Peke Yake

Siku ya Thelathini na Moja. KUMNGOJEA MUNGU: Peke Yake.

'Ee nafsi yangu, umngojee Mungu peke yake;

Maana tumaini langu hutoka kwake.

Yeye peke yake ndiye mwamba wangu na wokovu wangu.'—Zaburi 62:5,6.

Inawezekana kumngojea Mungu daima, lakini si Yeye peke yake; huenda yapo matumaini mengine ya siri yanayojiingiza kati na kuizuia ile baraka iliyotarajiwa. Hivyo basi neno peke yake lazima lije kuiangazia njia iendayo kwenye utimilifu na uhakika wa baraka. 'Ee nafsi yangu, umngojee Mungu peke yake. Yeye peke yake ndiye mwamba wangu.'

Naam, 'Ee nafsi yangu, umngojee Mungu peke yake.' Yuko Mungu mmoja tu, chanzo kimoja tu cha uzima na furaha kwa ajili ya moyo; Yeye peke yake ndiye mwamba wangu; ee nafsi yangu, umngojee Yeye peke yake. Unatamani kuwa mwema. 'Hakuna aliye mwema ila Mungu,' wala hakuna wema uwezekanao isipokuwa ule upokewao moja kwa moja kutoka kwake. Umetafuta kuwa mtakatifu: 'Hakuna aliye mtakatifu ila Bwana,' wala hakuna utakatifu isipokuwa ule ambao Yeye, kwa Roho wake wa utakatifu, huupulizia ndani yako kila dakika. Wataka kuishi na kutenda kazi kwa ajili ya Mungu na ufalme wake, kwa ajili ya wanadamu na wokovu wao. Sikia jinsi asemavyo, 'Mungu wa milele, Muumba wa miisho ya dunia. Yeye “peke yake” hazimii, wala hachoki. Huwapa nguvu wazimiao, na wale wasio na uwezo huwaongezea nguvu. Wamngojao Bwana watapata nguvu mpya.' Yeye peke yake ndiye Mungu; Yeye peke yake ndiye mwamba wako: 'Ee nafsi yangu, umngojee Mungu peke yake.'

'Ee nafsi yangu, umngojee Mungu peke yake.' Hutawapata wengi wawezao kukusaidia katika jambo hili. Watakuwapo ndugu zako wengi wa kutosha wa kukuvuta uweke tumaini katika makanisa na mafundisho, katika mipango na mbinu na vyombo vya kibinadamu, katika njia za neema na taratibu alizoziweka Mungu. Lakini, 'Ee nafsi yangu, umngojee Mungu peke yake, Yeye mwenyewe.' Taratibu zake takatifu kuliko zote huwa mtego zinapotumainiwa. Yule nyoka wa shaba huwa Nehushtani; lile sanduku na hekalu huwa tumaini la bure. Mungu aliye hai peke yake, si mwingine wala kitu kingine chochote ila Yeye, ndiye awe tumaini lako.

'Ee nafsi yangu, umngojee Mungu peke yake.' Macho na mikono na miguu, akili na fikira, huenda ikavilazimu kujishughulisha kwa bidii na kazi za maisha haya; 'Ee nafsi yangu, umngojee Mungu peke yake.' Wewe u roho isiyokufa, hukuumbwa kwa ajili ya ulimwengu huu bali kwa ajili ya umilele na kwa ajili ya Mungu. Ee, nafsi yangu! Itambue hatima yako. Ijue fursa yako, na 'umngojee Mungu peke yake.' Usiache shauku ya mawazo na mazoezi ya kidini ikudanganye; mara nyingi sana hivyo huchukua nafasi ya kumngojea Mungu. Ee nafsi yangu, ngoja wewe, wewe mwenyewe hasa, utu wako wa ndani kabisa, pamoja na nguvu zake zote, 'umngojee Mungu peke yake.' Mungu ni kwa ajili yako, nawe u kwa ajili ya Mungu; umngojee Yeye peke yake.

Naam, 'ee nafsi yangu, umngojee Mungu peke yake.' Jihadhari na adui zako wawili wakuu — Ulimwengu na Nafsi. Jihadhari, kisije kitu chochote cha dunia hii cha kuridhisha au kufurahisha, hata kionekane hakina hatia namna gani, kikakuzuia usiseme, 'Nitamwendea Mungu, aliye furaha yangu kuu.' Kumbuka na kutafakari asemavyo Yesu juu ya kujikana nafsi, 'Mtu na ajikane mwenyewe.' Tersteegen asema: 'Watakatifu hujikana wenyewe katika kila jambo.' Kuiridhisha nafsi katika mambo madogo kwaweza kuwa ni kuipa nguvu ya kujitokeza katika mambo makubwa. 'Ee nafsi yangu, umngojee Mungu peke yake;' Yeye na awe wokovu wako wote na shauku yako yote. Sema daima na kwa moyo usiogawanyika, 'Tumaini langu hutoka kwake; Yeye peke yake ndiye mwamba wangu; sitatikisika.' Yawe yoyote mahitaji yako ya kiroho au ya maisha haya, iwe yoyote shauku au maombi ya moyo wako, liwe lolote jambo linalokuhusu katika kazi ya Mungu Kanisani au ulimwenguni—katika upweke au katika msukosuko wa dunia, katika ibada ya hadhara au mikutano mingine ya watakatifu, 'Ee nafsi yangu, umngojee Mungu peke yake.' Matarajio yako na yatoke kwake peke yake. Yeye peke yake ndiye mwamba wako.

'Ee nafsi yangu, umngojee Mungu peke yake.' Usisahau kamwe zile kweli mbili za msingi ambazo kungoja huku kwenye baraka kunasimama juu yake. Ukielekea wakati wowote kudhani kwamba 'kungoja peke yake' huku ni kugumu mno au ni juu mno, kweli hizo zitakurudisha mara moja. Nazo ni: hali yako ya kutojiweza kabisa; na, utoshelevu kamili wa Mungu wako. Lo! ingia kwa kina katika udhambi kamili wa yote yaliyo ya nafsi, wala usifikirie kuiacha nafsi iwe na la kusema hata dakika moja. Ingia kwa kina katika kutoweza kwako kabisa na kusikokoma kubadili lililo ovu ndani yako, au kuzaa lolote lililo jema kiroho. Ingia kwa kina katika uhusiano wako wa utegemezi kama kiumbe kwa Mungu, ili kupokea kutoka kwake kila dakika kile atoacho. Ingia ndani zaidi bado katika agano lake la ukombozi, pamoja na ahadi yake ya kukirudisha kwa utukufu zaidi kuliko wakati wowote kile ulichokipoteza, na kwa Mwanawe na Roho wake kukupa ndani yako pasipo kukoma, Uwepo na Uweza wake halisi wa Kimungu. Na hivyo umngojee Mungu wako daima na Yeye peke yake.

'Ee nafsi yangu, umngojee Mungu peke yake.' Hakuna maneno yawezayo kueleza, wala moyo kuwaza, utajiri wa utukufu wa siri hii ya Baba na ya Kristo. Mungu wetu, katika wororo usio na kikomo na uweza wote wa pendo lake, angoja kuwa Uzima wetu na Furaha yetu. Ee, nafsi yangu! isiwe tena lazima nirudie maneno haya, 'Umngojee Mungu,' bali yote yaliyomo ndani yangu na yainuke na kuimba: 'Kweli nafsi yangu inamngojea Mungu. Nakungoja Wewe mchana kutwa.'

'Ee nafsi yangu, umngojee Mungu peke yake!'