Matokeo ya Kimatendo

Ikiwa yote yaliyosemwa kuhusu maisha yaliyofichwa pamoja na Kristo katika Mungu ni kweli, basi yanapaswa kudhihirika katika maisha yetu ya kila siku.

Wale wanaoyafurahia yanapaswa kuwa “watu wa pekee, wenye juhudi katika matendo mema.” Mwanangu alipokuwa chuoni aliwahi kumwandikia rafiki yake kwamba Wakristo ni lazima wawe mashahidi wa Mungu. Ulimwengu hautaisoma Biblia, bali utayasoma maisha yetu. Kuamini kwao dini yetu kunategemea ushuhuda unaotolewa na maisha yetu. Kama sote tujuavyo, huu ni wakati wa mambo halisi. Uchunguzi unahama kutoka nadharia kuelekea uhalisia.

Ikiwa dini yetu itasonga mbele kwa namna yo yote, ni lazima ithibitishwe kuwa ni zaidi ya nadharia tu. Ni lazima tuonyeshe, kwa akili zenye kudadisi za kizazi chetu, mambo makuu ya maisha yaliyobadilishwa kwa nguvu kuu ya Mungu itendayo kazi ndani yetu ili kutimiza mapenzi yake. “Tuonyesheni ‘maumbo ya uzima,’ wasema wanasayansi, nasi tutaamini. Kanisa litakapowaonyesha, katika wanachama wake wote, maisha matakatifu, ngome yao ya mwisho itakuwa imetekwa.” Ninatamani, kabla ya kufunga kitabu changu, kunena kwa uzito mkubwa kuhusu matunda ya maisha ya imani, kama vile nilivyokuwa nikieleza.

Ninaamini kuwa ni ya lazima. Nawasihi wasomaji wangu wahisi wajibu wao wa kuenenda kwa kustahili wito wao wa juu.

Ningependa kunena na baadhi yenu, kama rafiki wa karibu. Nina hakika kwamba, kupitia kitabu hiki, shauku ya pamoja imekua mioyoni mwenu, kama vile imekua ndani ya moyo wangu. Imetupasa kuzitangaza sifa zake yeye aliyetuita kutoka gizani kuingia katika nuru yake ya ajabu. Kwa kuwa ni rafiki, naweza kunena waziwazi na rafiki zangu. Tafadhali nisamehe ikiwa nitajadili baadhi ya mambo muhimu ya maisha na tabia. Ni ya muhimu kwa ukuaji wa kweli wa Kikristo.

Kiwango cha maisha matakatifu miongoni mwa Wakristo ni cha chini. Ujitoaji wo wote wa kweli katika maisha na mwenendo huwashangaza, na mara nyingi huwachukiza, wengi kanisani. Wengi wanaodai kuwa wafuasi wa Bwana Yesu Kristo hawafanani naye. Mtazamaji wa nje angeona upatano mdogo kati yao.

Lakini sisi, tuliousikia wito wa Mungu wa ujitoaji kamili na imani, ni lazima tutende tofauti. Ni lazima tutoke katika ulimwengu na kujitenga, wala tusifananishwe nao katika tabia zetu wala katika makusudi yetu.

Hatupaswi tena kushiriki katika roho yake wala njia zake.

Mazungumzo yetu ni lazima yawe mbinguni. Ni lazima tuyatafute yaliyo juu, ambako Kristo ameketi mkono wa kuume wa Mungu. Ni lazima tupite katika ulimwengu kama Kristo alivyoenenda. Ni lazima tuwe na nia ile iliyokuwa ndani yake.

Kama wasafiri na wageni ni lazima tujiepushe na tamaa za mwili zipiganazo na roho. Kama askari wema wa Yesu Kristo, ni lazima tuepuke shughuli za ulimwengu kadiri iwezekanavyo. Hii ni ili kumpendeza yeye aliyetuchagua kuwa askari.

Ni lazima tujiepushe na kila namna ya uovu. Ni lazima tuwe wenye fadhili na tusameheane sisi kwa sisi. Mungu, kwa ajili ya Kristo, ametusamehe. Hatupaswi kuchukia madhara wala ukatili. Badala yake, imetupasa kulipa mema kwa mabaya na kumgeuzia shavu la pili yeye anayetudhuru. Ni lazima daima tuchukue nafasi ya chini kabisa miongoni mwa wenzetu; wala tusitafute heshima yetu wenyewe, bali heshima ya wengine. Ni lazima tuwe wapole, na wanyenyekevu, na wenye kunyenyekea; tusiposimamia haki zetu wenyewe, bali haki za wengine. Yote tuyafanyayo ni lazima yafanyike kwa utukufu wa Mungu. Kwa muhtasari, kwa kuwa yeye aliyetuita ni mtakatifu, ni lazima tuwe watakatifu katika mwenendo wetu. Imeandikwa, “Iweni watakatifu, kwa kuwa mimi ni mtakatifu.””

Sasa, rafiki wapendwa, haya yote ni ya kimatendo kabisa. Bila shaka yanamaanisha maisha yaliyo tofauti sana na maisha ya wengi wanaodai imani. Yanamaanisha kwamba kwa kweli na kwa ukamilifu tunaipa nafsi kisogo, pamoja na nia za nafsi na malengo ya nafsi. Sisi ni watu wa pekee, kwa Mungu na kwa ulimwengu pia. Maisha na maneno yetu yanayofanana na Kristo yataonyesha kwamba tunamfuata Bwana Yesu Kristo. Sisi si wa ulimwengu, kama vile yeye asivyokuwa wa ulimwengu. Hatutahisi tena kwamba fedha zetu ni zetu wenyewe, bali ni za Bwana, ili zitumike katika utumishi wake. Hatuwezi kutumia nguvu zetu kwa kutafuta mambo ya kidunia tu. Tukiutafuta kwanza ufalme wa Mungu na haki yake, tutapata tunachohitaji.

Tutakatazwa kutafuta vyeo vya juu au faida za kidunia. Hatutaruhusiwa kufananishwa na ulimwengu katika namna zetu za kufikiri au za kuishi. Hatutakuwa na hamu ya kushiriki katika vituko vya kipuuzi vya ulimwengu. Imetupasa kupenda mambo ya mbinguni, si ya duniani. Hatutajitumikia sisi wenyewe, bali Bwana wetu. Tutatimiza wajibu wetu vema kuliko wakati wo wote. Tutatenda kazi “si kwa utumishi wa macho, kama wenye kuwapendeza wanadamu, bali kama watumishi wa Kristo, wakifanya mapenzi ya Mungu kwa moyo.””

Bila kiwango kilicho wazi cha maisha ya Kikristo, huenda tusiitambue sauti yake kwa sababu ya kutojua. Kwa hiyo, nataka kuwa wazi kabisa na dhahiri katika maneno yangu. Nimegundua kwamba, palipo na ufuasi mwaminifu wa Bwana katika nafsi iliyojiweka wakfu, mambo kadhaa hufuata, mapema au baadaye. Kadiri muda unavyopita, unyenyekevu na utulivu wa roho huwa maisha ya kila siku. Kunakuwa na kukubali kwa unyenyekevu mapenzi ya Mungu, kama yanavyokuja katika matukio ya kila siku.

Pia kunakuwa na ulaini mikononi mwa Mungu wa kutenda au kustahimili mapenzi yake. Kisha, imetupasa kuwa na utamu wakati wa kuchokozwa, utulivu katikati ya vurugu, na kunyenyekea matakwa ya wengine. Kunakuwa na kutokujali dharau na kutokuwa na wasiwasi. Hofu na masumbufu hutoweka. Haya yote, na neema nyingine nyingi zinazofanana nazo, ni matokeo ya asili ya yale maisha ya ndani yaliyofichwa pamoja na Kristo katika Mungu.

Kuhusu tabia zao: Daima huwaona Wakristo kama hao, mapema au baadaye, wakijitoa katika kazi fulani kwa ajili ya Mungu na wenzao. Wako tayari kutumia na kutumiwa katika utumishi wa Bwana wao. Huwa hawajali samani za nyumba zao wala mtindo wao wa kuishi. Huyafanya mapambo yote ya kibinafsi kuwa ya daraja la pili kuliko mambo ya Mungu.

Sauti hutolewa wakfu kwa Mungu, ili kunena na kuimba kwa ajili yake. Mfuko wa fedha huwekwa mikononi mwake. Kalamu hutolewa wakfu ili kuandika kwa ajili yake, midomo ili kunena kwa ajili yake, mikono na miguu ili kutimiza amri yake. Mwaka baada ya mwaka, Wakristo kama hao huzidi kuwa mbali na ulimwengu na wenye nia ya mbinguni. Huzidi kufanana na Kristo.

Nyuso zao huonyesha maisha mazuri, ya kimungu yaliyo ndani yao. Wote wanaowatazama hutambua kwamba wanaishi na kukaa ndani ya Mungu.

Nina hakika kila mmoja wenu amehisi baadhi ya viashiria vya Kimungu. Vinaonyesha mapema maisha ninayoyaeleza sasa. Je, hujaanza kuhisi, ndani kabisa ya nafsi yako, sauti ya Mungu ikikuambia kuhusu mambo haya? Je, haijakuwa maumivu na dhiki kwako siku hizi kugundua ni kiasi gani kilicho kibaya katika maisha yako? Je, nafsi yako haijasumbuliwa na shaka kuhusu baadhi ya tabia ulizowahi kuzijiingiza? Je, hujaanza kuhisi wasiwasi na baadhi ya tabia? Je, hutamani ungeweza kuzibadilisha? Je, njia za ujitoaji na za utumishi hazijaanza kujidhihirisha mbele yako, pamoja na wazo la shauku, “Laiti ningeweza kuenenda ndani yake”?

Shauku zako zote, mashaka, na dhiki ni sauti ya Mchungaji Mwema. Inatafuta kukuita utoke katika yote yaliyo kinyume na mapenzi yake. Ee! Niruhusu nikusihi usiigeuzie kisogo maombi yake ya upole. Hujui vizuri njia za siri anazokusudia kukuongoza kwazo kwa hatua hizi hizi. Hujui baraka kuu zilizo mwishoni mwake. Kama ungezijua, ungezitii kwa hamu amri zake zote. Waweza kuyafikia mafikio ya ukamilifu wa Kikristo. Ili kufanya hivyo, ni lazima umfuate Mwongozi atakayekuongoza huko. Hufunua njia yako hatua moja kwa wakati, kupitia maisha yako ya kila siku. Anaomba tu kwamba ujisalimishe kwa mwongozo wake.

Ikiwa umehakikishwa juu ya dhambi yo yote, ni sauti ya Bwana wako. Isalimishe mara moja kwa amri yake.

Furahi kwamba ameanza kukuongoza na kukuelekeza.

Uwe mlaini kabisa mikononi mwake yenye hekima. Nenda anakokuvuta. Geuka utoke katika yote yanayokufanya usite. Mtii kwa ukamilifu. Atakuongoza kwa haraka na kwa urahisi kuelekea maisha ya ajabu ya kufanana naye. Yatakuwa ushuhuda kwa wote walio karibu nawe, zaidi ya utakavyoweza kujua.

Nilimjua nafsi mmoja aliyejisalimisha ili kumfuata Bwana po pote alipomwongoza. Katika miezi mitatu, alitoka katika kukata tamaa kwa kina hadi katika umoja uliobarikiwa na Bwana Yesu Kristo.

Katika giza lake, alijiweka wakfu kwa Bwana. Aliusalimisha utashi wake kwake. Alitaka yeye atende kazi ndani yake, ili kutimiza kusudi lake jema. Alianza kusema naye kwa Roho wake ndani ya moyo wake. Alimpendekezea matendo madogo ya utumishi kwa ajili yake. Alimwita atoke katika njia zote zisizo za Kikristo.

Aliitambua sauti yake. Aliogopa jambo moja tu, nalo ni kutomtii. Kwa hiyo, alimfuata, akinyenyekea kila ombi lake, po pote alipomwongoza. Alimwongoza mbele, siku baada ya siku. Alimfananisha na mapenzi yake. Maisha yake yakawa ushuhuda kwa wale waliokuwa karibu naye. Hata baadhi ya waliopinga na kutoamini walilazimika kukiri kwamba jambo hilo lilikuwa la Mungu. Wakavutwa kufikia kujisalimisha kama huko.

Baada ya miezi mitatu mifupi ya ufuasi huu mwaminifu, ikawa hivyo. Alikwenda kwa haraka kiasi kwamba Bwana wake aliweza kuifunulia nafsi yake iliyostaajabu baadhi ya siri zake za ndani kabisa za upendo? Alilitimiza ahadi ya (Matendo 1:5) “kwa maana Yohana alibatiza kwa maji, bali ninyi mtabatizwa kwa Roho Mtakatifu baada ya siku si nyingi.” akimbatiza kwa Roho Mtakatifu.

Je, wadhani amewahi kujuta kumfuata kwa ukamilifu? Au kwamba kitu kingine cho chote ila furaha kimeujaza moyo wake? Anashukuru kwa ajili ya njia iliyomleta hadi mahali hapa pa ajabu. Baadhi ya hatua hizo zilikuwa ngumu wakati ule, lakini hazijuti. Ikiwa unataka baraka, jitoe kabisa kwa Bwana wa Kimungu, kama vile yeye alivyofanya. Usijizuie na kujisalimisha ko kote, akuombako.

Njia kamilifu ni ngumu kwa mwili. Si ngumu kwa upendo. Kama ungekuwa mgonjwa na kumhitaji Mungu, ungesonga kwa haraka kiasi gani? Bila shaka, waweza kumtumaini! Baadhi ya mambo huenda yakadai vitu vyenye thamani ndogo kwako. Huenda vikaonekana havistahili uangalifu wa Bwana. Kumbuka, yeye haoni kama mwanadamu aonavyo; kile kilicho kidogo kwako huenda kikawa, machoni pake, ufunguo wa jambo lililo la ndani kabisa. Ili kukuumba kufuata mapenzi yake, ni lazima awe nawe ukiwa mlaini. Ulaini huu hufikiwa kwa haraka zaidi kwa kunyenyekea katika mambo madogo kuliko katika yaliyo makubwa. Shauku yako moja kuu ni kumfuata kwa ukamilifu; je, huwezi basi kusema daima “Ndiyo, Bwana!” kwa amri zake zote tamu, ndogo au kubwa, na kumtumaini akuongoze kwa njia iliyo fupi zaidi hadi katika Heri yako iliyo kamili?

Rafiki yangu mpendwa, hili, na si pungufu ya hili, ndilo maana ya kujiweka kwako wakfu, ujue au usijue. Lilimaanisha utii usioepukika. Lilimaanisha kwamba mapenzi ya Mungu wako tangu sasa yangekuwa mapenzi yako katika hali zote na nyakati zote. Lilimaanisha kwamba, tangu wakati ule, uliuacha uhuru wako. Ulijisalimisha kabisa kwa uongozi wa Bwana wako. Lilimaanisha kipindi cha kumfuata, po pote alipokuongoza. Bila ndoto za kurudi nyuma. Sasa, nakuomba ushike neno lako. Acha kila kitu kingine kiende. Yaishi, katika maisha ya kila siku, yale maisha ya Kimungu yaliyo ndani yako. Umeunganishwa na Bwana wako kwa kifungo cha ajabu. Kwa hiyo, enenda kama yeye alivyoenenda. Uonyeshe ulimwengu nguvu zake za kuokoa kwa kumwacha akuokoe kabisa. Huna haja ya kuogopa kukubali jambo hili, kwa maana yeye ndiye Mwokozi wako, na nguvu zake ndizo za kutenda yote. Hakuombi wewe, katika udhaifu wako, kulitenda. Anakuomba tu ujisalimishe kwake. Ndipo, atatumia nguvu zake ili kukufanya utake kulitenda na kulitenda. Kazi yako ni kujisalimisha mwenyewe. Yake ni kutenda kazi. Kamwe hatakupa amri bila kukupa nguvu za kuitii.

Usisumbuke kwa ajili ya kesho. Mtumaini Bwana wako mwenye upendo. Aliahidi kuwaongoza kondoo wake katika njia iliyo salama na rahisi. Chukua kila hatua ya mbele kadiri anavyoiweka wazi kwako. Yalete maisha yako yote katika kila undani wake kwake ili ayadhibiti na kuyaongoza. Fuata kwa furaha na kwa haraka mapendekezo matamu ya Roho wake ndani ya nafsi yako. Na, siku baada ya siku, utamwona. Atakuleta zaidi katika kufanana na mapenzi yake katika mambo yote. Atakuumba, kadiri uwezavyo kustahimili. Ndipo, utakuwa chombo cha heshima yake, kilichotakaswa na kilicho tayari kwa kila tendo jema. Utakuwa na furaha ya kuwa barua ya Kristo, inayojulikana na kusomwa na watu wote.

Nuru yako itaangaza kwa mwangaza mkubwa hata kwamba, watu wakiona matendo yako mema, watamtukuza Baba yako aliye Mbinguni, si wewe.

Tumekusudiwa tangu asili kuwa “wenye kufananishwa na mfano” wa Mwana wa Mungu. Bila shaka, hii haimaanishi mfano wa umbo la mwili, bali mfano wa tabia na asili. Yamaanisha kufanana kwa fikira, kwa hisia, kwa shauku, kwa vitu tuvipendavyo, kwa vitu tuvichukiavyo. Yamaanisha kwamba imetupasa kufikiri na kutenda, kama Kristo angetenda, chini ya hali zetu.

Msichana mdogo aliwahi kuulizwa maana ya kuwa Mkristo. Alijibu, “Yamaanisha kuwa vile hasa Kristo angekuwa, kama angekuwa msichana mdogo na kuishi katika nyumba yangu.” Siri ya maisha ya Kristo ilikuwa upendo wake usio na ubinafsi kwa wengine. Ikiwa tunafanana naye, hii itakuwa siri yetu pia. Aliwaokoa wengine, bali nafsi yake hakuweza kuiokoa. Yeye “hakujipendeza nafsi yake.” Kwa hiyo, sisi “tusijipendeze nafsi zetu.” Badala yake, imetupasa kumpendeza jirani yetu, ikiwa ni kwa faida yake.

Mhindu mmoja mwenye mawazo mazito, aliyetembelea Uingereza na Amerika hivi karibuni ili kuchunguza Ukristo, alisema, “Kile Wakristo wanachohitaji ni Ukristo wa Kristo kidogo zaidi, na Ukristo wa mwanadamu kidogo pungufu.” Ukristo wa mwanadamu hufundisha kujitoa dhabihu ili kujiokoa wenyewe. Ukristo wa Kristo hufundisha kujitoa dhabihu ili kuwaokoa wengine. Ukristo wa mwanadamu huzaa ubinafsi usio na matunda wa dini yetu iliyozidi. Ukristo wa Kristo huzaa kutokujali nafsi kulikobarikiwa. Hutokana na maisha yaliyomwagwa kwa ajili ya wengine, kama vile yalivyokuwa yake. Kwa kifupi, kitabu chetu hufundisha jambo moja: imetupasa kuwa Wakristo wanaofanana na Kristo. Na uzoefu wetu wote hauna maana yo yote ikiwa hauzai matokeo haya. “Si kila mtu aniambiaye, ‘Bwana, Bwana,’ atakayeingia katika ufalme wa mbinguni, bali ni yeye afanyaye mapenzi ya Baba yangu aliye mbinguni.” (Mathayo 7:21)