukuru Mungu kwa kumtoa Mwanawe afe kwa ajili yake. Alimweleza jinsi alivyotamani kuishi ili aimbe kwa utukufu wake, kama alivyokuwa ameimba zamani kwa ajili yake mwenyewe; lakini “kama si mapenzi yako kwamba niishi na kuimba kwa ajili ya Kristo, nitafurahi kuondoka na kuwa pamoja na Kristo.” Naye aliondoka kweli, akiwa na moyo ulioshindwa, uliogeuzwa, na upendo wa Mungu. Mtafanya nini na upendo wa Mungu?

Nina hapa hadithi niliyoikata kutoka gazeti la leo. Bi. Bottome, wa Jiji la New York, anasema kwamba alikuwa na rafiki wakati wa ujana wake ambaye alimpoteza kabisa kwa miaka kumi na minane. Aliporudi New York alikuwa akipita katika mtaa mmoja, na juu katika dirisha la ghorofa ya pili akauona uso wa rafiki yake, ukizungukwa na nywele zilizokwisha kuwa mvi kabla ya wakati wake. Alikimbia hadi mlangoni mwa nyumba akamwambia mjakazi, “Mpelekee bibi yako kadi hii.” “Hayupo nyumbani,” likawa jibu. “Lo, yupo: nimemwona dirishani”; na Bi. Bottome akampita mjakazi mbio hadi juu chumbani, nao wakakumbatiana. “Umekuwa wapi miaka yote hii?” Bi. Bottome akauliza. Jibu lilikuwa, “Njoo katika chumba kile kingine, nami nitakuonyesha.” Katika chumba kilichopambwa kwa fahari kubwa aliketi mvulana punguani wa miaka kumi na saba, asiyeweza kuongea vizuri—punguani anayetokwa na mate. Mama yake akasema “Wajibu wangu uko hapa, pamoja na mvulana wangu mpendwa.” Bi. Bottome anasema kwamba katika dakika ya kutofikiri aliuliza, “Unawezaje kuvumilia hali hii? Sishangai kwamba una mvi kabla ya wakati.” “Nilijua hutaelewa upendo wangu kwa mvulana wangu mtamu,” akasema rafiki yake aliyechukizwa. “Si mzigo, si shida, kuishi na kumhudumia mvulana wangu; na kama, siku moja, atatoa tu ishara moja kwamba ananitambua kuwa mama yake, nitajiona nimelipwa kwa miaka yote ya upendo niliyoumwaga juu yake.”

Huo ulikuwa mfano hafifu tu wa upendo wa Mungu. Mtafanya nini na upendo huu wa Mungu? Mvulana yule hakuulipa upendo wa mama yake; kwa maana, kama Bi. Bottome asemavyo, alikuwa punguani wala hakujua vizuri zaidi. Ninyi si mapunguani. Mnaujua upendo wa Mungu: mtaulipaje?