Mwombezi

Kwa hiyo, ungameni dhambi zenu ninyi kwa ninyi, na kuombeana, mpate kuponywa. Kuomba kwake mwenye haki kwafaa sana, akiomba kwa bidii. Eliya alikuwa mwanadamu mwenye tabia moja na sisi, akaomba kwa bidii mvua isinyeshe, na mvua haikunyesha juu ya nchi muda wa miaka mitatu na miezi sita. ” Yakobo 5: 16, 17.

Hakuna kitu kidhoofishacho nguvu ya wito wa kuiga kielelezo cha watakatifu wa Maandiko kama wazo la kuwa hao ni visa vya kipekee, na ya kuwa yale tuyaonayo ndani yao hayapaswi kutarajiwa kwa wote. Lengo la Mungu katika maandiko ni kinyume kabisa. Hutupa watu hawa kwa ajili ya mafunzo yetu na kutiwa moyo, kama mfano wa yale ambayo neema yake yaweza kutenda, kama mifano iliyo hai ya yale ambayo mapenzi yake na asili yetu kwa pamoja huyadai na kuyafanya kuwa yawezekanayo.

Ilikuwa hasa ili kukabiliana na kosa hilo lililo la kawaida hivyo lililotajwa, na kutoa uthabiti kwetu sote tulengao maisha ya maombi yenye ufanisi, ndipo Yakobo alipoandika: “Eliya alikuwa mwanadamu mwenye tabia moja na sisi” Kwa kuwa hakukuwa na tofauti kati ya asili yake na yetu, au kati ya neema iliyotenda kazi ndani yake na itendayo kazi ndani yetu, hakuna sababu isiyo tufanya, kama yeye, kuomba kwa ufanisi. Kama maombi yetu yatakuwa na nguvu, ni lazima tutafute kuwa na kiasi fulani cha roho ya Eliya.

Shauku ya, na nitafute neema ya kuomba kama Eliya, ni halali kabisa, na ni ya lazima sana. Kama kwa uaminifu twatafuta siri ya nguvu yake katika maombi njia aliyoikanyaga itatufunukia. Tutaipata katika maisha yake pamoja na Mungu, kazi yake kwa ajili ya Mungu, na tumaini lake katika Mungu.

Eliya aliishi pamoja na Mungu. Maombi ni sauti ya maisha yetu. Kama mtu aishivyo, ndivyo aombavyo. Si maneno au mawazo ambayo kwayo hushughulika katika nyakati zilizowekwa za maombi, bali mwelekeo wa moyo wake kama uonekanavyo katika tamaa zake na matendo yake, ndio uhesabiwao na Mungu kuwa maombi yake halisi. Maisha husema kwa sauti kubwa na ya kweli zaidi kuliko midomo. Ili kuomba vyema ni lazima niishi vyema. Yeye atafutaye kuishi pamoja na Mungu atajifunza kuijua nia yake na kumpendeza hata aweze kuomba sawasawa na mapenzi yake. Fikiri jinsi Eliya, katika ujumbe wake wa kwanza kwa Ahabu, alivyosema juu ya “Kama BWANA, Mungu wa majeshi, aishivyo, ambaye mimi nasimama mbele zake” Fikiri upweke wake katika kijito cha Kerithi, akipokea mkate wake kutoka kwa Mungu kwa njia ya kunguru, na kisha huko Sarepta kwa njia ya huduma ya mjane maskini. Alikwenda pamoja na Mungu, alijifunza kumjua Mungu vyema; wakati ulipofika, alijua kumwomba Mungu ambaye alikuwa amemthibitisha. Ni kutoka tu katika maisha ya ushirika wa kweli na Mungu ndipo maombi ya imani yaweza kuzaliwa. Kifungo kati ya maisha na maombi na kiwe dhahiri na cha karibu. Tunapojitoa kwenda pamoja na Mungu, tutajifunza kuomba.

Eliya alifanya kazi kwa ajili ya Mungu. Alikwenda alikomtuma Mungu. Alifanya alichomwamuru Mungu. Alisimama kwa ajili ya Mungu na huduma yake. Aliwashuhudia watu na dhambi zao. Wote waliomsikia wangeweza kusema: “Sasa najua ya kuwa u mtu wa Mungu, na ya kuwa neno la BWANA kinywani mwako ni kweli.” Maombi yake yote yalikuwa yanaunganishwa na kazi yake kwa ajili ya Mungu. Alikuwa mtu wa tendo na mtu wa maombi kwa usawa. Alipoomba kwa maombi kwanza ukame na kisha mvua, ilikuwa, kama sehemu ya kazi yake ya kinabii, ili watu, kwa hukumu na rehema, wapate kurudishwa kwa Mungu.

Eliya alipoomba kwa maombi moto ushuke kutoka mbinguni juu ya dhabihu, ilikuwa ili Mungu apate kujulikana kuwa Mungu wa kweli. Yote aliyoyaomba yalikuwa kwa ajili ya utukufu wa Mungu. Ni mara ngapi waamini hutafuta nguvu katika maombi, ili wapate kujipatia vipawa vyema kwa ajili yao wenyewe? Ubinafsi wa siri huwanyang'anya nguvu na jibu. Ni pale nafsi inapopotea katika tamaa ya utukufu wa Mungu, na maisha yetu yamejitolea kufanya kazi kwa ajili ya Mungu, ndipo nguvu ya kuomba iwezavyo kuja.

Mungu huishi ili kupenda, kuokoa, na kubariki wanadamu: mwamini ajitoaye kwa huduma ya Mungu katika hili atapata katika hilo uzima wake mpya katika maombi. Kufanya kazi kwa ajili ya wengine huthibitisha uaminifu wa maombi yetu kwa ajili yao. Kufanya kazi kwa ajili ya Mungu hufunua vilevile hitaji letu na haki yetu ya kuomba kwa ujasiri. Kuza fahamu, na uiseme mbele za Mungu, ya kuwa umejitoa kabisa kwa huduma yake; itaimarisha uthabiti wako katika yeye kukusikia.

Eliya alimtumaini Mungu. Alikuwa amejifunza kumtumaini kwa mahitaji yake binafsi katika nyakati za njaa; alithubutu kumtumaini kwa mambo makuu zaidi kama jibu la maombi kwa ajili ya watu wake. Ni uthabiti gani katika Mungu kumsikia twauona katika rufaa yake kwa Mungu ajibuye kwa moto. Ni uthabiti gani katika Mungu kufanya kile atakachoomba, alipomtangazia Ahabu wingi wa mvua uliokuwa ukija, na kisha, akiwa na uso wake hadi nchi, aliusihi, wakati mtumishi wake, mara sita, alipoleta habari, “Hakuna kitu.” Uthabiti usiotetereka katika ahadi na sifa ya Mungu, na umoja binafsi na Mungu, uliothibitishwa katika kazi kwa ajili ya Mungu, ulitoa nguvu kwa ajili ya maombi yenye ufanisi ya mtu mwenye haki.

Chumba cha ndani ndipo mahali ambapo hili lapaswa kujifunzwa. Saa ya kesha ya asubuhi ndiyo shule ya mazoezi ambamo twapaswa kuizoeza neema iwezayo kutufanya tufae kuomba kama Eliya. Tusiogope. Mungu wa Eliya bado aishi; roho iliyokuwa ndani yake akaa ndani yetu. Na tuache mitazamo iliyo na mipaka na ya kibinafsi ya maombi, ilengayo tu neema ya kutosha kutuweka tukisimama.

Na tukuze fahamu ambayo Eliya aliyo nayo, ya kuishi kabisa kwa ajili ya Mungu, nasi tutajifunza kuomba kama yeye. Maombi yataleta kwetu sisi wenyewe na kwa wengine uzoefu mpya na uliobarikiwa ya kuwa maombi yetu nayo ni yenye ufanisi na yafaayo sana. Katika nguvu ya Mwombezi yule wa Ukombozi, aishiye daima ili kuomba, na tuchukue moyo wala tusiogope. Tumejitoa wenyewe kwa Mungu, twafanya kazi kwa ajili yake. Twajifunza kumjua na kumtumaini.

Twajifunza kumjua. Twaweza kutegemea uzima wa Mungu ndani yetu, Roho Mtakatifu akaaye ndani yetu, kutuongoza mbele kufikia neema hii pia: maombi yenye ufanisi ya mtu mwenye haki yafaayo sana.

MWISHO