Kupaa Juu Sana

Ni picha ya ajabu kama nini Mungu anayotupatia kupitia nabii Isaya, kama ilivyoandikwa katika Sura ya 40 mstari wa 28-31: Je, hukujua? Je, hukusikia ya kwamba Mungu wa milele, Bwana, Muumba wa miisho ya dunia, hazimii wala hachoki? Akili zake hazichunguziki. Yeye huwapa nguvu wazimiao; na wale wasio na uwezo huwaongezea nguvu. Hata vijana watazimia na kuchoka, na wanaume vijana wataanguka kabisa; bali wamngojao Bwana watapata nguvu mpya; watapanda juu kwa mbawa kama tai; watapiga mbio wala hawatachoka; watatembea wala hawatazimia.

[Maneno ‘kumngojea’ katika mstari wa mwisho yangetafsiriwa vyema zaidi kama ‘kukaa ndani yake’ (‘kufungamana naye’), kwa kuwa ndiyo maana ya asili ya neno la Kiebrania qavah. (Ona Strong’s #6960)] Mtunga-zaburi Daudi anaandika katika Zaburi 103:1-5: Ee nafsi yangu, umhimidi Bwana; naam, vyote vilivyo ndani yangu vilihimidi jina lake takatifu. Ee nafsi yangu, umhimidi Bwana, wala usisahau fadhili zake zote. Yeye akusamehe maovu yako yote; akuponya magonjwa yako yote; aukomboa uhai wako na uharibifu; akuvika taji ya fadhili na huruma; aushibisha kinywa chako kwa mema; hata ujana wako ukarejezwa kama wa tai.

Nimewahi kutazama kundi la bata-bukini wa Kanada wakiruka kwa safu juu ya vichwa vyetu; nimeona kundi la mwari wakipaa kutoka majini ya ziwa lenye misukosuko; nimeshuhudia jeshi la tumbusi likishukia mzoga uliooza; lakini sijapata kuona jambo la kuvutia kama tai aliyekomaa akipaa juu, mbali zaidi kuliko ndege wote, mtawala wa vyote anavyoviona. Haishangazi kwamba Warumi wa kale na Waamerika wa leo wamemfanya kuwa ishara ya mataifa yao makuu.

Mojawapo ya siku nzuri kuliko zote maishani mwangu niliitumia katika Kisiwa cha Saturna, karibu na pwani ya magharibi ya Kanada, ambako, pamoja na marafiki watatu waliokuja kunitembelea kutoka Wales, nilisimama juu ya kilima kirefu kati ya tai sita au saba wakishuka kasi hadi bondeni chini yetu, kisha wakipaa hadi angani juu, wakipita karibu na mikono yetu iliyonyooshwa kwa umbali wa hatua chache tu. Walionekana kama hawajitahidi hata kidogo; hakukuwa na mbawa zilizokuwa zikipepea kwa shughuli walipopanda juu ya mikondo ya hewa iliyokuwa ikipanda katika miteremko mikali kuelekea nchi ile ya juu.

Ni shauku ya Mungu kwamba watu wake wawe vyote wanavyopaswa kuwa; kama tai wanaopaa mpaka mahali pa mbinguni pamoja naye. Lakini wengi wetu hatujajifunza kamwe kuruka, tukitosheka badala yake kubaki katika starehe ya viota vyetu, tukiusaga mlo wa karibuni wa mahubiri ya mimbari ya Jumapili asubuhi.

Wengine wamejaribu kupepea mbawa zao, ili wapae juu ya mambo ya kawaida, kwa kuwa wameona au wamesikia habari za waamini wengine wakipaa juu, wakifurahia baraka tele za Bwana wao wanapoinuka juu ya upepo wa Roho.

Wamejaribu ‘kupiga hatua kwa imani’ au kuhatarisha, na mara nyingi matokeo yamekuwa ni kukata tamaa na kuumia wanapoanguka kwa nguvu tena hadi ardhini.

Makanisa yetu yamejaa watu wanaojikuta wakifanana zaidi na kuku wa uani kuliko tai apaaye juu! Wanatosheka kuteta ‘ko-ko-ko’ wakidonoa chembechembe za baraka kati ya wingi wa mipango ya kanisa iliyoandaliwa kwa faida yao. Kwa nini inaonekana ni vigumu kiasi hiki kuruka kama tai ikiwa hayo ndiyo mapenzi ya Mungu kwetu na shauku ya mioyo yetu? Mtu mmoja amependekeza kwa dhihaka kwamba ‘ni vigumu kuruka kama tai unapozungukwa na batamzinga!’ lakini mimi nasema kuna sababu za msingi zaidi.

Baadhi ya Sababu Zinazowafanya Wengi Washindwe Kuruka

1. Wanazaliwa ‘wakiwa na majeraha.’

Tulipozaliwa mara ya pili kwa Roho wa Mungu, roho zetu zilihuishwa kwa Mungu, tukahamishwa kutoka ufalme wa giza hadi ufalme wa nuru, tukatolewa katika mauti hadi uzima. Tulifanywa viumbe vipya, ‘ya kale yamepita; tazama! yamekuwa mapya’. Wanatheolojia huita hilo kuhesabiwa haki; wokovu wa roho; kazi ya wakati uliopita ya Roho Mtakatifu ambayo kwayo tuliokolewa kutoka adhabu ya dhambi.

Lakini miili yetu haikubadilika ghafla; ingali inakufa, siku moja baada ya nyingine, na matokeo ya kimwili ya dhambi yanaendelea katika miili yetu. Makovu ya majeraha ya zamani yanabaki, bado tunahitaji miwani ili kusoma, nywele zetu zinaendelea kunyonyoka, na mianya iliyo katika meno yetu haijazwi kwa enameli mpya zing’aazo. Ni dhahiri, miili yetu haikuwa ‘kiumbe kipya’! Ahimidiwe Mungu, siku moja itafanywa mipya wakati uharibifu huu utakapovaa kutokuharibika, na huu wa kufa utakapovaa kutokufa.

Tunaita hilo kutukuzwa; wokovu wa mwili; kazi ijayo ya Roho Mtakatifu ambayo kwayo tutaokolewa kutoka uwepo wa dhambi.

Vivyo hivyo, nafsi zetu hazikuponywa mara moja kutoka majeraha zilizoyapata; majeraha kama vile kukataliwa, kuachwa, mashambulizi ya maneno na ya kimwili yaletayo hali ya kujiona duni, ukosefu wa usalama, na hofu; majeraha ambayo mara nyingi yamo ndani sana ya fahamu zetu za ndani. Kama wewe ni mtoto wa wazazi walioachana, unabeba majeraha. Kama palikuwa na tendo la ndoa nje ya vifungo vya ndoa, unabeba majeraha. Kama wazazi wako hawakuweza kukumiminia upendo unaodhihirika katika usalama, kujithamini, na afya ya kihisia, unabeba majeraha. Shetani anayajua majeraha mengi tunayoyabeba, naye ni mwepesi kuyachochea kila mara tunapojaribu kufanya mambo makuu kwa ajili ya Mungu.

Habari njema ni kwamba kuna uponyaji na ukamilifu unaopatikana, hata kwa majeraha haya, katika kazi ya upatanisho ya msalaba. Tunaita hilo utakaso; wokovu wa nafsi; kazi ya sasa, inayoendelea, ya Roho Mtakatifu ambayo kwayo tunaokolewa kutoka nguvu ya dhambi. Mpaka majeraha haya yatakaposhughulikiwa; kwa njia ya kiroho; ‘kuruka’ kwetu kutakuwa na kikomo. (Ona kitabu changu kingine The Key in My Hand .)

“Na Mungu wa amani mwenyewe awatakase kabisa; nayo roho yenu, na nafsi yenu, na mwili wenu, vihifadhiwe mkamilifu, bila lawama, hata kuja kwake Bwana wetu Yesu Kristo.”

2. Tumefanya maamuzi yaliyo kinyume cha kanuni za Mungu za maisha.

Maamuzi mengi kati ya hayo yana matokeo ya maisha yote. Kwa mfano, tunafundishwa tusiwe ‘tumefungwa nira isivyo sawasawa pamoja na asiyeamini’ lakini wako waamini wengi walioolewa na kuoa wenzi wasioamini. Ingawa Bwana angaliweza kuwaita kwenye kusudi kuu katika utumishi wake, wajibu wao wa kwanza sasa ni kuwa shahidi kwa mwenzi wao asiyeamini. Bila shaka, Bwana aweza kumleta mwenzi asiyeamini kwake mwenyewe, ingawa hilo si la kawaida, na kisha wote wawili waweza kujifunza kuruka. Aweza bado kuwatumia watu kama hao hata kama mwenzi anabaki bila kujitoa, lakini ‘kuruka’ kuna kikomo kikubwa, na uamuzi ule hauwezi kutenduliwa.

Lakini maamuzi mengine yaweza kutenduliwa, na ni lazima yatenduliwe, ikiwa mtu anataka kuruka kama tai. Wengi wanaishi katika madeni, kinyume kabisa cha neno la Mungu, bila kutambua kwamba sasa wanamtumikia Mamona, mungu mgeni! Nashangaa kabisa ninapoona viongozi wengi wa Kikristo na makanisa wakijifunga katika mzigo mzito wa madeni ambao, wanaposhindwa kutimiza matakwa ya wadai wao, huwaingiza katika utumwa ambao Bwana hakuwakusudia kamwe. Bwana hawezi kuwaachilia waingie katika ukuu wa utumishi wake wakati bado wako chini ya uwezekano wa matakwa ya wadai wao.

Wengi wanabeba hali ya kutosamehe mioyoni mwao kwa wengine, hivyo kumpa Shetani nafasi yake, hali wengine zaidi wanabeba machukizo na ubaguzi. Yote haya ni maamuzi waliyoyafanya ingawa wangependelea kumlaumu mtu mwingine. Mtu akikukosea, Bwana amekuahidi neema itoshayo kuvumilia kosa hilo na kusamehe.

Mtu akikuudhi kwa matendo yake, tabia yake, au maneno yake, waweza kuchagua kutomruhusu yule tumbili akae mabegani mwako!

Kama likibaki, kuudhika huko ni kwako! Ubaguzi ni ile mielekeo hasi tuliyo nayo kwa wengine, mara nyingi inayotokana na ujinga. Kumbuka, hutajua kamwe jinsi mtu mwingine anavyohisi hadi utakapotembea maili kadhaa ukiwa umevaa viatu vyake!

Bwana aweza bado kuwatumia watu hawa wote katika huduma, lakini ‘kuruka’ kuna kikomo.

“Na tuweke kando kila mzigo mzito, na dhambi ile ituzingayo kwa upesi; nasi na tupige mbio kwa saburi katika yale mashindano yaliyowekwa mbele yetu.”

3. Hatujawahi kuelewa kwamba tunapaswa kuwa tunaruka!

Tumeridhika sana na hali ya kawaida ya maisha yetu ya Kikristo hata hatujawahi kuuliza kama kuna zaidi ya hayo. Tunatosheka kulishwa kila Jumapili kwa ujumbe wa mimbari, ukiongezewa na muziki mzuri wa ‘ibada’ kwenye redio ya gari letu na kitabu cha kupendeza cha mtu mashuhuri wa Kikristo wa siku hizi. Hakika hii ni hali isiyo ya kawaida; iliyo chini ya maisha yale yaliyo tele ambayo Bwana alitukusudia!

Tumepotezewa hisia zetu kiasi na Ukristo dhaifu, wa kupenda vitu, wa sehemu kubwa ya ulimwengu wa magharibi, hata hatuwezi tena kumsikia bwana-arusi wetu akisema, Ondoka, mpenzi wangu, njoo zako. Sauti yake imekuwa sauti ya mgeni, naye bibi-arusi amesahau mahaba ya sauti hiyo. Ameupenda ulimwengu huu mno, na masumbufu yake na uchafu wake vimemlemea.

Mtu akitaka kuisikia sauti ya Bwana, kumkaribia, huitwa kwa dhihaka ‘mtu wa mafumbo’ (kama nilivyowahi kuitwa na mchungaji mkuu mmoja!) Hatujali tena wala hatutazamii kuisikia sauti ya Mchungaji.

Makanisa yetu mengi yamekuwa mahali tunapokwenda ili tujisikie vizuri, badala ya kuwa mahali pa kumwabudu Mungu na kujifunza juu ya matakwa yake juu ya maisha yetu. Hatupendi kuisikia sauti yake isije ikatuletea hukumu ya dhamiri. Kila mtu anaponiambia juu ya kanisa ‘kuu’ analohudhuria, ninatafuta kujua, bila kumchokoza, ana maana gani anaposema ‘kuu.’ Mara nyingi wana maana kwamba idadi imeongezeka, Yesu anainuliwa, mikono iko juu hewani, uimbaji una shangwe, na mahubiri hayazidi dakika ishirini na tano, juu ya mada isiyo na changamoto! Twataka kuwa katika kanisa linalopanda juu! Nashangazwa kwamba Evan Roberts, chombo cha Mungu katika uamsho mkuu wa Wales wa mwaka 1904, alijifunza kuruka kama tai kwa kuomba, “Bwana, niiname chini, niiname chini zaidi!”

Zaidi ya hayo inaonekana kwangu kwamba makanisa yetu mengi ‘makuu’ ni hivyo kwa sababu ya haiba ya kiongozi, si kwa sababu ya karama za Roho Mtakatifu. Kiongozi angefanikiwa vivyo hivyo katika kujenga himaya ya biashara kama alivyofanikiwa katika kujenga himaya yake binafsi ya kanisa. Amejifunza mbinu zote za ulimwengu wa biashara katika kuwadhibiti wale wanaomfanyia kazi, na ameweka ‘chati’ imara ya mamlaka na wajibu. Vivyo hivyo, upande wa pili, makanisa yetu mengi madogo hubaki hivyo kwa sababu ya ukosefu wa usalama na udhibiti wa kiongozi wake.

Usinisukume sana! Nafurahi kupumzika hapa tu katika kiota changu!

4. Tumekatwa mbawa zetu ili tusiruke juu mno!

Viongozi wetu wengi hawajaelewa wajibu wao wa kuwafundisha watu wao kuruka. Badala yake, makanisa mengi na mashirika ya kando ya kanisa yanaendeshwa kwa namna inayofanana na mifumo ya ulimwengu, ambapo muundo wa shirika ni wa kipiramidi, mamlaka yakitiririka kutoka juu kwenda chini, na neno linalotawala ni udhibiti. Yesu alisema, “Ninyi msiwe hivyo!” Nikiwa mchungaji, nachangamotishwa sana kwamba kazi yangu ni “kuwakamilisha watakatifu kwa kazi ya huduma.” yaani; kuwafundisha kuruka! Nimeitwa kufanya wanafunzi, si kujenga viota vikubwa zaidi! na wanafunzi wanapaswa kuruka kama Mungu alivyowakusudia.

Tai hatapumzika mpaka amwone mtoto wake akiinuka kupaa juu ya ndege wengine wote katika anga pana la mbinguni. Laiti wachungaji wangekuwa na shauku hii; kuwalisha, kuwafundisha na kuwaachilia watu wao ili kila mmoja afikie kusudi lake la juu kabisa katika Kristo. Badala yake, mara nyingi tunawaona wakiwakata mbawa watu wao ili wasisumbue starehe ya kanisa ‘lao.’

Ni kanisa la nani hasa?

Nilikuwa nyumbani kwa mchungaji mmoja huko Australia, ambapo mwenyeji wangu alikuwa amewaalika marafiki kadhaa kwa jioni ya ushirika pamoja na mgeni wake kutoka Kanada. Alinitambulisha kwa ufupi, akiniomba niwashirikishe wageni wake lolote ambalo Bwana angaliweza kuliweka moyoni mwangu. Nilianza kwa kupanua utambulisho wake. “Mimi ni mchungaji, kwa sasa sisimamii kanisa, lakini hata hivyo ni mchungaji kwa mujibu wa Waefeso 4:11, nikijua wito wangu na huduma ambayo Bwana ameiweka mbele yangu.” Mara moja mwanamke mmoja wa makamo aliyekuwepo akasema, kwa sauti kubwa iliyoweza kusikiwa na wote, “Nadhani tutakatwa mbawa zetu tena!” Sikuweza ila kudhani kwamba uzoefu wake na wachungaji ulikuwa kwamba mara kwa mara walimzuia katika lile alilodhani kuwa wito wa Mungu juu ya maisha yake.

Nafurahi kuweza kusema kwamba, ilipofika mwisho wa jioni ile, yeye na mimi tulikuwa ‘marafiki wakubwa!’ Hata alitoa “Amina” ya moyoni nilipomaliza.

Ni lazima niongeze kwamba katika mkutano ule ule nilikutana na mmoja wa Wakristo wale wachukizao kupita kiasi, yule “mlinzi wa ukutani” aliyejiteua mwenyewe, ambaye kazi yake maishani ni kukosoa kila neno ambalo mchungaji au mgeni angeweza kusema, ambalo laweza kufasiriwa kumaanisha jambo la hatari (kwa mujibu wa mlinzi huyo) kwa watakatifu; mara nyingi jambo ambalo msemaji hakukusudia kamwe. Mchungaji mwema bila shaka angehitaji kukata mbawa hizo!

Tuna vijana wengi katika makanisa yetu ambao bado hawajaambukizwa ugonjwa wa uvivu ulioenea sana miongoni mwa wazee, na ambao wana ndoto na mawazo ya kumtumikia Bwana.

“Kwa nini tusianzishe duka la kahawa? Je, vijana waweza kuongoza ibada Jumapili moja? Je, twaweza kufanya mkutano wa nje? Nataka kwenda safari ya umishonari na Youth With A Mission au Campus Crusade. Je, twaweza kupanga karamu ya nyama choma kwa ajili ya watoto wa mitaani wenye nywele za rangi na pete puani mwao? Je, twaweza kuunda kwaya ya vijana, wote wakiwa wamevaa fulana za raga na suruali za jinsi?” Tunavutiwa na shauku yao lakini tu wepesi kuwavunja moyo kwa udhuru mia na moja.

Hatutaki ‘mtumbwi wetu utikiswe.’ Baada ya yote, letu ni kanisa lenye heshima na tuna kila kitu ‘chini ya udhibiti.’ Kwa kweli hatuhitaji mipango zaidi, hasa ile ambayo ulimwengu ungeweza kuizingatia, kama iliyopendekezwa hapo juu.

Baada ya yote, ni kazi ya mchungaji kujua ni mipango gani Mungu anayoitaka katika kanisa lake, sivyo? Sivyo???

Kama maoni yangu niliyoyaeleza hapo juu ni ya kweli, basi haishangazi kuwa kuna waamini wengi ambao hawako tena katika ushirika mwema na kanisa la mahali kwa sababu ya kukata tamaa, kufadhaika, na majeraha.

Mzigo ulio moyoni mwangu ni kwa ajili ya kanisa lililojeruhiwa, hasa kwa wale wachungaji na wamishonari walioko ‘mstari wa mbele’ wanaoteseka kutokana na makosa na majeraha waliyofanyiwa, mara nyingi, na kwa masikitiko, na washiriki wengine wa Mwili wa Kristo. Lakini, katika safari zangu, ninakutana na waamini wengi zaidi na zaidi waliokata tamaa, wa kidini na walei pia, waliopoteza furaha yao na kusudi lao la kumtumikia Bwana. Wengi wamechoka kabisa kwa kubeba huduma ambazo Mungu hakuwahi kuwakusudia kuzibeba.