Kumngoja Mungu

Zaburi 62:5.—Ee nafsi yangu, umngojee Mungu peke yake kwa kimya, kwa maana tumaini langu latoka kwake.

Swali zito latujia, “Je, Mungu niliye naye, ni Mungu aliye kwangu juu ya hali zote, aliye karibu nami kuliko hali yoyote iwezavyo kuwa?” Ndugu, je, umejifunza kuishi maisha yako ukiwa na Mungu kweli kweli pamoja nawe kila dakika, hata katika hali zilizo ngumu kupita zote, yeye yupo daima na yu karibu nawe kuliko kila kitu kinachokuzunguka? Maarifa yetu yote ya Neno la Mungu yatatusaidia kidogo sana isipokuwa hilo litakapokuwa swali tunalopata jibu lake. Ni sababu gani hasa kwamba watoto wengi wapendwao na Mungu wanalalamika daima: “Hali zangu zanitenga na Mungu; majaribu yangu, vishawishi vyangu, tabia yangu, hasira yangu, rafiki zangu, adui zangu, kila kitu chaweza kuingia kati ya Mungu wangu nami?” Je, Mungu hana uwezo kiasi cha kunimiliki hata awe karibu nami kuliko kitu chochote ulimwenguni? Je, mali au umaskini, furaha au huzuni, ni lazima viwe na nguvu juu yangu ambazo Mungu wangu hana? La.

Kwa nini, basi, watoto wa Mungu hulalamika mara nyingi kwamba hali zao zawatenga naye? Hakuna jibu ila moja tu, “Hawamjui Mungu wao.” Kama kuna taabu au udhaifu katika Kanisa la Mungu, ni kwa sababu hatumjui Mungu tuliye naye. Ndiyo sababu, zaidi ya ile ahadi katika Yeremia 30:22, “Nami nitakuwa Mungu wenu,” ahadi hii huongezwa mara nyingi, “Nanyi mtajua ya kuwa mimi ndimi BWANA, Mungu wenu.” Kama nikijua hilo, si kwa mafundisho ya mwanadamu, si kwa akili yangu wala mawazo yangu; bali kama nikijua hilo, kwa ushuhuda ulio hai ambao Mungu hutia moyoni mwangu, ndipo najua kwamba uwepo wa kimungu wa Mungu wangu utakuwa wa ajabu sana, na Mungu wangu mwenyewe atakuwa mzuri sana, na wa karibu sana, hata niweze kuishi siku zangu zote na miaka yangu yote nikiwa mshindi kwa yeye aliyenipenda. Je, si maisha tunayoyahitaji? Swali laja tena: Kwa nini watu wa Mungu hawamjui Mungu wao? Na jibu ni: Huchukua kitu chochote badala ya Mungu,—wahudumu, kuhubiri, vitabu, sala, kazi, na jitihada, kila juhudi ya asili ya kibinadamu, badala ya kungoja, na kungoja muda mrefu kama ikibidi, hata Mungu ajidhihirishe mwenyewe.

Hakuna mafundisho tuwezayo kupata, wala jitihada tuwezayo kufanya, viwezavyo kutuweka katika kumiliki nuru hii yenye baraka ya Mungu, aliye yote katika yote kwa nafsi zetu. Lakini bado, yawezekana kuipata. Iko karibu tukaifikia kama Mungu atajidhihirisha mwenyewe. Hiyo ndiyo hitaji moja tu. Ningemwomba Mungu kwamba kila mtu aulize moyo wake kama amesema na anasema kila siku: “Nataka zaidi ya Mungu. Usiniambie tu juu ya kweli nzuri iliyomo katika Biblia. Hiyo haiwezi kunitosheleza. Namtaka Mungu.”

Katika maisha yetu ya ndani ya Kikristo, katika sala zetu za kila siku, katika kuishi kwetu kwa Kikristo, katika makanisa yetu, katika mikutano yetu ya sala, katika ushirika wetu, ni lazima ifikie hapo—kwamba Mungu daima ashike nafasi ya kwanza; na kama akipewa hiyo, atamiliki. Kama katika maisha yetu kama watu binafsi kila jicho lingekazwa kwa Mungu, kwa Mungu aliye hai, kila moyo ukilia, “Nafsi yangu yamwonea Mungu kiu,” ni nguvu gani, ni baraka gani, na ni uwepo gani wa Mungu wa milele ungedhihirishwa kwetu! Twasoma nini katika Waebrania 7:25?

“Anaweza kuwaokoa kabisa.”—Ni nani? “wao wamwendeao Mungu kwa yeye” si wale tu wanaomjia Kristo. Katika Kristo—jina lake libarikiwe—tunayo neema, unyenyekevu, na huruma ya Mungu. Lakini tuko hatarini kusimama hapo na kuridhika na hayo, naye Kristo ataka kuturudisha tufurahi vile vile katika utukufu wa Mungu mwenyewe, katika haki yake, utakatifu wake, mamlaka yake, uwepo wake, na nguvu zake. Aweza kuwaokoa kabisa wao wamwendeao Mungu kwa yeye!

Sasa, mawazo machache tu juu ya njia ambayo kwayo naweza kufikia kumjua Mungu kama Mungu huyu aliye juu ya hali zote, ajazaye moyo wangu na maisha yangu kila siku. Kitu kimoja kinachohitajika ni: Ni lazima nimngoje Mungu. Maandiko ya asili yasema,—yamo katika tafsiri yetu ya Kiholanzi, na yamo pembeni pia,—“Ee nafsi yangu, umngojee Mungu peke yake kwa kimya, kwa maana tumaini langu latoka kwake.” Zaburi 62:5. Kimya cha nafsi mbele za Mungu kimepaswa kuwaje? Nafsi ijitambuayo udogo wake, ujinga wake, upendeleo wake, na hatari zake zitokanazo na tamaa, na yote yaliyo ya kibinadamu na yenye dhambi, nafsi ijitambuayo hayo, na kusema, “Nataka Mungu wa milele aingie na kunishika, na kunishika kwa namna ambayo naweza kuhifadhiwa katika kiganja cha mkono wake maisha yangu yote; nataka animiliki kwa namna ambayo kila dakika aweze kutenda yote katika yote ndani yangu.” Hivyo ndivyo vinavyodokezwa katika asili yenyewe ya Mungu wetu.

Jinsi tunavyopaswa kuwa kimya mbele zake na kumngoja yeye!

Naomba niulize, kwa heshima: Mungu ni kwa ajili ya nini? Mungu ni kwa ajili ya hili: kuwa nuru na uzima wa uumbaji, chanzo, na nguvu ya kuwako kote. Miti mizuri, nyasi za kijani, na jua angavu alivyoumba Mungu vilikuwa ili kudhihirisha uzuri wake, hekima yake, na utukufu wake. Mti wa miaka mia moja—ulipopandwa, Mungu hakuupa akiba ya uhai ambayo kwayo ungeendeleza kuwako kwake. La, hakika, Mungu huvika maua uzuri wake upya kila mwaka; kila mwaka Mungu huuvika mti majani yake na matunda yake. Kila siku na kila saa ni Mungu adumishaye uhai wa maumbile yote.

Mungu alituumba ili tuwe vyombo ambavyo ndani yavyo aweze kutimiza uzuri wake, mapenzi yake, upendo wake, na mfano wa Mwanawe mbarikiwa. Hivyo ndivyo Mungu alivyo, kutenda ndani yetu kwa uwezo wake mkuu, bila kukoma hata dakika moja. Ninapoanza kulishika hilo, siyafikirii tena maisha ya kweli ya Kikristo kuwa jambo lisilowezekana kabisa na lisilo la kiasili, bali nasema, “Ni jambo la kiasili kupita yote katika uumbaji kwamba Mungu aniwe naye kila dakika na kwamba Mungu wangu awe karibu nami kuliko vitu vyote.” Fikiri tu, kwa dakika, ni upumbavu gani kuwaza kwamba siwezi kutumaini Mungu kuwa pamoja nami kila dakika.

Tazama mwanga wa jua; je, umewahi kupata taabu yoyote ulipokuwa ukifanya kazi au ukisoma au ukisoma kitabu katika nuru itoayo na jua? Je, umewahi kusema, “Ee, nawezaje kuitunza nuru hiyo, nawezaje kuishika sana, nawezaje kuwa na hakika kwamba nitaendelea kuwa nayo ili kuitumia?” Hukuwahi kuwaza hivyo. Mungu ameshughulikia jambo hili kwamba jua lenyewe likupatie nuru, bila wewe kujishughulisha; nuru huja bila kuombwa. Nami nakuuliza: Wadhani nini? Je, Mungu amepanga kwamba nuru ya jua hilo ambalo siku moja litateketea, iweze kukujia bila wewe kutambua na kukaa ndani yako kwa baraka na kwa nguvu; na je, Mungu hataki, au hawezi, kuiacha nuru yake na uwepo wake uangaze ndani yako kiasi kwamba uweze kutembea mchana kutwa ukiwa na Mungu aliye karibu nawe kuliko kitu chochote katika maumbile? Msifuni Mungu kwa uhakika huu; aweza kulifanya. Na kwa nini halifanyi? Kwa nini mara chache namna hii, na kwa nini kwa kiasi dhaifu namna hii? Kuna jibu moja tu: humwachi yeye.

Umeshughulishwa sana na kujazwa na mambo mengine, mambo ya kidini, kuhubiri na kusali, kujifunza na kufanya kazi, umeshughulishwa sana na dini yako, hata humpi Mungu wakati wa kujidhihirisha mwenyewe, na kuingia na kumiliki. Ee, ndugu, sikiliza neno la mtu aliyemjua Mungu vema hivyo, na uanze kusema: “Ee nafsi yangu, umngoje Mungu peke yake.” Naweza kuonyesha kwamba huu ndio utukufu hasa wa Muumba, huo ndio uzima hasa ambao Kristo aliuleta ulimwenguni, uzima aliouishi, na uzima ule hasa ambao Kristo ataka kutuinua kuufikia katika kumtegemea Baba kikamili.

Siri hasa ya maisha ya Kristo ni hii: utambuzi namna hiyo wa uwepo wa Mungu kwamba ikiwa alikuwa Yuda, aliyekuja kumsaliti, au Kayafa, aliyemhukumu isivyo haki, au Pilato, aliyemtoa asulubiwe, uwepo wa Baba ulikuwa juu yake, na ndani yake, na kumzunguka, wala mwanadamu hakuweza kuigusa roho yake.

Na hivyo ndivyo Mungu atakavyo kuwa kwako na kwangu.

Je, wasiwasi wako wote na kutotulia, na jitihada zisizo na faida, havithibitishi kwamba hukumwacha Mungu afanye kazi yake? Mungu anakuvuta kwake mwenyewe. Hili si tamaa yako mwenyewe wala msukumo wa moyo wako mwenyewe, bali ni sumaku ya kimungu ya milele inayokuvuta. Tamaa hizi zisizotulia na kiu hizi, kumbuka, ni kazi ya Mungu. Njoo na utulie, na umngoje Mungu. Atajidhihirisha mwenyewe.

Nimngoje Mungu jinsi gani? Kama jibu, ningesema: kwanza kabisa, katika sala chukua muda zaidi wa kuwa kimya mbele za Mungu bila kusema neno moja. Ni kitu gani, katika sala, kilicho cha maana kupita yote? Ni kwamba nishike sikio la yule ninayesema naye. Hatuko tayari kutoa dua yetu hata tutakapotambua kikamili kwamba tumepata usikivu wa Mungu.

Waniambia kwamba wayajua hayo yote. Ndiyo, wayajua; lakini wahitaji moyo wako ujazwe na Roho Mtakatifu utambuzi mtakatifu kwamba Mungu wa milele, Mwenyezi, kweli anakaribia sana kwako. Yule mwenye upendo anatamani sana kukupata uwe wake mwenyewe. Tulia mbele za Mungu, na ungoje, na useme: “Ee Mungu, miliki. Jidhihirishe, si kwa mawazo yangu wala fikira zangu, bali kwa ule utambuzi wenye adhama, uletao hofu ya heshima, utiishao nafsi, kwamba Mungu ananiangazia ili anilete mahali pa kutegemea na unyenyekevu”.

Sala yaweza kweli kuwa kumngoja Mungu, lakini kuna sala nyingi sana isiyo kumngoja Mungu.

Kumngoja Mungu ndio mwanzo wa kwanza na ulio bora zaidi wa sala. Tunapoinama katika kukiri kwa unyenyekevu na kimya utukufu wa Mungu na ukaribu wake, tunapoanza kusali kutakuwa na ile baraka hasa ambayo mara nyingi twaipata mwishoni tu.

Tangu mwanzo kabisa, naja uso kwa uso na Mungu; naunganishwa na uweza wa milele wa upendo nami najua Mungu wangu atanibariki. Tusiogope kamwe kuwa kimya mbele za Mungu; ndipo tutakapouchukua utulivu huo katika kazi yetu; na tuendapo kanisani siku ya Jumapili, au kwenye mkutano wa sala siku za juma, itakuwa kwa nia moja kwamba kisiwepo kitu cha kusimama kati yetu na Mungu, na kwamba tusiwahi kushughulishwa sana na kusikia na kutega sikio hata tukausahau uwepo wa Mungu.

Ee, laiti Mungu angemfanya kila mhudumu kuwa kama Musa alivyokuwa chini ya Mlima Sinai; “Musa akawatoa watu nje ili kukutana na Mungu,” nao wakakutana naye na kuogopa (Kutoka 19:16). Kila mhudumu na aombe kwa bidii yote nafsi yake iwezavyo, kwamba Mungu amwokoe na dhambi ya kuhubiri na kufundisha bila kuwafanya watu wahisi kwanza kabisa: “Mtu huyu ataka kutuleta kwa Mungu mwenyewe.” Yaweza kuhisiwa, si katika maneno tu bali katika hali yenyewe ya moyo wenye unyenyekevu, ungojao, na uabuduo. Ni lazima tuchukue kungoja huku katika ibada yetu yote; itatubidi kuifanyia utafiti; itatubidi kunena juu yake; itatubidi kusaidiana, kwa maana kweli hii imepotea mno katika Kanisa la Kristo; ni lazima tumngoje Mungu kwa ajili yake. Ndipo tutakapoweza kuitekeleza katika maisha yetu ya kila siku.

Kuna Wakristo wengi sana wanaostaajabu kwamba wanashindwa; lakini fikiri urahisi wanaoongea kwao na kujiunga na mazungumzo, wakitumia saa nyingi humo, bila kuwaza kamwe kwamba haya yote yaweza kutawanya nguvu ya nafsi na kuwaongoza kutumia saa nyingi, si katika uwepo wa Mungu wa papo hapo. Nahofia hii ndiyo shida kubwa: kwamba hatuko tayari kutoa dhabihu inayohitajika kwa ajili ya maisha ya kumngoja Mungu daima.

Je, hawapo baadhi yetu ambao wangeliona kuwa jambo lisilowezekana kutumia kila dakika chini ya sitara ya Aliye Juu, “atanificha katika hema yake” Wapenzi, msilifikirie kuwa juu mno, au gumu mno. Ni gumu mno kwako na kwangu kulifikia, lakini Mungu wetu atatupatia. Na tuanze hata sasa kungoja kwa bidii zaidi na kwa dhati zaidi mbele za Mungu.

Na katika nyumba zetu tuiname kidogo kwa kimya mara kwa mara; na katika vyumba vyetu vya faragha tungoje kwa kimya, na tufanye agano, yamkini, bila maneno, kwamba kwa mioyo yetu yote, tutautafuta uwepo wa Mungu utujilie. Dini ni nini? Kadiri tu ulivyo na Mungu akitenda ndani yako, hiyo peke yake ndiyo dini. Na kama ukitaka dini zaidi, neema zaidi, nguvu zaidi, na uzao zaidi, ni lazima uwe na Mungu zaidi. Hilo na liwe kilio cha mioyo yetu,—Mungu zaidi! Mungu zaidi! Mungu zaidi! Na tuziambie nafsi zetu, “Ee nafsi yangu, umngojee Mungu peke yake kwa kimya, kwa maana tumaini langu latoka kwake” Zaburi 62:5.