Masharti ya Nguvu katika Maombi

“Na lo lote tuombalo, twalipokea kwake, kwa sababu tunazishika amri zake, na kutenda yale yapendezayo mbele zake. Na hii ndiyo amri yake, kwamba tuliamini jina la Mwanawe Yesu Kristo, na kupendana sisi kwa sisi, kama alivyotupa amri. Naye azishikaye amri zake hukaa ndani yake, naye ndani yake. Na katika hili twajua ya kuwa anakaa ndani yetu, kwa huyo Roho aliyetupa.” 1 Yohana 3:22-24.

NILIKUSUDIA kuwahutubia asubuhi hii juu ya umuhimu wa maombi, nami nilinuia kwa bidii kuwaamsha mniombee mimi na kazi ya Bwana mahali hapa. Kwa kweli, sidhani kama ningeweza kupata somo lenye uzito zaidi, au lililonilemea nafsi kuliko hili. Kama ningeruhusiwa kuwaomba jambo moja tu, lingekuwa hili—“Ndugu, tuombeeni.” Huduma yetu ina faida gani bila baraka ya Mungu, nasi twawezaje kutumaini baraka ya Mungu isipokuwa Kanisa la Mungu limeiomba? Ningesema hata kwa machozi, “Ndugu, tuombeeni.” Msiyazuie maombi—bali, wingini katika maombezi, kwa maana kwa njia hiyo, na kwa njia hiyo peke yake, ustawi wetu kama Kanisa waweza kuongezeka, au hata kudumu.

Lakini kisha, swali likanijia, itakuwaje kama kungekuwa na jambo fulani ndani ya Kanisa ambalo lingezuia maombi yetu yasifanikiwe? Hilo ni swali muhimu, nalo lapasa kutafakariwa kwa bidii nyingi hata kabla hatujawahimiza mwelekee maombezi. Kama tulivyokwisha fundishwa katika sura ya kwanza ya Isaya, maombi ya watu wasio watakatifu upesi yatakuwa machukizo mbele za Mungu. “Mnyooshapo mikono yenu, nitawaficha macho yangu msiuone uso wangu; naam, mwombapo maombi mengi, sitasikia.” Makanisa yaweza kutumbukia katika hali ambayo ibada zenyewe zitakuwa uovu. “Hata kusanyiko lenu takatifu” litakuwa uchovu kwa Bwana. Yaweza kuwapo maovu ndani ya moyo wa mmoja wetu ye yote yawezayo kumfanya Mungu, kwa kupatana na tabia yake na sifa zake, ashindwe kabisa kuyajali maombezi yetu.

Kama tukiuangalia uovu mioyoni mwetu, Bwana hatatusikia. Kwa mujibu wa andiko letu kuna mambo fulani yaliyo ya lazima ili kushinda katika maombi. Mungu atayasikia maombi yote ya kweli, lakini kuna mambo fulani ambayo ni lazima watu wa Mungu wawe nayo, la sivyo maombi yao yatapungukiwa na shabaha. Andiko latuambia, “Lo lote tuombalo, twalipokea kwake, kwa sababu tunazishika amri zake, na kutenda yale yapendezayo mbele zake.” Basi, asubuhi hii somo la kutafakariwa litakuwa mambo ya lazima kwa nguvu katika maombi—yatupasayo kutenda, yatupasayo kuwa, yatupasayo kuwa nayo—ikiwa tutashinda daima na Mungu katika maombi, kwa hakika ya kudumu. Na tujifunze jinsi ya kuwa kama Eliya na Yakobo.

I. Nitaanza, kwanza, kwa kuyatafakari YALE YALIYO YA LAZIMA KWA NGUVU KATIKA MAOMBI. Yatupasa kufanya tofauti chache mwanzoni. Naona kuna tofauti kubwa kati ya maombi ya nafsi itafutayo rehema na maombi ya mtu aliyeokoka. Ningemwambia kila mtu aliyepo hapa, tabia yake iwe yo yote, kama ukiitafuta rehema ya Mungu kwa moyo wa kweli kwa njia ya Yesu Kristo, utaipata. Hali yako ya maisha iliyopita iwe ilikuwaje, kama sasa ukiutafuta uso wa Yehova kwa toba kwa njia ya yule Mpatanishi aliyewekwa, ataonekana kwako.

Kama Roho Mtakatifu amekufundisha kusali, usisite tena bali kimbilia Msalabani, na huko iegemeze nafsi yako yenye hatia juu ya Yesu. Sifahamu sifa yo yote inayotakiwa kwa ombi la kwanza la mwenye dhambi ila unyofu, lakini yatupasa kunena kwa namna nyingine kwenu ninyi mliookoka. Sasa mmekuwa watu wa Mungu, na ijapokuwa mtasikiwa vile vile kama mwenye dhambi asikiwavyo, na kila siku mtaipata neema iliyo ya lazima ambayo kila atafutaye huipokea kwa kujibu maombi, lakini sasa u mwana wa Mungu, nawe u chini ya adabu ya pekee iliyo mahsusi kwa jamaa iliyozaliwa mara ya pili. Katika adabu hiyo majibu ya maombi yana nafasi ya juu, nayo ni ya faida kubwa.

Kuna kitu ambacho Mwamini aweza kukifurahia zaidi ya wokovu peke yake. Kuna rehema, baraka, faraja na fadhili zifanyazo maisha yake ya sasa kuwa ya faida, ya furaha na ya heshima. Na hivi atavipata pasipo kuangalia tabia yake. Si mambo ya msingi kuhusu wokovu—Mwamini anavimiliki bila masharti, kwa maana ni baraka za Agano. Lakini sasa twanena juu ya heshima na vinono vya nyumba vitolewavyo au vinyimwavyo kwa kadiri ya utii wetu tukiwa watoto wa Bwana. Kama ukiziacha shuruti zilizoambatanishwa na hivi, Baba yako wa mbinguni atakunyima. Baraka za msingi za Agano la Neema zasimama bila sharti—mwaliko wa kutafuta rehema wapelekwa kwa wale wasio na sifa yo yote, ila uhitaji wao.

Lakini ingieni ndani ya jamaa ya Mungu kama wanaume na wanawake mliookoka, nanyi mtaona ya kuwa baraka nyingine bora hutolewa au hunyimwa kwa kadiri ya jinsi tunavyozizingatia kanuni za Bwana katika jamaa yake. Kutoa mfano wa kawaida—Kama mtu mwenye njaa angekuwa mlangoni kwako akiomba mkate, ungempa tabia yake iwe yo yote. Vile vile utampa mtoto wako chakula, mwenendo wake uwe waje—hutamnyima mtoto wako cho chote kilicho cha lazima kwa uhai. Kamwe hutaendelea na adabu yo yote juu yake hata kumnyima chakula chake cha lazima, au vazi la kumkinga na baridi. Lakini kuna mambo mengine mengi ambayo mtoto wako aweza kuyatamani, ambayo utampa kama ni mtii, ambayo hutampa kama ni mwasi kwako. Naona ya kuwa hili ladhihirisha jinsi utawala wa Mungu wa kibaba utakavyolisukuma jambo hili mbali, na mahali usipokwenda.

Fahamuni, tena, ya kuwa andiko halimaanishi sana kule Mungu kuyasikia maombi ya watumishi wake mara kwa mara, kwa maana hilo atalifanya, hata watumishi wake wapotokapo naye na anapowaficha uso wake. Nguvu katika maombi, ikusudiwayo hapa, ni nguvu ya kudumu na kamili pamoja na Mungu, hata—kunukuu maneno ya andiko—“lo lote tumwombalo twalipokea.” Kwa maombi haya kuna mahitaji na mambo ya lazima ambayo sasa twapaswa kuyanena, na la kwanza ni utii kama wa mtoto—“Lo lote tuombalo, twalipokea kwake, kwa sababu tunazishika amri zake.” Kama tumepungukiwa na hili, Bwana aweza kutuambia kama alivyowaambia watu wake Israeli, “Mmeniacha mimi, mkatumikia miungu mingine; kwa hiyo sitawaokoa tena. Nendeni mkaililie hiyo miungu mliyoichagua.”

Baba ye yote atakuambia ya kuwa yeye kulikubali ombi la mtoto asiye mtii kungekuwa ni kutia moyo uasi katika jamaa na kumfanya ashindwe kuitawala nyumba yake mwenyewe. Mara nyingi humlazimu mzazi kusema, “Mwanangu, hukulisikia neno langu punde hivi, kwa hiyo, siwezi kulisikia lako.” Si kwamba baba hampendi, bali ni kwa sababu ampenda mtoto, na kwa ajili ya pendo lake ajiona analazimika kuonyesha kutoridhika kwake kwa kulikataa ombi la mzao wake akosaye. Mungu hututenda kama tuwapasavyo kuwatenda watoto wetu wakaidi. Naye akiona ya kuwa tutakwenda katika dhambi na kukosa, ni sehemu ya adabu yake ya kibaba yenye fadhili kusema, “Nitalifunga ombi lako, unililiapo; sitakusikia unisihipo; sitakuangamiza, utaokoka, utakuwa na mkate wa uzima na maji ya uzima, lakini hutakuwa na zaidi ya hayo: anasa za ufalme wangu utanyimwa, na kitu cho chote kama nguvu ya pekee pamoja nami katika maombi hutakuwa nayo.”

Ya kuwa Bwana hushughulika hivi na watu wake mwenyewe ni wazi kutoka Zaburi ya 81—“Laiti watu wangu wangalinisikiliza, laiti Israeli wangalienda katika njia zangu! Ningaliwatiisha adui zao upesi, na kuugeuza mkono wangu juu ya watesi wao. Ningaliwalisha, tena, kwa unono wa ngano; na kwa asali itokayo mwambani ningalikushibisha.” Kwa nini, kama mtoto wa Mungu asiye mtii angetiwa ahadi hii mikononi—“Lo lote uombalo katika sala, utapokea,” bila shaka angeomba kitu ambacho kingemtia nguvu katika uasi wake! Angekuwa akiomba mahitaji ya tamaa yake mwenyewe, na misaada ya uasi wake. Hili haliwezi kamwe kuvumiliwa! Je! Mungu atazikubali dhambi zetu? Je! Atatafuta kuni za kuwasha moto wa tamaa za mwili?

Moyo wenye ushupavu hutamani uhuru zaidi upate kuwa mkaidi zaidi. Roho ya kiburi hutamani kuinuliwa zaidi ipate kujivuna zaidi. Roho ya uvivu huomba raha zaidi ipate kuwa legevu zaidi. Na roho ya kutaka kutawala huomba nguvu zaidi ipate nafasi nyingi za kuonea. Kama mtu alivyo, ndivyo yatakavyokuwa maombi yake—roho ya uasi hutoa maombi ya ushupavu na ya kiburi. Je! Mungu atayasikiliza maombi kama haya? Haiwezekani! Atatupa tuombalo kama tukizishika amri zake, lakini kama tukiwa waasi na kuukataa utawala wake, yeye, naye, atayakataa maombi yetu na kusema, “Kama mkienda kinyume nami, mimi nami nitakwenda kinyume nanyi. Kwa mkaidi nitajionyesha mkaidi.” Heri tutakuwa kama, kwa neema ya Mungu, tukiweza kusema pamoja na Daudi, “Nitanawa mikono yangu katika hali ya kutokuwa na hatia; ndivyo nitakavyoizunguka madhabahu yako, Ee Bwana.” Hii haitakuwa kamwe hali kamili ya kutokuwa na hatia, bali angalau itakuwa ni kutokuwa na hatia ya kupenda dhambi na ya kumwasi Mungu kwa makusudi.

Karibu na hili kuna jambo jingine la lazima kwa maombi yenye ushindi—heshima kama ya mtoto. Angalieni sentensi ifuatayo. Twapokea tuombalo, “kwa sababu tunazishika amri zake, na kutenda yale yapendezayo mbele zake.” Hatuwaruhusu watoto, wanapopewa amri na baba yao, kuuhoji unyofu wake au hekima yake. Utii hukoma pale kuhoji kunapoanza. Kipimo cha mtoto juu ya wajibu wake kisiwe kipimo cha haki ya baba ya kuamuru—watoto wema husema, “Baba ametuagiza tufanye vivi na vile, kwa hiyo tutafanya, kwa maana twafurahi kumpendeza sikuzote.” Sababu yenye uzito zaidi ya kitendo cha mtoto mwenye upendo ni kule kusadiki ya kuwa kitawapendeza wazazi wake. Na jambo lenye nguvu zaidi liwezalo kunenwa ili kumzuia mtoto mwema ni kuthibitisha ya kuwa mwenendo kama huo ungewachukiza wazazi wake. Ndivyo ilivyo kabisa kwetu sisi kwa Mungu, aliye Mzazi mkamilifu, na kwa hiyo twaweza, bila hofu ya kukosea, kuufanya sikuzote wema wake kuwa kanuni ya haki, hali kanuni ya ubaya yaweza salama kubaki kuwa lile lingemchukiza.

Tuseme mmoja wetu awe mshupavu na kusema, “Sitafanya kile kimpendezacho Mungu, nitafanya kile kinipendezacho mimi.” Basi, tazama, maombi yetu yangekuwa ya namna gani? Maombi yetu yangeweza kufupishwa katika ombi hili, “Niache niende kwa njia yangu mwenyewe.” Nasi twaweza kutumaini kuwa Mungu atakubali hilo? Je! Tutakuwa si mabwana juu ya urithi wa Mungu tu bali juu ya Mungu mwenyewe? Je! Ungependa Mwenyezi aiache Enzi yake ili kumweka mtu wa kufa mwenye kiburi hapo? Kama una mtoto nyumbani mwako asiye na heshima yo yote kwa babaye, bali asemaye, “Nataka kwenda kwa njia yangu mwenyewe katika mambo yote,” akikujia na ombi, je, utamwinamia? Je, utamruhusu akuamuru na kuisahau heshima unayostahili? Je, utasema, “Naam, mwanangu mpenzi, naitambua thamani yako. Utakuwa bwana nyumbani na lo lote uombalo utalipata”?

Nyumba hiyo ingekuwa ya namna gani? Nachelea kuna nyumba kadhaa za namna hiyo, kwa maana wako wazazi wapumbavu wawaachao watoto wao kuwa mabwana wao na hivyo hujifanyia fimbo ya kuchapa migongo yao wenyewe. Lakini nyumba ya Mungu haikupangwa hivyo! Hatawasikiliza watoto wake washupavu, isipokuwa kuwasikia kwa hasira na kuwajibu kwa ghadhabu! Kumbukeni jinsi alivyosikia ombi la Israeli la nyama, na nyama ilipokuwa ingali vinywani mwao ikawa laana kwao? Watu wengi huadhibiwa kwa kupata haja zao wenyewe, kama vile wanaorudi nyuma wanavyojazwa hila zao wenyewe. Yatupasa kuwa na heshima kama ya mtoto kwa Mungu, hata tuhisi, “Bwana, kama kile niombacho hakikupendezi, wala hakingenipendeza mimi. Haja zangu nazitia mikononi mwako zisahihishwe. Piga kalamu juu ya kila ombi nitoalo lisilo sawa na, Bwana, tia lo lote nililoliacha hata kama nisingelilitamani ningalilikumbuka. Bwana mwema, kama ningalipaswa kulitamani, unisikie kana kwamba nililitamani. 'Si kwa mapenzi yangu, bali kwa mapenzi yako.' “ Sasa nadhani mwaweza kuona ya kuwa roho hii ya kunyenyekea ni ya lazima kwa kushinda daima na Mungu katika maombi. Kinyume chake ni kizuizi cha hakika kwa ubora katika dua. Bwana ataheshimiwa na wale wanaomzunguka. Ni lazima wawe na jicho kwa wema wake katika yote wayatendayo na yote wayaombayo, la sivyo hatawatazama kwa upendeleo.

Katika nafasi ya tatu, andiko ladokeza uhitaji wa kutumaini kama kwa mtoto—“Na hii ndiyo amri yake, kwamba tuliamini jina la Mwanawe Yesu Kristo.” Kila mahali katika Maandiko imani kwa Mungu hunenwa kuwa ya lazima kwa maombi yenye mafanikio. Ni lazima tuamini ya kuwa Mungu yuko, na ya kuwa huwapa thawabu wale wamtafutao kwa bidii, la sivyo hatujaomba kabisa. Kwa kadiri ya imani yetu ndivyo yatakavyokuwa mafanikio ya maombi yetu. Ni kanuni ya daima ya ufalme, “Kwa kadiri ya imani yenu na iwe hivyo kwenu.” Kumbukeni jinsi Roho Mtakatifu anenavyo kwa kinywa cha mtume Yakobo? “Mtu wa kwenu akipungukiwa na hekima, na aombe dua kwa Mungu, awapaye wote kwa ukarimu, wala hakemei; naye atapewa. Ila na aombe kwa imani, pasipo shaka yo yote. Maana mwenye shaka ni kama wimbi la bahari lililochukuliwa na upepo, na kutupwa huku na huku. Basi mtu kama huyo asidhani ya kuwa atapokea kitu kwa Bwana.”

Andiko lanena juu ya imani katika jina la Mwanawe Yesu Kristo, ambayo naifahamu kuwa ni imani katika Tabia yake iliyotangazwa, imani katika Injili yake, imani katika Kweli ihusuyo Ubadala wake na Wokovu wake. Au yaweza kumaanisha imani katika mamlaka ya Kristo, hata nimsihipo Mungu na kusema, “Fanya hivi katika jina la Yesu,” namaanisha, “Nitendee kama ambavyo ungemtendea Yesu, kwa maana nimepewa idhini naye kulitumia jina lake. Nitendee kama ambavyo ungemtendea yeye.” Yeye awezaye kusali kwa imani katika jina la Yesu hawezi kushindwa, kwa maana Bwana Yesu amesema, “Mkiomba neno lo lote kwa jina langu, nitalifanya.” Lakini ni lazima kuwe na imani, na kama hakuna imani hatuwezi kutumaini kusikiwa. Je, mwafahamu

hilo?

Turudini tena kwenye mifano yetu ya kijamaa. Tuseme mtoto nyumbani haliamini neno la babaye na daima husema ya kuwa akili yake imejaa mashaka juu ya ukweli wa babaye? Tuseme, kwa kweli, awaambia ndugu zake wa kiume na wa kike ya kuwa imani yake kwa babaye ni dhaifu sana? Alitaja jambo hilo la kusikitisha wala hastuki hata kidogo kwamba anena jambo kama hilo, bali huhisi zaidi ya kuwa apasa kuhurumiwa, kana kwamba ni udhaifu ambao hakuweza

kuuepuka. Kwa namna moja au nyingine haamini ya kuwa babaye asema kweli, naye hukiri ya kuwa ijapokuwa hujaribu kuiamini ahadi ya babaye, lakini hawezi.

Nadhani baba aliyetiliwa shaka kwa njia ya chini hivyo hangekuwa na haraka nyingi kuyakubali maombi ya mwana kama huyo. Naam, yaelekea sana ya kuwa maombi ya mwana mwenye kutokuamini yangekuwa ya namna isiyoweza kutimizwa, hata kama babaye angependa kufanya hivyo, kwa kuwa yangekuwa ni kuutosheleza kutokuamini kwake na kumvunjia heshima mzazi wake! Kwa mfano, tuseme mtoto huyu angeingiza kichwani mwake kutia shaka kama babaye angemruzuku chakula chake cha kila siku? Basi, aweza kumjia babaye na kusema, “Baba, nipe fedha za kutosha miaka 10 ijayo, kwa maana wakati huo nitakuwa mtu mzima nami nitaweza kujiruzuku mwenyewe. Nipe fedha taslimu ili kutuliza hofu zangu, kwa maana nina wasiwasi mwingi.” Babaye ajibu, “Mwanangu, kwa nini nifanye hivyo?”

Naye apata jibu, “Nasikitika sana kusema hivi, Baba mpenzi, lakini siwezi kukutumaini. Nina imani dhaifu hivyo kwako na kwa pendo lako hata naogopa ya kuwa siku moja utaniacha nife kwa njaa. Na kwa hiyo ningependa kuwa na kitu cha hakika benki.” Ni nani kati yenu akina baba angelisikiliza ombi la mtoto kama angetafuta jambo kama hilo? Ungehuzunika kwamba mawazo yenye kukuvunjia heshima hivyo yanapita akilini mwa mmoja wa wapenzi wako! Nawe usingekubali, wala usingeweza kuyakubali. Basi, niwaombeni muufananishe mfano huu na nafsi zenu. Je, hamkupata kutoa maombi yaliyokuwa na tabia ile ile? Mmeshindwa kumtumaini Mungu awape, siku kwa siku, riziki yenu ya kila siku, na kwa hiyo mmekuwa mkitamani sana kile mkiitacho, “akiba fulani kwa ajili ya wakati ujao.”

Wataka mruzuku aliye wa kutumainiwa zaidi kuliko Riziki ya Mungu, dhamana iliyo bora kuliko ahadi ya Mungu! Umeshindwa kuliamini Neno la Baba yako wa mbinguni. Hati chache za deni za serikali fulani ya kigeni iliyokaribia kufilisika waziona kuwa za kutegemewa zaidi. Waweza kumtumaini Sultani wa Uturuki, au Liwali wa Misri, lakini si Mungu wa dunia yote! Kwa njia elfu twamtukana Bwana kwa kudhani ya kuwa “vitu vinavyoonekana” ni vya kudumu zaidi kuliko Uweza wake usioonekana. Twamwomba Mungu atupe, mara moja, kile tusichokihitaji kwa sasa na ambacho huenda tusikihitaji kamwe! Kwa ndani, sababu ya haja kama hizo yaweza kuonekana katika kutokumtumaini kwa aibu ambako kwatufanya tudhani ya kuwa akiba kubwa ni ya lazima ili kuhakikisha tunaruzukiwa.

Ndugu wa kiume na wa kike, je, ninyi hamna hatia, hapa, na je, mwatumaini Bwana aisaidie na kuiunga mkono upumbavu wenu? Je! Mungu atakubaliana na kutokuamini kwenu? Je! Atawapa chungu ya dhahabu na fedha inayoharibika ili wevi waibe, na masanduku ya mavazi ya kulisha nondo? Je, mngependa Bwana atende kana kwamba anakubali unyofu wa shuku zenu na kuungama kutokuwa mwaminifu? Hasha! Basi, msitumaini kusikiwa maombi yenu yanaposhawishiwa na moyo usioamini— “Umkabidhi Bwana njia yako; mtumaini yeye naye atafanya.” Jambo la lazima lifuatalo kwa mafanikio ya kudumu katika maombi ni upendo kama wa mtoto—“kwamba tuliamini jina la Mwanawe, Yesu Kristo, na kupendana sisi kwa sisi kama alivyotupa amri.”

Amri kuu baada ya imani ni upendo. Kama isemwavyo juu ya Mungu, “Mungu ni upendo,” vivyo hivyo twaweza kusema, “Ukristo ni upendo.” Kama tungekuwa, kila mmoja, mfano hai wa upendo, tungalifikia mfano kamili wa Kristo. Tungezidi katika upendo kwa Mungu, upendo kwa Kristo, upendo kwa Kanisa, upendo kwa wenye dhambi na upendo kwa watu kila mahali! Mtu asipokuwa na upendo kwa Mungu, yu katika hali ya mtoto asiye na upendo kwa babaye. Je, babaye atamwahidi kwa hakika kuzitimiza haja zote za moyo wake usio na upendo, usio wa kibinti? Au, kama mtoto hana upendo kwa ndugu zake wa kiume na wa kike, je, baba atamwamini kwa ahadi kamili, na kusema, “Omba nawe utapewa?” Kwani, mwana asiye na upendo angeifukarisha jamaa yote kwa madai yake ya ubinafsi! Bila kujali wengine wote wa nyumbani, angejali tu kuzitosheleza tamaa zake mwenyewe. Ombi lake baada ya muda mfupi lingekuwa—“Baba, nipe urithi wote.” Au, “Baba, ipange nyumba iniendee mimi na uwafanye ndugu zangu wote wazitii nia zangu.”

Akijivuna kwa sura yake, kama Absalomu, aliyejivuna kwa nywele zake, punde angeutafuta ufalme uwe wake mwenyewe! Ni akina Yusufu wachache wawezao kuvaa vazi la rangi nyingi wasiwe madhalimu wa nyumbani. Ni nani angemruhusu mpotevu akimbie na mali? Ni nani angekuwa mjinga hata kumsimika ndugu mwenye choyo na kutaka kutawala katika kiti cha heshima, juu ya ndugu zake wa kiume na wa kike? Kwa hiyo, mwaona ya kuwa ubinafsi hauwezi kuaminiwa nguvu katika maombi. Roho zisizo na upendo, zisizompenda Mungu wala watu, haziwezi kuaminiwa ahadi kubwa, pana, zisizo na mpaka. Kama Mungu atatusikia ni lazima tumpende Mungu na kuwapenda wenzetu, kwa maana, tumpendapo Mungu, hatutaomba kitu ambacho kisingemheshimu Mungu, wala hatutatamani kuona kikitupata cho chote ambacho kisingewabariki pia ndugu zetu. Mioyo yetu itapiga kwa uaminifu kwa Mungu na kwa viumbe vyake, wala hatutajifungia ndani ya nafsi zetu wenyewe. Ni lazima uuondoe ubinafsi kabla Mungu

hajaweza kukuamini funguo za Mbinguni. Nafsi ifapo, ndipo atakapokuwezesha kuzifungua hazina zake na, kama mkuu, utakuwa na nguvu pamoja na Mungu na kushinda.

Karibu na hili, ni lazima tuwe na tabia kama za mtoto pia. Someni mstari ufuatao. “Naye azishikaye amri zake hukaa ndani yake, naye ndani yake.” Ni miongoni mwa tabia za mtoto kuipenda nyumba yake. Mtoto mwema ambaye babaye husikiliza maombi yake sikuzote hapendi mahali po pote kama ile nyumba ya zamani ipendwayo ambamo wazazi wake wanakaa. Basi yeye aipendaye na kuzishika amri za Mungu husemekana kukaa ndani yake—amemfanya Bwana kuwa maskani yake na hukaa katika urafiki mtakatifu na Mungu. Ndani yake maneno ya Bwana wetu hutimizwa, “Ninyi mkikaa ndani yangu, na maneno yangu yakikaa ndani yenu, ombeni mtakalo lo lote, nanyi mtatendewa.” Imani na upendo, kama mabawa mawili ya makerubi, zimeiinua nafsi ya Mwamini juu ya ulimwengu na kumchukua karibu na Kiti cha Enzi cha Mungu. Amekuwa kama Mungu na sasa ndipo maombi yake huwa ya namna ambayo Mungu aweza kuyajibu—lakini hata atakapofananishwa hivyo na nia ya Mungu ni lazima kuwe na mpaka fulani kwa uwezo wa dua zake. Kukaa ndani ya Mungu ni lazima kwa nguvu pamoja na Mungu.

Tuseme mmoja wenu angekuwa na mvulana, aliyesema, “Baba, siipendi nyumba yangu, sikujali wewe wala sitavumilia vizuizi vya utawala wa jamaa. Nakwenda kukaa na wageni, lakini fahamu, Baba, nitakujia kila juma nami nitakuhitaji mambo mengi. Nami nitatumaini ya kuwa utanipa lo lote nikuombalo”? Kwani, kama u mwafaka kwa vyo vyote kuwa kichwa cha nyumba, utasema, “Mwanangu, wawezaje kuniambia kwa namna hii? Kama u mshupavu hivyo hata kuiacha nyumba yangu, waweza kutumaini ya kuwa nitafanya uniamuruyo? Kama unanidharau kabisa, waweza kutumaini nikutegemeze katika ukatili wako usio na fadhili na uasi wako mbaya? La, mwanangu, kama hutakaa nami na kunikubali kuwa baba, siwezi kukuahidi cho chote.”

Na ndivyo ilivyo kwa Mungu. Tukikaa naye na kushirikiana naye, atatupa vitu vyote. Tukimpenda kama apasavyo kupendwa, na kumtumaini kama apasavyo kutumainiwa, ndipo atakaposikia maombi yetu. Lakini kama sivyo, si jambo la busara kulitazamia. Naam, kungekuwa ni kuivunjia heshima Tabia ya Mungu yeye kuzitimiza haja zisizo takatifu na kutosheleza matashi maovu. “Nawe utajifurahisha katika Bwana, naye atakupa haja za moyo wako,” lakini kama huna furaha katika Mungu, wala yeye si maskani yako, hatakujibu. Aweza kukupa mkate wa mateso na maji ya mateso na kuyafanya maisha kuwa machungu kwako, lakini kwa hakika hatakupa kile moyo wako ukitamanicho.

Jambo moja zaidi—yaonekana kutoka andiko ya kuwa ni lazima tuwe na roho kama ya mtoto, kwa maana, “Katika hili twajua ya kuwa anakaa ndani yetu, kwa huyo Roho aliyetupa.” Hii ni nini isipokuwa Roho ya kufanywa wana—Roho itawalayo ndani ya watoto wote wa Mungu? Washupavu wanaowaza na kuhisi na kutenda kwa namna tofauti na Mungu wasitumaini ya kuwa Mungu atageukia njia yao ya kuwaza na kuhisi na kutenda! Wenye ubinafsi wanaosukumwa na roho ya kiburi, wavivu wanaosukumwa na kupenda raha wasitumaini ya kuwa Mungu atawaridhia! Roho Mtakatifu, akitawala ndani yetu, atautiisha utu wetu chini ya mamlaka yake mwenyewe, na ndipo maombi yatokayo katika mioyo yetu iliyofanywa upya yatakapopatana na mapenzi ya Mungu—na maombi kama hayo kwa asili yatasikiwa.

Hakuna mzazi angefikiri kumsikiliza mtoto mshupavu, mtoto asemaye, “Najua baba yangu hataki nipate hiki, lakini nitakipata.” Kwani, ukiwa mtu mzima usingezungushwazungushwa hivi na kijana mwenye jeuri! Je! Mungu atatupa kile tuombalo wakati ni kinyume cha nia yake takatifu? Haiwezi kuwa! Uwezekano kama huo hauwaziki! Nia ile ile iwe ndani yetu ambayo ilikuwa katika Kristo Yesu, na ndipo tutakapoweza kusema, “Najua ya kuwa wanisikia sikuzote.” Lakini ni lazima tuendelee mbele na kuutwaa uangalifu wenu, kwa dakika chache, kwa tawi jingine la somo lile lile.

II. Katika nafasi ya pili tutaangalia KUSHINDA KWA MAMBO HAYA YA LAZIMA. Kama yamo ndani yetu na kuzidi, maombi yetu hayawezi kuwa matupu wala yasiyo na faida. Kwanza, kama tuna imani kwa Mungu, hakuna swali juu ya Mungu kuyasikia maombi yetu. Kama twaweza kusihi, kwa imani, jina na damu ya Yesu, ni lazima tupate majibu ya amani. Lakini hoja elfu hutolewa. Tuseme maombi haya yahusu Sheria za Asili? Basi wanasayansi wako kinyume chetu. Yadhuru nini hayo? Nitajivunia kuwapa hawa wanasayansi nafasi ya kutosha—nilikaribia kusema nafasi ya kutosha kabisa.

Sijui ombi lo lote linalostahili kuombwa ambalo haligusani na Sheria fulani ya asili au nyingine, na bado naamini maombi husikiwa! Husemwa ya kuwa Mungu hatazibadili Sheria za Asili kwa ajili yetu, nami najibu, “Ni nani aliyesema atazibadili?” Bwana ana njia za kuyajibu maombi yetu bila kutegemea kufanya miujiza au kusimamisha sheria. Zamani alikuwa akisikia maombi kwa muujiza, lakini kama nilivyowaambia mara nyingi, hiyo yaonekana kuwa njia ngumu zaidi ya kutimiza kusudi lake—ni kama kusimamisha mashine kubwa kwa ajili ya matokeo madogo—yeye ajua jinsi ya kutimiza makusudi yake na kuyasikia maombi yetu kwa njia za siri nisizozijua.

Labda kuna nguvu nyingine na sheria ambazo amezipanga zitende kazi wakati ule ule ambao maombi, nayo, hutenda kazi. Sheria zilizo imara vile vile na nguvu zilizo za asili vile vile kama zile ambazo wenye nadharia wetu wenye elimu wameweza kuzigundua. Watu wenye hekima kuliko wote hawazijui sheria zote zinazoutawala ulimwengu, la, wala sehemu ya kumi yake! Twaamini ya kuwa maombi ya Wakristo ni sehemu ya mashine ya Riziki ya Mungu, meno ya gurudumu kubwa la majaliwa—na Mungu awaongozapo watoto wake kuomba, amekwisha lianzisha gurudumu litakalotokeza tokeo lililoombewa, na maombi yatolewayo yanaenda kama sehemu ya gurudumu. Kama kuna imani kwa Mungu tu, ni lazima Mungu akome kuwako, au akome kuwa wa kweli, la sivyo ni lazima ayasikie maombi!

Mstari ulio kabla ya andiko wasema, “Mioyo yetu isipotuhukumu, tuna ujasiri mbele za Mungu; na lo lote tuombalo, twalipokea kwake.” Yeye aliye na dhamiri safi humjia Mungu kwa ujasiri, na ujasiri huo wa imani humhakikishia jibu la ombi lake. Ujasiri kama wa mtoto hutufanya tuombe kama asiwezavyo mwingine ye yote. Humfanya mtu aombe mambo makubwa ambayo asingaliyaomba kamwe kama asingalijifunza ujasiri huu. Humfanya aombe mambo madogo ambayo wengi sana huogopa kuyaomba, kwa sababu bado hawajahisi kwa Mungu ujasiri wa watoto. Nimesema mara nyingi ya kuwa yahitaji ujasiri zaidi kwa Mungu kumwomba juu ya jambo dogo kuliko juu ya mambo makubwa. Twadhani ya kuwa mambo yetu makubwa yastahili kwa kiasi fulani kujaliwa na Mungu, ijapokuwa kwa kweli ni madogo mno kwake! Kisha twawaza ya kuwa mambo yetu madogo ni lazima yawe duni hivyo hata kuyaleta mbele zake kungekuwa karibu ni tusi, hali twapaswa kujua ya kuwa kilicho kikubwa mno kwa mtoto chaweza kuwa kidogo sana kwa mzazi wake—na bado mzazi hakipimi kitu kwa mtazamo wake mwenyewe bali kwa wa mtoto.

Ulimsikia mvulana wako mdogo siku ile akilia kwa uchungu. Mama yake akamwita, akamwuliza ana nini? Ilikuwa ni kibanzi katika kidole chake. Naam, hilo lilikuwa jambo dogo. Hukutaka kuwaita wapasuaji watatu ili kukitoa, wala kupiga kelele katika magazeti ya watu wote! Lete sindano nasi tutalitengeneza upesi. Lo, lakini lilikuwa jambo kubwa jinsi gani kwa yule mteswa mdogo mzuri alipokuwa amesimama pale na macho yote yamelowa machozi ya maumivu. Lilikuwa ni jambo kubwa kwake! Basi, je, ilimjia yule mvulana ya kuwa maumivu yake yalikuwa jambo dogo mno kwa mama yake kuyashughulikia? La hasha! Akina mama na akina baba waliumbwa kwa nini isipokuwa kuyaangalia mahitaji madogo ya watoto wadogo? Na Mungu, Baba yetu, ni Baba mwema. Hutuhurumia kama baba wawahurumiavyo watoto wao na hujishusha kwetu. Ayajua hesabu ya nyota, na kuziita zote kwa majina yao, lakini huwaponya waliovunjika moyo na kuvifunga vidonda vyao. Mungu yule yule aliyewasha jua amesema, “Sitauzima utambi utokao moshi.” Kama una ujasiri kwa Mungu tu, utayapeleka kwake mambo yako makubwa na mambo yako madogo, naye hataudanganya kamwe ujasiri wako—kwa maana amesema wale wamtumainio hawataona haya wala kutahayarika, milele na milele. Imani ni lazima ifanikiwe!

Lakini kisha, upendo nao ni lazima ufanikiwe, kwa kuwa tumekwisha ona ya kuwa mtu apendaye, kwa maana ya Kikristo, yu katika upatano na Mungu. Kama ukiufunga upendo wako ndani ya jamaa yako mwenyewe, usitumaini Mungu afanye hivyo, na maombi yaliyofinywa ndani ya duara hiyo atayapuuza. Kama mtu akijipenda nafsi yake ndogo mwenyewe na kutumaini mavuno ya ngano ya kila mtu yataharibika, ili mazao yake mwenyewe yapate bei kubwa zaidi, kwa hakika hawezi kutumaini Bwana akubaliane na ubinafsi mchafu kama huo! Kama mtu ana moyo wa kutosha kuwakumbatia viumbe vyote vya Mungu katika upendo wake hali angali akiwaombea hasa watu wa nyumba ya imani, maombi yake yatakuwa sawa na nia ya Mungu. Upendo wake na wema wa Mungu hukwenda pamoja. Ijapokuwa upendo wa Mungu ni kama mto mkubwa unaobiringika na wake ni kama kijito kinachotiririka, lakini vyote viwili vyakwenda upande mmoja, na vyote vitafikia mwisho mmoja. Mungu sikuzote huyasikia maombi ya mtu mwenye upendo kwa sababu maombi hayo ni vivuli vya maagizo yake mwenyewe.

Tena, mtu wa utii ndiye mtu ambaye Mungu atamsikia kwa sababu moyo wake wa utii humwongoza kuomba kwa unyenyekevu na kwa kujitiisha, kwa maana ahisi ya kuwa haja yake iliyo kuu ni mapenzi ya Bwana yatimizwe. Kwa hiyo ndiyo maana mtu mwenye moyo wa utii huomba kama Nabii—maombi yake ni unabii. Je, hayu mmoja na Mungu? Je, hatamani na kuomba sawasawa kabisa na kile akusudiacho Mungu? Ombi lililopigwa kutoka upinde kama huo laweza kushindwaje kufikia shabaha yake? Kama nafsi yako ikipatana na nafsi ya Mungu, utatamani matakwa ya Mungu mwenyewe! Ugumu ni kwamba hatudumu, kama neno lisemavyo, katika mapatano na Mungu. Lakini kama tungefanya hivyo, ndipo tungepiga sauti ile ile aipigayo Mungu, na ijapokuwa yake ingesikika kama radi na yetu kama mnong'ono, lakini kungekuwa na upatano kamili—sauti iliyopigwa na maombi duniani ingelingana na ile isikikayo kutoka maagizo yaliyoko Mbinguni.

Tena, mtu aishiye katika ushirika na Mungu bila shaka atashinda katika maombi kwa sababu, kama akikaa ndani ya Mungu, na Mungu akikaa ndani yake, atatamani kile akitamanicho Mungu. Mwamini aliye katika ushirika na Bwana hutamani mema ya mwanadamu na ndivyo afanyavyo Mungu. Hutamani Utukufu wa Kristo na ndivyo afanyavyo Mungu. Hutamani ustawi wa Kanisa na ndivyo afanyavyo Mungu. Hutamani yeye mwenyewe awe kielelezo cha utakatifu na Mungu hutamani hivyo, pia. Kama mtu huyo wakati wo wote akiwa na haja isiyo kulingana na

mapenzi ya Mungu, ni matokeo ya kutojua, kwa kuwa mwanadamu ni mwanadamu tu wala si Mungu. Hata awapo katika hali yake iliyo bora ni lazima akose, lakini hujilinda na kasoro hii kwa namna ya ombi lake ambalo sikuzote lina nyongeza hii mwishoni mwake—“Bwana, kama nimeomba katika hili, ombi langu, kitu cho chote kisicho kulingana na nia yako, nakusihi, usiniangalie. Na kama tamaa yo yote niliyoieleza kwako—ijapokuwa ni ile haja iwakayo kifuani mwangu kuliko haja nyingine zote—ni tamaa isiyo sawa machoni pako, usiniangalie, Baba yangu, bali, katika pendo lako lisilo na kikomo na huruma yako, umfanyie mtumishi wako jambo lililo bora zaidi kuliko mtumishi wako ajuavyo kuomba.”

Basi, ombi liwapo la namna hiyo, laweza kushindwaje? Bwana hutazama nje kupitia madirisha ya Mbinguni na kuona ombi kama hilo likimjia, kama vile Nuhu alivyomwona njiwa akirudi safinani, naye huunyoosha mkono wake kwa ombi hilo. Na kama Nuhu alivyomwokota njiwa ndani ya safina, ndivyo Mungu aliokotavyo ombi hilo kwake na kulitia kifuani mwake mwenyewe, na kusema, “Ulitoka kifuani mwangu, nami nakukaribisha urudi kwangu—Roho yangu ndiye aliyekutunga, kwa hiyo nitakujibu.” Na hapa, tena, na tuseme, andiko letu lanena juu ya mtu Mkristo kuwa amejaa Roho ya Mungu—“Twajua ya kuwa anakaa ndani yetu, kwa huyo Roho aliyetupa.” Ni nani ayajuaye mawazo ya mtu isipokuwa roho ya mtu? Basi, ni nani ayajuaye mambo ya Mungu isipokuwa Roho wa Mungu? Na kama Roho wa Mungu akikaa ndani yetu, ndipo yeye atuambiapo nia ya Mungu ni nini. Yeye hufanya maombezi ndani ya watakatifu kwa kadiri ya mapenzi ya Mungu!

Nyakati nyingine hudhaniwa ya kuwa watu wenye kushinda katika maombi waweza kuomba lo lote wapendalo, lakini nawahakikishia ye yote kati ya hawa atawaambia ya kuwa sivyo. Waweza kumwendea mtu kama huyo na kumwomba akuombee, lakini hawezi kuahidi ya kuwa atafanya. Kuna vizuizi vya ajabu kwa watu kama hao wanapohisi—hali hawajui jinsi wala kwa nini—ya kuwa hawawezi kuomba maombi yenye nguvu na bidii katika hali fulani, ijapokuwa wangependa kufanya hivyo. Kama Paulo, alipojaribu kwenda Bithinia na Roho hakumruhusu, ndivyo yalivyo maombi ambayo kwa asili tungependa kuyatoa, lakini twafungwa rohoni. Yaweza kuonekana hakuna baya lo lote juu ya ombi hilo, lakini siri ya Bwana i pamoja na wale wamchao, naye hutoa madokezo ya siri lini na wapi wateule wake waweza kutumaini kushinda. Hukupa ahadi ya kuwa atalisikia ombi lako la imani, wewe ukiwa mtu aendaye pamoja naye, uliyejaa Roho yake. Lakini yeye hakupi, wakati ule ule, imani juu ya kila jambo ambalo kila mtu apenda kukuletea—bali hukupa busara, na uamuzi, na hekima—na Roho hufanya maombezi ndani ya watakatifu kwa kadiri ya mapenzi ya

Mungu.

Hivyo nadhani nimeieleza fundisho hili kwa uwazi kiasi. Sasa dakika chache za manufaa ya matendo, kama Wapuritani wa zamani walivyokuwa wakisema. Natamani tu yapate kuwa ya manufaa kwa wengi wetu. La kwanza ni, twataka kuomba baraka kubwa tukiwa Kanisa. Nadhani ningezipata kura zenu kama ningesema tunakusudia kumwomba Mungu apeleke baraka juu ya Kanisa lote kwa jumla. Vema sana. Je, tunayo mambo ya lazima kwa mafanikio? Je, twaamini katika jina la Yesu Kristo? Naam, nadhani twaamini. Sidhani kama kosa lingeweza kupatikana juu ya uzima wa imani yetu, ijapokuwa mengi yapasa kuungamwa juu ya udhaifu wake.

Na tuendelee kwenye swali lifuatalo. Je, tumejaa upendo kwa Mungu na kwa mmoja na mwingine? Amri maradufu ni ya kuwa tuliamini jina la Yesu Kristo na ya kuwa tupendane sisi kwa sisi. Je, twapendana? Je, twaenda katika upendo? Hakuna hata mmoja wetu aliye mkamilifu katika hilo. Nitaanza kuungama kwa kukiri ya kuwa mimi si vile nipasavyo kuwa katika jambo hilo. Je, mtaruhusu maungamo yazunguke na kila mmoja afikiri ni mara ngapi tumetenda mambo yasiyo ya upendo, tumewaza mambo yasiyo ya upendo, tumesema mambo yasiyo ya upendo, tumesikiliza uchambuzi usio wa upendo, tumeuzuia mkono wetu bila upendo hapo tulipopaswa kutoa msaada, na kuunyoosha mkono wetu bila upendo kumsukuma chini mtu aliyekuwa akianguka? Kama katika Kanisa la Mungu kuna upungufu wa upendo, hatuwezi kutumaini maombi kusikiwa, kwa maana Mungu atasema, “mnaomba ustawi. Kwa nini? Ili kuongeza zaidi kwa jumuiya ambayo haijajipenda yenyewe? Mnaomba kuongoka kwa watu. Nini? Ili kuwaleta wengine wajiunge na jumuiya isiyo na upendo?”

Je, mwatumaini Mungu atawaokoa wenye dhambi msiowapenda na kuziongoa nafsi msizozijali hata kidogo? Ni lazima tuzipende nafsi ziingie kwa Kristo kwa maana, chini ya Roho Mtakatifu wa Mungu, chombo kikuu cha kuushinda ulimwengu ni upendo! Kama Wakristo watapenda zaidi ya Waislamu wapendavyo, na Wayahudi wapendavyo, watawashinda Waislamu na Wayahudi! Na kama wataonyesha upendo mdogo zaidi, Waislamu na Wayahudi watawashinda! Upanga wa Roho, ambao ni Neno la Mungu, ndicho silaha kuu. Lakini karibu na hicho ni mwenendo wa upendo na maongezi ya ukarimu ya Wakristo kwa wenzao. Kiasi gani cha hicho tunacho? Niseme, ni kidogo mno?

Kisha, je, twatenda yale yampendezayo Mungu? Hatuwezi kutumaini majibu ya maombi kama hatutendi. Jiulizeni swali hili nyote pande zote. Kila mwana wa Kanisa, hasa, na alijibu swali hilo. Je, umekuwa ukitenda, siku hizi, yale ambayo ungependa Yesu Kristo ayaone? Je, nyumba yako imepangwa kwa namna impendezayo Mungu? Tuseme Yesu

Kristo angetembelea nyumba yako juma hili, bila kualikwa na bila kutarajiwa—angefikiri nini juu ya kile angekiona? “Lo,” asema mmoja, “namjua fulani hutenda pasipo mfululizo kabisa.” Bwana, nakuomba ujifikirie mwenyewe. Hilo ndilo jambo. Jirekebishe mwenyewe. Wana wa Kanisa la Mungu wasipotenda yale yampendezayo, huufunga mlango juu ya ustawi—huyazuia maombi ya Kanisa yasifanikiwe. Ni nani apendaye kuwa mtu asimamaye kuzuia ustawi wa Kanisa la Mungu kwa kutokuwa na mfululizo katika mwenendo? Ni nani angekuwa na hatia hivyo? Mungu awasamehe baadhi yenu. Twaweza kunena juu ya baadhi hata kwa kulia, kwa maana, ole, ijapokuwa hukiri kuwa wafuasi wa Kristo, hawana mfululizo hata kwamba si rafiki, bali adui za Msalaba wa Kristo.

Swali lifuatalo ni, je, twakaa ndani ya Mungu? Andiko lasema ya kuwa tukizishika amri zake Mungu hukaa ndani yetu nasi ndani yake. Je, ni hivyo? Namaanisha, mchana kutwa je, twamfikiri Mungu? Katika shughuli zetu je, twako bado pamoja na Mungu? Mkristo haimpasi kumkimbilia Mungu asubuhi na tena usiku, na kumtumia kama kimbilio na kitu cha dharura, kama watu wafanyavyo tao au ukumbi wanaokimbilia chini yake wakati wa mvua ya manyunyu. Yatupasa kukaa ndani ya Mungu na kuishi ndani yake tangu kuchomoza kwa jua hata kuzama kwake, tukimfanya kuwa tafakari yetu ya kila siku, na kwenda kama tulivyo mbele zake, tukihisi daima, “Wewe Mungu waniona.” Je, hali yako ikoje, Rafiki wapenzi. Lo, swali hili na lizunguke kutoka benchi hata benchi na kutoka moyo hata moyo, na akili—kila mmoja na ajibu kwa nafsi yake mwenyewe.

Mwisho, je, Roho wa Mungu ndiye atuendeshaye, au ni roho nyingine? Je, twamngoja Mungu na kusema, “Bwana, Roho wako na aniambie niseme nini katika jambo hili, na nifanye nini. Uutawale uamuzi wangu, uzitiishe tamaa zangu, uzizuie hisia zangu za chini na Roho wako aniongoze. Bwana, uwe kwangu bora kuliko nafsi yangu mwenyewe. Uwe nafsi na uhai kwangu na katika ufalme maradufu wa roho yangu, nafsi yangu, na mwili wangu, Bwana mwema, uwe wewe Bwana mkuu ili katika kila jimbo la asili yangu Sheria yako isimikwe na mapenzi yako yaheshimiwe”? Tungekuwa na Kanisa lenye nguvu kama sote tungekuwa na nia hii. Lakini mkutano wa watu waliochangamana wako pamoja nasi, ule mkutano wa watu waliochangamana uliotoka Misri, na hawa huanguka katika tamaa. Uovu sikuzote huanza nao. Mungu na atuokoe tukiwa Kanisa tusiipoteze Uwepo wake.

Mkutano wa watu waliochangamana ni lazima uwe pamoja nasi ili kutujaribu, kwa maana Bwana amesema, “Viache vyote vikue pamoja hata wakati wa mavuno,” na tukijaribu kung'oa magugu tungeng'oa ngano, pia—lakini, kwa vyo vyote, na tumwombe Mungu aifanye ngano kuwa yenye nguvu zaidi. Mojawapo la mambo mawili sikuzote hutokea katika Kanisa. Ama ngano huyasonga magugu au magugu huisonga ngano. Mungu na akubali ngano ipite magugu kwa juu katika hali yetu. Mungu na awape Neema watumishi wake wawe na nguvu za kutosha kuushinda uovu unaowazunguka na, wakiisha kufanya yote, kusimama kwa sifa ya utukufu wa Neema yake, ambaye pia ametukubali katika Mpendwa. Bwana awabariki, na awe pamoja nanyi milele. Amina na Amina.

FUNGU LA MAANDIKO LILILOSOMWA KABLA YA MAHUBIRI—1 Yohana 3; Isaya 1:10-20.