Yeye Atungojeaye Sisi

Siku ya Ishirini. KUMNGOJEA MUNGU: Yeye Atungojeaye Sisi.

'Na kwa hiyo Bwana atangoja, ili apate kuwaneemesha ninyi; na kwa hiyo atatukuzwa, ili apate kuwarehemu ninyi; kwa maana Bwana ni Mungu wa hukumu; heri wote wamngojao yeye.'—Isaya 30:18

HATUNA budi kufikiri si juu ya kumngojea kwetu Mungu tu, bali pia juu ya jambo lililo la ajabu zaidi, yaani, jinsi Mungu anavyotungojea sisi. Kumwona yeye akitungojea kutatia msukumo mpya na moyo mpya katika kumngojea kwetu yeye. Kutatupa uhakika usioelezeka kwamba kungoja kwetu hakuwezi kuwa bure. Ikiwa yeye anatungojea, basi tunaweza kuwa na hakika kwamba tumekaribishwa kupita kiasi; kwamba anafurahi kuwaona wale ambao amekuwa akiwatafuta. Basi na tujaribu hata sasa hivi, wakati huu, katika roho ya kumngojea Mungu kwa unyenyekevu, kufahamu kidogo maana ya maneno haya: 'Kwa hiyo Bwana atangoja, ili apate kuwaneemesha ninyi.' Nasi tutaupokea ujumbe huu na kuuitikia: 'Heri wote wamngojao yeye.'

Tazama juu, umwone Mungu mkuu katika kiti chake cha enzi. Yeye ni Upendo—shauku isiyokoma, isiyoelezeka, ya kuwashirikisha viumbe vyake vyote wema wake na heri yake mwenyewe. Anatamani na kufurahia kubariki. Anayo makusudi matukufu yasiyowazika kwa kila mmoja wa watoto wake: kwa uweza wa Roho wake Mtakatifu kuudhihirisha ndani yao upendo wake na uweza wake. Anangoja kwa shauku zote za moyo wa baba. Anangoja ili apate kuwaneemesha ninyi. Na kila mara ujapo kumngojea, au unapotafuta kuidumisha katika maisha ya kila siku ile desturi takatifu ya kungoja, waweza kutazama juu na kumwona yu tayari kukulaki, akingoja ili apate kukuneemesha. Naam, unganisha kila tendo, kila pumzi ya maisha ya kungoja, na kule kumwona kwa imani Mungu wako akikungojea.

Nawe ukiuliza, imekuwaje, ikiwa anangoja ili apate kuneemesha, kwamba hata baada ya kuja kwangu na kumngojea, hanipi msaada niutafutao, bali anaendelea kungoja zaidi na zaidi? Jibu ni la sehemu mbili. La kwanza ni hili: Mungu ni mkulima mwenye hekima, 'angojaye mazao ya nchi yaliyo ya thamani, na kuyastahimili kwa saburi nyingi.' Hawezi kuyachuma matunda kabla hayajaiva. Anajua wakati tulipo tayari kiroho kuipokea baraka kwa faida yetu na kwa utukufu wake. Kungoja katika mwanga wa jua la upendo wake ndiko kutakakoiivisha nafsi kwa ajili ya baraka yake. Kungoja chini ya wingu la majaribu, limwagalo baadaye manyunyu ya baraka, ni jambo la lazima vilevile. Uwe na hakika kwamba Mungu akingoja muda mrefu kuliko utakavyo wewe, ni kwa ajili tu ya kuifanya baraka kuwa ya thamani maradufu. Mungu alingoja miaka elfu nne, hata ulipowadia utimilifu wa wakati, ndipo akamtuma Mwanawe: nyakati zetu zimo mikononi mwake: atawapatia haki wateule wake upesi: atafanya haraka kutusaidia, wala hatakawia hata saa moja zaidi ya ipasavyo.

Jibu la pili laelekeza kwa yale yaliyokwisha kusemwa. Mtoaji ni bora kuliko kipawa chake; Mungu ni zaidi ya baraka; na kule kuachwa kwetu tukimngojea ndiyo njia pekee ya kujifunza kuupata uzima wetu na furaha yetu ndani yake mwenyewe. Laiti watoto wa Mungu wangalijua jinsi walivyo na Mungu mtukufu, na jinsi lilivyo pendeleo kubwa kuunganishwa katika ushirika naye mwenyewe, wangalifurahi ndani yake hata anapowaacha wakingoja. Wangalijifunza kuelewa vizuri kuliko wakati wo wote; 'Kwa hiyo Bwana atangoja, ili apate kuwaneemesha ninyi.' Kungoja kwake kutakuwa ndio uthibitisho mkuu kabisa wa neema yake.

'Heri wote wamngojao yeye.' Malkia wetu anao wanawake wa heshima wamngojeao daima. Cheo chao ni cha chini na cha utumishi, lakini huhesabiwa kuwa cha heshima kuu na pendeleo kubwa, kwa sababu mtawala mwenye hekima na fadhili huwafanya kuwa wenzake na rafiki zake. Ni heshima na heri iliyoje kuwa watumishi wamngojeao Mungu wa Milele, tukiwa macho daima kuona kila ishara ya mapenzi yake au kibali chake, tukiutambua daima ukaribu wake, wema wake, na neema yake! 'Bwana ni mwema kwa hao wamngojao.' 'Heri wote wamngojao yeye.' Naam, ni heri nafsi ingojayo na Mungu angojaye wanapokutana. Mungu hawezi kuifanya kazi yake pasipo yeye na sisi kuungojea wakati wake: basi kungoja na kuwe kazi yetu, kama kulivyo kazi yake. Na ikiwa kungoja kwake si kitu ila wema na neema tupu, basi kwetu sisi kungoja na kusiwe kitu ila kuufurahia wema huo, na kuitazamia neema hiyo kwa uhakika. Na kila wazo la kungoja na liwe kwetu usemi tu wa heri isiyochanganyika na kitu, isiyotamkika, kwa sababu latupeleka kwa Mungu angojaye ili ajijulishe kwetu kwa ukamilifu kuwa ndiye Mwenye Neema.

'Ee nafsi yangu, umngojee Mungu peke yake!'