Baraka za Mtendaji

“Lakini iweni watendaji wa neno, wala si wasikiaji tu, hali mkijidanganya nafsi zenu. Kwa sababu mtu akiwa ni msikiaji wa neno tu, wala si mtendaji, mtu huyo ni kama mtu anayejiangalia uso wake katika kioo; maana hujiangalia, kisha huenda zake, mara akasahau jinsi alivyo. Lakini aliyeitazama sheria kamilifu iliyo ya uhuru, na kukaa humo, asiwe msikiaji msahaulifu, bali mtendaji wa kazi, huyo atakuwa heri katika kutenda kwake.” Yakobo 1:22-25. Udanganyifu wa kutisha ulioje kuridhika, kufurahia kusikia neno, na bado kutolitenda. Na jambo la kawaida kwa kutisha kiasi gani, kuona umati wa Wakristo wakilisikiliza neno la Mungu kwa ukawaida na kwa bidii kabisa, na bado wasilitende. Kama mtumishi wao mwenyewe angefanya hivyo, akisikia lakini asitende, hukumu ingekuwaje? Na bado, ni kamili kiasi hicho udanganyifu, kamwe hawajui kwamba hawaishi maisha mema ya Kikristo. Ni nini kiwezacho kutudanganya? Kuna zaidi ya jambo moja. Moja ni kwamba watu hukosea furaha waliyo nayo katika kusikia, wakiiona kuwa dini na ibada. Akili hufurahia kuwekewa kweli wazi mbele yake: mawazo hupendezwa na taswira yake; hisia huchochewa na utumizi wake.

Kwa akili yenye shughuli, maarifa hutoa furaha. Mtu aweza kujifunza tawi fulani la sayansi—tuseme umeme—kwa furaha ya maarifa impayo, bila nia yoyote ile ya kuutumia kivitendo. Na hivyo watu huenda kanisani na kufurahia mahubiri, na bado hawafanyi lile Mungu aombalo. Yeye asiyeokoka na yeye aliyeokoka sawasawa hubaki wakiridhika kuendelea katika kutenda na kuungama, na tena kutenda mambo wasiyopaswa kuyatenda. Sababu nyingine ya udanganyifu huu ni upotoshaji wa kutisha wa fundisho la kutokuwa kwetu na uwezo wa kutenda mema. Neema ya Kristo ya kutuwezesha kutii, ya kutuepusha na dhambi, na kwa kweli kutufanya watakatifu, huaminiwa kidogo mno, hata watu kivitendo hufikiri kwamba wana ulazima wa kutenda dhambi. Mungu hawezi kutarajia utii kamili kutoka kwao, kwa maana ajua hawawezi kuutoa. Kosa hili hukata mzizi wenyewe wa kusudi thabiti la kutenda yote Mungu aliyoyanena. Hufunga moyo usiwe na shauku ya dhati ya kuamini na kuonja yote neema ya Mungu iwezayo kutenda ndani yetu, na huwafanya watu wajiridhishe wenyewe katikati ya dhambi. Kusikia na kutotenda—udanganyifu wa kutisha ulioje.

Kuna sababu ya tatu ya hili, ihusuyo hasa kusoma Biblia kwa faragha. Kusikia au kusoma huonwa kuwa wajibu, na utekelezaji wa kusoma huonwa kuwa wajibu, ambao utimizaji wake huhesabiwa kuwa ibada ya kidini. Tumetumia dakika zetu tano au kumi asubuhi kusoma; tumesoma kwa fikira na usikivu; tumejaribu kuelewa kilichosomwa: wajibu uliotimizwa kwa uaminifu hutuliza dhamiri, na hutoa hisi ya kuridhika.

Na hakuna karibu wazo lolote la ubatili, na zaidi ya hilo, la uvutano ugumizao wa wajibu uliotimizwa au maarifa yaliyopatikana, isipokuwa twatoka na moyo wetu wote ukiwa umekaziwa juu ya kutenda na kuwa kihalisi kile neno la Mungu lisemalo kwamba angetaka tuwe nacho na aweza kutufanya kuwa nacho. Udanganyifu wa kutisha! “Lakini iweni watendaji wa neno, wala si wasikiaji tu, hali mkijidanganya nafsi zenu.” Yakobo 1:22.

Ni chumbani, katika zamu ya asubuhi, ambapo udanganyifu huu lazima upiganwe na kushindwa. Twaweza kuona kwamba utavuruga kusoma kwetu Biblia kwa ukawaida, na kutufanya tubaki nyuma katika mafungu yetu. Haihitaji kufanya hivi. Lakini afadhali ufanye hivyo, kuliko nukta hii kubaki na shaka na bila kutatuliwa. Kila kitu chategemea hili. Bwana wetu Yesu alisema: “Mtu akipenda kuyatenda mapenzi yake, atajua habari ya yale mafunzo, kwamba yatoka kwa Mungu.” Ni moyo tu ufurahiao sheria ya Mungu na uliokaza nia yake kwa uthabiti juu ya kuitenda, uwezao kupokea mwangaza wa Kimungu, ujuao kiroho mafundisho ya Kristo katika asili na nguvu zake za Kimungu. Bila nia hii ya kutenda, maarifa yetu hayatatufaidi: ni maarifa ya kichwani tu.

Katika maisha, katika sayansi na sanaa, na katika biashara, njia pekee ya kujua kwa kweli, ni kutenda. Kile mtu asichoweza kufanya hakijui kabisa. Njia pekee ya kumjua Mungu, ya kuonja baraka yake, ni kwa kutenda mapenzi yake. Hilo huthibitisha kama ni Mungu wa hisia zangu mwenyewe na mawazo yangu ninayeungama au Mungu wa kweli aliye hai atawalaye na afanyaye yote. Ni kwa kutenda mapenzi yake tu ndipo nathibitisha kwamba nayapenda na kuyakubali, na kujifanya mmoja nayo. Zaidi ya hilo, hakuna njia yoyote iwezekanayo chini ya mbingu ya kuunganishwa na Mungu ila kwa kuunganishwa na mapenzi yake katika kuyatenda.

Ni katika utulivu wa chumba cha ndani, katika roho niisomeayo Biblia yangu kwa faragha, katika azimio niisomeayo Biblia yangu kwa faragha, katika azimio ninalotafuta kwalo kuwa nukta hii imetatuliwa kabisa na mwisho, kwamba nakwenda kufanya lolote Mungu asemalo, ambapo udanganyifu wa kutisha wa kusikia na kutotenda lazima ushindwe. Yaweza kutusaidia tukichukua fungu fulani la neno la Mungu na kuona jinsi tupaswavyo kulishughulikia.

Tuseme ni Mahubiri ya Mlimani. Naanza na Heri ya kwanza: “Heri walio maskini wa roho.” Nauliza—Hili lamaanisha nini? Je, nautii amri hii? Je, angalau niko na bidii kabisa katika kutafuta siku baada ya siku kudumisha hulka hii?

Ninapohisi jinsi asili yangu yenye kiburi na kujiamini ilivyo mbali nayo, je, niko tayari kungoja, kumsihi Kristo, na kuamini kwamba aweza kuifanya kazi ndani yangu? Je, nakwenda kufanya hili—kuwa maskini wa roho? Au je, tena nitakuwa msikiaji na si mtendaji? Na hivyo naweza kupitia zile Heri, na kupitia mahubiri yote, pamoja na mafundisho yake juu ya upole na huruma, juu ya upendo na haki, juu ya kufanya kila kitu kama kwa Baba, na katika kila kitu kumtumaini, juu ya kutenda mapenzi yake na maneno ya Kristo, na kuuliza—Je, najua hili lamaanisha nini? Je, nayaishi? Je, nayatenda? Je, ni kile asemacho?

Na kadiri jibu lijavyo daima—Naogopa sivyo, la, sioni uwezekano wa kuishi hivi na kufanya asemayo, nitaongozwa kuhisi uhitaji wa mapitio kamili ya imani yangu na mwenendo wangu.

Nami nitauliza kama ile nadhiri, kwamba lolote asemalo nakwenda kulifanya, imepata kuchukua nafasi, iwe katika kusoma kwangu Biblia au katika maisha yangu, ambayo anadai kwamba ipaswa kuwa nayo. Najua, maswali kama hayo yaweza kuanza kufanya kazi ndani yangu na kuniongoza kwenye ufahamu mpya kabisa wa uhitaji wangu wa Kristo atakayepumua ndani yangu uzima wake mwenyewe, na kufanya kazi ndani yangu yote asemayo. Nitapata ujasiri katika imani kusema: Naweza kufanya mambo yote katika yeye anitiaye nguvu: lolote asemalo katika Neno lake, nitalifanya.