Circuit Teaching International

Mwaka 1998 ulikuwa na shughuli nyingi kwangu: huduma Baja California, Mexico, Uingereza, Brazil (safari yangu ya tatu kwa kongamano la umisheni na kampeni ya uinjilisti – ona Sura ya 28), Uingereza tena, na Mexico City na viunga vyake.

Februari, nilialikwa kuwafundisha wachungaji Baja California pamoja na Circuit Teaching International – programu iliyoanzishwa Afrika kuwafundisha wachungaji wasioweza kumudu kwenda seminari. Tuliendesha gari hadi San Diego ambako marafiki zetu wapendwa tangu siku za Anastasis, Randy na Barbara Sizemore, sasa walikuwa na nyumba yao. Anne alitumia muda mwingi pamoja nao lakini pia aliungana nami kwa muda kule Tecate, nyumbani kwa Dave na Beth Goff. Walikuwa marafiki wa thamani kama nini, walivyotuzungusha sehemu kubwa ya Baja California kwa fursa za huduma kwa wachungaji wenye shauku katika maeneo yale yote. Baadaye ningetumia nyakati nyingi katika miji mbalimbali ya Baja, nikijifunza kuboresha Kihispania changu na kuufurahia utamaduni wa Kimeksiko, ucheshi wake na chakula chake, tena nikifurahia ushirika wa ajabu namna hiyo. Tulipata marafiki wapya wengi Valle de Trinidad, San Filipe na San Matias kule pwani, na Mexicali na Tijuana mpakani mwa Marekani.

Mei, nilikwenda Uingereza kwa majuma sita kwa mwaliko wa wafanyakazi Wakristo wa benki ya National Westminster (NatWest). Kuna ‘vikundi’ vingi vya waaminio katika eneo pana la London na, hasa katika ‘the city’, wakutanao kila juma kwa ushirika. Ilikuwa pendeleo langu kuzungumza na vikundi vyote hivyo katika majuma sita na kuwa mgeni wao katika jumba la NatWest la mashambani, Haythorp Hall, Oxfordshire, kwa semina ya siku moja iliyohudhuriwa na ‘watu wa benki’ wapatao sabini, yenye kichwa “Kuachilia karama zako za kiroho sokoni pa kilimwengu.” Hii ndiyo dhamira kuu ya kitabu changu ‘Soar Like the Eagle’.

Jinsi jambo hili lilivyotokea ni hadithi ya kuvutia. Martin Edwards, binamu yake Anne, aliyeshika cheo cha juu katika benki ile, alifuatwa na Peter wakati wa mapumziko kutoka shughuli za kawaida. “Nimevunjika moyo kabisa,” akasema. “Nahisi wito wa kuingia katika huduma ya uchungaji, lakini kanisa langu haliniruhusu kutenda kazi hivi.” “Unamwona yule mama pale?” Martin akajibu. “Ndio kwanza amefiwa na binti yake wa ujana katika ajali.” “Yule bwana pale ndio kwanza ameachishwa kazi baada ya miaka ishirini na mitano.” “Kijana aliye kushoto kwako ndio kwanza uchumba wake umevunjika.” “Je, hudhani wanahitaji mchungaji?” Mara moja Peter aliipokea changamoto ya kuwahudumia watu hawa waliojeruhiwa moyoni na, mwaka mmoja baadaye, alikuwa amejulikana kama mchungaji wa wafanyakazi wote wa benki katika ghorofa ile – naye alitoshelezwa sana kuitekeleza huduma yake katika soko hili la kilimwengu.

Kutoka Uingereza nilisafiri hadi Fortaleza, Brazil, ambako Anne angekutana nami nasi tungeanza miezi yetu mitatu ya kuwahudumia viongozi vijana wa YWAM walipokuwa wakipanga kongamano la umisheni na kampeni ya uinjilisti, ambavyo mafanikio yake nimeyasimulia katika sura iliyopita.

Septemba, Anne aliporudi Kanada baada ya Fortaleza, mimi nilirudi Uingereza kwa kuwa tikiti yangu ilipitia nchi yangu ya nyumbani. Tena nilihudumu katika makanisa mengi kabla ya kurudi nyumbani, na hasa kutembelea tena kanisa la Assembly of God huko Nottingham. Rafiki yangu wa siku nyingi, Yorrie Richards, alihudhuria kanisa lile naye alikuwa amenipangia kuzungumza pale. Ulikuwa wakati wa ajabu wa pekee wenye tunda tele kwa juhudi zangu, hasa katika maisha ya watu wanne – nililala fofofo usiku ule!

Novemba, niliondoka tena kwenda Mexico, safari hii katika mikoa iliyozunguka Mexico City. Francisco alikuwa amenipangia mikutano mingi na CTI, nami nilisafiri maili nyingi kwa mabasi mazuri sana, hata kuingia mahali pa mbali na pa hatari. Tulizungumza na makundi makubwa mno ya wachungaji na kadhaa madogo, mbali mno kama Cuidad Victoria na Tampico kaskazini hadi Oaxaca na Matias Romero kusini, tukikaa muda mrefu zaidi Vera Cruz. Mwaka 1999 ungetumika zaidi nyumbani Victoria nikiwa na miadi mingi ya kuhubiri katika makanisa mengi.

Nilifurahi hasa kuzungumza mara kadhaa katika kanisa langu la zamani, sasa liitwalo Pacific Rim Alliance Church, na pia katika Oaklands Chapel, kusanyiko la Ndugu lililochungwa na rafiki mwema, Denis Scott.

Hata hivyo, mwishoni mwa mwaka, nilisafiri tena hadi Baja California kufundisha makongamano mengine ya wachungaji na CTI, safari hii nikitembelea makundi mapya huko Rosarito, Sonora na Carranza, yote katika Valle de Mexico. Tena, Dave na Beth waliimarisha urafiki wetu udumuo hadi leo.

Mwaka uliisha kwa safari ya kwenda kuwaona binti yetu na wajukuu Australia, jambo lililokuwa sehemu ya kawaida ya maisha yetu. Kwa miezi sita, ningehudumu katika makanisa kandokando ya pwani yote ya mashariki ya nchi ile kubwa, wakati mwingine kwa wikendi nzima. Mawasiliano yangu yalikuwa yale niliyoyapata Capernwray miaka mitano mapema, watu wenye shauku bado ya kulisikia Neno na kukua katika Bwana.