Kipawa Kinachojumuisha Yote

“Basi ikiwa ninyi, mlio waovu, mnajua kuwapa watoto wenu vipawa vyema, je! si zaidi sana Baba aliye mbinguni atawapa Roho Mtakatifu wale wamwombao?”—Luka 11:13.

KATIKA Mahubiri ya Mlimani, Bwana alikuwa amekwisha kutamka lile swali lake la ajabu la SI ZAIDI SANA? Hapa katika Luka, ambapo anarudia swali lile lile, kuna tofauti. Badala ya kunena, kama pale, juu ya kutoa vipawa vyema, anasema, “Si zaidi sana Baba aliye mbinguni atawapa ROHO MTAKATIFU?” Kwa hiyo anatufundisha kwamba kikuu na bora zaidi cha vipawa hivi ni Roho Mtakatifu, au afadhali, kwamba katika kipawa hiki vyote vingine vimejumlishwa. Roho Mtakatifu ni kipawa cha kwanza cha Baba, na kile anachopenda zaidi kukitoa. Kwa hiyo Roho Mtakatifu ndiye kipawa tunachopaswa kukitafuta kwanza na hasa.

Thamani isiyoelezeka ya kipawa hiki twaweza kuielewa kwa urahisi. Yesu alinena juu ya Roho kuwa ni “ile ahadi ya Baba;” ahadi ile pekee ambamo ubaba wa Mungu ulijidhihirisha. Kipawa bora zaidi ambacho baba mwema na mwenye hekima aweza kumpa mtoto duniani ni roho yake mwenyewe. Hili ndilo lengo kuu la baba katika malezi—kuzalisha ndani ya mtoto wake tabia na hulka yake mwenyewe. Ikiwa mtoto atamjua na kumfahamu baba yake; ikiwa, akikua, ataingia katika mapenzi yake yote na mipango yake; ikiwa atapata furaha yake iliyo juu zaidi ndani ya baba, na baba ndani yake,—hana budi kuwa na nia moja na roho moja pamoja naye. Basi haiwezekani kuwazia Mungu akimpa mtoto wake kipawa kilicho juu kuliko hiki, Roho wake mwenyewe. Mungu ni vile alivyo kwa njia ya Roho wake; Roho ndiye uzima hasa wa Mungu. Fikiri tu maana yake—Mungu kumpa mtoto wake duniani Roho wake mwenyewe.

Au je, huu haukuwa ndio utukufu wa Yesu akiwa Mwana hapa duniani, kwamba Roho wa Baba alikuwa ndani yake? Wakati wa ubatizo wake katika Yordani mambo mawili yaliunganishwa,—ile sauti, ikimtangaza kuwa Mwana Mpendwa, na Roho, akishuka juu yake. Na hivyo mtume anena juu yetu, “Na kwa kuwa ninyi mmekuwa wana, Mungu alimtuma Roho wa Mwanawe mioyoni mwetu, aliaye, Aba, Baba.” Mfalme hutafuta katika malezi yote ya mwanawe kuchochea ndani yake roho ya kifalme. Baba yetu wa mbinguni anatamani kutulea sisi kama watoto wake kwa ajili ya uzima mtakatifu, wa mbinguni ambamo yeye anakaa, na kwa ajili ya hili anatupa, kutoka vilindi vya moyo wake, Roho wake mwenyewe. Ndilo hili lililokuwa lengo lote la Yesu alipoingia kwa ajili yetu mbele za uwepo wa Mungu, baada ya kufanya upatanisho kwa damu yake mwenyewe, ili apate kwa ajili yetu, na kutuletea ashuke akae ndani yetu, Roho Mtakatifu. Akiwa Roho wa Baba, na wa Mwana, uzima wote na upendo wote wa Baba na Mwana umo ndani yake; naye, akishuka ndani yetu, hutuinua na kutuingiza katika ushirika wao. Akiwa Roho wa Baba, humwaga upendo wa Baba, ule aliompenda Mwana, ndani ya mioyo yetu, na kutufundisha kuishi ndani yake. Akiwa Roho wa Mwana, hututia ndani yetu ule uhuru wa kitoto, na ujitoaji, na utii ambao Mwana aliishi nao duniani. Baba hawezi kutoa kipawa kilicho juu wala cha ajabu zaidi kuliko hiki: Roho wake Mtakatifu mwenyewe, Roho wa uwana.

Kweli hii kwa kawaida yaleta wazo kwamba kipawa hiki cha kwanza na kikuu cha Mungu hakina budi kuwa lengo la kwanza na kuu la maombi yote. Kwa kila hitaji la maisha ya kiroho hiki ndicho kitu kile kimoja kinachohitajika, Roho Mtakatifu. Utimilifu wote umo ndani ya Yesu; utimilifu wa neema na kweli, ambao kutokana nao twapokea neema juu ya neema. Roho Mtakatifu ndiye mpokezaji aliyewekwa, ambaye kazi yake ya pekee ni kutufanya Yesu na yote yaliyomo ndani yake kwa ajili yetu yawe yetu kwa kumiliki binafsi, katika uzoefu uliobarikiwa. Yeye ni Roho wa uzima ule ulio katika Kristo Yesu; kama vile uzima ulivyo wa ajabu, vivyo hivyo ni ya ajabu maandalizi ambayo kwayo mtenda kazi kama huyu ametolewa kutuletea uzima huo. Tukijitoa tu wenyewe kabisa kwa uongozi wa Roho, na kumwacha afanye apendavyo nasi, atadhihirisha uzima wa Kristo ndani yetu. Atafanya hivi kwa nguvu za Kimungu, akiuhifadhi uzima wa Kristo ndani yetu bila kukatika. Hakika, kama kuna ombi moja lipasalo kutuvuta kwenye kiti cha enzi cha Baba na kutuweka pale, ni hili: kwa ajili ya Roho Mtakatifu, ambaye sisi kama watoto tumekwisha kumpokea, atiririke ndani yetu na atoke kutoka kwetu kwa utimilifu ulio mkuu zaidi.

Katika aina mbalimbali za vipawa ambavyo Roho anavyo vya kutoa, hukidhi kila hitaji la mwaminio. Fikiri tu majina ayabebayo. Roho wa neema, kudhihirisha na kutoa neema yote iliyomo ndani ya Yesu. Roho wa imani, akitufundisha kuanza na kuendelea na kuzidi katika kuamini daima. Roho wa kufanywa wana na wa uhakika, ashuhudiaye kwamba sisi tu watoto wa Mungu, na atiaye ndani yetu ule mwito wa kumtumaini na wa ujasiri, Aba, Baba! Roho wa kweli, kuongoza katika kweli yote, kufanya kila neno la Mungu kuwa letu kwa tendo na kwa kweli. Roho wa maombi, ambaye kwake twanena na Baba; maombi ambayo hayana budi kusikiwa. Roho wa hukumu na wa kuunguza, kuchunguza moyo, na kuhakikisha juu ya dhambi. Roho wa utakatifu, akidhihirisha na kuwasilisha uwepo mtakatifu wa Baba ndani yetu. Roho wa nguvu, ambaye kwake tuna nguvu za kushuhudia kwa ujasiri na kutenda kazi kwa matokeo katika utumishi wa Baba. Roho wa utukufu, dhamana ya urithi wetu, maandalizi na kionjo cha utukufu ujao. Hakika mtoto wa Mungu anahitaji kitu kimoja tu ili aweze kweli kuishi kama mtoto: nacho ni, kujazwa Roho huyu.

Na sasa, funzo ambalo Yesu anatufundisha leo katika shule yake ni hili: Kwamba Baba anatamani sana kumpa yeye kwetu ikiwa tu tutaomba kwa kutegemea kitoto juu ya lile asemalo: “Ikiwa ninyi mnajua kuwapa watoto wenu vipawa vyema, SI ZAIDI SANA Baba yenu aliye mbinguni atawapa Roho Mtakatifu wale wamwombao.” Katika maneno ya ahadi ya Mungu, “Nitamimina Roho wangu tele;” na ya amri yake, “Jazweni Roho” tuna kipimo cha kile ambacho Mungu yu tayari kutoa, na kile tuwezacho kupokea. Kama watoto wa Mungu, tumekwisha kumpokea Roho. Lakini bado twahitaji kuomba na kusali kwa ajili ya vipawa vyake vya pekee na matendo yake kadiri tuvihitajivyo. Wala si hivi tu, bali kwa ajili yake mwenyewe kutumiliki kabisa na kwa ukamilifu; kwa ajili ya uongozi wake usiokoma wa kila dakika. Kama vile tawi, ambalo tayari limejaa utomvu wa mzabibu, liliavyo daima kwa ajili ya kuendelea na kuongezeka kwa utomvu ule, ili lipate kuzaa matunda yake kwa ukamilifu, vivyo hivyo mwaminio, akifurahia kummiliki Roho, huona kiu daima na kulia kwa ajili ya zaidi. Na kile ambacho Mwalimu mkuu angependa tujifunze ni kwamba, hakuna kilicho pungufu kuliko ahadi ya Mungu na amri ya Mungu kiwezacho kuwa kipimo cha matarajio yetu na maombi yetu; hatuna budi kujazwa tele. Angependa tuombe hili kwa uhakika kwamba ile SI ZAIDI SANA ya ajabu ya upendo wa Baba wa Mungu ndiyo dhamana kwamba, tuombapo, twapokea bila shaka kabisa.

Na sasa tuamini hili. Tuombapo tupate kujazwa Roho, tusitafute jibu ndani ya hisia zetu. Baraka zote za kiroho hazina budi kupokelewa, yaani, kukubaliwa au kutwaliwa kwa imani.¹ Na niamini, Baba humpa mtoto wake aombaye Roho Mtakatifu. Hata sasa, ninapoomba, sina budi kusema kwa imani: Ninacho kile niombacho, utimilifu wa Roho ni wangu. Na tudumu imara katika imani hii. Kwa nguvu ya Neno la Mungu twajua kwamba tunacho kile tuombacho. Na tuendelee, kwa shukrani kwamba tumesikiwa, kwa shukrani kwa ajili ya kile tulichokipokea na kukitwaa na sasa tunachokishika kuwa chetu, tudumu imara katika maombi ya imani ili ile baraka, iliyokwisha kutolewa kwetu, na ambayo twaishika kwa imani, ipate kupenya na kujaza nafsi yetu yote. Ni katika shukrani na maombi ya namna hii ya kuamini, ndipo nafsi yetu inapojifungua ili Roho aitwae kabisa bila kusumbuliwa. Ni maombi ya namna hii ambayo si tu yaombayo na kutumaini, bali yatwaayo na kushika, ndiyo yarithiyo baraka kamili. Katika maombi yetu yote na tukumbuke funzo ambalo Mwokozi angependa kutufundisha siku hii, kwamba, kama kuna jambo moja duniani tuwezalo kuwa na hakika nalo, ni hili, kwamba Baba anatamani kutuona tumejazwa Roho wake, kwamba anafurahia kutupa Roho wake.

Na tukiisha kujifunza hivyo kuamini kwa ajili yetu wenyewe, na kila siku kutwaa kutoka katika hazina tuliyo nayo mbinguni, ni uhuru na nguvu kama nini kuomba kwa ajili ya kumiminwa kwa Roho juu ya Kanisa la Mungu, juu ya wote wenye mwili, juu ya watu binafsi, au juu ya juhudi za pekee! Yeye aliyekwisha kujifunza kumjua Baba katika maombi kwa ajili yake mwenyewe, hujifunza kuomba kwa ujasiri mkubwa kwa ajili ya wengine pia. Baba huwapa Roho Mtakatifu wale wamwombao, si kwa kiasi kidogo, bali kwa wingi zaidi, waombapo kwa ajili ya wengine.

“BWANA, UTUFUNDISHE KUOMBA.”

Baba uliye mbinguni! Ulimtuma Mwanao ili ujidhihirishe kwetu, upendo wako wa kibaba, na yote ambayo upendo huo unayo kwa ajili yetu. Naye ametufundisha kwamba kipawa kilicho juu ya vipawa vyote ambacho ungependa kutoa kwa kujibu maombi ni, Roho Mtakatifu.

Ee Baba yangu! Naja kwako na ombi hili; hakuna kitu ambacho ningependa—naam, niseme, ninatamani—kama kujazwa Roho, Roho Mtakatifu. Baraka azichukuazo ni za ajabu mno, na ndizo hasa nizihitajizo. Yeye humwaga upendo wako moyoni, na kuujaza kwa nafsi yako mwenyewe. Naitamani hii. Yeye hupuliza nia na uzima wa Kristo ndani yangu, ili niishi kama yeye alivyoishi, ndani ya na kwa ajili ya upendo wa Baba. Naitamani hii. Yeye hunivika nguvu kutoka juu kwa ajili ya mwenendo wangu wote na kazi yangu. Naitamani hii. Ee Baba! Nakusihi, unipe leo utimilifu wa Roho wako.

Baba! Naomba hili, nikiegemea juu ya maneno ya Bwana wangu: “SI ZAIDI SANA ROHO MTAKATIFU.” Naamini kwamba wasikia ombi langu; napokea sasa kile niombacho; Baba! Nakidai na nakitwaa: utimilifu wa Roho wako ni wangu. Napokea kipawa hiki tena siku hii kama kipawa cha imani; kwa imani nahesabu ya kuwa Baba yangu hutenda kwa njia ya Roho yote aliyoyaahidi. Baba hufurahia kumpuliza Roho wake mtoto wake angojaye anapokaa katika ushirika naye mwenyewe. Amina.