Mungu Mwenyezi

Siku ya Ishirini na Moja. KUMNGOJEA MUNGU: Mungu Mwenyezi.

'Wamngojao Bwana watapata nguvu mpya; watapanda juu kwa mbawa za tai; watapiga mbio, wala hawatachoka; watatembea, wala hawatazimia.'—Isaya 40:31.

KUNGOJA sikuzote huchukua tabia ya mawazo yetu juu ya yule tunayemngojea. Kumngojea kwetu Mungu kutategemea sana imani yetu juu ya jinsi Yeye alivyo. Katika fungu letu tunao mwisho wa kifungu ambamo Mungu anajifunua kuwa ndiye wa Milele na Mwenyezi. Ufunuo huo unapoingia katika nafsi yetu, ndipo kungoja kutakapokuwa kielelezo cha hiari cha kile tunachomjua kuwa—Mungu astahiliye kabisa kabisa kungojewa.

Sikiliza maneno haya: 'Mbona unasema, Ee Yakobo, njia yangu imefichwa Bwana asiione?' Mbona unanena kana kwamba Mungu hasikii wala hasaidii?

'Je, hukujua, je, hukusikia, ya kwamba Yeye wa Milele, Bwana, Muumba wa miisho ya dunia, hazimii, wala hachoki?' Mbali na hayo, 'Yeye huwapa nguvu wazimiao, na wale wasio na uwezo huwaongezea nguvu. Hata vijana'—'utukufu wa vijana ni nguvu zao'—'hata vijana watazimia, na wanaume vijana wataanguka kabisa:' kila kihesabiwacho kuwa chenye nguvu kwa mwanadamu kitakuwa si kitu. 'Lakini wamngojao Bwana,' Yeye wa Milele, asiyezimia wala kuchoka, wao 'watapata nguvu mpya; watapanda juu kwa mbawa kama tai; watapiga mbio na,'—sikiliza sasa, watakuwa hodari kwa nguvu za Mungu, na, kama Yeye, 'hawatachoka; watatembea na,' kama Yeye, 'hawatazimia.'

Naam, 'watapanda juu kwa mbawa kama tai.' Unajua maana ya mbawa za tai. Tai ni mfalme wa ndege; yeye hupaa juu angani kuliko ndege wote. Waaminio wanapaswa kuishi maisha ya kimbingu, ndani ya Uwepo na Upendo na Furaha ya Mungu mwenyewe. Wanapaswa kuishi pale Mungu aishipo; wanahitaji nguvu za Mungu ili kupaa huko. Wale wamngojao watapewa nguvu hizo.

Unajua jinsi mbawa za tai zipatikanavyo. Kwa njia moja tu—kwa kuzaliwa tai. Wewe umezaliwa na Mungu. Unazo mbawa za tai. Huenda hukulijua hilo: huenda hujazitumia; lakini Mungu aweza kukufundisha kuzitumia, naye atakufundisha.

Unajua jinsi tai wanavyofundishwa kuzitumia mbawa zao. Tazama jabali lile linaloinuka futi elfu moja kutoka baharini. Tazama juu kabisa ukingo wa mwamba, palipo na kiota cha tai chenye hazina yake ya makinda mawili ya tai. Tazama ndege mama akija na kukitibua kiota chake, na kwa mdomo wake akiwasukuma wale ndege waoga kutoka ukingoni mwa genge. Tazama jinsi wanavyopapatika na kuanguka na kuzama kuelekea vilindini. Tazama sasa (Kumbukumbu la Torati 32:11) 'jinsi apapatikavyo juu ya makinda yake, na kuzitandaza mbawa zake, na kuwatwaa, na kuwachukua juu ya mbawa zake,' na hivyo, wakiwa wamebebwa juu ya mbawa zake, huwafikisha mahali pa salama. Naye hufanya hivyo tena na tena, kila mara akiwatupa nje juu ya genge, kisha akiwatwaa tena na kuwachukua. 'Hivyo Bwana peke yake alimwongoza.' Naam, silika ya yule tai mama ilikuwa kipawa cha Mungu, mwali mmoja wa upendo ule ambao kwa huo Mwenyezi huwazoeza watu wake kupaa kama kwa mbawa za tai.

Yeye hukitibua kiota chako. Huyakatisha matumaini yako. Huushusha ujasiri wako. Hukufanya uogope na kutetemeka, nguvu zako zote zikikoma, nawe ukijiona umechoka kabisa na huna msaada. Na wakati huo wote Yeye anakutandazia mbawa zake zenye nguvu ili uuegemeze udhaifu wako juu yake, akikutolea nguvu zake za milele za Muumba zitende kazi ndani yako. Na anachokiomba ni hiki tu, kwamba uzame chini katika kuchoka kwako na kumngojea Yeye; na kumruhusu, katika nguvu zake za Yehova, akuchukue huku ukibebwa juu ya mbawa za Uweza wake wote.

Mtoto mpendwa wa Mungu! Nakusihi, inua macho yako, umtazame Mungu wako! Msikilize Yeye asemaye kwamba hazimii wala hachoki, aahidiye kwamba wewe nawe hutazimia wala kuchoka, asiyeomba kitu ila jambo hili moja, kwamba umngojee Yeye. Na jibu lako na liwe, Kwa Mungu wa namna hii, mwenye uweza namna hii, mwaminifu namna hii, mpole namna hii,

'Ee nafsi yangu, umngojee Mungu peke yake!'