Hema la Kweli

"Kwa mfano ule ulioonyeshwa kwako mlimani." -WAEBRANIA 8:5.

KULIKUWA na hatua tatu ambazo kwazo Musa, mtu wa Mungu, alipanda Mlimani. Kwenye hatua ya kwanza, alienda pamoja na Haruni, Nadabu, na Abihu, pamoja na wazee sabini wa wana wa Israeli, wawakilishi walioteuliwa wa watu. "Nao wakamwona Mungu wa Israeli; na chini ya miguu yake palikuwa na kitu kama sakafu ya kito cha yakuti samawi, kama mbingu zenyewe kwa usafi wake; wakamwona Mungu, wakala na kunywa" (Kutoka 24:10, 11). Kula na kunywa huku dhahiri kulikuwa ishara ya urafiki na amani, iliyojengwa juu ya kumwagwa kwa damu, kunakoandikwa katika mistari iliyotangulia. Sisi pia, twaweza kumwona Mungu, na kula mwili na kunywa damu ya Mwana wa Adamu, kwa msingi wa ile damu ya thamani ambayo kwayo tumeletwa karibu.

Karamu hii ilipokwisha, sauti ya Mungu ikamwita Musa apande hata mahali pa juu zaidi, kilele cha mbali zaidi. Kwanza akawaamuru wazee wangoje pale walipokuwa; kisha, akiwa pamoja na Yoshua peke yake, akainuka, akaenda katika mlima wa Mungu, ambao juu yake wingu lilitanda, likizama na kuoshwa katika utukufu wa Bwana, kama mistari mirefu ya mawingu katika mng'ao wa jua lizamalo.

Lakini siku ya saba, hata Yoshua aliachwa nyuma. Mungu akamwita Musa toka ndani ya lile wingu. Naye Musa akapanda zaidi mlimani, ndani zaidi na zaidi hata moyoni mwa ule utukufu uwakao. Hisi zake zote zilikuwa macho kabisa kwa mandhari yaliyomzunguka, na kutekwa nyoyo; kila moja ikiwa mfereji wa mafuriko ya furaha ya kuchangamsha, bila maumivu, bila kujitambua, bila kupooza kwa hofu, kana kwamba mtu anachukuliwa mbele daima na wimbi la utukufu na muziki, ambalo kila mwendo wake ulikuwa furaha kuu. "Naye Musa alikuwa Mlimani siku arobaini, mchana na usiku."

Wakati huo Musa alipewa maagizo ya kina kuhusu Hema (la Kukutania), lililokuwa lisimikwe katika tambarare huko chini. Maagizo hayo yametolewa katika Kutoka 25, 26, 27, tena ni ya kina mno. Lakini hakuna kilichoachwa kwa mawazo ya mwanadamu. Kuanzia sanduku na kiti chake cha rehema kama kiti cha enzi cha Mungu, maagizo hupitia meza ya mti wa mshita, kinara chenye matawi yake saba, mbao na mapazia na vitambaa, hata yanapoishia kwenye ile madhabahu kubwa ya shaba katika ua wa Hema, mahali ambapo Mungu na mwenye dhambi walikutana. Je, hii siyo pia njia aliyoikanyaga Bwana mwenyewe, ndiye kiini cha mifano hii yote, aliyekuja kutoka kifuani mwa Baba hata msalaba wa Kalvari, ile madhabahu ya shaba mahali alipoziondoa dhambi za wanadamu?

Lakini, zaidi ya maelezo ya kina yaliyotolewa hivyo, yaonekana kwamba mbele ya akili ya Musa palionyeshwa taswira fulani ya vitu alivyoamriwa kuvitengeneza. Ilikuwa kana kwamba zile hakika za milele zilizokaa daima katika nia ya Mungu zilichukua umbo la kuonekana mbele ya macho yake. Kisichoonekana kikawa cha kuonekana. Cha milele kikapata umbo. Mfano ulionyeshwa kwake. Akatembea katika njia za Hema la kweli. Akaviona vile vitu vya mbinguni vyenyewe. Na ni kwa mfano huu ndio alihimizwa na kuamriwa tena na tena ajenge. "Sawasawa na yote nikuonyeshayo, mfano wa Hema, na mfano wa vyombo vyake vyote, ndivyo mtakavyovifanya" (Kutoka 25:9, 40; 26:30; 27:8).

IBADA YA KIYAHUDI YASTAHILI KUCHUNGUZWA KWA UCHA MUNGU. Sikuzote inavutia kuchunguza namna za ibada ya kidini, ijapokuwa taratibu zake zimepitwa na wakati, madhabahu zimeachwa ukiwa, na mavumbi ya kuhani na mwabudu tangu zamani yamechanganyika na mchanga wa jangwa au majani mabichi ya uwanda. Ni nani awezaye kutazama bila kuguswa yale makumbusho makubwa yajiinuayo katika misitu minene ya Meksiko ya Kati, mabaki ya zama za majitu waliopita, wasioacha dalili yo yote ya alama au maandishi ya picha waliyoyachonga? Ni nani awezaye kupita katikati ya duara za mawe za Stonehenge, Keswick, au Penmaenmawr, asianguke katika tafakari za huzuni?

Kwa sababu hii, kama si nyingine, ibada ya Kilawi ingekuwa daima na mvuto wa asili ndani yake. Tufikiriapo zile roho tukufu zilizoturithisha kumbukumbu zetu za kidini zilizo za thamani kuliko zote, walioimba katika Zaburi, na kulia katika Maombolezo, na kung'aa kwa shangwe ya utabiri na unabii wa Kimasiya; na wote hao waliofunzwa katika mfumo ambao Hema lilikuwa kitovu na moyo wake, hatuwezi kukosa kulichunguza kwa udadisi mtakatifu na wa heshima, kana kwamba mtu angetembelea kitalu au chumba cha shule ambamo waalimu wapendwa na waheshimiwa walikaa miaka yao ya kwanza.

Lakini kuna mvuto wa ndani zaidi hapa. Kwa maana twaambiwa kwamba vitu hivi vilifanywa kwa mfano wa vitu vilivyo mbinguni. Kila kifundo, na kishikizo, na pazia, na chombo, na kipande cha samani, kilikuwa na kilinganifu chake, mfano wake wa kiroho ambao kilikuwa dhihirisho lake gumu na la kimwili. Kwa mifano na vivuli hivi hapana shaka kwamba watakatifu wa kale walipata mng'ao wa zile hakika za milele. Twahitimisha hivi, kwa sababu kuna mfano mkubwa hivi kati ya maisha yao ya kidini, kama yalivyoonyeshwa katika maandiko yao, na yetu wenyewe. Lakini ikiwa wao, waliokuwa na mfano tu wa kuwaongoza, waliweza kutambua mafunzo mengi hivyo mazito na matakatifu kupitia njia yake, si zaidi sana wazi tunavyopaswa kuweza kuona kanuni kuu za ukombozi katika ibada ya kale, ambapo mbele yetu yamepita mandhari ya Bethlehemu, Kalvari, Bustani ya Arimathaya, na Mlima wa Kupaa!

Wakati mwingine katika kivuli twaweza kuona mambo madogo ya ufundi ambayo vinginevyo katika kile kitu chenyewe tungeweza kuyakosa. Mojawapo ya mafanikio ya ajabu ya siku hizi ni upigaji picha wa jua, ambao kwao picha za tone la jua hupatikana chini ya hali fulani. Na dhahiri ni rahisi zaidi kuchunguza asili ya jua kutokana na picha kama hizo kuliko kulisoma katikati ya utukufu wake usiovumilika. Jicho laweza kwa utulivu kuendelea na uchunguzi wake bila kupofushwa wala kuaibishwa. Vivyo hivyo twaweza kuelewa vizuri zaidi baadhi ya mambo madogo ya kazi ya Kristo, tusomapo Mambo ya Walawi, kuliko tusimamapo pamoja na mitume katikati ya maajabu ya msalaba, au pamoja na yule Mwonaji katikati ya mwako wa juu wa maono ya Ufunuo.

Basi usiache kwa wepesi Kitabu cha Mambo ya Walawi, kinachoonyesha kivuli cha Injili; na, hakika, kinatoa sehemu kubwa ya istilahi, misemo na alama, zitakazotumika baadaye. Chini ya mafundisho ya Roho Mtakatifu yule yule aliyemfundisha Musa zamani za kale twachunguza maana takatifu zilizo chini ya sanduku na kifuniko cha upatanisho; kitani nzuri ya kusokotwa na rangi ya samawi; kinara na meza; madhabahu ya uvumba na madhabahu ya sadaka ya kuteketezwa; beseni na chombo na makasi ya taa. Kila kimoja ni kama ndoana katika nyumba ya Mungu, ambayo Mungu ameishikamanisha na maana takatifu, nayo itatoa siri yake kwa wale waombao na kutafuta na kubisha kwa heshima. Tukibadili maneno fulani ya kukumbukwa, twaweza kusema: "Mambo ya Mungu yasiyoonekana, tokea kujengwa kwa Hema, yanaonekana wazi, yakifahamika kwa vitu vilivyofanywa, naam, kusudi lake la milele la ukombozi."

KWELI ZA INJILI NI HAKIKA ZA MILELE. Hatupaswi kudhani kwamba zimekusudiwa kupita, kama mifano ya Kiyahudi ilivyopita. Haziwezi. Ni vile vitu vya mbinguni vyenyewe. Ni za kweli, zilizo kamili, zilizo za Mungu. Sikuzote zimekuwa vile zilivyo. Sikuzote zitakuwa vile zilivyo. Bado twaweza kulazimika kuziona kwa kina zaidi; twaweza kuhitaji kufundishwa kwa njia za juu zaidi za mawasiliano ya Kimungu. Twaweza kulazimika kuinuliwa hata mahali pa juu zaidi pa uzoefu ili tuzifahamu. Lakini kwa asili yake na milele zimethibitika, mwamba wa hakika ya milele. Jengo lo lote lililojengwa juu yake litadumu milele. Wayahudi walikuwa na mfano tu, sisi tunayo hakika; wao walikuwa na picha, sisi tunaye mtu; wao walikuwa na kivuli, sisi tunacho kile kitu chenyewe.

Yavutia kuhisi kwamba Musa hakuona kweli nyingine yo yote katika ufunuo wa Mungu zaidi ya ile aliyoiona Paulo; ingawa kwa Musa ilijichukulia umbo katika Hema pamoja na tabaka zake za ngozi, ilhali kwa Paulo ilichukua umbo katika mkururo unaong'aa wa hoja na usemi mzuri. Lakini daima katika nia na wazo la Mungu kumekuwako tofauti ile ile kati ya utakatifu na dhambi; daima uhitaji wa dhabihu, hata mautini; daima madai ya uhai uliomwagwa, kama njia pekee ambayo kwayo mwenye dhambi aweza kumkaribia Enzi yake takatifu; daima matakwa ya uvumba wa sifa, mkate wa utii, nuru ya tabia iliyoangazwa; daima kuhani wa kufanya maombezi; na daima njia na nyua na nafasi zilizowekwa wakfu kwa ibada na mawasiliano, tukufu kama ushirika kati ya Baba na Mwana.

Kalvari si jambo geni, wala ukuhani, wala kazi ya Yesu; vinaonyesha kung'aa kwa hakika za milele katika asili iliyo ndani kabisa ya Mungu. Kuvipuuza ni kukosa muungano na Mungu katika sheria na mienendo iliyo ya msingi kuliko yote ya nafsi yake. Mwana-Kondoo alichinjwa kabla ya kuwekwa msingi wa ulimwengu: naye anaonekana mbinguni bado akichukua alama za kifo chake, "Mwana-Kondoo kana kwamba amechinjwa."

MAHALI PETU PA KUABUDU. Ni lazima tukusanyike katika mahali pa kukusanyikia pamoja na Wakristo wenzetu; lakini kwa kweli hakuna hata pamoja pao palipo pa muhimu kwa ibada ya kweli. Mfano umepita, nasi twajua kwamba Hema la Kiyahudi halipo tena. Lakini twaona nini? Watu wanajaribu kulizalisha tena, au kubuni mbadala wake. Ee, jinsi wanavyoipotosha sana hali yetu ya kweli! Kwa hakika hatuhitaji Hema la Kiyahudi wala mbadala wo wote; kwa sababu tumefanywa makuhani wa hema ya mbinguni, ambayo mkono wa mwanadamu haukuisimika kamwe, nayo ndiyo mahali pa kukutana kati ya Mungu na mioyo yote ya kweli, naam, ya wote wampendao Mungu. "Wala si katika mlima huu, wala kule Yerusalemu, mtakapomwabudu Baba." Tukutanapo na kundi la Wakristo wenzetu, hatupaswi kuwadhania kuwa ndio jumla ya wale tuabuduo pamoja nao. Mwabudu wa kweli ni mmoja wa umati mkubwa wa sherehe, unaolijaza hekalu la kiroho. Sisi ni sehemu tu ya kusanyiko linalojumuisha wafu wote watakatifu, na walio hai waaminio, katika mashirika yote, na katika ulimwengu wote wa Mungu. Mfungwa, msafiri, mgonjwa, mama, muuguzi-wote hukutana huko kwa umoja, na kumwabudu Mungu pamoja. Wote ni makuhani, na kule yuko Kuhani Mkuu, aliyepita katika mbingu na aishiye daima ili kufanya maombezi. "Mhudumu wa hema ya kweli." Jinsi wanavyoonekana wa kuchekesha mbele ya kusanyiko kama hilo wale wajidaio madai ya kikuhani, na ambao wangetaka kutufanya tuamini kwamba wanairudia dhabihu ya Kristo! Katika hekalu hili angalau hawahitajiwi, kwa maana Kristo yuko hapa kuitoa dhabihu mwenyewe.

MFANO WA KWELI WA MAISHA YETU WAONYESHWA HAPA. Tunazo mipango na mikakati na mifano mingi; lakini mara ngapi isiyofanikiwa na ya kukatisha tamaa! Laiti tungeweza kukaa nyakati ndefu pamoja na Mungu mlimani, tukipokea mfano wake wa maisha yetu na kazi yetu! Hakuna kilicho cha juu zaidi kwetu kuliko kujenga mfanano fulani na wazo la milele la Mungu. Majengo yote yaliyojengwa juu ya mpango huo yatasimama milele. Naye Mungu daima atapata vifaa, vya kutosha na kuzidi, kwa ajili ya wale wathubutuo kuwa wa pekee, kwa sababu wako waaminifu kwa mfano ule anaouonyesha mlimani. Na kama ikiulizwa mfano ni upi ule Mungu atakaotuonyesha katika mlima wa ushirika, twaweza kujibu: ni maisha na tabia na kazi ya Yesu Kristo Bwana wetu; kielelezo na kigezo na mfano wa yote yaliyo ya kweli na ya haki na safi na yenye kupendeza na ya sifa njema. Angalia ufanye maisha yako kwa mfano huu, ambao Mungu angoja kukuonyesha mlimani. Mungu akuita kwao, naye atakuwezesha kutimiza.