Njia Iliyo Njema ya Kuja Mbele za Bwana

“Nimwendee Bwana na nini, na kuinama mbele za Mungu aliye juu? Je, nimwendee na sadaka za kuteketezwa, na ndama wa umri wa mwaka mmoja? Je, Bwana atapendezwa na maelfu ya kondoo waume, au na makumi elfu ya mito ya mafuta? Je, nimtoe mzaliwa wangu wa kwanza kwa ajili ya kosa langu, mzao wa mwili wangu kwa ajili ya dhambi ya roho yangu? Ee mwanadamu, amekuonyesha yaliyo mema; naye Bwana anataka nini kwako, ila kutenda haki, na kupenda rehema, na kwenda kwa unyenyekevu na Mungu wako?”

Fundisho.—Njia iliyo njema ya kuja mbele za Bwana.

Swali la nafsi iliyoamshwa.—“Nimwendee Bwana na nini?” Mtu ambaye hajaamshwa kamwe haulizi swali hilo. Mtu wa asili hana hamu ya kuja mbele za Mungu, wala ya kuinama mbele za Mungu aliye juu. Hapendi kumfikiri Mungu. Afadhali afikiri jambo lingine lo lote. Husahau upesi yale anayoambiwa kuhusu Mungu. Mtu wa asili hana kumbukumbu kwa mambo ya Mungu, kwa sababu hana moyo kwa ajili yake. Hana hamu ya kuja mbele za Mungu katika maombi. Hakuna kitu ambacho mtu wa asili hukichukia kuliko maombi. Afadhali sana atumie nusu saa kila asubuhi katika mazoezi ya mwili au katika kazi ngumu, kuliko kuwa mbele za Mungu. Hana hamu ya kuja mbele za Mungu atakapokufa. Anajua kwamba ni lazima atasimama mbele za Mungu, lakini jambo hilo halimpi furaha yo yote. Afadhali atoweke kabisa; afadhali asiuone kamwe uso wa Mungu. Aa! rafiki zangu, je, hii ndiyo hali yenu? Hakika mnaweza kujua kwamba mnayo “nia ya mwili iliyo uadui juu ya Mungu.” Mko kama Farao—“Bwana ni nani, hata nimtii?” Mnamwambia Mungu, “Ondoka kwangu, kwa maana sitaki kuzijua njia zako.” Ni hali ya kutisha kama nini kutokuwa na hamu yo yote kwake yeye aliye chemchemi ya maji ya uzima!

Nafsi iliyoamshwa huhisi kwamba furaha yake kuu iko katika kuja mbele za Mungu. Hii ilikuwa furaha ya Adamu kabla hajaanguka. Alijiona kama mtoto chini ya jicho la Baba mwenye upendo. Ilikuwa furaha yake kuu kuja mbele za Mungu—kupendwa naye—kuwa kama chembe ya vumbi katika mwale wa jua—kuota daima katika mwanga wa jua wa upendo wake—pasipo wingu wala pazia katikati. Hii ndiyo furaha ya malaika watakatifu, kuja mbele za Bwana, na kuinama mbele za Mungu aliye juu. Mbele za uso wake kuna furaha tele. “Malaika sikuzote hutazama uso wa Baba yangu.” Katika kila safari ya upendo wanayoiruka, bado huhisi kwamba jicho lake la upendo li juu yao—hii ndiyo furaha yao ya kila siku, ya kila saa. Hii ndiyo furaha ya kweli ya mwamini. Msikieni Daudi (Zaburi 42), “Kama ayala aioneavyo shauku mito ya maji, ndivyo nafsi yangu ikuoneavyo shauku wewe, Ee Mungu: nafsi yangu inamwonea kiu Mungu, Mungu aliye hai: lini nitakuja nionekane mbele za Mungu?” Haoni shauku ya vipawa vya Mungu—si fadhili zake wala faraja zake—bali yeye mwenyewe. Mwamini humtamani Mungu—kuingia mbele zake—kuuhisi upendo wake—kujihisi karibu naye sirini—kuhisi, katikati ya umati, kwamba yeye yu karibu zaidi kuliko viumbe vyote. Aa! ndugu wapendwa, je, mmewahi kuionja heri hii? Kuna pumziko na faraja kubwa zaidi ya kupatikana mbele za Mungu kwa saa moja, kuliko katika milele nzima ya kuwa mbele za mwanadamu. Kuwa mbele zake—chini ya upendo wake— chini ya jicho lake—ndiyo mbingu, po pote ilipo. Mungu aweza kukufanya mwenye furaha katika hali yo yote. Pasipo yeye, hakuna kiwezacho.

Nafsi iliyoamshwa huona vikwazo njiani. “Na nini,” n.k. Kuna vikwazo viwili vikubwa.

1. Asili ya mwenye dhambi.—“Nimwendee Bwana na nini,” n.k. Mungu anapoiamsha nafsi kweli kweli, humwonyesha mtu ubaya na uchukizo wa nafsi yake mwenyewe. Huyaelekeza macho yake ndani. Humwonyesha kwamba kila fikira ya moyo wake imekuwa mbaya tu siku zote; kwamba kila kiungo cha mwili wake amekitumia katika utumishi wa dhambi; kwamba amemtendea Kristo kwa namna ya aibu; kwamba amefanya dhambi juu ya sheria na juu ya upendo pia; kwamba ameufunga kwa komeo mlango wa moyo wake dhidi ya Bwana Yesu, hata kichwa chake kikajaa umande, na nywele zake matone ya usiku. Ee ndugu, kama Mungu angewahi kukufunulia nafsi yako mwenyewe, ungestaajabu kwamba donge kama hilo la jehanamu na dhambi limeruhusiwa kuishi na kupumua muda mrefu hivyo; kwamba Mungu amekuvumilia hata leo. Kilio chako kitakuwa, “Nimwendee Bwana na nini?” Hata kama ulimwengu wote ungekuja mbele zake, mimi nitawezaje?

2. Asili ya Mungu.—“Mungu aliye juu.” Mungu anapoiamsha nafsi kweli kweli, kwa kawaida humfunulia mtu kitu fulani cha utakatifu na ukuu wake mwenyewe. Ndivyo alivyomtendea Isaya (sura 6), “Nalimwona Bwana ameketi katika kiti cha enzi, kilicho juu sana na kilichoinuliwa; na pindo za vazi lake zikalijaza hekalu. Juu yake walisimama maserafi; mmoja akamwita mwenzake, Mtakatifu, Mtakatifu, Mtakatifu, ni Bwana wa majeshi, dunia yote imejaa utukufu wake. Ndipo niliposema, Ole wangu, kwa maana nimepotea.” Isaya alipoona kwamba Mungu ni Mungu mkuu hivyo, na mtakatifu hivyo, alijiona amepotea. Alihisi kwamba hawezi kusimama mbele za Mungu mkuu namna hiyo. Ee ndugu! Je, mmewahi kupata ufunuo wa ukuu na utakatifu wa Mungu, hata ukawaangusha chini miguuni pake? Ee ombeni ufunuo wa Mungu kama ule aliokuwa nao Ayubu, “Nilikuwa nimesikia habari zako kwa kusikia kwa masikio; bali sasa jicho langu linakuona; kwa hiyo najichukia nafsi yangu, na kutubu katika mavumbi na majivu.” Ole! nachelea kwamba wengi wenu hamtamjua kamwe yule Mungu ambaye mna mambo naye, mpaka mtakaposimama wenye hatia na bila neno la kusema mbele ya kiti chake kikubwa cheupe cha enzi. Ee laiti mngeomba sasa afunuliwe kwenu, mpate kulia, “Nimwendee Bwana na nini, na kuinama mbele za Mungu aliye juu!”

3. Wasiwasi wa nafsi iliyoamshwa huiongoza kwenye swali, “Na nini?”—Aa! ni swali lichomalo. Ni swali la mtu aliyefanywa kuhisi kwamba “kunahitajika kitu kimoja tu.” Cho chote alicho nacho angekiacha ili apate amani na Mungu. Kama angekuwa na kondoo waume elfu, au makumi elfu ya mito ya mafuta, angevitoa kwa furaha. Kama uhai wa watoto wake, vitu apendavyo kuliko vyote duniani, ungeweza kuipata, angewatoa. Kama angekuwa na malimwengu elfu kumi, angeyatoa yote ili apate sehemu katika Kristo. Ole wenu mnaostarehe katika Sayuni. Ole wenu ninyi msiowahi kuuliza swali hili, Nimwendee Bwana na nini? Aa! wapumbavu mnaoyafanyia mzaha mambo ya milele! Vipepeo maskini, mnaorukaruka kutoka ua hadi ua, wala hamlifikiri giza la milele lililo mbele yenu! Jiweke tayari ukutane na Mungu wako, Ee Israeli! Mnaharakisha kuelekea mauti na hukumu, lakini hamwulizi kamwe, “Ni vazi gani litakalonifunika, nitakaposimama mbele ya kiti kikubwa cheupe cha enzi? Kama mngekuwa mnakwenda kusimama mbele ya mfalme wa dunia hii, mngeuliza kabla, Nivae nini? Kama mngeshtakiwa mbele ya mahakama ya dunia, mngehakikisha mnaye mtetezi. Imekuwaje basi mnakaza mwendo upesi hivyo kuelekea kiti cha hukumu cha Mungu, wala hamwulizi kamwe swali hili, Nitasimama mbele zake na nini? “Na mwenye haki akiokolewa kwa shida, yule asiyemcha Mungu, mwenye dhambi, ataonekana wapi?”

Jibu la amani kwa nafsi iliyoamshwa.“Ee mwanadamu, amekuonyesha yaliyo mema.”
Hakuna kitu ambacho mwanadamu aweza kuleta pamoja naye kitakachomhesabia haki mbele za Mungu. Moyo wa asili hujitahidi daima kuleta kitu fulani kiwe vazi la haki mbele za Mungu. Hakuna jambo ambalo mtu asingelifanya—hakuna ambalo asingelivumilia—kama tu angeweza kujifunika mbele za Mungu. Machozi, maombi, wajibu, matengenezo, ibada—moyo utafanya lo lote ili uwe na haki mbele za Mungu. Lakini haki hii yote ni matambara machafu. Kwa maana,

Moyo unabaki kuwa kilindi cha kutisha cha uharibifu. Kila kitu ambacho moyo huo una sehemu ndani yake kimetiwa unajisi na ni kiovu. Machozi yao na maombi yao yenyewe yangehitaji kuoshwa.

Hata tukidhani kwamba haki hii ni kamilifu, haiwezi kuyafunika yaliyopita. Inafaa tu kwa wakati ule ilipotendwa. Dhambi za zamani, na dhambi za ujanani, bado zinabaki bila kufunikwa. Ee! ndugu wapendwa, ikiwa Yesu atawahesabia haki, ni lazima awatendee kama alivyomtendea Yoshua, “Mvueni nguo hizo zenye uchafu;” na “Nitakuvika mavazi mema.”—Zekaria 3:4. Mkono wa Yesu peke yake waweza kuwavika mavazi mema. Kristo ndiye njia iliyo njema.—“Amekuonyesha,” n.k. “Simameni katika njia panda mkaone, mkaziulize njia za kale, i wapi njia iliyo njema? Mkaiendee, nanyi mtajipatia raha nafsini mwenu.” Kristo ndiye njia iliyo njema iendayo kwa Baba.

Kwanza, Kwa sababu anafaa kabisa. Yeye anaikidhi sawasawa hali ya mwenye dhambi; kwa kila dhambi ya mwenye dhambi anayo jeraha, kwa kila uchi anayo kifuniko, kwa kila utupu anayo akiba ya kujaza. Hakuna hofu kwamba hatampokea mwenye dhambi, kwa maana alikuja ulimwenguni makusudi ili awaokoe wenye dhambi. Hakuna hofu kwamba Baba hatapendezwa nasi ndani yake, kwa maana Baba ndiye aliyemtuma, akaweka juu yake uovu wetu, akamfufua katika wafu, naye anawaelekeza kwake. “Ee mwanadamu, amekuonyesha yaliyo mema.”

Pili, Yeye ni wa bure kabisa.—“Kama vile kwa kutokutii kwa mtu mmoja wengi walivyofanywa wenye dhambi, kadhalika kwa kutii kwa mmoja wengi watafanywa wenye haki.” Kadiri laana ya Adamu inavyoenea, ndivyo toleo la msamaha kwa njia ya Yesu linavyoenea. Hapa kuna habari njema kwa walio waovu kupita wote kati ya wanadamu. Mnaweza kufunikwa kwa ukamilifu na kwa bure kama wale ambao hawajapata kutenda dhambi kama ninyi mlivyotenda. “Ee mwanadamu, amekuonyesha yaliyo mema.”

Tatu, Yeye humtukuza Mungu kweli kweli.—Njia nyingine zote za wokovu humtukuza mwanadamu, lakini njia hii humtukuza Mungu; kwa hiyo ni njema. Njia ile ndiyo njema, tena bora kuliko zote, impayo Mwana-Kondoo utukufu. Njia ya haki kwa Yesu ni njema, kwa sababu hii, kwamba Yesu hupata sifa zote. Utukufu uwe kwake. Ni kwa imani, ili iwe kwa neema. Kama mtu angeweza kujihesabia haki mwenyewe, au kama angeweza kuamini kwa nguvu zake mwenyewe na kuivuta haki ya Kristo juu ya nafsi yake, mtu huyo angejisifu. Lakini mtu anapolala amekufa miguuni pa Yesu, naye Yesu analitandaza vazi lake jeupe juu yake, kwa rehema huru ya enzi kuu, ndipo Yesu hupata sifa zote. Je, mmeichagua njia iliyo njema ya kuhesabiwa haki? Hii ndiyo njia ambayo Mungu amekuwa akiionyesha tangu kuwekwa misingi ya ulimwengu. Aliionyesha katika mwana-kondoo wa Habili, na katika dhabihu zote, na kwa manabii wote. Huionyesha moyoni kwa Roho wake. Je, njia hii iliyo njema imefunuliwa kwenu? Kama imefunuliwa, mtayahesabu mambo yote kuwa hasara, kwa ajili ya uzuri usio na kifani wa kuijua. Ee, njia tamu, ya kimungu, ya kumhesabia haki mwenye dhambi! Ee, laiti ulimwengu wote ungeijua! Ee, laiti tungeiona zaidi! Ee, laiti mngeitumia! “Mkaiendee, nanyi mtajipatia raha nafsini mwenu.”

Matakwa ya Mungu kwa waliohesabiwa haki. Yesu alipomponya yule mtu asiyejiweza kwenye birika la Bethzatha, alimwambia, “Angalia, umekuwa mzima; usitende dhambi tena, lisije likakupata jambo lililo baya zaidi.” Tena, alipoifunika dhambi ya yule mwanamke mzinzi, alisema “Wala mimi sikuhukumu: enenda, wala usitende dhambi tena.”— Yohana 8. Vivyo hivyo hapa, anapoionyesha njia iliyo njema ya haki, anaongeza, “Naye Bwana anataka nini kwako?”

Mungu huwataka waliokombolewa wake wawe watakatifu.—Kama ninyi ni ndugu zake, atawataka muwe watu wenye haki, watu watakatifu.

1. Anawataka mtende haki—muwe wenye haki katika shughuli zenu kati ya mtu na mtu. Hii ni mojawapo ya sifa zake mwenyewe tukufu. Yeye ni Mungu mwenye haki. “Je, Mwamuzi wa dunia yote hatafanya haki?” “Yeye ni Mwamba wangu, wala hakuna udhalimu kwake.” Je, mmekuja kwake kwa njia ya Yesu?—Anawataka mwakisi sura yake. Je, u mtoto wake?—ni lazima ufanane naye. Ee ndugu, kuweni waangalifu kabisa katika shughuli zenu. Fananeni na Mungu wenu. Jihadharini na udanganyifu; jihadharini na hila katika biashara. Jihadharini na kuzisifu mno bidhaa zenu mnapoziuza, na kuzibeza mnapozinunua. “Si kitu, si kitu, asema mnunuzi; lakini akiisha kwenda zake, ndipo hujisifu.” Isiwe hivyo kwenu. Mungu anawataka mtende haki.

2. Anawataka mpende rehema.—Hii ndiyo sifa inayong’aa kuliko zote katika tabia ya Kristo. Kama mko ndani ya Kristo, kunyweni kwa wingi Roho wake; Mungu anawataka muwe wenye rehema. Ulimwengu una ubinafsi, hauna rehema. Mama asiyeongoka hana rehema kwa nafsi ya mtoto wake mwenyewe. Aweza kumwona akiporomoka kuingia jehanamu bila kumhurumia. Ee ukatili wa kijehanamu wa watu wasioongoka! Isiwe hivyo kwenu. Kuweni na rehema, kama Baba yenu wa mbinguni alivyo na rehema.

3. Anawataka mwende kwa unyenyekevu na Mungu wako.—Kristo asema, “Jifunzeni kwangu, kwa kuwa mimi ni mpole na mnyenyekevu wa moyo.” Ikiwa Mungu amezifunika dhambi zenu zote za nyuma—maasi—kurudi nyuma—maanguko ya wazi; basi msifumbue kamwe vinywa vyenu ila kwa sifa ya unyenyekevu. Mungu anataka jambo hili mkononi mwenu. Tembeeni pamoja na Mungu, tena tembeeni kwa unyenyekevu.

Kumbukeni kwamba hili ndilo kusudi la Mungu katika kuwahesabia haki.—Alilipenda Kanisa, akajitoa kwa ajili yake, ili alitakase na kulisafisha. Hili ndilo lililokuwa kusudi lake kuu, kujiinulia watu wa milki yake mwenyewe wamtumikie, na kuchukua mfano wake, katika ulimwengu huu na katika milele. Kwa ajili ya hili aliiacha mbingu—kwa ajili ya hili aliugua, akatoka damu, akafa, ili awafanye watakatifu. Kama hamjafanywa watakatifu, Kristo alikufa bure kwa ajili yenu.

Lo lote analotaka, hutoa neema ya kulitenda.—Kristo si mwema tu kama njia yetu iendayo kwa Baba, bali yeye ni chemchemi yetu ya maji ya uzima. Uwe hodari katika neema iliyo katika Kristo Yesu. Kuna vya kutosha ndani ya Kristo kukidhi mahitaji ya watu wake wote. Mhudumu mmoja wa zamani asema, mtoto aweza kuchota maji kidogo tu baharini kwa mikono yake miwili, na ndivyo ilivyo, ni kidogo tu tuwezacho kupata kutoka kwa Kristo. Ndani yake kuna utajiri usiopimika.
Uwe hodari katika neema iliyo ndani yake. Ishi nje ya nafsi yako, na uishi kwa kumtegemea yeye, Nenda ukamwambie, kwamba kwa kuwa anataka haya yote kwako, ni lazima akupe neema kwa kadiri ya mahitaji yako. Mungu wangu atawajazeni mahitaji yenu yote kwa kadiri ya utajiri wake katika utukufu, ndani ya Kristo Yesu. Amekuonyesha mmoja aliye mwema—naam, Imanueli yule mzuri; sasa mtegemee yeye—pata kwake uzima usiokauka kamwe. Mkono wake na ukushike juu katikati ya mawimbi ya bahari hii yenye dhoruba. Bega lake na likuchukue juu ya miiba ya jangwa hili. Mtazame yeye kwa ajili ya utakaso kama vile kwa ajili ya kuhesabiwa haki.

Hivyo mwenendo wako na Mungu utakuwa wa karibu,
Moyo wako tulivu na wenye amani;
Hivyo nuru safi zaidi itaiangaza njia
Ikuongozayo kwa Mwana-Kondoo.