Jinsi ya Kuwaachilia Watu Wako

Sisi tulioitwa kuwa wachungaji na wazee katika kanisa lazima tuelewe baadhi ya kweli za kibiblia kuhusu huduma yetu. NDIYO, tumeitwa kuwaandaa watakatifu ili wafanye kazi ya huduma. Sisi HATUKO mstari wa mbele wa vita — wao ndio walioko! Kwa muda mrefu mno tumewafundisha watu wetu ‘kumwombea mchungaji wako kwa kuwa yuko mstari wa mbele wa vita dhidi ya uovu, na Shetani anataka kumshambulia!’

Ukweli ni kwamba mimi ninaweza kuendelea siku baada ya siku bila hata kukutana ana kwa ana na mtu asiyeamini, ninaweza kutumia muda mwingi wa thamani katika Neno na katika maombi, lakini wengi wa watu wa kutaniko langu hawawezi. Nimeitwa kuwa hema la maburudisho, kituo cha uuguzi, ghala la silaha, mbali nyuma ya mistari ya mbele, hali wao wako mahandakini siku baada ya siku. Ni lazima niwaandae vyema ikiwa watakuwa washindi katika vita. Bwana hatarajii tu kwamba washinde, bali pia anatarajia wawe mashahidi wake katika ulimwengu huu. Amewatwika mzigo (wengi wao), amewapa karama, na sasa anasubiri kuwapaka mafuta wanapotoka kumtumikia.

Naamini kwamba kila mkutano wa halmashauri ya wazee wa kanisa unapaswa kuwa na mambo mawili muhimu. Kwanza, maombi ya kuwasiliana na Bwana. Jambo hili lingehusisha kuzungumza na Mungu na pia kungoja kwa utulivu ili aweze kuzungumza nasi. Pili, wakati wa kujadili ni nani kanisani anayeonyesha mzigo, au anayedhihirisha karama za kubeba mzigo kama huo, au ambaye sasa yuko tayari kuachiliwa kuingia katika huduma.

Hali ya kawaida yaweza kuwa hivi: Mchungaji: Yupo yeyote unayemtambua kuwa yuko tayari kuachiliwa kuingia katika huduma?

Mzee (wazee): Tumekuwa tukimtazama Mary sana tangu mkutano wetu uliopita. Ni dhahiri kwamba ana shauku kubwa katika umisionari, na maombi yake kwa ajili ya waliopotea yanaonyesha kujali kwa kina. Yeye ni mwamini aliyejitoa, mwaminifu katika utoaji wake wa kifedha na mahudhurio. Tungependa halmashauri imwalike aeleze mzigo wake pamoja na pendekezo, ili tuone jinsi sisi, kama familia ya kanisa, tunavyoweza kuitikia pendekezo hilo.

Mary anapofika mbele ya wazee na pendekezo lake, yaweza kuwezekana kuanzisha huduma ya kuutegemeza mzigo wake.

Hali nyingine: Mchungaji: Unamwonaje John akikua kuwa mzee mtarajiwa?

Mzee (wazee): Hakika anaheshimika sana miongoni mwa watu wengi kanisani. Ninajua kwamba wengi wao humwendea kwa ushauri na kwamba shauri lake ni thabiti. Analielewa Neno vyema na anaishi maisha yanayolingana na maagizo yake.

Mchungaji: Je, yeye ‘anafuzu’ kwa kadiri Maandiko yanavyohusika? (Tito na 1 Timotheo) Mzee (wazee): Twaamini hivyo.

Mchungaji: Basi na tumwalike kwenye mkutano ujao wa halmashauri na tumweke ‘katika kipindi cha majaribio’ kama mzee kwa miezi sita ijayo. Jim, je, utamchukua pamoja nawe na kuwa mlezi wake? Akithibitisha wito wake, tutamtambulisha kwa kutaniko kwenye mkutano ujao wa mwaka.

Hali zinazowezekana ni nyingi — nyingi kama watu mbalimbali walioko kanisani mwako ambao Bwana angependa kuwaachilia kuingia katika huduma yake.

Sikiliza

Ni jambo la muhimu sisi tulio wachungaji tuwasikilize watu wetu wanapoeleza mizigo yao. Tunapaswa kuwasaidia kufafanua maono yao kidogo ili waweze kweli kuutambua na kuueleza mzigo huo. Wachochee, watie moyo, lakini zaidi ya yote, wasikilize. Ni mzigo wao kutoka kwa Bwana ndio tunaoupenda, si mzigo wetu ambao tungependa watusaidie kuubeba. Wasaidie kuueleza mzigo huo kwa maneno.

Thibitisha karama zao

Mzigo unapokuwa dhahiri, tafuta kujua kutoka kwa wengine kama uwezo, vipaji na karama za kiroho zinazohitajika kuubeba mzigo huo katika huduma, vinapatikana katika maisha ya mwanakanisa huyu. Ili kusaidia katika jambo hili, mtu anaweza kutumia mojawapo ya dodoso nyingi kuhusu karama na wasifu wa kibinafsi zinazopatikana kwa wingi leo hii. Bila shaka, hatupaswi kutarajia kuona upako au ukomavu wa uongozi katika ‘tai ambaye bado hajaachiliwa kuruka’! Watakuwa na wasiwasi, nawe utakuwa na hofu, lakini ni mama yupi asiye na hofu anapowaona watoto wake wakipiga zile hatua zao za kwanza zilizo dhaifu na za kujikwaa?

Je, basi humfunga mtoto wake tena na kukataa kumwacha ahatarishe kutembea asije akajikwaa? La hasha! Wala wewe hupaswi, wewe uliyeitwa kuwalea kondoo wake.

Anza kuachilia

Mwamini mwenye afya anapokuwa na mzigo ulio dhahiri na ushahidi wa uwezo na karama upo na umethibitishwa na wengi, ni wakati wa kumwachilia tai. Tenga muda wa thamani wa kuwa pamoja naye. Hupaswi kuwa na mipango ya awali kwa ajili ya mkutano huu wala nia ya kumtwika mzigo wako mabegani mwake. Ni jambo la muhimu kwamba mkutano huu uwe unamzunguka mwanakanisa na mwenendo wake pamoja na Bwana, si kanisa na mipango yake. Ikiwa mipango ya kanisa lako yatoka kwa Bwana, yeye ana uwezo kamili wa kuwaandaa viongozi wanaohitajika kwa kuwatwika mzigo unaofaa — mzigo wake ulio mwepesi. Mwishoni mwa mkutano huu, wewe na yule mwanakanisa mnapaswa kuwa na uelewa ulio dhahiri wa mzigo na shauku ya huduma iliyo moyoni mwa mwanakanisa. Yaweza kuwa haiwezekani kutimiza shauku zake zote za huduma — zaweza kuwa zaidi ya yale kanisa liwezayo kufanya, au si za kutekelezeka kwa upande wa watumishi au fedha. Hata hivyo, sasa nyote wawili mnalo jambo la kuanzia.

Agano la Huduma

Ukiona huduma inayowezekana ambayo yaweza kufunguliwa kwa ajili ya tai kijana, ijadili naye ili kuona kama kuna makubaliano.

Napendekeza kwamba kisha uandae Agano la Huduma kwa mazungumzo pamoja na mwanakanisa.

Jambo hili laweza kuchukua wiki kadhaa kulitunga kabla yeye na wewe (wazee) hamjafikia makubaliano kamili. Yaweza kuwa una kikundi kidogo cha watu ambao huduma yao ni kuandika maagano ya huduma kama hayo kwa ajili ya idhini yako na ya yule tai kijana. Agano la Huduma linapaswa kueleza waziwazi mipaka ya huduma, mamlaka yaliyokabidhiwa na uwajibikaji. Mfano rahisi wafuata: Susan amekuwa akiwaambia rafiki zake kwamba anatamani kwenda Shule ya Mafunzo ya Uanafunzi na Youth With A Mission (kwa mfano), naye yuko bize akizungumza na watu mmoja mmoja kanisani akijaribu kupata msaada wa kifedha kwa ajili ya miezi sita anayotarajia kuwa mbali. Hufurahii sana jambo hili kwa kuwa waamini kwamba baadhi ya watu katika kutaniko wanaweza kuwa wanahamisha baadhi ya sadaka zao kutoka mipango ya kanisa ili kumsaidia Susan. Je, wawaendea faraghani na kuwaambia wasimsaidie? Je, wamwita ofisini mwako na kumkataza asiwaombe waamini msaada? Je, wahubiri hotuba iliyo kali zaidi kuhusu utoaji wa uaminifu kwa kanisa lako mwenyewe? Au wajiuliza mwenyewe, “Nitawezaje kumsaidia kifaranga huyu wa tai aruke?” Nani ajuaye, labda atakuwa mmisionari mkuu siku moja, akimshindia Bwana wengi na kuliletea jina lake heshima kubwa — akiruka kama tai kama vile Bwana alivyompangia.

Waweza kumwita ofisini, umpe muda wa thamani na kumsikiliza anapoushusha mzigo wake. Kwa kweli hajui mengi kuhusu umisionari wala kuhusu YWAM, lakini ana shauku ya kumtumikia Bwana katika mazingira ya umisionari na anatambua uhitaji wa kupatiwa mafunzo kwa ajili ya hilo.

Imekuwa dhahiri kwako kwamba Susan ana elimu nzuri na ni mwamini aliyejitoa mwenye moyo wa huruma kwa waliopotea. Waweza kumpendekezea ajifahamishe zaidi na YWAM na shule nyingine zinazowezekana, hali wewe ukitafuta ufahamu kuhusu tabia yake na karama yake. Kisha agano la huduma lifuatalo laweza kuwasilishwa.

Agano la Huduma - Susan Smith

Tukitambua kwamba Bwana ametuita kwenda ulimwenguni kote kuihubiri Injili, kwamba umisionari u karibu na moyo wake na kwamba mashamba ni meupe tayari kwa mavuno lakini wavunaji ni wachache, Sisi, wazee wa Westside Evangelical Church, Yourtown, twafanya Agano hili la Huduma na Susan Smith, mwanakanisa wa kanisa hili.

Susan atahudhuria Shule ya Mafunzo ya Uanafunzi na YWAM katika jiji la mji wao kwa muda wa miezi sita, kuanzia Januari hadi Juni, 1999. Twaelewa kwamba gharama jumla ya shule hii itakuwa takriban dola 5000, ikijumuisha malazi, ada ya masomo, mahitaji binafsi na gharama za uinjilisti.

Kabla ya kuhudhuria shule, Susan atapewa dakika kumi na tano katika ibada ya asubuhi ya Jumapili kulieleza kutaniko mipango yake. Sadaka ya upendo itapokewa kwa ajili yake mwishoni mwa ibada hiyo. Kanisa litaongeza juu ya hii, fedha za kutosha kumwezesha kulipia usafiri wake kwenda mji wao.

Akiwa shuleni, Susan atatuma kanda ya sauti (au barua) kanisani kila mwezi ili kutufahamisha maendeleo yake na mahitaji ya maombi. Sehemu ndogo ya kanda hiyo itachezwa kwa kutaniko wakati wa ibada ya asubuhi mara moja kwa mwezi na kisha maombi yatafanywa kwa niaba yake. Kila kikundi cha maombi cha kanisa kitatiwa moyo kufanya maombi kwa ajili ya Susan kuwa sehemu ya kawaida ya mikutano yao.

Picha au majarida yoyote ambayo Susan atatuma nyumbani yatabandikwa kwenye ubao wa umisionari wa kanisa.

Kanisa litamtumia Susan dola 200 kila mwezi pamoja na fedha zozote zitakazokusanywa kwa ajili yake kupitia shughuli nyingine za nje ya kanisa zinazofanywa na waamini wetu.

Hatutasahau kwamba Susan bado ni mwanakanisa wa kutaniko letu ijapokuwa yuko mbali kwa miezi hii sita, na wazee wanajiweka wakfu kupatikana kwake kwa ajili ya dharura yoyote au mahitaji ya ushauri anayoweza kuwa nayo akiwa mbali.

Baada ya kumaliza shule yake ya miezi sita, Susan atarudi katika kanisa hili kabla ya kujitoa katika huduma nyingine yoyote, iwe na YWAM au shirika lolote lingine. Atawajibika kwa mchungaji kuonyesha maendeleo aliyoyapata kama mwanafunzi kupitia shule ya DTS. Atatakiwa kukutana na mchungaji, au mzee aliyekabidhiwa, mara moja kwa mwezi kwa miezi sita ijayo. Mwishoni mwa muda huo, Agano hili la Huduma litakoma.

Imekubaliwa: Imetiwa saini: Susan Smith John Williams (mzee) - kwa niaba ya halmashauri ya wazee Peter Smith (mchungaji) * Mifano mingine ya Maagano ya Huduma yaweza kupatikana katika Nyongeza ya 2 Endelea kulea Susan anapoondoka kwenda shuleni kwake - au huduma itakayofuata - kazi ya mchungaji haijaisha. Ni lazima aendelee kumlea, kumtunza. Kupendezwa kwake dhahiri na yote anayoyafanya kutamwathiri kwa kina na kutamjengea mtazamo mzuri kuhusu kanisa na uongozi wake uliochaguliwa. Kutakuwa na nyakati ambapo atahisi kukata tamaa na atamhitaji mchungaji kumwinua roho yake tena. Atahitaji ushauri anapohangaika kutimiza mzigo wake.

Aweza kuhitaji mkono thabiti wa kumzuia asianguke moja kwa moja katika hatari au upumbavu. Anamhitaji mchungaji wake - tai baba yake - hadi atakapojifunza kuruka chini ya upako wa Roho. Ikiwezekana, mtembelee mahali pake pa huduma, tazama anachokifanya katika maisha yake ya kila siku, jaribu kuelewa vita anayokabiliana nayo, mtie moyo, mwoshe miguu yake .