Kazi ya Roho Mtakatifu katika Yesu Kristo

Yesu Kristo ni kielelezo kikamilifu cha kazi kamili ya Roho Mtakatifu katika maisha ya mtu. Alichukuliwa mimba, akapewa nguvu, akaongozwa, akafundishwa, na hata akafufuliwa kutoka kwa wafu kwa Roho Mtakatifu, akiitimiza huduma yake kwa nguvu za Roho. Roho huyu huyu yupo tayari kwa waaminio leo ili waishi kwa ushindi, wamtumikie Mungu, na kuishinda dhambi.

Yesu Kristo mwenyewe ndiye udhihirisho mmoja mkamilifu katika historia wa kazi kamili ya Roho Mtakatifu ndani ya mwanadamu.

1. Yesu Kristo alizaliwa kwa Roho Mtakatifu. Tunasoma katika Luka 1:35, “Malaika akajibu, akamwambia, Roho Mtakatifu atakujilia juu yako, na nguvu zake Aliye juu zitakufunika kama kivuli; kwa sababu hiyo hicho kitakachozaliwa kitaitwa kitakatifu, Mwana wa Mungu.” Kama tulivyokwisha kuona, katika kuzaliwa mara ya pili mwumini huzaliwa na Mungu; lakini Yesu Kristo alizaliwa na Mungu katika kuzaliwa kwake kwa asili. Yeye ndiye Mwana pekee wa Mungu (Yohana 3:16). Ilikuwa kabisa kwa nguvu za Roho zilizotenda kazi ndani ya Mariamu ndipo Mwana wa Mungu aliumbwa ndani yake. Mtu aliyezaliwa mara ya pili ana asili ya kimwili aliyoipokea kutoka kwa baba yake wa duniani, na asili mpya iliyowasilishwa na Mungu. Yesu Kristo alikuwa na asili moja tu takatifu, ile iitwayo katika mwanadamu asili mpya. Walakini alikuwa mwanadamu halisi kwa kuwa alikuwa na mama wa kibinadamu.

2. Yesu Kristo aliishi maisha matakatifu yasiyo na doa, na akajitoa mwenyewe kwa Mungu bila doa kwa kutenda kazi kwa Roho Mtakatifu. Tunasoma katika Waebrania 9:14, “Basi si zaidi damu yake Kristo, ambaye kwa Roho wa milele alijitoa nafsi yake kwa Mungu kuwa sadaka isiyo na mawaa, itawasafisha dhamiri zenu na matendo mafu, mpate kumwabudu Mungu aliye hai?” Yesu Kristo alikutana na majaribu na kuyashinda kama vile wanadamu wengine waweza kukutana nayo na kuyashinda, kwa nguvu za Roho Mtakatifu. Alijaribiwa na akateswa kwa majaribu (Waebrania 3:18); alijaribiwa sawasawa na sisi katika mambo yote (Waebrania 4:15), lakini hakukubali kamwe kushindwa na jaribu kwa njia yo yote. Alijaribiwa pasipo dhambi kabisa; lakini alizishinda kwa njia iliyo wazi kwa sisi sote ili tuupate ushindi, yaani kwa nguvu za Roho Mtakatifu.

3. Yesu Kristo alitiwa mafuta na kufaishwa kwa ajili ya huduma na Roho Mtakatifu. Tunasoma katika Matendo 10:38, “Jinsi Mungu alivyomtia mafuta Yesu wa Nazareti kwa Roho Mtakatifu na nguvu; naye akazunguka huku akitenda kazi njema na kuponya wote walioonewa na Ibilisi; kwa maana Mungu alikuwa pamoja naye.” Katika maono ya kinabii ya Masihi ajaye katika Agano la Kale, tunasoma katika Isaya 61:1, “Roho ya Bwana MUNGU i juu yangu; kwa sababu BWANA amenitia mafuta niwahubiri wanyenyekevu habari njema; amenituma ili kuwaganga waliovunjika moyo, kuwatangazia mateka uhuru wao, na hao waliofungwa habari za kufunguliwa kwao.” Katika kumbukumbu ya Luka ya maisha ya Bwana wetu hapa duniani, katika Luka 4:14, tunasoma, “Yesu akarudi kwa nguvu za Roho, akaenda Galilaya; habari zake zikaenea katika nchi ile ya kandokando yote.”

Vivyo hivyo, Yesu alinena juu ya nafsi yake alipokuwa akihutubu katika sinagogi la Nazareti, “Roho wa Bwana yu juu yangu, kwa maana amenitia mafuta kuwahubiri maskini habari njema. Amenituma kuwatangazia wafungwa kufunguliwa kwao, na vipofu kupata kuona tena, kuwaacha huru waliosetwa, na kutangaza mwaka wa Bwana uliokubaliwa.” (Luka 4:18-19). Mafungu haya yote yana somo lile lile moja, kwamba ni kwa kutiwa mafuta maalum kwa Roho Mtakatifu ndipo Yesu Kristo alistahilishwa kwa ile huduma Mungu aliyomwitia. Aliposimama katika Yordani baada ya kubatizwa kwake, “Roho Mtakatifu akashuka juu yake kwa mfano wa mwili kama hua,” na wakati ule na mahali pale ndipo alipotiwa mafuta kwa Roho Mtakatifu, akabatizwa kwa Roho Mtakatifu, na kutayarishwa kwa ajili ya huduma iliyokuwa mbele yake. Yesu Kristo aliupokea utayarisho wake kwa huduma kwa njia ile ile tunayoupokea sisi wetu, yaani kwa ubatizo dhahiri kwa Roho Mtakatifu.

4. Yesu Kristo aliongozwa na Roho Mtakatifu katika kwenda kwake huku na huku hapa duniani. Tunasoma katika Luka 4:1, “Yesu, hali amejaa Roho Mtakatifu, akarudi kutoka Yordani, akaongozwa na Roho muda wa siku arobaini nyikani.” Alipoishi kama mwanadamu hapa duniani na kutuwekea mfano, kila hatua ya maisha yake ilikuwa chini ya uongozi wa Roho Mtakatifu.

5. Yesu Kristo alifundishwa na Roho aliyekaa juu yake. Roho wa Mungu ndiye aliyekuwa chanzo cha hekima yake katika siku za mwili wake. Katika unabii wa Agano la Kale kuhusu Masihi ajaye, tunasoma katika Isaya 11:2-3, “Na roho ya BWANA atakaa juu yake, roho ya hekima na ufahamu, roho ya shauri na uweza, roho ya maarifa na ya kumcha BWANA; na furaha yake itakuwa katika kumcha BWANA; wala hatahukumu kwa kuyafuata ayaonayo kwa macho yake, wala hataonya kwa kuyafuata ayasikiayo kwa masikio yake.” Zaidi ya hayo, katika Isaya 42:1, tunasoma, “Tazama, mtumishi wangu nimtegemezaye; mteule wangu, ambaye nafsi yangu imependezwa naye; nimetia roho yangu juu yake; naye atawatolea mataifa hukumu,” na kadhalika. Mathayo atuambia katika Mathayo 12:17-18 kwamba unabii huu ulitimizwa katika Yesu wa Nazareti.

6. Roho Mtakatifu alikaa juu ya Yesu katika utimilifu wake wote, na maneno aliyoyanena kutokana na hilo yalikuwa maneno ya Mungu hasa. Tunasoma katika Yohana 3:34, “Kwa kuwa yeye aliyetumwa na Mungu huyanena maneno ya Mungu; kwa sababu hampi Roho kwa kipimo.”

7. Baada ya kufufuka kwake, Yesu Kristo aliwapa amri Mitume wake aliowachagua kwa njia ya Roho Mtakatifu. Tunasoma katika Matendo 1:2, “Hata siku ile alipochukuliwa juu, alipokwisha kuwaagiza kwa Roho Mtakatifu wale mitume aliowachagua.” Hili lahusu wakati baada ya kufufuka kwake; hivyo twamwona Yesu bado akitenda kazi kwa nguvu za Roho Mtakatifu hata baada ya kufufuka kwake kutoka kwa wafu.

8. Yesu Kristo aliitenda miujiza yake hapa duniani kwa nguvu za Roho Mtakatifu. Katika Mathayo 12:28, tunasoma, “Lakini mimi nikitoa pepo kwa Roho wa Mungu.” Ni kwa njia ya Roho ndipo nguvu za kutenda miujiza zilipopewa baadhi ya watu katika kanisa baada ya Bwana wetu kuondoka duniani (1 Wakorintho 12:9-10); na kwa nguvu za Roho yeye yule, Yesu Kristo aliitenda miujiza yake.

9. Ni kwa nguvu za Roho Mtakatifu ndipo Yesu Kristo alifufuliwa kutoka kwa wafu. Tunasoma katika Warumi 8:11, “Lakini, ikiwa Roho yake yeye aliyemfufua Yesu katika wafu anakaa ndani yenu, yeye aliyemfufua Kristo Yesu katika wafu ataihuisha na miili yenu iliyo katika hali ya kufa, kwa Roho wake anayekaa ndani yenu.” Roho yeye yule atakayeihuisha miili yetu iliyo katika hali ya kufa na atakayetufufua siku ijayo ndiye aliyemfufua Yesu. Mambo kadhaa yadhihirika kutokana na uchunguzi huu wa kazi ya Roho Mtakatifu ndani ya Yesu Kristo: Kwanza kabisa, twaona utimilifu wa ubinadamu wake. Aliishi, akafikiri, akafanya kazi, akafundisha, akaishinda dhambi, na kupata ushindi kwa ajili ya Mungu, kwa nguvu za Roho yeye yule ambaye ni pendeleo letu nasi kumpata.

Pili, twaona kutegemea kwetu Roho Mtakatifu kwa kabisa. Ikiwa ni kwa nguvu za Roho Mtakatifu ndipo Yesu Kristo, Mwana pekee wa Mungu, aliishi na kufanya kazi, akatimiza na kushinda, basi je, sisi hatumtegemei zaidi sana katika kila kigeuko cha maisha, na katika kila hali ya huduma, na katika kila tukio la kupambana na Shetani na dhambi?

Jambo la tatu lililo dhahiri ni ulimwengu wa ajabu wa pendeleo, baraka, na ushindi ulio wazi kwetu.

Roho yeye yule ambaye kwake Yesu alizaliwa kwa asili yupo tayari kwetu ili nasi tuzaliwe mara ya pili kwake. Roho yeye yule ambaye kwake Yesu alijitoa mwenyewe kwa Mungu bila doa yupo tayari kwetu ili nasi tuweze kujitoa wenyewe kwake bila doa. Roho yeye yule ambaye kwake Yesu alitiwa mafuta kwa ajili ya huduma yupo tayari kwetu ili nasi tutiwe mafuta kwa ajili ya huduma. Roho yeye yule aliyemwongoza Yesu Kristo katika kwenda kwake duniani yu tayari kutuongoza sisi leo. Roho yeye yule aliyemfundisha Yesu na kumpa hekima na ufahamu, shauri, uweza, maarifa, na kumcha Bwana, yupo hapa ili atufundishe sisi.

Yesu Kristo ni kielelezo chetu (1 Yohana 2:6), “mzaliwa wa kwanza miongoni mwa ndugu wengi” (Warumi 8:29). Lo lote alilolipata yeye kwa njia ya Roho Mtakatifu ni letu sisi kulipata leo.

MWISHO