Roho Mtakatifu Akimwongoza Mwamini Katika Maisha kama ya Mwana

Maisha ya kweli ya Kikristo humaanisha kuongozwa kibinafsi na Roho Mtakatifu, si kutawaliwa na hofu wala kanuni zisizohesabika za kujitungia. Roho Mtakatifu hamwongozi mtu kamwe kinyume na Maandiko, na uongozi wake huleta uhuru, si utumwa. Wale wanaojisalimisha kwa uongozi wa Roho huishi kama wana wa Mungu waliokomaa, wakifurahia uhuru na mwelekeo wa uhakika maishani.

Mtume Paulo aandika katika Warumi 8:14, “Kwa kuwa wote wanaoongozwa na Roho wa Mungu, hao ndio wana wa Mungu.”

Katika fungu hili, twaona Roho Mtakatifu akichukua uendeshaji wa maisha ya mwamini. Maisha ya kweli ya Kikristo ni maisha yanayoongozwa kibinafsi, yakiongozwa kila hatua na Mtu wa Kimungu. Ni pendeleo la mwamini kuwekwa huru kutoka kila fadhaa, wasiwasi, na mahangaiko kuhusu maamuzi tunayopaswa kuyafanya katika kila hatua ya maisha.

Roho Mtakatifu huchukua jukumu lote hilo kwa ajili yetu.

Maisha ya kweli ya Kikristo si yanayotawaliwa na orodha ndefu ya kanuni zilizo nje yetu, bali yanayoongozwa na Mtu aliye hai na aliyepo daima ndani yetu. Ni katika muktadha huu ambapo Paulo asema, “Kwa kuwa hamkupokea tena roho ya utumwa iletayo hofu.” Maisha yanayotawaliwa na kanuni zilizo nje ya mtu ni maisha ya utumwa. Daima kuna hofu kwamba hatujatunga kanuni za kutosha, na daima hofu kwamba katika kitambo cha kutokuwa waangalifu, huenda tumevunja mojawapo ya kanuni tulizozitunga. Maisha ambayo Wakristo wengi huishi ni ya utumwa wa kutisha; kwa maana wamejiwekea kongwa lililo zito kubeba kuliko lile la sheria ya kale ya Musa ambalo kuhusu hilo Petro aliwaambia Wayahudi wa wakati wake kwamba wala wao wala baba zao hawakuweza kulichukua (Matendo 15:10).

Wakristo wengi wana orodha ndefu ya kanuni za kujitungia, na kama kwa bahati mbaya wakivunja mojawapo ya kanuni hizi za kujitungia, au wakisahau kuishika mojawapo, mara moja hujawa hofu ya kutisha kwamba wamejiletea ghadhabu ya Mungu (na nyakati nyingine hata hudhania kwamba wametenda dhambi isiyosameheka). Huku si Ukristo; huu ni utumwa wa sheria. “Hatukupokea tena roho ya utumwa iletayo hofu,” tumepokea Roho atupaye nafasi ya wana (Warumi 8:15).

Maisha yetu hayapaswi kutawaliwa na kanuni zilizo nje yetu, bali na Roho wa kupenda wa Kufanywa Wana aliye ndani yetu. Yatupasa kuamini fundisho la Neno la Mungu kwamba Roho wa Mwana wa Mungu anakaa ndani yetu, na yatupasa kumkabidhi mamlaka kamili juu ya maisha yetu na kumtazama atuongoze kila hatua ya maisha. Atafanya hivyo kama tu tutajisalimisha kwake aifanye na kumwamini aifanye. Kama katika kitambo cha kutokufikiri, twakwenda njia yetu badala ya yake, hatutajawa na hisia kubwa ya hukumu na hofu ya Mungu aliyekasirika, bali tutamwendea Mungu kama Baba yetu, tukiungama kupotoka kwetu, tukiamini kwamba anatusamehe kabisa kwa sababu asema hivyo (1 Yohana 1:9), na kuendelea wepesi na wenye furaha ya moyo kumtii na kuongozwa na Roho wake.

Kuongozwa na Roho wa Mungu hakumaanishi hata kidogo kwamba tutafanya mambo ambayo Neno la Mungu lililoandikwa latuambia tusiyafanye. Roho Mtakatifu hamwongozi kamwe watu kinyume na Kitabu ambacho yeye ndiye Mwandishi wake. Kama kuna roho fulani inayotuongoza kufanya jambo fulani kinyume na mafundisho ya wazi ya Yesu au Mitume, twaweza kuwa na hakika kwamba roho hii inayotuongoza si Roho Mtakatifu. Jambo hili lahitaji kusisitizwa katika siku zetu, kwa maana hawakosekani wengi wanaojiachilia kwa uongozi wa roho fulani, ambayo wasema ni Roho Mtakatifu, lakini inayowaongoza kufanya mambo yaliyokatazwa waziwazi katika Neno. Lazima tukumbuke daima kwamba roho nyingi za uongo na manabii wengi wa uongo wametokea duniani (1 Yohana 4:1). Wengi wana wasiwasi mkubwa wa kuongozwa na nguvu isiyoonekana hata wako tayari kukabidhi uendeshaji wa maisha yao kwa ushawishi wo wote wa kiroho au mtu asiyeonekana. Kwa njia hii, huyafungulia maisha yao uendeshaji na ushawishi wa uadui wa roho waovu ili kuyaharibu maisha yao.

Mtu mmoja aliyekiri sana utakatifu aliwahi kunijia na kusema kwamba Roho Mtakatifu alikuwa akimwongoza yeye na “mwanamke mmoja Mkristo mtamu,” aliyekutana naye, wafikirie kuoana. “Kwani,” nikasema kwa mshangao, “wewe tayari una mke.” “Ndiyo,” akasema, “lakini wajua sisi si marafiki, wala hatujaishi pamoja kwa miaka mingi.” “Ndiyo,” nikajibu, “najua hamjaishi pamoja kwa miaka, nami nimelichunguza jambo hili, na naamini kwamba lawama ya hilo iko kwako kwa kiasi kikubwa. Vyo vyote iwavyo, yeye ni mke wako. Huna sababu ya kudhani amekutenda ukafiri, na Yesu Kristo afundisha kwamba ukioa mwingine yeye akiwa hai wazini” (Luka 16:18). “Ee, lakini,” yule mtu akasema, “Roho wa Mungu anatuongoza kupendana na kuona kwamba twapaswa kuoana.” “Unadanganya, nawe unakufuru,” nikajibu.

“Roho ye yote anayekuongoza kutotii fundisho la wazi la Yesu Kristo si Roho wa Mungu bali ni roho fulani wa ibilisi.”

Hii labda ilikuwa hali iliyokithiri, lakini hali za tabia ile ile kimsingi si adimu. Wakristo wengi wanaokiri hutafuta kujihalalisha katika kufanya mambo yaliyokatazwa katika Neno kwa kusema kwamba wanaongozwa na Roho wa Mungu. Nilipinga kwa viongozi wa kusanyiko fulani la Kikristo ambapo katika kila mkutano wengi walidai kunena kwa lugha kinyume waziwazi cha fundisho la Roho Mtakatifu kupitia Mtume Paulo katika 1 Wakorintho 14:27-28 (Kama mtu akinena kwa lugha, wanene wawili au watatu, si zaidi, tena kwa zamu; na mmoja na afasiri. Lakini asipokuwapo mwenye kufasiri na anyamaze katika kanisa; aseme na nafsi yake tena na Mungu). Utetezi walioutoa ulikuwa kwamba Roho Mtakatifu aliwaongoza wanene kadhaa kwa wakati mmoja na wengi katika mkutano mmoja, na kwamba lazima wamtii Roho Mtakatifu, na katika hali kama hii, hawakuwa chini ya Neno.

Roho Mtakatifu hajipingi kamwe. Hamwongozi kamwe mtu mmoja mmoja kufanya lile ambalo katika Neno lililoandikwa ametuamuru sote tusilifanye. Uongozi wo wote wa Roho lazima ujaribiwe kwa lile tunalojua kuwa uongozi wa Roho katika Neno. Ingawa yatupasa kuwa macho dhidi ya uongozi wa roho za uongo, ni pendeleo letu kuongozwa na Roho Mtakatifu, na kuishi maisha yaliyo huru mbali na utumwa wa kanuni na wasiwasi kwamba tutakosea, maisha kama ya watoto ambao Baba yao amewapelekea Mwongozi sahihi wa kuwaongoza njia yote.

Wale wanaoongozwa hivyo na Roho wa Mungu ni “wana wa Mungu,” yaani, si tu watoto wa Mungu, waliozaliwa kweli na Baba, lakini wasiokomaa, bali ni watoto waliokua, watoto wa Mungu waliokomaa; si vitoto tena bali wana. Mtume Paulo achora tofauti katika Wagalatia 4:1-7 kati ya mtoto aliye chini ya mwongozo wa sheria na asiyetofautiana na mtumwa, na mwana aliyekua kamili ambaye si mtumwa tena bali mwana anayeenenda katika uhuru wa furaha. Nyakati nyingine yaonekana kana kwamba ni Wakristo wachache tu leo waliovua utumwa wa sheria, kanuni zilizo nje yao, na kuingia katika uhuru wa furaha wa wana.