Ujasiri wa Rafiki za Mungu

“Akawaambia, Ni nani kwenu aliye na rafiki, akamwendea usiku wa manane na kumwambia, Rafiki, nikopeshe mikate mitatu; kwa kuwa rafiki yangu amefika kwangu, atoka safarini, nami sina kitu cha kuweka mbele yake; naye yule wa ndani ajibu na kusema, Usinitaabishe; mlango umekwisha fungwa, na watoto wangu wako pamoja nami kitandani; siwezi kuondoka nikupe. Nawaambia, Ijapokuwa haondoki ampe kwa kuwa ni rafiki yake, lakini kwa sababu ya udumifu wake ataondoka na kumpa kadiri ya haja yake.”—Luka 11:5-8.

Fundisho la kwanza kwa wanafunzi wake alilitoa Bwana wetu katika lile Hubiri la Mlimani. Ilikuwa karibu mwaka mmoja baadaye ambapo wanafunzi walimwomba Yesu awafundishe kuomba. Katika kuwajibu, aliwapa mara ya pili ile Sala ya Bwana, akiwafundisha hivyo nini cha kuomba. Kisha anena juu ya jinsi wanavyopaswa kuomba, na kuyarudia yale aliyoyasema hapo awali kuhusu Ubaba wa Mungu na hakika ya kupata jibu. Lakini katikati anaongeza ule mfano mzuri wa rafiki wa usiku wa manane, ili kuwafundisha somo lenye pande mbili: kwamba Mungu hataki tuombe kwa ajili yetu wenyewe tu, bali pia kwa ajili ya wanaopotea wanaotuzunguka, na kwamba katika maombezi ya namna hiyo ujasiri mkuu wa kusihi mara nyingi ni wa lazima, na daima ni halali, naam, wenye kumpendeza Mungu.

Mfano huu ni ghala kamili la mafundisho kuhusu maombezi ya kweli. Kwanza, kuna upendo unaotafuta kumsaidia mhitaji aliye karibu nasi: “rafiki yangu amefika kwangu.” Kisha haja inayosukuma hata kilio: “sina kitu cha kuweka mbele yake.” Kisha unafuata uhakika ya kwamba msaada unaweza kupatikana: “ni nani kwenu aliye na rafiki, aseme, Rafiki, nikopeshe mikate mitatu.” Kisha yaja yale kukataliwa kusikotarajiwa: “siwezi kuondoka nikupe.” Kisha tena ule uvumilivu usiokubali kukataliwa: “kwa sababu ya udumifu wake.” Na mwishowe, thawabu ya maombi ya namna hii: “atampa kadiri ya haja yake.” Ni ufunuo wa ajabu wa njia ya maombi na imani ambayo kwayo baraka ya Mungu imetafutwa na kupatikana mara nyingi sana.

Na tujifunge katika wazo kuu: maombi kama rufaa kwa urafiki wa Mungu; nasi tutaona kwamba mafundisho mawili yanapendekezwa hasa. La kwanza, kwamba tukiwa rafiki za Mungu, na kumjia hivyo, ni lazima tujithibitishe kuwa rafiki za wahitaji; urafiki wa Mungu kwetu na wetu kwa wengine huenda pamoja mkono kwa mkono. La pili, kwamba tunapomjia hivyo twaweza kutumia uhuru mkuu kabisa katika kudai jibu.

Kuna matumizi ya maombi ya namna mbili: moja, ni kupata nguvu na baraka kwa ajili ya maisha yetu wenyewe; jingine, lililo la juu zaidi, utukufu wa kweli wa maombi, ambao kwa ajili yake Kristo ametuingiza katika ushirika na fundisho lake, ni maombezi, ambapo maombi ni ile nguvu ya kifalme ambayo mwana wa Mungu huitumia mbinguni kwa ajili ya wengine na hata kwa ajili ya ufalme. Twayaona katika Maandiko, jinsi ilivyokuwa katika maombezi kwa ajili ya wengine ambapo Ibrahimu na Musa, Samweli na Eliya, pamoja na watu watakatifu wote wa zamani, walithibitisha kwamba walikuwa na uwezo kwa Mungu nao wakashinda. Ni tunapojitoa kuwa baraka ndipo twaweza hasa kuitegemea baraka ya Mungu. Ni tunapomkaribia Mungu kama rafiki wa maskini na wanaopotea ndipo twaweza kuutegemea urafiki wake; mtu mwenye haki aliye rafiki wa maskini ni rafiki wa Mungu kwa namna ya pekee kabisa. Jambo hili hutoa uhuru wa ajabu katika maombi. Bwana! Nina rafiki mhitaji ambaye ni lazima nimsaidie. Kama rafiki, nimejitwika kumsaidia. Kwako wewe nina Rafiki, ambaye wema wake na utajiri wake najua kuwa hauna mwisho: nina hakika utanipa niombalo. Ikiwa mimi, niliye mwovu, niko tayari kumtendea rafiki yangu niwezalo, si zaidi sana wewe, Ee Rafiki yangu wa mbinguni, utamtendea sasa rafiki yako yale ayaombayo?

Laweza kujitokeza swali, kwamba je, Ubaba wa Mungu hautoi uhakika wa kutosha katika maombi hata wazo la Urafiki wake laweza kutufundisha jambo lolote zaidi: baba ni zaidi ya rafiki. Lakini, tukilitafakari, kusihi huku kwa urafiki wa Mungu hutufunulia maajabu mapya. Kwamba mtoto apate akiombalo kwa babaye laonekana ni jambo la kawaida kabisa, karibu twahesabu kuwa ni wajibu wa baba kutoa. Bali kwa rafiki ni kana kwamba wema huo u huru zaidi, hautegemei asili, bali huruma na tabia. Tena uhusiano wa mtoto ni zaidi ule wa kutegemea kamili; rafiki wawili wako karibu sawa. Na hivyo Bwana wetu, katika kutaka kutufunulia siri ya kiroho ya maombi, angependa sana tumkaribie Mungu katika uhusiano huu pia, kama wale ambao amewakubali kuwa rafiki zake, ambao nia zao na maisha yao yana huruma pamoja naye.

Lakini basi ni lazima tuishi kama rafiki zake. Bado mimi ni mtoto hata niwapo mtangatanga; bali urafiki hutegemea mwenendo. “Ninyi mmekuwa rafiki zangu, mkitenda yote niwaamuruyo.” “Waona ya kuwa imani ilitenda kazi pamoja na matendo yake, na kwa matendo hiyo imani ikakamilishwa; ukatimia ule andiko unenao, Ibrahimu alimwamini Mungu, naye akaitwa rafiki wa Mungu.” Ni Roho, “yule yule Roho,” atuongozaye ndiye pia ashuhudiaye kukubaliwa kwetu kwa Mungu; “kadhalika, naye,” huyo Roho hutusaidia katika maombi. Ni maisha kama rafiki wa Mungu ndiyo yatoayo uhuru wa ajabu wa kusema: nina rafiki ambaye naweza kumwendea hata usiku wa manane. Na si zaidi sana ninapokwenda katika roho ile ile ya urafiki, nikijidhihirisha mwenyewe kwa ule wema nautafutao kwa Mungu, nikitaka kumsaidia rafiki yangu kama nitakavyo Mungu anisaidie. Ninapomjia Mungu katika maombi, daima huangalia lengo la ombi langu ni nini. Kama ni kwa ajili ya faraja au furaha yangu mwenyewe tu ninaitafuta neema yake, sipokei. Bali kama naweza kusema kwamba ni ili atukuzwe kwa kuzigawa kwangu baraka zake kwa wengine, sitaomba bure. Au kama naomba kwa ajili ya wengine, lakini nataka kungoja hata Mungu anitajirishe kiasi kwamba kuwasaidia hakuwi dhabihu wala tendo la imani, sitapata. Bali kama naweza kusema kwamba tayari nimejitwika kwa ajili ya rafiki yangu mhitaji, kwamba katika umaskini wangu tayari nimeanza kazi ya upendo, kwa sababu najua nalikuwa na rafiki ambaye angenisaidia, ombi langu litasikiwa. Ee, hatujui ni kwa kadiri gani kusihi huku kwafaa: urafiki wa duniani ukitazama katika haja yake urafiki wa mbinguni: “atampa kadiri ya haja yake.”

Lakini si mara moja sikuzote. Kitu pekee ambacho kwacho mwanadamu aweza kumheshimu na kumfurahia Mungu wake ni imani. Maombezi ni sehemu ya shule ya mazoezi ya imani. Hapo urafiki wetu na watu na Mungu hujaribiwa. Hapo huonekana kama urafiki wangu na wahitaji ni wa kweli kiasi kwamba nitatumia muda na kuidhabihu pumziko langu, nitakwenda hata usiku wa manane wala sitaacha hata nimepata kwa ajili yao kile nihitajicho. Hapo huonekana kama urafiki wangu na Mungu u dhahiri kiasi kwamba naweza kumtegemea kuwa hatanigeuza mkono, na kwa hiyo naendelea kuomba hata atoe.

Ee, ni siri gani ya mbinguni yenye kina ilivyo hii ya maombi ya kudumu. Mungu aliyeahidi, mwenye shauku, ambaye kusudi lake lililowekwa ni kutoa baraka, huizuia. Kwake ni jambo lenye maana kubwa hivyo kwamba rafiki zake walioko duniani wamjue na kumtumaini kikamilifu Rafiki yao tajiri aliye mbinguni, hata yeye huwazoeza, katika shule ya jibu lililoahirishwa, wagundue jinsi uvumilivu wao kwa kweli ushindavyo, na ni nguvu gani kuu waiwezayo mbinguni, wakijitia tu katika hilo. Kuna imani ionayo ahadi, na kuikumbatia, na bado haiipokei (Waebrania 11:13, 39). Ni pale jibu la maombi lisipokuja, na ahadi tuitumainiyo kwa uthabiti kabisa ionekanapo kuwa haifai kitu, ndipo jaribu la imani, lililo la thamani kuliko dhahabu, litendekapo. Ni katika jaribu hili ambapo ile imani iliyoikumbatia ahadi husafishwa na kutiwa nguvu na kutayarishwa katika ushirika binafsi, mtakatifu na Mungu aliye hai, ili kuuona utukufu wa Mungu. Huichukua na kuishika ahadi hata imepokea utimilifu wa kile ilichokidai katika kweli iliyo hai ndani ya Mungu asiyeonekana lakini aliye hai.

Kila mwana wa Mungu anayetafuta kuitenda kazi ya upendo katika utumishi wa Baba yake na apate moyo. Mzazi na mwanawe, mwalimu na darasa lake, mtembeleaji na eneo lake, msomaji wa Biblia na kundi lake, mhubiri na wasikilizaji wake, kila mmoja ambaye, katika mzunguko wake mdogo, amekubali na anachukua mzigo wa roho zenye njaa, zinazopotea,—wote na wapate moyo. Hakuna kitu chenye kutushangaza mwanzoni kama vile kwamba Mungu kweli anataka maombi ya kudumu, kwamba kuwe na lazima ya kweli ya kiroho ya udumifu. Ili kutufundisha jambo hili, Bwana anatumia mfano huu ulio karibu wa ajabu. Ikiwa kutokuwa na urafiki kwa rafiki wa kidunia mwenye ubinafsi kwaweza kushindwa kwa udumifu, si zaidi sana kutafaa kwa Rafiki wa mbinguni, apendaye sana kutoa, lakini anazuiliwa na kutostahili kwetu kwa kiroho, kutoweza kwetu kumiliki kile alicho nacho cha kutoa. Ee, na tumshukuru kwamba katika kuahirisha jibu lake anatuelimisha hata tufike katika hali yetu ya kweli na katika kutumia nguvu zetu zote pamoja naye, akituzoeza kuishi pamoja naye katika ushirika wa imani na tumaini lisilo na shaka, ili tuwe kweli rafiki za Mungu. Nasi na tuushike sana ule ugwe wenye nyuzi tatu usioweza kukatika: rafiki mwenye njaa ahitajiye msaada, na rafiki aombaye atafutaye msaada, na Rafiki Mwenye Nguvu, apendaye kutoa kadiri ya haja yake.

“BWANA, UTUFUNDISHE KUOMBA.”

Ee Bwana wangu uliyebarikiwa na Mwalimu wangu! Ni lazima nije kwako katika maombi. Fundisho lako ni tukufu sana, na bado ni la juu mno nisiweze kulishika. Ni lazima niungame kwamba moyo wangu ni mdogo mno kuyapokea mawazo haya ya ule ujasiri wa ajabu niwezao kuutumia kwa Baba yako aliye Rafiki yangu. Bwana Yesu! Nakutumaini unipe Roho wako pamoja na Neno lako, na kulifanya Neno kuwa hai na lenye nguvu moyoni mwangu. Natamani kulishika Neno lako la siku hii ya leo: “Kwa sababu ya udumifu wake atampa kadiri ya haja yake.”

Bwana! Nifundishe zaidi kuijua nguvu ya maombi ya kudumu. Najua kwamba katika hayo Baba hujilinganisha na haja yetu ya wakati ili maisha ya ndani yafikie kukua na kukomaa kwake, ili neema yake kweli ipokewe na kufanywa mali yetu wenyewe kabisa. Najua kwamba angependa sana kutuzoeza hivyo katika kutumia ile imani thabiti isiyomwacha aende hata mbele ya kile kionekanacho kuwa kukata tamaa. Najua kwamba anataka kutuinua hata kufikia ule uhuru wa ajabu ambao katika huo twafahamu jinsi kwa kweli alivyoifanya kutolewa kwa kipawa chake kutegemee maombi yetu. Bwana! Najua hili: Ee nifundishe kuliona katika roho na kweli.

Na sasa iwe furaha ya maisha yangu kuwa mgawaji wa sadaka za Rafiki yangu Tajiri aliye mbinguni, kuwatunza wote wenye njaa na wanaopotea, hata usiku wa manane, kwa sababu namjua RAFIKI YANGU, ambaye sikuzote humpa yeye adumuye, kwa sababu ya udumifu wake, kadiri ya haja yake. Amina.