Nanga ya Nafsi

"Iweni wafuasi wa wale ambao kwa imani na uvumilivu wanazirithi 1)ahadi."

WAEBRANIA 6:12.

AHADI ZA MUNGU! Hilo ndilo neno la msingi hapa. Kuzirithi ahadi (mst. 12); Mungu alifanya ahadi (mst. 13); aliipata ile ahadi (mst. 15); warithi wa ahadi (mst. 17). Lakini labda kurudiwarudiwa kwa neno hili hakuamshi shauku wala hakuuchochei moyo wa wale wanaolisoma. Tumelizoea mno; na zaidi ya yote, hatumo katika hali zinazozifanya ahadi za Mungu kuwa za thamani ya pekee. Usiku wa huzuni sharti utie giza anga letu, ama sivyo kamwe hatuwezi kuziona wala kuzithamini nyota za ahadi zing'aazo kama vito katika anga la Maandiko. Wale walio matajiri, walioongezewa mali, wasiohitaji kitu, hawawezi kutambua maana halisi ya ahadi za Mungu.

Aliye na kipato kizuri, kinachohakikisha kupatiwa kwa kila hitaji, si jambo la maana sana kwake kwamba Mungu ameahidi kuwapatia vitu vyote vya lazima wale wanaoutafuta ufalme wake kwanza. Aliyezungukwa na makundi ya rafiki waaminifu, kama safu nyingi za ulinzi zilizojengeka katika ngome imara ya cheo na hadhi, kuna shauku kidogo katika uhakikisho kwamba Mungu atakuwa ngao na kigao chake, ngome ya miamba, kimbilio wakati wa dhoruba kwa watakatifu wake. Lakini mali zinapopungua, na rafiki wanaposhindwa, na afya inapodhoofika, na shida, mateso, na jaribu zinapotisha, ndipo nafsi hujielekeza kwenye ahadi za Mungu, na kuzitafakari tena na tena, ikizichunguza kwa saa nyingi pamoja, hata inapoamka na kukuta migodi ya hazina chini ya kurasa zilizokuwa tupu kama nyika ambazo chini yake yamelala matabaka ya makaa ya mawe. Ingekuwa vema kwa baadhi yetu kama Mungu angetuvua vitu vyote hivyo tunavyoviwekea imani hiyo; ili tulazimishwe, labda kwa mara ya kwanza maishani mwetu, kutafuta ndani yake mwenyewe yale yote ambayo sasa tumezoea kuyatafuta katika vipawa vyake. Ee, hasara iliyobarikiwa, ambayo ingetufundisha utajiri wetu wa kweli! Ee, kunyimwa kwenye furaha, ambako kungetufunulia rasilimali zetu zisizokwisha! Ee, nidhamu ya upendo, ambayo ingevunja mabirika yanayoshika maji ya mvua yenye chumvichumvi, na kutulazimisha kujielekeza kwenye mto wa Mungu, utokao katika kiti cha enzi cha Mungu na cha Mwana-Kondoo!

Namna ya uzembe na ya haraka tunayosoma kwayo kurasa zilizopambwa kwa ahadi za Mungu inatokana zaidi na ukweli kwamba hatujawahi kutiwa katika dhiki za huzuni na unyonge kiasi cha kuithamini thamani yake. Jaribu moja lenye kuponda lingefungua maeneo yote ya ahadi, ambayo sasa ni kama milango iliyofungwa ya ukumbi katika jumba la kifalme. Hii ni sababu moja kwa nini mtu kama yule shujaa wa Kikristo, Gordon, angetumia saa nyingi juu ya Neno la Mungu, akizihesabu ahadi za Baba yake, akizishika juu kama vito katika mwanga wa jua, na kuzifurahia kama nyara kubwa; watu kama yeye walikuwa na kidogo kingine; hawakuwa na rasilimali nyingine ya kutegemea; walisukumwa kuzishika kwa ajili ya uhai wenyewe. Na hivyo waliitimiza fumbo la Mtume, "Kama wasio na kitu, bali wenye vitu vyote." Wale wanaotambua umaskini wao ndio wanaokuwa matajiri katika imani, na warithi wa Ufalme.

Ni katika hali hasa kama hiyo ambamo Waebrania wanaozungumziwa hapa walipatikana. Mali zao zilikuwa zimeporwa; walikuwa wamevumilia vita kuu ya mateso; walikuwa wamefanywa kitu cha kutazamwa kwa dhihaka na kwa mateso; yote ambayo watu huzoea kuyategemea yalikuwa yamefagiliwa mbali nao; kwa hiyo Roho Mtakatifu, katika kurasa hizi, anaielekeza mioyo yao kwenye ahadi kuu mno na za thamani, ambazo kwazo Mungu aliahidi kuwapatia mahitaji yao yote; na kuwapa kutoka katika hazina zake mwenyewe yote, na zaidi ya yote, waliyokuwa wamepoteza; si kwa kuwapa vitu hivyo katika umiliki wa kuonekana, bali akiwapatia kadiri walivyohitaji, na kwa kadiri ya imani yao. Hakika ilikuwa ni ubadilishano mzuri, kupoteza yote, na kuyapata tena yote ndani ya Mungu!

AHADI ZA MUNGU NI ZA KUTEGEMEWA. Neno la mtu mwema ni dhamana yake. Na mtu kama huyo atoapo ahadi wasiwasi wetu hutulizwa, hofu zetu hunyamazishwa, tunapata faraja kuu. Lakini kama, zaidi ya ahadi, rafiki yetu amejifunga kwa dhati kwa kiapo, akiita mbingu na dunia kuwa mashahidi, na Mungu athibitishe, tamko hilo ni zito mno, rufaa yake ya kutisha mno, chapa iliyowekwa akilini ni nzito mno, hata, litokeapo lolote, nafsi hujikinga katika kutobadilika kwa uamuzi wake. Haiwezekani mara mbili kwake kubadilika au kudanganya. Na hii ndiyo dhamana ambayo kwayo Mungu amejifunga mwenyewe.

Alipokuwa akishughulika na Ibrahimu, Mungu alimpa ahadi tena na tena, kwanza ya nchi, kisha ya uzao, pia ya baraka ambayo ingewafikia vizazi vyote vya wanadamu kupitia yeye. Wakati mmoja alipitia namna ya kufanya agano iliyokuwa desturi miongoni mwa mataifa yaliyowazunguka (Mwanzo 15:17). Lakini, juu ya Mlima Moria, mzee huyo mwaminifu alipokuwa ametoa ushahidi mmoja wa ajabu wa imani na utii, hata mautini, Mungu aliapa, na "kwa kuwa hakuwa na mkuu kuliko yeye mwenyewe wa kumwapia, aliapa kwa nafsi yake." "Nimeapa kwa nafsi yangu, asema Bwana', (Mwanzo 22:16).

Na ndivyo ilivyo kwetu sisi. Sisi ambao kwa imani tu uzao wa kiroho wa Ibrahimu tumebarikiwa pamoja naye. "Ahadi ni imara kwa wazao wote; si kwa wale walio wa sheria tu, bali kwa wale walio wa imani ya Ibrahimu, aliye baba yetu sisi sote" (Warumi 4:16). Ahadi zote za Mungu ni Ndiyo na Amina. Yeye si mtu hata aseme uongo, wala si mwanadamu hata ajute. Amezikadiria vema rasilimali zake, kabla hajajifunga mwenyewe; na mara akiisha kufanya hivyo haiwezekani ashindwe. Angukeni kabisa juu ya ahadi za Mungu; shikamaneni nazo kama baharia aliyevunjikiwa na meli ashikavyo ubao unaoelea; hatarisheni yote juu yake; utimizo wake umehakikishwa kwa agano na kiapo; kwa damu na maumivu makuu na mauti; kwa nuru ya asubuhi ya ufufuo na utukufu wa mlima wa kupaa; kwa uzoefu wa maelfu wasiohesabika, ambao kamwe hawajaziona zikishindwa. Kama mtu yeyote aliye hai amewahi kuona ahadi moja isiyoaminika, na aitangaze kwa ulimwengu; na mbingu zitajivika nguo za magunia, na jua na mwezi na nyota vitayumbayumba kutoka mahali pao, ulimwengu utatikisika, na upepo mtupu utaugua katika uumbaji wote, ukichukua habari kwamba Mungu anabadilika, kwamba Mungu aweza kusema uongo. Na sauti hiyo itakuwa mtangazaji wa kutoweka kwa vitu vyote. Lakini haliwezi kamwe, kamwe kuwa hivyo. Enyi warithi wa ahadi! Nguvu za Mungu ni za milele, shauri lake halibadiliki. Mbingu na nchi zaweza kupita, lakini neno lake halitapita kamwe. Kwa hiyo mwaweza kuwa na faraja kuu; ijapokuwa mtapoteza kila kitu kingine, urithi wenu katika neno na kiapo cha Mungu utabaki bila kudhurika, milele na milele.

AHADI ZA MUNGU, ZIKIWA HIVYO ZIMEHAKIKISHWA, HUFANYA MAHALI PA KUTIA NANGA KWA NAFSI. Ni vitu vichache vilivyo muhimu zaidi kwa baharia kuliko kupata sehemu nzuri ya kutia nanga, ambapo udongo hautatoa mbele ya uzito wa chombo na msukumo wa dhoruba. Na pamoja na mielekeo hiyo yote ya kuchukuliwa na maji ambayo tumekwisha kuyazingatia, tunahitaji kwa haraka kugundua kitu cha kudumu, kisichobadilika, na chenye kuridhisha, ambacho kwacho tunaweza kukishika kwa nanga ya tumaini letu.

Kipawa cha tumaini ndani ya Mkristo hakitofautiani na kile cha mtu wa kilimwengu. Ni kipawa kilekile au sifa ileile kwa kila mmoja. Lakini kuna tofauti kubwa katika ardhi ambamo nanga hutiwa. Kwa upande wa mtu wa kilimwengu, ni udongo ulio legevu, mwepesi, usiotegemewa wa mambo ya bahati nasibu na ya kubuni. Kwa upande wa Mkristo, ni ahadi na kiapo kisichokubali kutoa, kisichobadilika, cha Mungu wa Milele. Kwa hiyo yule wa kwanza mara nyingi hutiwa giza kwa mashaka na hofu; hali yule wa pili hulia, bila kivuli cha shaka, "Namjua yeye niliyemwamini, tena nina hakika."

Tumaini ni kitu zaidi ya imani. Imani hukubali na kuamini ushuhuda; tumaini hutazamia mbele. Imani husema tunda ni jema; tumaini huchuma na kula. Imani ni chipukizi; tumaini ni ua. Imani huwasilisha hundi; tumaini hutoa kiasi kilichopokewa. Na tumaini kama hilo ndilo nanga ya nafsi. Ulinganisho kati ya tumaini na nanga unajulikana hata kwa waandishi wa kipagani, na ni rahisi kuona jinsi unavyofaa. Hutuliza nafsi. Chukua mfano kutoka maisha ya kawaida. Kijana huahidi uaminifu wake kwa msichana maskini lakini mtukufu. Anaandikishwa kwa utumishi wa nchi za ng'ambo, na kuaga kwa miaka mingi. Wakati huohuo yeye anaachwa afanye awezavyo ili kujikimu. Kazi ni haba, mishahara midogo, nyakati nyingine hujaribiwa na kuteswa vikali. Lakini, katikati ya yote, anahifadhiwa mwaminifu kwa mpenzi wake aliye mbali, na kwa nafsi yake iliyo bora zaidi, kwa uzi mdogo wa tumaini unaomuunganisha na wakati ujao wenye furaha na wa umoja. Vivyo hivyo, tunapoteseka au kujaribiwa au kukata tamaa, tumaini letu husonga mbele hadi wakati ujao uliobarikiwa, uliochorwa katika ukurasa wa Maandiko kwa rangi zing'aazo, na kuahidiwa kwa neno la yeye asiyeweza kusema uongo; na kutazamia kwake hujaza nafsi ujasiri na saburi, ili kuvumilia majaribu ya wakati, kwa kutazamia heri ya hakika ya umilele.

PALE PA KUTIA NANGA KATIKA AHADI PANA THAMANI YA NAMNA TATU. Ni imara, hakuna hofu ya kushindwa kwake; imara kama rehema za Daudi zilizo imara; imara kama "agano la milele, lililopangwa katika mambo yote, tena thabiti"; imara kadiri Mungu awezavyo kuifanya. Ni thabiti, ushawishi wake juu ya nafsi ni kuifanya iwe imara: "Iweni thabiti, msitikisike, sikuzote mkizidi sana katika kazi ya Bwana." Nayo huingia mpaka ndani ya pazia. Katika ulimwengu wa kale, palipokuwa hapana maji ya kutosha kuelea meli hadi bandarini, mtu angeichukua nanga juu ya vina vifupi, na kuitia katika maji matulivu ya bonde la ndani. Kwa namna kama hiyo, Bwana wetu Yesu, alipopita, kama kuhani mkuu katika Hema la Kiyahudi, kupitia pazia la buluu lifichalo ulimwengu wa mbinguni usionekane kwetu, alilichukua tumaini letu pamoja naye, na kulishika huko. Bwana Yesu ndiye tumaini letu (1 Timotheo 1:1; 1 Yohana 3:3). Yeye ni mtangulizi wetu. Ametutangulia mbele hadi uwepo wa Baba yake, malimbuko ya wale waliolala. Amekwenda huko akiwa Mwakilishi wetu na Kuhani. Alipopita kwa fahari kutoka machoni pa wanafunzi wake, na kufichwa asionekane na macho yaliyomfuata kwa hamu, aliingia ndani ya pazia. Huko yu hai daima; na kwa sababu hiyo matumaini yetu humfuata, hukita ndani yake, na kwa hivyo hutuunganisha tayari na makao yale mang'aavu ambayo yeye ndiye kitovu chake chenye kung'aa.

KUNA SIFA FULANI AMBAZO SHARTI TUJIFUNZE KUZITUMIA. Imani na saburi peke yake ndizo ziwezazo kuzirithi ahadi (mst. 12). Ibrahimu ilimbidi kuvumilia kwa saburi kabla ya kuipokea ahadi (mst. 15). Si rahisi kungoja, wala kuiacha saburi ikamilishe kazi yake; na inawezekana kwa imani tu. Hakuna mfano ulio bora zaidi wa kungoja kwa muda mrefu kuliko historia ya Ibrahimu, ambayo imani yake ilimtia nguvu, na ambaye ahadi ilitimizwa kwake kihalisi. Na ndivyo itakavyokuwa tena. Enyi mioyo iliyochoka na yenye hamu, vumilieni. Wakati utafika mtakapoiweka mikono juu ya mtaji wenu; lakini kwa sasa ridhikeni kufurahia faida. Wakati wenye baraka unaharakisha mtakapojua na kuonja heri yote ya Paradiso iliyorejeshwa; lakini kwa muda huu jilisheni zabibu za Eshkoli, makomamanga na mazao mengine ya nchi. Dai saburi ya Kristo, ambayo mtume wa mwisho, aliyeihitaji ili kumtegemeza katika ucheleweshaji mrefu, aisema kwa utamu (Ufunuo 1:9). "Nanyi vumilieni; ithibitisheni mioyo yenu; kwa maana kuja kwake Bwana kunakaribia." "Na tupige mbio kwa saburi katika yale mashindano yaliyowekwa mbele yetu, tukimtazama Yesu." Hivyo tutaonyesha "saburi ya watakatifu"; na hivyo, kama wale waliotutangulia, mwishowe tutazirithi ahadi.