Magumu Kuhusu Mwongozo

Sasa umeanza, msomaji mpendwa, maisha ya imani. Umejitoa kwa Bwana, uwe wake kabisa. Amekuchukua na ameanza kukuumba uwe chombo cha heshima yake. Shauku yako ya ndani kabisa ni kuwa mnyofu kabisa mikononi mwake. Unataka kumfuata popote atakapokuongoza.

Unamtumaini afanye kazi ndani yako kutaka na kutenda kwa kulitimiza kusudi lake jema. Lakini hapa unakutana na ugumu mkubwa. Hauijui sauti ya Mchungaji Mwema. Kwa hiyo, una shaka kuhusu mapenzi yake kwako.

Mungu anakuita katika njia fulani. Rafiki zako wanaonyesha kutokubali kwa nguvu. Tena, rafiki hawa huenda wamekuzidi umri katika maisha ya Kikristo. Wanaonekana kuwa mbele zaidi, pia. Ni vigumu sana kwako kutofautiana nao au kuwahuzunisha. Pia unahisi kutokuwa na uhakika sana kuhusu kutii wajibu wowote ambao wangeweza kuukataa.

Hata hivyo, huwezi kuziondoa hisia hizi. Unatumbukia katika shaka na wasiwasi. Kuna njia ya kutokea kutoka katika magumu haya yote, kwa nafsi iliyojisalimisha kikamilifu. Ningerudia, iliyojisalimisha kikamilifu. Utashi wowote wa kupinga hufanya iwe vigumu kujua nia ya Mungu kuhusu jambo hilo. Kwa hiyo, kwanza, hakikisha unataka kweli kumtii Bwana katika mambo yote. Ikiwa ndivyo, nafsi yako inahitaji tu kujua mapenzi ya Mungu ili iyakubali.

Basi, huwezi kutia shaka shauku yake ya kuyafunua na kukuongoza.

Kuna ahadi nyingi zilizo wazi kabisa kuhusu jambo hili. Kwa mfano, Yohana 10:3-4 “Bawabu humfungulia huyo. Kondoo huisikia sauti yake, naye huwaita kondoo wake kwa majina yao, na kuwaongoza nje. Naye awatoapo nje kondoo wake wote, hutangulia mbele yao, na kondoo humfuata, kwa maana waijua sauti yake. ” Yohana 14:26: Lakini huyo Msaidizi, Roho Mtakatifu, ambaye Baba atampeleka kwa jina langu, atawafundisha yote, na kuwakumbusha yote niliyowaambia.” Pia, Yakobo 1:5-6: “Ikiwa mtu wa kwenu amepungukiwa na hekima, na aombe dua kwa Mungu, awapaye wote kwa ukarimu wala hakemei, naye atapewa. Lakini na aombe kwa imani, pasipo shaka yo yote; maana mwenye shaka ni kama wimbi la bahari lililochukuliwa na upepo, na kutupwa huku na huku. ” Kwa mafungu kama haya, na mengine mengi kama hayo, ni lazima tuamini kwamba mwongozo wa Kimungu tumeahidiwa, na imani yetu ni lazima iutazamie na kuutarajia kwa ujasiri.

Jambo hili ni la muhimu; kwa maana katika Yakobo 1:6-7, tunaambiwa, “ Lakini na aombe kwa imani, pasipo shaka yo yote; maana mwenye shaka ni kama wimbi la bahari lililochukuliwa na upepo, na kutupwa huku na huku. Kwa maana mtu kama huyo asidhani ya kwamba atapokea kitu kwa Bwana .

Kwanza, kata shauri juu ya jambo hili. Mwongozo wa Kimungu umeahidiwa. Hakika utaupata ukiuomba.

Shaka isikugeuze kutoka katika jambo hili.

Kisha, kumbuka kwamba Mungu wetu ana ujuzi wote na hekima yote. Kwa hiyo, huenda akakuongoza katika njia ambazo baraka kubwa zinakungoja. Lakini, machoni pa wanadamu wenye kuona karibu tu walio kandokando yako, njia hizo zaweza kuonekana kana kwamba zinaelekea kwenye machafuko na hasara.

Ni lazima ukubali kwamba mawazo na njia za Mungu ni tofauti na za mwanadamu . Yeye peke yake, ajuaye mwisho tangu mwanzo, ndiye awezaye kuhukumu matokeo ya tendo lo lote. Ni lazima utambue kwamba upendo wake kwako waweza kukuongoza kwenda kinyume na matakwa ya rafiki zako wapendwa zaidi.

Ni lazima ujifunze kutoka Luka 14 na mafungu mengineyo kama hayo, “Mtu ye yote akija kwangu naye hawachukii baba yake, na mama yake, na mke wake, na watoto wake, na ndugu zake wa kiume na wa kike, naam, hata na nafsi yake mwenyewe, hawezi kuwa mwanafunzi wangu. Mtu ye yote asiyeuchukua msalaba wake na kunifuata, hawezi kuwa mwanafunzi wangu. Kwa maana ni nani miongoni mwenu, ataka kujenga mnara, asiyeketi kwanza na kuhesabu gharama, kwamba anavyo vya kuutimiza? Ama sivyo, akiisha kuuweka msingi naye akashindwa kuumaliza, wote waonao huanza kumdhihaki, wakisema, ‘Mtu huyu alianza kujenga naye akashindwa kumaliza.’ Au ni mfalme gani, aendaye kupigana na mfalme mwingine vitani, asiyeketi kwanza na kufikiri kwamba aweza, kwa elfu kumi, kukutana na yule anayekuja juu yake na elfu ishirini? Na kama hawezi, hutuma wajumbe angali yule yu mbali, na kutaka masharti ya amani. Basi, kadhalika kila mmoja wenu asiyeacha vyote alivyo navyo, hawezi kuwa mwanafunzi wangu.” ( Luka 14:26-33.)

Ili uwe mwanafunzi wa Bwana wako, huenda ukahitaji kuacha vyote ulivyo navyo. Huenda ukalazimika kuwapa kisogo jamaa yako, au hata uhai wako mwenyewe. Kama jambo hili halitambuliwi waziwazi, nafsi yaweza kuteseka. Mara nyingi, njia ya utii ya mtoto itawachukiza wale awapendao zaidi. Kama hawezi kumtumaini Bwana katika jambo hili, atapotea.

Bila shaka, jambo hili linapatana na wajibu wetu wa kuheshimiana na kupendana katika mahusiano mbalimbali ya maisha yetu. Kadiri tunavyokaribia zaidi kwa Kristo, ndivyo tutakavyoonyesha zaidi upole wake na utaratibu wake. Pia tutakuwa wenye wororo kwa walezi na washauri wetu wa asili. Mwongozo wa Bwana Mkubwa daima utajidhihirisha kwa Roho wa Bwana Mkubwa. Ikiwa, katika kumtii yeye, tunatenda kinyume na matakwa ya rafiki zetu, upendo wetu na saburi yetu vitathibitisha nia yetu. Lakini, baada ya jambo hili kukatwa, sasa twauliza mwongozo wa Mungu utatujiaje. Tutaijuaje sauti yake?

Kuna njia nne za pekee ambazo Mungu husema kwazo: 1. sauti ya Maandiko, 2. hisia za ndani za Roho Mtakatifu, 3. busara yetu ya juu zaidi, na 4. mazingira ya maongozi ya Mungu. Ikiwa hizi nne zinapatana, ni salama kusema kwamba Mungu anasema. Naliweka jambo hili kuwa kanuni, ambayo hakuna awezaye kuipinga. Sauti yake daima itapatana yenyewe kwa yenyewe, hata kama atasema kwa njia ngapi.

Sauti zaweza kuwa nyingi, lakini ujumbe waweza kuwa mmoja tu. Kama Mungu ataniambia kwa sauti moja nifanye au niache kufanya jambo lo lote, haiwezekani kabisa aniambie kinyume chake kwa sauti nyingine. Kama kuna mgongano katika sauti hizo, basi anayesema hawezi kuwa ni yeye yeye mmoja.

Kanuni yangu ya kutofautisha sauti ya Mungu ni kuipima kwa upatano huu. Nikiwa na hisia fulani, ni lazima nichunguze kama inapatana na Maandiko. Ni lazima pia nione kama busara yangu ya juu zaidi inaikubali, na, kama sisi Wakwaka tusemavyo, kama “njia inafunguka” ili kulitekeleza. Kama pimo lo lote kati ya haya likishindikana, si salama kuendelea. Ni lazima ningoje kwa tumaini tulivu hata Bwana anionyeshe mahali pa upatano. Naye atanionyesha, ikiwa ni sauti yake iliyosema. Kwa maana hatuna budi kutosahau kwamba kuna sauti nyingine zisemazo na nafsi. Kuna sauti ya nafsi yenye kelele na makelele ambayo daima hutafuta kusikiwa. Na kuna sauti za pepo waovu, wadanganyao. Huvizia ili kumtega kila msafiri aingiaye katika sehemu hizi za juu za maisha ya kiroho.

Katika waraka ule ule utuambiao kwamba tumeketishwa katika “akatufufua pamoja naye, akatuketisha pamoja naye katika ulimwengu wa roho, katika Kristo Yesu , ” (Waefeso 2:6) , twaambiwa pia kwamba itatubidi kupigana huko na adui za kiroho. “ Kwa maana kushindana kwetu sisi si juu ya damu na nyama; bali ni juu ya falme, na mamlaka, na wakuu wa giza hili, na majeshi ya pepo wabaya katika ulimwengu wa roho.” (Waefeso 6:12). Adui hawa wa kiroho, wawe ni nani, ni lazima wawasiliane nasi kupitia nguvu zetu za kiroho. Kwa hiyo sauti zao zitakuwa, kama za Mungu, hisia ya ndani katika roho zetu.

Kwa hiyo, kama vile Roho Mtakatifu awezavyo kutuambia, kwa hisia, mapenzi ya Mungu, ndivyo watakavyofanya adui hawa wa kiroho.

Watatuambia, kwa hisia, mapenzi yao, ijapokuwa hawatoi jina lao. Kwa hiyo ni wazi kwamba twahitaji kipimo. Ni lazima tuzijaribu hisia hizi za ndani. Ni ili kujua ni sauti ya nani inayosema. Na kipimo hicho daima kitakuwa ni ule upatano niliouzungumzia. Katika jitihada iliyopotoka ya kumheshimu Roho wa Kimungu, baadhi ya Wakristo wenye bidii wameyapuuza na hata kuyahalifu Maandiko. Wamezidharau ishara zilizo wazi za maongozi ya Mungu na kuidhulumu busara yao wenyewe iliyo bora. Mungu, aonaye mioyo yao ya kweli, aweza kusamehe naye husamehe. Lakini, matokeo yake katika maisha haya mara nyingi ni ya kusikitisha sana.

Ni lazima kwanza tuipime sauti yo yote idaiyo kuwa ya Kimungu. Ni lazima ipatane kimaadili na nia na mapenzi ya Mungu, kama yalivyofunuliwa katika Injili ya Kristo. Lo lote lililo kinyume cha hili, haliwezi kuwa la Kimungu, kwa sababu Mungu hawezi kujipinga mwenyewe. Hatuwezi kutarajia ufunuo wa moja kwa moja hata tutafute na kutii mapenzi ya Mungu, kama yalivyofunuliwa katika Biblia. Makosa mengi sana ya kuangamiza hufanywa katika jambo hili la mwongozo, kwa kupuuza kanuni hii rahisi. Ikiwa Baba yetu ametupatia maelekezo yaliyo wazi, hatatufunulia jambo jingine zaidi. Hakuna mtu ahitajiye au awezaye kutarajia ufunuo wa moja kwa moja umwambie asiibe. Mungu tayari, katika Maandiko, ameyatangaza waziwazi mapenzi yake kuhusu jambo hilo. Laonekana wazi kiasi kwamba nisingelitaja. Lakini, nimekutana na Wakristo waliolipuuza wakawa na msimamo wa kupindukia.

Kwa maana Maandiko yako wazi zaidi sana hata kuhusu mambo madogomadogo kuliko watu wengi wafikirivyo. Na hakuna mambo mengi ya maana maishani ambayo kwayo hakuwezi kupatikana maelekezo yaliyo wazi katika kitabu cha Mungu.

Chukua suala la mavazi, nasi tunayo 1 Petro 3:3-4 “ Kujipamba kwenu kusiwe kwa nje — kusuka nywele, na kujitia dhahabu, na kuvaa mavazi — bali kuwe utu wa moyoni usionekana, katika mapambo yasiyoharibika, yaani, roho ya upole na utulivu, iliyo ya thamani kubwa mbele za Mungu .” na 1 Timotheo 2:9-10 “ vivyo hivyo wanawake nao wajipambe kwa mavazi ya kujisitiri, pamoja na adabu nzuri, na moyo wa kiasi; si kwa kusuka nywele, wala kwa dhahabu na lulu, wala kwa nguo za thamani; bali kwa matendo mema, kama iwapasavyo wanawake wanaokiri kuwa watu wa kumcha Mungu.”

Chukua suala la usemi, nasi tunayo Waefeso 4:29 “ Neno lo lote lililo ovu lisitoke vinywani mwenu, bali lililo jema la kumfaa mwenye kuhitaji, ili liwape neema wanaosikia . ” , na 5:4 “ Wala aibu, wala maneno ya upumbavu, wala ubishi; hayo hayapendezi; bali afadhali kushukuru .” Chukua suala la kulipiza kisasi cha maudhi na kudai haki zako, nasi tunayo (Warumi 12:19-21) “ Wapendwa, msijilipizie kisasi, bali ipisheni ghadhabu ya Mungu; maana imeandikwa, “Kisasi ni juu yangu mimi, mimi nitalipa, anena Bwana.” Lakini, “Adui yako akiwa na njaa, mlishe; akiwa na kiu, mnyweshe; maana ufanyapo hivyo, utampalia makaa ya moto kichwani pake.” Usishindwe na ubaya, bali uushinde ubaya kwa wema ,” na (Mathayo 5:38-48) “Mmesikia kwamba imenenwa, ‘Jicho kwa jicho, na jino kwa jino.’ Lakini mimi nawaambia, Msishindane na mtu mwovu. Lakini mtu akupigaye shavu la kuume, mgeuzie na la pili.

Na mtu akitaka kukushtaki na kuitwaa kanzu yako, mwachie na joho pia. Na mtu akikulazimisha mwendo wa maili moja, nenda naye mbili. Akuombaye mpe, wala usimpe kisogo yeye atakaye kukukopa. Mmesikia kwamba imenenwa, ‘Umpende jirani yako, na umchukie adui yako.’ Lakini mimi nawaambia, Wapendeni adui zenu, waombeeni wanaowaudhi, ili mpate kuwa wana wa Baba yenu aliye mbinguni; maana yeye huwaangazia jua lake waovu na wema, huwanyeshea mvua wenye haki na wasio haki. Maana mkiwapenda wanaowapenda ninyi, mwapata thawabu gani? Hata watoza ushuru, je! nao hawafanyi hivyo? Tena mkiwaamkia ndugu zenu tu, mnatenda tendo gani la kupita kawaida? Hata watu wa mataifa, je! nao hawafanyi hivyo? Basi ninyi mtakuwa wakamilifu, kama Baba yenu wa mbinguni alivyo mkamilifu.”

“ Kwa maana huu ni wema, mtu akivumilia huzuni kwa kumkumbuka Mungu, hali akiteswa isivyo haki. Kwa maana ni sifa gani, mtu akifanya dhambi kisha akapigwa, na kustahimili? Lakini mkitenda mema kisha mkiteswa, na kustahimili, huu ni wema mbele za Mungu. Kwa maana ndilo mliloitiwa; kwa sababu Kristo naye aliteswa kwa ajili yenu, akawaachia kielelezo, mfuate nyayo zake .”(1 Petro.

2:19-21) Chukua suala la kusameheana, nasi tunayo (Waefeso 4:32) “ Iweni wafadhili ninyi kwa ninyi, wenye huruma, mkasameheane kama na Mungu katika Kristo alivyowasamehe ninyi.”

Marko 11:25-26 “Nanyi kila msimamapo na kusali, sameheni, mkiwa na neno juu ya mtu; ili na Baba yenu aliye mbinguni awasamehe na ninyi makosa yenu .” Chukua suala la kuufuata mfano wa ulimwengu, nasi tunayo (Warumi 12:2) “ Wala msiifuatishe namna ya dunia hii; bali mgeuzwe kwa kufanywa upya nia zenu, mpate kujua hakika mapenzi ya Mungu yaliyo mema, ya kumpendeza, na ukamilifu. ” na (1 Yohana 2:15-17) “ Msiipende dunia, wala mambo yaliyomo katika dunia. Mtu akiipenda dunia, kumpenda Baba hakumo ndani yake. Maana kila kilichomo duniani, yaani, tamaa ya mwili, na tamaa ya macho, na majivuno ya uhai — havitokani na Baba, bali vyatokana na dunia. Na dunia inapita, pamoja na tamaa zake; bali yeye afanyaye mapenzi ya Mungu adumu hata milele.

“ Enyi wazinzi! Hamjui ya kwamba urafiki wa dunia ni uadui na Mungu?

Basi, kila atakaye kuwa rafiki wa dunia hujifanya kuwa adui wa Mungu.”(Yakobo 4:4) Chukua suala la wasiwasi wa kila namna, nasi tunayo (Mathayo 6:25-34) “Kwa sababu hiyo nawaambia, Msisumbukie maisha yenu, mle nini au mnywe nini; wala miili yenu, mvae nini. Maisha, je! si zaidi ya chakula, na mwili zaidi ya mavazi? Waangalieni ndege wa angani, ya kwamba hawapandi, wala hawavuni, wala hawakusanyi ghalani; na Baba yenu wa mbinguni huwalisha hao. Ninyi je! si bora kupita hao? Ni nani kwenu ambaye akijisumbua aweza kujiongeza kimo chake hata mkono mmoja?

Na mavazi, ya nini kuyasumbukia? Fikirini maua ya mashamba, jinsi yameavyo; hayafanyi kazi, wala hayasokoti; nami nawaambia, ya kwamba hata Sulemani katika fahari yake yote hakuvikwa vizuri kama mojawapo la hayo. Basi, ikiwa Mungu huyavika hivi majani ya kondeni, yaliyopo leo, na kesho hutupwa kalibuni, je! hatawavika ninyi zaidi, enyi wa imani haba? Kwa hiyo msisumbuke, mkisema, ‘Tule nini?’

au ‘Tunywe nini?’ au ‘Tuvae nini?’ Kwa maana hayo yote mataifa huyatafuta; kwa sababu Baba yenu wa mbinguni anajua ya kuwa mnahitaji hayo yote. Bali utafuteni kwanza ufalme wake, na haki yake; na hayo yote mtazidishiwa. “Kwa hiyo , msisumbukie ya kesho; kwa kuwa kesho itajisumbukia yenyewe. Yatosha kwa siku maovu yake.

“ Msijisumbue kwa neno lo lote; bali katika kila neno kwa kusali na kuomba, pamoja na kushukuru, haja zenu na zijulikane na Mungu. Na amani ya Mungu, ipitayo akili zote, itailinda mioyo yenu na nia zenu katika Kristo Yesu.”( Wafilipi 4:6-7) Natoa haya tu kama mifano ili kuonyesha jinsi mwongozo wa Biblia ulivyo kamili na wa vitendo kabisa. Ikiwa umechanganyikiwa, kwanza, chunguza kama Biblia inalizungumzia swali lako. Mwombe Mungu akufunulie mapenzi yake kupitia Maandiko. Na lo lote litakaloonekana kwako kufundishwa waziwazi humo, hilo ni lazima ulitii. Kusoma na kutafakari kumbukumbu hii ya nia na mapenzi ya Mungu hutuangaza. Roho ivuviaye atafanya hivyo. Kisha utii wetu utakuwa, kana kwamba, ni neno lililopo, lililo hai. Litakuwa kana kwamba Bwana wetu amelinena kwetu leo kutoka Mbinguni. Biblia ni ujumbe wa kale kutoka kwa Mungu, uliotumwa kwetu zamani sana. Pia ni ujumbe wa sasa, uliotumwa kwetu sasa kila mara tuisomapo.

“Maneno yangu ni roho, tena ni uzima. Ni lazima uyatii. Ni amri, ya binafsi na ya sasa.” Lakini ni lazima tukumbuke, Biblia ni kitabu cha kanuni. Si mkusanyiko wa misemo isiyohusiana . Maandiko yaliyotengwa peke yake yaweza kutumiwa kuhalalisha mambo . Mambo haya yanapingwa na kanuni za Maandiko.

Karibuni nilisikia habari za mwanamke Mkristo katika mkutano mmoja wa Magharibi. Andiko, “Kwa maana twaenenda kwa imani, si kwa kuona,” lilimjia akilini. Alihisi kwamba ilikuwa amri ya kutiiwa kihalisi. Kwa hiyo, alijifunga kitambaa machoni na kusisitiza kutembea huku na huku katika njia ya kanisani ili kuonyesha mwenendo wa imani. Punde si punde alijikwaa na kuanguka juu ya jiko, akajiunguza. Kisha, alistaajabia ile maongozi ya ajabu.

Kuyatumia Maandiko pamoja na akili yake ya kawaida kungelimwokoa kutoka katika udanganyifu ule.

Kwa hiyo, kipimo cha pili ni busara yetu wenyewe ya juu zaidi, au akili ya kawaida. Ni kweli sasa kama ilivyokuwa katika siku za Sulemani. “mwenye ufahamu atapata mashauri mema.” Onyo lake bado latufunga: “Jipatie hekima, ndilo jambo kuu. “Kwa kila upatacho, jipatie ufahamu.” Maandiko yasema ni jambo la muhimu kwa watoto wa Mungu kutumia uwezo wao wote katika safari yao kupitia ulimwengu huu. Wanapaswa kutumia nguvu zao za nje kwa mwenendo wao wa nje, na nguvu zao za ndani kwa mwenendo wao wa ndani. Wangeweza vivyo hivyo kutarajia “kulindwa” wasigonge vidole vyao vya miguu kama wakitembea hali wamefungwa macho. Ni sawa na kutarajia “kulindwa” dhidi ya kujikwaa kiroho kama wakiipuuza busara yao na akili yao ya kawaida.

Nilimwuliza Mkristo mmoja mwenye “akili timamu” jinsi alivyotofautisha pepo za uongo na Roho Mtakatifu. Akajibu, “Nawapiga kichwani nione kama wana akili ya kawaida yo yote.” Wengine waweza kusema, “Lakini hatuna budi kutokutegemea ufahamu wetu wa kibinadamu katika mambo ya Kimungu.” Nami najibu kwamba hatupaswi kutegemea ufahamu wetu usio na nuru. Twapaswa kutegemea busara yetu na akili yetu ya kawaida, ambayo Roho wa Mungu ameiangaza. Yaani, Mungu atasema nasi kupitia nguvu ambazo yeye mwenyewe ametupatia, wala si kwa kuziacha kando. Ni lazima tutumie macho yetu tunapotembea, hata tuwe waaminifu kiasi gani.

Vivyo hivyo, ni lazima tutumie akili zetu katika maisha yetu ya ndani.

Kipimo cha tatu na cha mwisho ni kile cha mazingira ya maongozi ya Mungu. Ikiwa “uongozi” fulani ni wa Mungu, njia daima itafunguka kwa ajili yake. Bwana wetu anatuhakikishia jambo hili katika Yohana 10:4. Wasema, “Naye awatoapo nje kondoo wake wote, hutangulia mbele yao, na kondoo humfuata, kwa maana waijua sauti yake. ” Angalia hapa maneno haya “hutangulia mbele,” na “ humfuata .” Yeye hutangulia mbele ili kufungua njia, nasi twapaswa kufuata katika njia iliyofunguliwa hivyo. Mkristo hapaswi kulazimisha njia yake na kukanyaga upinzani. Hilo kamwe si ishara ya uongozi wa Kimungu. Ikiwa Bwana “anatangulia mbele” yetu, atatufungulia milango yote, nasi hatutahitaji sisi wenyewe kuivunja kwa nguvu.

Jambo la nne ni hili: Ni lazima tuzipime hisia zetu kwa zile sauti nyingine tatu. Ni lazima pia tuzipime sauti hizo kwa hisia zetu za ndani. Tukihisi “kizuizi akilini mwetu” juu ya jambo lo lote, ni lazima tungoje hata kiondolewe kabla ya kutenda. Mkristo mmoja, aliyekuwa amesonga mbele haraka katika maisha ya Kimungu, alinipa siri hii: “Sikuzote nazizingatia ishara za kuzuia.” Hatuna budi kutokupuuza sauti yetu ya ndani, wala kuipita kwa nguvu, kama vile tusivyopaswa kufanya kwa zile sauti nyingine tatu nilizozizungumzia.

Basi, sauti hizi nne, daima zitaonekana kupatana katika uongozi wo wote ulio wa Kimungu kweli. Sauti ya hisia zetu, sauti ya Maandiko, sauti ya busara yetu wenyewe iliyotakaswa. Sauti ya mazingira ya maongozi ya Mungu. Ikiwa hizi nne hazipatani mwanzoni, ni lazima tungoje hata zipatane.

Hisia ya Kimungu ya “wajibu wa kupasa,” itokanayo na upatano wa sauti mbalimbali zote za Mungu, ndiyo msingi pekee ulio salama kwa tendo lo lote. Nimezilinda sehemu za hatari. Kwa hiyo, tafadhali niacheni niendelee. Naitamani sana shangwe ya mawasiliano haya ya moja kwa moja ya mapenzi ya Mungu kwetu. Yanionekana kuwa fahari kuu kupita zote. Kwanza kabisa, kwamba Mungu anipende kiasi cha kujali mambo madogomadogo ya maisha yangu ni jambo la ajabu kabisa.

Na kwamba angeniambia yote kuhusu jambo hilo. Na, kujua jinsi ya kuishi na kuenenda ili kumpendeza kikamilifu, yaonekana karibu kuwa jema mno kiasi cha kutoaminika.

Kamwe hatujali mambo madogomadogo ya maisha ya watu isipokuwa tunawapenda. Hatujali watu wengi wafanyayo nini au jinsi wanavyotumia wakati wao. Lakini tunapompenda mtu, twaanza kujali. Kujali kwa Mungu kwetu kunathibitisha upendo wake. Ni baraka kuu kwamba anasema nasi juu ya kila jambo katika maisha yetu. Hili linatia ndani wajibu wetu, anasa zetu, urafiki wetu, na yote tuyafanyayo, tuyafikiriyo, au tuyasemayo.

Ni lazima ujue jambo hili katika uzoefu wako mwenyewe, msomaji mpendwa. Ndipo tu utakapoipata shangwe na fahari ya maisha yaliyofichwa pamoja na Kristo katika Mungu. Ni mojawapo ya vipawa vyake vya thamani zaidi. Mungu anaahidi kufanya kazi ndani yetu kutaka na kutenda kwa kulitimiza kusudi lake jema.

Maana yake ni kwamba atautwaa utashi wetu na kuutendea kazi kwa niaba yetu. Mapendekezo yake yatatujia kama shauku, si kama amri. Yatatoka ndani ya utashi wetu; tutahisi kana kwamba tulitaka kufanya jambo fulani na fulani, si kana kwamba ni lazima. Hili linaifanya kuwa utumishi wa uhuru mkamilifu. Kwa maana daima ni rahisi kufanya kile tunachokitamani, hata mazingira yawe magumu kiasi gani. Kila mama anajua angeweza kupata utii mkamilifu kutoka kwa mtoto wake. Anahitaji tu kuutawala utashi wake, akimfanya atake kufanya kile amtakalo.

Na hivi ndivyo Baba yetu awafanyiavyo watoto wake katika maongozi mapya.

Anaziandika sheria zake katika mioyo yetu na nia zetu. Twazipenda. Hisia zetu na busara yetu, si hofu zetu, ndizo zitusukumazo kutii. Roho Mtakatifu kwa kawaida huongoza kwa kuchapa ndani ya moyo shauku ya kufanya au kuepuka mambo fulani.

Katika sala, nafsi huhisi pendekezo la ghafla kuhusu wajibu fulani. “Ningependa kufanya hili au lile,” hufikiri, “laiti ningeweza.” Au pendekezo laweza kuja kama swali, “Je, isingekuwa afadhali nifanye hivi na hivi?” Au laweza kuwa mwanzoni ni kwa njia ya mkazo wa moyoni tu kwamba jambo kama hilo ndilo lililo sahihi na bora kufanywa. Jambo hilo lapaswa kukabidhiwa kwa Bwana. Ni lazima papo hapo tuchague kumtii. Ikiwa pendekezo linapatana na Maandiko, na busara takatifu, na mazingira, twapaswa kulitii.

Utii wa papo hapo ndio njia iliyo salama na rahisi zaidi. Roho anaposema, ni rahisi kutii. Lakini nafsi ikisitasita na kubishana, kutii huwa kugumu zaidi.

Mikazo ya moyoni ya kwanza kwa kawaida huwa sahihi katika moyo uliojisalimisha kikamilifu. Mungu ni mwaminifu naye atafanya sauti yake isikike kuliko zote nyingine. Kwa hiyo mikazo kama hiyo kamwe haipaswi kukabiliwa kwa hoja. Sala na tumaini ndizo hali pekee zilizo salama za nafsi. Lakini hata hizi zapaswa kuwa fupi.

Ni lazima tutende kabla wakati haujapita na tukaikosa baraka.

Ikiwa pendekezo si wazi na shaka ikaibuka, twapaswa kungoja ufahamu zaidi. Hili ni kweli hasa ikiwa rafiki zetu hawakubaliani. Kanuni ya Maandiko ni, “na kila lisilotoka katika imani ni dhambi” maana yake wazi ni kwamba kamwe hatupaswi kutenda tukiwa na shaka. Mkazo ulio wazi wa jambo lililo sahihi ndio mwongozo pekee ulio salama. Lakini ni lazima tungoje kwa imani. Ni lazima tujisalimishe kikamilifu, tukisema, “Naam,” kwa mapenzi ya Bwana wetu, yawe yo yote.

Matatizo yetu hutokana na kukosa utashi. Kisha, wengi hutia shaka mwongozo wo wote halisi wa Kimungu. Watoto wa Mungu wana mashaka mengi sana katika jambo hili. Wanazisoma ahadi na kuhisi hitaji. Lakini, hawawezi kuamini kwamba kuna atakayewaongoza.

Ni kana kwamba Mungu anataka tuitii sauti yake, lakini asijue jinsi ya kutufanya tumsikie na kumwelewa. Kwa hiyo inawezekana kabisa Mungu aseme, lakini nafsi isisikie, kwa sababu haiamini kwamba anasema. Hakuna mzazi wala bwana ye yote wa duniani awezaye kuwaongoza watoto au watumishi wake kama hawakumwamini au kuikubali sauti yake kuwa ndiyo mapenzi yake ya kweli. Mungu, aliyesema na baba zetu kwa njia nyingi, bado anasema. Anataka kuona kama kuna nafsi zo zote zitakazoyatii mapenzi yake.

Kila dakika ya maisha yetu Baba yetu anatafuta kujidhihirisha kwetu. “ Yesu akamwambia, “Mimi ninayesema nawe ndiye.”(Yohana 4:26) Mimi ninayesema moyoni mwako, katika mazingira yako, katika hasara zako, katika faida zako, katika huzuni zako, na katika furaha zako, ndiye. “Mimi nasema kila mahali na katika kila jambo.” Kwa hiyo, ni lazima tuwe na imani kamili kwamba sauti ya Bwana inasema nasi. Itatufundisha na kutuongoza. Atatupa hekima kwa ajili ya mwongozo wetu. Baada ya kuomba mwongozo, ni lazima tufuate hisia yetu iliyo na nguvu zaidi ya kile tupaswacho kufanya. Kanuni chache zaweza kutusaidia katika jambo hili.

I. Ni lazima tuamini kwamba Mungu atatuongoza.

II. Ni lazima tuusalimishe utashi wetu wenyewe kwa mwongozo wake.

III. Ni lazima tuisikilize sauti ya Kimungu.

IV. Ni lazima tuungoje upatano wa Kimungu.

Tunapokuwa na hakika ya mwongozo wa Mungu, ni lazima tuufuate bila kusitasita. Yeye ndiye makao yetu ya kweli. Njia yaweza kuwa ngumu na nyembamba, lakini hakuna kingine kiwezacho kuutosheleza moyo umtamaniao yeye. Ni kiasi kidogo namna gani cha njia hiyo ambacho umekitembea, ee nafsi yangu! Jipe moyo, na uache wazo la Mungu likuvute mbali zaidi. Njia iliyo kamili yaweza kuwa ngumu kwa mwili, lakini si ngumu kwa upendo. Kama ungelimhitaji Mungu kwa dhati, ni kwa haraka namna gani ungelisogea kwake.

Usimpe Mungu wajibu wako kwa kinyongo — mikono yako na iwe wazi na huru. Kaza macho yako kwa Yesu na ufikiri jinsi alivyokupa upendo wake kwa ukarimu. Ukamilifu wa kweli wahitaji tu moyo ubakiao katika amani mchana kutwa, ukiisikiliza sauti ya Roho kila dakika. Uweke dhamiri yako ikiwa nyeti — usiyapuuze mashawishi yake matulivu. Nawe uende po pote neema yake ikuongozayo.