Upendo Upitao Ufahamu

“Na kuujua upendo wa Kristo upitao ufahamu.”
(Waefeso 3:19.)

Kama ningeweza tu kuwafanya watu waielewe maana halisi ya maneno ya mtume Yohana—“Mungu ni upendo,” ningeutwaa mstari huo mmoja tu, na ningekwenda huku na huku ulimwenguni kote nikiitangaza kweli hii tukufu. Ukiweza kumsadikisha mtu kwamba wewe wampenda, umeushinda moyo wake. Kama tungewafanya watu waamini kweli kweli kwamba Mungu anawapenda, jinsi tungewaona wakisongana kuingia katika ufalme wa mbinguni! Tatizo ni kwamba watu hudhani Mungu anawachukia; na hivyo wanamkimbia yeye wakati wote.

Miaka kadhaa iliyopita tulijenga kanisa huko Chicago; nasi tulikuwa na shauku kubwa ya kuwafundisha watu upendo wa Mungu. Tulifikiri kwamba kama tusingeweza kuuhubiri hata uingie mioyoni mwao, tungejaribu kuuchoma humo; hivyo tukayaweka maneno haya juu ya mimbari yenyewe kwa taa za gesi—Mungu ni Upendo. Usiku mmoja mtu mmoja aliyekuwa akipita barabarani alichungulia mlangoni, akauona mstari ule. Alikuwa mpotevu maskini. Alipoendelea kupita alifikiri moyoni mwake, “Mungu ni Upendo! La! Yeye hanipendi mimi; kwa maana mimi ni mwenye dhambi maskini na mnyonge.” Alijaribu kuyaondoa maneno yale akilini mwake; lakini yalionekana kusimama mbele yake yakiwa yameandikwa kwa herufi za moto. Alikwenda mbele kidogo; kisha akageuka, akarudi nyuma, akaingia ndani ya mkutano. Hakuyasikia mahubiri yale; lakini maneno ya mstari ule mfupi yalikuwa yamekita ndani sana ya moyo wake, na hilo lilitosha. Si kitu kikubwa lile wasemalo watu, ikiwa tu Neno la Mungu litapata nafasi ya kuingia moyoni mwa mwenye dhambi. Alibaki baada ya mkutano wa kwanza kuisha; nami nikamkuta pale akilia kama mtoto mdogo. Nilipozifunua Maandiko na kumweleza jinsi Mungu alivyokuwa akimpenda wakati wote, ijapokuwa alikuwa amezurura mbali kiasi kile, na jinsi Mungu alivyokuwa akingoja kumpokea na kumsamehe, nuru ya Injili iliingia akilini mwake, naye akaenda zake akifurahi.

Hakuna kitu duniani humu ambacho watu hukithamini kama wanavyoithamini Upendo. Nionyeshe mtu asiye na yeyote wa kumjali au kumpenda, nami nitakuonyesha mmoja wa viumbe wenye taabu kupita wote juu ya uso wa dunia. Kwa nini watu hujiua? Mara nyingi sana ni kwa sababu wazo hili huwaingia kwa siri—kwamba hakuna anayewapenda; nao wangependelea kufa kuliko kuishi.

Sijui kweli yoyote katika Biblia nzima ambayo yapasa kutugusa kwa nguvu na kwa upole namna ile ya kweli ya Upendo wa Mungu; wala hakuna kweli katika Biblia ambayo Shetani angependa kuifuta kuliko hiyo. Kwa muda wa zaidi ya miaka elfu sita amekuwa akijaribu kuwashawishi watu kwamba Mungu hawapendi wao. Alifaulu kuwafanya wazazi wetu wa kwanza waliamini uongo huu; naye hufaulu mara nyingi mno kwa watoto wao pia.

Wazo kwamba Mungu hatupendi mara nyingi hutokana na mafundisho ya uongo. Akina mama hukosea wanapowafundisha watoto wao kwamba Mungu hawapendi wanapotenda mabaya; bali huwapenda tu wanapotenda mema. Hilo halifundishwi katika Maandiko. Wewe huwafundishi watoto wako kwamba wanapotenda mabaya wewe unawachukia. Kutenda kwao mabaya hakuugeuzi upendo wako kuwa chuki; kama kungeugeuza, ungeugeuza upendo wako mara nyingi mno. Kwa sababu tu mtoto wako ana kinyongo, au ametenda tendo fulani la kutokutii, wewe humtupi nje kana kwamba si wako! La! Yeye bado ni mtoto wako; nawe wampenda. Na kama watu wamepotea mbali na Mungu, haifuati kwamba yeye anawachukia wao. Ni dhambi ndiyo aichukiayo.

Naamini sababu inayowafanya watu wengi sana kudhani kwamba Mungu hawapendi ni kwamba wanampima Mungu kwa kipimo chao wenyewe kilicho kidogo, kutoka mahali pale wasimamapo wao wenyewe. Sisi huwapenda watu maadamu tunawaona kuwa wanastahili upendo wetu; wasipostahili, twawatupa mbali. Si hivyo kwa Mungu. Kuna tofauti kubwa mno kati ya upendo wa kibinadamu na upendo wa Kimungu.

Katika Waefeso 3:18 twaambiwa juu ya upana, na urefu, na kina, na kimo cha upendo wa Mungu. Wengi wetu hudhani kwamba twajua kitu fulani juu ya upendo wa Mungu; lakini baada ya karne nyingi zijazo tutakiri kwamba hatukupata kamwe kujua mengi juu yake. Kolumbus aliigundua Amerika; lakini alijua nini juu ya maziwa yake makuu, na mito yake, na misitu yake, na Bonde la Mississippi? Alikufa bila kujua mengi juu ya kile alichokigundua. Vivyo hivyo, wengi wetu tumegundua kitu fulani cha upendo wa Mungu; lakini kuna vimo, na vina, na urefu wake ambao hatuvijui. Upendo ule ni bahari kuu; nasi twahitaji kujitosa ndani yake kabla ya kujua lolote juu yake kweli kweli. Yasemwa juu ya Askofu Mkuu mmoja Mkatoliki wa Paris kwamba alipotupwa gerezani na kuhukumiwa kupigwa risasi, muda mfupi kabla ya kutolewa nje ili afe, aliona dirisha katika chumba chake lenye umbo la msalaba. Juu ya msalaba ule aliandika “kimo,” na chini yake “kina,” na mwishoni mwa kila mkono wake “urefu.” Alikuwa ameionja kweli ile iliyomo katika wimbo ule—

“Niutazamapo Msalaba ule wa ajabu,

Ambao juu yake Mkuu wa Utukufu alikufa.”

Tutakapo kuujua upendo wa Mungu, yatupasa kwenda Kalvari. Je, twaweza kuutazama mandhari ule, na kusema kwamba Mungu hakutupenda? Msalaba ule wanena juu ya upendo wa Mungu. Hapajapata kufundishwa upendo mkuu kuliko ule aufundishao msalaba. Ni nini kilichomsukuma Mungu amtoe Kristo?—ni nini kilichomsukuma Kristo afe?—kama si upendo? “Hakuna aliye na upendo mwingi kuliko huu, wa mtu kuutoa uhai wake kwa ajili ya rafiki zake.” Kristo aliutoa uhai wake kwa ajili ya adui zake; Kristo aliutoa uhai wake kwa ajili ya wauaji wake; Kristo aliutoa uhai wake kwa ajili ya wale waliomchukia; na roho ya msalaba, roho ya Kalvari, ni upendo. Walipokuwa wakimdhihaki na kumcheka, alisema nini yeye? “Baba, uwasamehe, kwa kuwa hawajui watendalo.” Huo ndio upendo. Hakuuita moto ushuke kutoka mbinguni uwateketeze; hakukuwa na kitu chochote ila upendo tu ndani ya moyo wake.

Ukiisoma Biblia kwa bidii utaona kwamba upendo wa Mungu haubadiliki. Wengi waliokupenda wakati mmoja pengine wamepoa katika mapenzi yao, nao wamegeuka na kukuacha: yamkini upendo wao umebadilika kuwa chuki. Si hivyo kwa Mungu. Imeandikwa juu ya Yesu Kristo, wakati ule ule alipokuwa karibu kutengwa na wanafunzi wake na kuchukuliwa mpaka Kalvari, kwamba: “naye alikuwa amewapenda watu wake waliokuwa katika ulimwengu, aliwapenda upeo” (Yohana 13:1). Alijua kwamba mmoja wa wanafunzi wake angemsaliti; na hata hivyo alimpenda Yuda. Alijua kwamba mwanafunzi mwingine angemkana, na kuapa kwamba hakumjua kamwe; na hata hivyo alimpenda Petro. Ni ule upendo ambao Kristo alikuwa nao kwa Petro ndio uliouvunja moyo wake, na kumrudisha kwa toba mpaka miguuni pa Bwana wake. Kwa muda wa miaka mitatu Yesu alikuwa pamoja na wanafunzi wake akijaribu kuwafundisha upendo wake, si kwa maisha yake na maneno yake tu, bali kwa matendo yake pia. Na katika usiku ule aliposalitiwa, achukua bakuli la maji, ajifunga taulo kiunoni, na kushika mahali pa mtumishi, awaosha miguu yao; alitaka kuwasadikisha juu ya upendo wake usiobadilika.

Hakuna fungu la Maandiko nisomalo mara nyingi kama Yohana sura ya 14; wala hakuna lingine lililo tamu zaidi kwangu. Sichoki kamwe kulisoma. Sikilizeni asemayo Bwana wetu, akiumimina moyo wake mbele ya Wanafunzi wake: “Siku ile ninyi mtatambua ya kuwa mimi ni ndani ya Baba yangu, nanyi ndani yangu, nami ndani yenu. Yeye aliye na amri zangu, na kuzishika, yeye ndiye anipendaye; naye anipendaye atapendwa na Baba yangu” (14:20, 21). Fikirini juu ya Mungu mkuu aliyeziumba mbingu na nchi akikupenda wewe na mimi! . . . “Mtu akinipenda, atalishika neno langu; na Baba yangu atampenda; nasi tutakuja kwake, na kufanya makao kwake” (mstari 23).

Laiti akili zetu ndogo zingeweza kuishika kweli hii kuu, kwamba Baba na Mwana wanatupenda sisi kiasi kwamba wanatamani kuja na kukaa pamoja nasi. Si kukaa usiku mmoja tu, bali kuja na kukaa ndani ya mioyo yetu.

Tunalo fungu lingine la ajabu zaidi katika Yohana 17:23. “Mimi ndani yao, nawe ndani yangu, ili wawe wamekamilika katika umoja; tena ulimwengu upate kujua ya kuwa ndiwe uliyenituma, na ya kuwa umewapenda wao kama ulivyonipenda mimi.” Nadhani hilo ni mojawapo ya maneno ya ajabu kuliko yote yaliyopata kutoka midomoni mwa Yesu Kristo. Hakuna sababu yoyote ya Baba kutompenda yeye. Alikuwa mtii hata mauti; hakuivunja kamwe sheria ya Baba, wala hakukengeuka katika njia ya utii mkamilifu hata kwa unywele mmoja. Kwetu sisi ni tofauti kabisa; na hata hivyo, pamoja na uasi wetu wote na upumbavu wetu wote, asema kwamba kama tunamtumaini Kristo, Baba anatupenda sisi kama ampendavyo Mwana. Upendo wa ajabu! Upendo wa kustaajabisha! Kwamba Mungu aweza kutupenda sisi kama ampendavyo Mwanawe mwenyewe laonekana jambo jema mno lisiloweza kuwa kweli. Lakini ndivyo afundishavyo Yesu Kristo.

Ni vigumu kumfanya mwenye dhambi auamini upendo huu wa Mungu usiobadilika. Mtu akiisha kuzurura mbali na Mungu, hudhani kwamba Mungu anamchukia. Yatupasa kutofautisha kati ya dhambi na mwenye dhambi. Mungu ampenda mwenye dhambi; lakini yeye anaichukia dhambi. Anaichukia dhambi kwa sababu inayaharibu maisha ya mwanadamu. Ni kwa sababu tu Mungu ampendavyo mwenye dhambi ndiyo maana anaichukia dhambi.

Upendo wa Mungu si tu kwamba haubadiliki, bali pia haupungui kamwe. Katika Isaya 49:15, 16 twasoma: “Je! mwanamke aweza kumsahau mtoto wake anyonyaye, hata asimhurumie mwana wa tumbo lake? Naam, hawa waweza kusahau, lakini mimi sitakusahau wewe. Tazama, nimekuchora katika vitanga vya mikono yangu; kuta zako ziko mbele zangu daima.”

Basi upendo wa kibinadamu ulio na nguvu kuliko yote tuujuao ni upendo wa mama. Mambo mengi yaweza kumtenga mtu na mkewe. Baba aweza kumpa mtoto wake mgongo; ndugu na dada waweza kuwa adui wasiopatana kamwe; waume waweza kuwaacha wake zao; nao wake, waume zao. Lakini upendo wa mama hustahimili katika yote. Katika sifa njema, katika sifa mbaya, hata mbele ya hukumu ya ulimwengu wote, mama huendelea kupenda, na kutumaini kwamba mtoto wake aweza kuziacha njia zake mbaya na kutubu. Hukumbuka tabasamu za mtoto mchanga, na kicheko cha furaha cha utoto, na matumaini ya ujana; wala hawezi kamwe kufanywa amdhanie kuwa hastahili. Mauti haiwezi kuuzima upendo wa mama; una nguvu kuliko mauti.

Umepata kumwona mama akimwuguza mtoto wake mgonjwa. Jinsi angependa kwa moyo wote kuuchukua ugonjwa ule katika mwili wake mwenyewe kama kwa njia hiyo angeweza kumwondolea mtoto wake taabu! Juma baada ya juma yeye atakesha; hataruhusu mtu mwingine yeyote amtunze mtoto yule mgonjwa.

Rafiki yangu mmoja, muda fulani uliopita, alikuwa akitembelea katika nyumba moja nzuri ambamo alikutana na marafiki kadhaa. Baada ya wote kuwa wameondoka zao, na kwa kuwa alikuwa amesahau kitu fulani pale, alirudi ili akikichukue. Huko akamkuta yule mwanamke mwenye nyumba, mwanamke tajiri, ameketi nyuma ya kijana maskini aliyeonekana kama mzururaji wa barabarani. Alikuwa mwanawe mwenyewe. Kama yule mwana mpotevu, alikuwa amezurura mbali sana: na hata hivyo mama yule akasema, “Huyu ni mwanangu; ningali nampenda hata sasa.” Mchukue mama mwenye watoto tisa au kumi, mmoja wao akipotea, aonekana kumpenda yule mmoja kuliko wote waliosalia.

Mchungaji mmoja mkuu katika jimbo la New York aliwahi kuniambia habari za baba mmoja aliyekuwa mtu mwovu sana. Mama alifanya kila alichoweza kumzuia mwanawe asichafuliwe; lakini uvutano wa baba ulikuwa na nguvu zaidi, naye akamwongoza mwanawe katika kila aina ya dhambi hata kijana yule akawa mmoja wa wahalifu waovu kupita wote. Alifanya uuaji, akapelekwa mahakamani kuhukumiwa. Katika kesi ile yote, yule mama mjane (kwa maana baba alikuwa amekwisha kufa) aliketi mahakamani. Mashahidi walipotoa ushuhuda dhidi ya kijana yule, ilionekana kumwumiza yule mama kuliko mwana mwenyewe. Alipoonekana kuwa na hatia na kuhukumiwa kufa, kila mtu mwingine, akihisi kwamba hukumu ile ilikuwa ya haki, alionekana kuridhika na matokeo yake. Lakini upendo wa mama haukusita kamwe. Aliomba asamehewe adhabu yake; lakini hilo likakataliwa. Baada ya kuuawa kwake aliomba apewe maiti yake; na hilo nalo likakataliwa. Kwa kufuata desturi, ilizikwa katika ua wa gereza. Muda mfupi baadaye mama mwenyewe akafa; lakini kabla hajaondolewa, alionyesha shauku ya kuzikwa kando ya mwanawe. Hakuona haya kujulikana kuwa mama wa muuaji.

Yasimuliwa habari za msichana mmoja huko Uskoti, aliyeondoka nyumbani kwao, akawa mtu aliyetupwa huko Glasgow. Mama yake alimtafuta mbali na karibu, lakini bure. Mwishowe, akaifanya picha yake itundikwe kwenye kuta za vyumba vya Misheni ya Usiku wa Manane, mahali walipokusanyika wanawake walioachwa. Wengi waliitupia picha ile jicho la kupita tu. Mmoja alikawia kando ya picha ile. Ni uso ule ule mpendwa uliomtazama chini alipokuwa mtoto mdogo. Mama hakumsahau wala hakumtupa mtoto wake mwenye dhambi; kama angemtupa, picha yake isingetundikwa kamwe kwenye kuta zile. Midomo ile ilionekana kufunguka, na kunong’ona, “Njoo nyumbani; nimekusamehe, na ningali nakupenda.” Msichana yule maskini akaanguka chini akizidiwa na hisia zake. Yeye ndiye alikuwa binti mpotevu. Kuuona uso wa mama yake kulikuwa kumemvunja moyo. Akatubu kweli kweli kwa ajili ya dhambi zake, na kwa moyo uliojaa huzuni na aibu, akarudi nyumbani kwao alikokuwa ameacha; na mama na binti wakaunganishwa tena.

Lakini niwaambieni kwamba hakuna upendo wa mama uwezao kulinganishwa na upendo wa Mungu; haukipimi kimo wala kina cha upendo wa Mungu. Hakuna mama duniani humu aliyepata kumpenda mtoto wake kama Mungu anavyokupenda wewe na mimi. Fikirini juu ya upendo ambao Mungu lazima alikuwa nao alipomtoa Mwanawe ili afe kwa ajili ya ulimwengu. Zamani nilikuwa nikimfikiri Kristo zaidi sana kuliko nilivyomfikiri Baba. Kwa namna fulani nilikuwa na wazo kwamba Mungu alikuwa hakimu mkali; na kwamba Kristo alikuja kati yangu na Mungu, akaituliza hasira ya Mungu. Lakini baada ya mimi kuwa baba, na kwa miaka mingi kuwa na mwana wa pekee, nilipomtazama mvulana wangu niliwaza juu ya Baba akimtoa Mwanawe ili afe; nayo ikanionekana kana kwamba ilihitaji upendo mkubwa zaidi kwa Baba kumtoa Mwanawe kuliko kwa Mwana kufa. Ee, upendo ambao Mungu lazima aliupata kwa ulimwengu alipomtoa Mwanawe ili afe kwa ajili yake! “Kwa maana jinsi hii Mungu aliupenda ulimwengu, hata akamtoa Mwanawe pekee, ili kila mtu amwaminiye asipotee, bali awe na uzima wa milele” (Yohana 3:16). Sijaweza kamwe kuhubiri kwa kutumia mstari ule. Mara nyingi nimewaza kwamba nitafanya hivyo; lakini uko juu mno kiasi kwamba siwezi kamwe kukwea hata kimo chake; nimekuwa nikiunukuu tu na kupita. Ni nani awezaye kukipima kina cha maneno haya: “Mungu aliupenda ulimwengu jinsi hii?” Hatuwezi kamwe kuvipanda vimo vya upendo wake wala kukipima kina chake. Paulo aliomba apate kujua kimo, na kina, na urefu, na upana wa upendo wa Mungu; lakini ilikuwa zaidi ya uwezo wake wa kuvumbua. Wenyewe “upitao ufahamu” (Waefeso 3:19).

Hakuna kitu kinachotuambia juu ya upendo wa Mungu kama msalaba wa Kristo. Njoo pamoja nami mpaka Kalvari, ukamtazame Mwana wa Mungu akining’inia pale. Je, waweza kukisikia kilio kile kikali kutoka midomoni mwake iliyokuwa ikifa: “Baba, uwasamehe, kwa kuwa hawajui watendalo!” na kusema kwamba yeye hakupendi? “Hakuna aliye na upendo mwingi kuliko huu, wa mtu kuutoa uhai wake kwa ajili ya rafiki zake” (Yohana 15:13). Lakini Yesu Kristo aliutoa uhai wake kwa ajili ya adui zake.

Wazo lingine ni hili: Yeye alitupenda muda mrefu kabla hatujapata kumfikiri yeye. Wazo kwamba hatupendi mpaka sisi tumpende yeye kwanza halionekani popote katika Maandiko. Katika 1 Yohana 4:10 imeandikwa: “Hili ndilo pendo, si kwamba sisi tulimpenda Mungu, bali kwamba yeye alitupenda sisi, akamtuma Mwanawe kuwa kipatanisho kwa dhambi zetu.” Alitupenda sisi kabla hatujapata kufikiri kumpenda yeye. Wewe uliwapenda watoto wako kabla hawajajua lolote juu ya upendo wako. Vivyo hivyo, muda mrefu kabla hatujapata kumfikiri Mungu, sisi tulikuwa katika mawazo yake.

Ni nini kilichomrudisha yule mwana mpotevu nyumbani kwao? Ni lile wazo kwamba baba yake alikuwa akimpenda. Tuseme habari zingalimfikia kwamba alikuwa ametupwa nje, na kwamba baba yake hakumjali tena hata kidogo, je, angalirudi kweli? Kamwe! Lakini wazo likamzukia moyoni kwamba baba yake alikuwa angali akimpenda: kwa hiyo akaondoka, akarudi nyumbani kwao. Msomaji mpendwa, upendo wa Baba ndio wapasao kuturudisha kwake sisi pia. Ni msiba wa Adamu na dhambi yake ndiyo iliyoudhihirisha upendo wa Mungu. Adamu alipoanguka, Mungu alishuka chini na kutenda naye kwa rehema. Kama mtu yeyote atapotea, haitakuwa kwa sababu Mungu hampendi: itakuwa kwa sababu ameupinga upendo wa Mungu.

Ni nini kitakachoifanya Mbingu kuwa ya kuvutia? Je, ni malango ya lulu au barabara za dhahabu? La. Mbingu itakuwa ya kuvutia kwa sababu huko tutamwona yeye aliyetupenda kiasi cha kumtoa Mwanawe pekee ili afe kwa ajili yetu. Ni nini kinachoifanya nyumba kuwa ya kuvutia? Je, ni samani nzuri na vyumba vya fahari? La; nyumba nyingine zenye vitu hivyo vyote ni kama makaburi yaliyopakwa chokaa. Huko Brooklyn mama mmoja alikuwa akifa; nayo ikawa lazima mtoto wake aondolewe kwake, kwa sababu yule mtoto mdogo hakuweza kuufahamu ugonjwa ule ulivyokuwa, naye alimtaabisha mama yake. Kila usiku yule mtoto alijilaza akilia hata usingizi umchukue katika nyumba ya jirani, kwa sababu alitaka kurudi kwa mama yake; lakini mama alizidi kuwa mgonjwa, nao hawakuweza kumrudisha mtoto nyumbani. Mwishowe mama akafa; na baada ya kufa kwake wakaona ni afadhali wasimwache mtoto amwone mama yake aliyekufa ndani ya jeneza. Baada ya mazishi mtoto alikimbilia chumba kimoja akilia “Mama! mama!” kisha akaenda kingine akilia “Mama! mama!” na hivyo akaizunguka nyumba yote: na yule kiumbe mdogo alipomkosa yule mpendwa wake, akalia ili arudishwe kwa majirani. Basi kinachoifanya mbingu kuwa ya kuvutia ni wazo kwamba tutamwona Kristo aliyetupenda na kujitoa nafsi yake kwa ajili yetu.

Ukiniuliza kwa nini Mungu apaswe kutupenda sisi, siwezi kusema. Nadhani ni kwa sababu yeye ni Baba wa kweli. Ni asili yake kupenda; kama vile ilivyo asili ya jua kuangaza. Anataka wewe pia ushiriki katika upendo huo. Usiache kutokuamini kwako kukuzuie usimwendee yeye. Usidhani kwamba, kwa sababu wewe ni mwenye dhambi, Mungu hakupendi wewe, wala hakujali wewe. Yeye anakupenda kweli! Anataka kukuokoa na kukubariki.

“Kwa maana hapo tulipokuwa hatuna nguvu, wakati ulipotimia Kristo alikufa kwa ajili ya waovu” (Warumi 5:6). Je, hilo halikutoshi kukusadikisha kwamba yeye anakupenda? Asingekufa kwa ajili yako kama asingelikupenda. Je, moyo wako ni mgumu kiasi kwamba waweza kujikaza dhidi ya upendo wake, na kuudharau na kuukataa? Wewe waweza kufanya hivyo; lakini utafanya hivyo kwa hasara yako mwenyewe.

Naweza kuwazia baadhi wakijisemea nafsini mwao, “Naam, twaamini kwamba Mungu anatupenda, kama sisi tunampenda yeye; twaamini kwamba Mungu anawapenda walio safi na watakatifu.” Niseme hivi, rafiki yangu, si tu kwamba Mungu anawapenda walio safi na watakatifu: yeye anawapenda pia wasiomcha Mungu. “Bali Mungu aonyesha pendo lake yeye mwenyewe kwetu sisi, kwa kuwa Kristo alikufa kwa ajili yetu, tulipokuwa tungali wenye dhambi” (Warumi 5:8). Mungu alimtuma yeye ili afe kwa ajili ya dhambi za ulimwengu wote. Kama wewe ni wa ulimwengu huu, basi una fungu na sehemu katika upendo huu ulioonyeshwa katika msalaba wa Kristo.

Kuna fungu katika Ufunuo (1:5) ambalo mimi nalifikiri sana—“Yeye atupendaye na kutuosha.” Yaweza kudhaniwa kwamba Mungu angetuosha kwanza, na kisha atupende. Lakini la, yeye alitupenda kwanza. Yapata miaka minane iliyopita nchi nzima ilitaharuki sana kwa habari za Charlie Ross, mtoto wa miaka minne, aliyeibiwa. Watu wawili waliokuwa ndani ya gari dogo walimwuliza yeye na kaka yake mkubwa kama walitaka peremende. Kisha wakaondoka na yule mtoto mdogo, wakamwacha yule mkubwa. Kwa miaka mingi upelelezi umefanywa katika kila Jimbo na kila eneo. Watu wamekwenda hata Uingereza, na Ufaransa, na Ujerumani, wakamtafuta mtoto yule bure. Mama yake angali hai akiwa na tumaini kwamba atamwona Charlie wake aliyepotea siku nyingi. Sikumbuki nchi nzima kupata kutaharuki hivyo kwa jambo lolote lile isipokuwa ilipokuwa mauaji ya Rais Garfield. Basi, tuseme mama yake Charlie Ross alikuwa katika mkutano fulani; na kwamba wakati mhubiri alipokuwa akinena, ikatokea akatazama chini kati ya wasikilizaji na kumwona mwanawe aliyepotea siku nyingi. Tuseme alikuwa maskini, na mchafu na mwenye matambara, asiye na viatu wala koti, angefanya nini? Je, angengoja mpaka aoshwe na kuvikwa nguo za heshima kabla ya kumkiri kuwa ni wake? La, angeshuka jukwaani mara moja, akimkimbilia na kumkumbatia mikononi mwake. Baada ya hapo ndipo angemsafisha na kumvika nguo. Ndivyo ilivyo kwa Mungu. Yeye alitupenda, na kutuosha. Naweza kuwazia mtu akisema, “Kama Mungu ananipenda, kwa nini hanifanyi kuwa mwema?” Mungu anataka wana na binti mbinguni; hataki mashine wala watumwa. Angeweza kuivunja mioyo yetu migumu, lakini anataka kutuvuta kwake mwenyewe kwa kamba za upendo.

Amekutaka wewe uketi pamoja naye katika karamu ya arusi ya Mwana-Kondoo; akuoshe, na kukufanya mweupe kuliko theluji. Anataka wewe utembee pamoja naye juu ya sakafu ya bilauri ya ulimwengu ule wa heri. Anataka kukutwaa uwe wa jamaa yake; na kukufanya uwe mwana au binti wa mbinguni. Je, utaukanyaga upendo wake chini ya miguu yako? au je, saa hii utajitoa nafsi yako kwake?

Wakati vita vyetu vile vibaya vya wenyewe kwa wenyewe vilipokuwa vikiendelea, mama mmoja alipata habari kwamba mwanawe alikuwa amejeruhiwa katika vita vya Wilderness. Akapanda treni ya kwanza, akaanza safari kumwendea mwanawe, ijapokuwa amri ilikuwa imetoka katika Idara ya Vita kwamba wanawake wasiruhusiwe tena kuingia ndani ya safu za jeshi. Lakini upendo wa mama haujui lolote juu ya amri, hivyo kwa machozi na maombi mengi akafanikiwa kupenya safu zile mpaka Wilderness. Mwishowe akaikuta hospitali alimokuwa mwanawe. Kisha akamwendea daktari akasema: “Je, utaniruhusu niende wodini nimwuguze mwanangu?”

Daktari akasema: “Sasa hivi tu ndipo nimemfanya mwanao apate usingizi; yu katika hali mbaya sana ya hatari; nami nachelea kwamba ukimwamsha, msisimko wake utakuwa mkuu kiasi kwamba utamwondolea uhai. Ni afadhali usubiri kwa muda kidogo, na kubaki huko nje mpaka nimwambie yeye kwamba umekuja, na kumfahamisha habari hizo kidogo kidogo.” Yule mama akamtazama daktari usoni akasema: “Daktari, tuseme mwanangu hataamka tena kamwe, nami nisipate kumwona akiwa hai kamwe! Niache niende nikaketi kando yake; sitasema naye hata neno moja.” “Kama hutasema naye neno, basi waweza kufanya hivyo,” akasema daktari.

Akanyatia mpaka kitandani na kumtazama mwanawe usoni. Jinsi alivyokuwa akitamani kumtazama! Jinsi macho yake yalivyoonekana kufanya karamu alipoutazama uso wake! Alipokaribia vya kutosha hakuweza kuizuia mikono yake; akauweka ule mkono wake laini na wenye upendo juu ya paji la uso wake. Mara ule mkono ulipoligusa paji la uso wa mwanawe, yeye, bila kuyafumbua macho yake, akapaza sauti: “Mama, umekuja!” Aliujua mguso wa ule mkono wenye upendo. Ulikuwamo upendo na huruma ndani yake.

Ee, mwenye dhambi, ukiuhisi mguso wa upendo wa Yesu utautambua; umejaa upole namna ile. Ulimwengu waweza kukutenda bila huruma; lakini Kristo hatakutenda hivyo kamwe. Hutapata kamwe Rafiki aliye bora kuliko yeye katika ulimwengu huu. Unachohitaji ni hiki—kumwendea yeye leo hii. Mkono wake wa upendo na uwe chini yako; mkono wake wa upendo na uwe ukikuzunguka; naye atakushika kwa nguvu kuu. Atakuhifadhi, na kuujaza moyo wako ule upole wake na upendo wake.

Naweza kuwazia baadhi yenu mkisema, “Nitamwendeaje mimi yeye?” Basi, mwendee kama vile tu ambavyo ungemwendea mama yako. Je, umepata kumtenda mama yako jeuri kubwa na ubaya mkubwa? Ikiwa ndivyo, wewe humwendea yeye na kumwambia, “Mama, nataka unisamehe mimi.” Mtende Kristo kwa njia iyo hiyo. Nenda kwake leo hii na kumwambia kwamba hukumpenda yeye, kwamba hukumtenda ipasavyo; ziungame dhambi zako, nawe uone jinsi atakavyokubariki upesi kiasi gani.

Nakumbushwa tukio lingine—la kijana mmoja aliyekuwa amehukumiwa na baraza la kijeshi na kuamriwa apigwe risasi. Mioyo ya baba na mama ilivunjika waliposikia habari zile. Katika nyumba ile alikuwamo msichana mdogo. Alikuwa amesoma maisha ya Abraham Lincoln, naye akasema: “Sasa, kama Abraham Lincoln angejua jinsi baba na mama yangu walivyompenda mwana wao, asingemruhusu kaka yangu kupigwa risasi.” Alitaka baba yake aende Washington kumwombea mwanawe. Lakini baba akasema: “La; hakuna faida yoyote; sheria sharti ipite njia yake. Wamekataa kumsamehe mmoja au wawili waliohukumiwa na baraza lile la kijeshi, na amri imekwisha kutoka kwamba Rais hataingilia tena; mtu akiisha kuhukumiwa na baraza la kijeshi sharti ateseke kwa matokeo yake.” Baba na mama yule hawakuwa na imani ya kuamini kwamba mwana wao angeweza kusamehewa.

Lakini yule msichana mdogo alikuwa na tumaini imara; akapanda treni huko juu Vermont, akaanza safari kwenda Washington. Alipofika kwenye Jumba la Rais askari walikataa kumwingiza ndani; lakini akaisimulia hadithi yake ya kusikitisha, nao wakamruhusu apite. Alipofika katika chumba cha Katibu, alipokuwako katibu wa faragha wa Rais, huyo alikataa kumruhusu aingie katika ofisi ya faragha ya Rais. Lakini yule msichana mdogo akaisimulia hadithi yake, nayo ikaugusa moyo wa katibu yule wa faragha; kwa hiyo akamwingiza ndani. Alipoingia katika chumba cha Abraham Lincoln, walikuwako maseneta wa Marekani, na majenerali, na magavana na wanasiasa wakuu, waliokuwa pale kwa shughuli muhimu za vita; lakini ikatokea Rais akamwona mtoto yule amesimama mlangoni pake. Alitaka kujua alichokitaka, naye akamwendea moja kwa moja na kumwambia hadithi yake kwa maneno yake mwenyewe. Yeye alikuwa baba, na machozi makubwa yakabubujika mashavuni mwa Abraham Lincoln. Akaandika barua ya haraka na kuipeleka jeshini ili kijana yule aletwe Washington mara moja. Alipofika, Rais akamsamehe, akampa likizo ya siku thelathini, na kumpeleka nyumbani pamoja na yule msichana mdogo ili kuifurahisha mioyo ya baba na mama.

Je, wataka kujua jinsi ya kumwendea Kristo? Nenda kama vile tu yule msichana mdogo alivyomwendea Abraham Lincoln. Yamkini unayo hadithi ya giza ya kusimulia. Isimulie yote; usiweke kitu chochote nyuma. Ikiwa Abraham Lincoln alimhurumia yule msichana mdogo, akalisikia ombi lake na kulijibu, je, wadhani Bwana Yesu hatalisikia ombi lako? Je, wadhani kwamba Abraham Lincoln, au mtu yeyote aliyepata kuishi juu ya dunia hii, alikuwa na huruma nyingi kama Kristo? La! Yeye ataguswa hapo ambapo hakuna mwingine atakayeguswa; ataonyesha rehema hapo ambapo hakuna mwingine atakayeonyesha; atasikia huruma hapo ambapo hakuna mwingine atakayesikia. Ukimwendea yeye moja kwa moja, ukiiungama dhambi yako na uhitaji wako, atakuokoa.

Miaka michache iliyopita mtu mmoja aliondoka Uingereza akaenda Amerika. Alikuwa Mwingereza; lakini akapewa uraia, na hivyo akawa raia wa Marekani. Baada ya miaka michache akajisikia hana raha wala hakuridhika, akaenda Kuba; na baada ya kukaa Kuba muda kidogo vita vya wenyewe kwa wenyewe vikazuka huko; ilikuwa mwaka wa 1867; naye mtu huyu akakamatwa na serikali ya Kihispania kama mpelelezi. Akahukumiwa na baraza la kijeshi, akaonekana kuwa na hatia na kuamriwa apigwe risasi. Kesi yote iliendeshwa kwa lugha ya Kihispania, naye mtu yule maskini hakujua yaliyokuwa yakiendelea. Walipomwambia hukumu ile, kwamba amepatikana na hatia na amehukumiwa kupigwa risasi, akapeleka ujumbe kwa Balozi wa Marekani na Balozi wa Uingereza, na kuweka shauri lote mbele yao, akithibitisha kutokuwa na hatia kwake na kudai ulinzi. Wakalichunguza shauri lile, wakaona kwamba mtu huyu ambaye maofisa wa Kihispania walikuwa wamemhukumu apigwe risasi hakuwa na hatia hata kidogo; wakamwendea Jenerali wa Kihispania na kusema, “Tazama hapa, mtu huyu uliyemhukumu kufa ni mtu asiye na hatia; hana kosa lolote.” Lakini Jenerali wa Kihispania akasema, “Amehukumiwa kwa sheria yetu; amepatikana na hatia; sharti afe.” Hapakuwa na waya wa umeme; nao watu hawa hawakuweza kushauriana na serikali zao.

Ikafika asubuhi ile ambayo mtu yule alipaswa kuuawa. Akatolewa nje ameketi juu ya jeneza lake ndani ya gari, akavutwa mpaka mahali alipopaswa kuuawa. Kaburi likachimbwa. Wakalitoa jeneza katika gari, wakamweka yule kijana juu yake, wakaichukua kofia nyeusi, nao walikuwa wakiivuta tu kumfunika uso wake. Askari wa Kihispania wakangoja amri ya kufyatua risasi. Lakini wakati ule ule Mabalozi wa Marekani na wa Uingereza wakawasili kwa magari. Balozi wa Uingereza akaruka kutoka katika gari lake akaitwaa union jack, ile bendera ya Uingereza, akamzungushia mtu yule, na Balozi wa Marekani akamzungushia ile bendera yenye nyota na mistari, kisha wakiwageukia maofisa wa Kihispania wakasema: “Fyatueni risasi juu ya bendera hizi kama mnathubutu.” Hawakuthubutu kufyatua risasi juu ya bendera zile. Kulikuwa na serikali mbili kubwa nyuma ya bendera zile. Hiyo ndiyo iliyokuwa siri yake.

“Alinileta mpaka nyumba ya karamu, na bendera yake juu yangu ilikuwa upendo. . . . Mkono wake wa kushoto u chini ya kichwa changu, na mkono wake wa kuume wanikumbatia” (Wimbo Ulio Bora 2:4, 6). Amshukuriwe Mungu kwamba twaweza kuja chini ya bendera hiyo leo hii tukitaka. Mwenye dhambi yeyote maskini aweza kuja chini ya bendera hiyo leo hii. Bendera yake ya upendo iko juu yetu. Injili iliyobarikiwa; habari zilizobarikiwa na za thamani. Ziamini leo hii; zipokee moyoni mwako; na uingie katika maisha mapya. Upendo wa Mungu na umiminwe moyoni mwako na Roho Mtakatifu leo hii: utaliondoa giza; utaiondoa huzuni; utaiondoa dhambi; na amani na furaha zitakuwa zako.