Huduma ya Maombezi

“Ukuhani mtakatifu, mtoe dhabihu za roho, zinazokubaliwa na Mungu, kwa njia ya Yesu Kristo.”—1 Petro 2:5.

“Nanyi mtaitwa Makuhani wa Bwana.”—Isaya 61:6.

“Roho ya Bwana MUNGU i juu yangu; kwa sababu Bwana amenitia mafuta.” Haya ni maneno ya Yesu katika Isaya. Kama tunda la kazi yake, wote waliokombolewa ni makuhani, washiriki pamoja naye katika kutiwa kwake mafuta ya Roho akiwa Kuhani Mkuu. “Ni kama mafuta mazuri yashukayo ndevuni, ndevu za Haruni, yashukayo mpaka pindo za mavazi yake.” Kama vile kila mwana wa Haruni, ndivyo kila kiungo cha mwili wa Yesu kina haki ya ukuhani. Lakini si kila mmoja auutumiaye: wengi bado hawaujui kabisa. Na hata hivyo ni pendeleo lililo juu kuliko yote la mtoto wa Mungu, alama ya ukaribu na ufanano mkubwa zaidi naye, “aishiye siku zote ili kuwaombea.” Je, wewe waona shaka kama kweli ni hivyo? Fikiri ni nini kiundacho ukuhani. Kwanza, kuna kazi ya ukuhani. Hii ina pande mbili, moja upande wa Mungu, nyingine upande wa wanadamu. “Kila kuhani amewekwa kwa ajili ya wanadamu katika mambo yamhusuyo Mungu” (Ebr. 5:1); au, kama asemavyo Musa (Kumb. 10:8, ona pia 21:5, 33:10; Mal. 2:6): “Bwana aliitenga kabila ya Lawi, ili wasimame mbele za Bwana wamtumikie, na kubariki kwa jina lake.” Kwa upande mmoja, kuhani alikuwa na uwezo wa kumkaribia Mungu, kukaa naye nyumbani mwake, na kuleta mbele zake damu ya dhabihu au uvumba uliokuwa ukifuka. Lakini kazi hii hakuifanya kwa ajili yake mwenyewe, bali kwa ajili ya watu ambao alikuwa mwakilishi wao. Hii ndiyo upande ule mwingine wa kazi yake. Alipokea kutoka kwa watu dhabihu zao, akaziweka mbele za Mungu, kisha akatoka nje kubariki kwa jina lake, kutoa hakikisho la upendeleo wake na kuwafundisha sheria yake.

Kwa hiyo kuhani ni mtu ambaye hajaishi kwa ajili yake mwenyewe hata kidogo. Anaishi pamoja na Mungu na kwa ajili ya Mungu. Kazi yake ni, akiwa mtumishi wa Mungu, kuitunza nyumba yake, heshima yake, na ibada yake, kuwajulisha wanadamu upendo wake na mapenzi yake. Anaishi pamoja na wanadamu na kwa ajili ya wanadamu (Ebr. 5:2). Kazi yake ni kuvumbua dhambi na uhitaji wao, na kuyaleta mbele za Mungu, kutoa dhabihu na uvumba kwa jina lao, kupata msamaha na baraka kwa ajili yao, kisha kutoka nje na kuwabariki kwa jina lake. Huu ndio wito ulio juu wa kila mwamini. “Heshima hii wanayo watauwa wake wote.” Wamekombolewa kwa kusudi moja: kuwa katikati ya mamilioni ya wanaopotea walio kandokando yao, makuhani wa Mungu, ambao kwa kufanana na Yesu, Kuhani Mkuu, wanapaswa kuwa wahudumu na mawakili wa neema ya Mungu kwa wote walio karibu nao.

Kisha kuna mwenendo wa ukuhani, kwa kupatana na kazi yake. Kama Mungu alivyo mtakatifu, ndivyo kuhani alivyopaswa kuwa mtakatifu hasa. Hii ina maana si kutengwa tu na kila kitu kilicho najisi, bali kuwa mtakatifu kwa Mungu, akitengwa na kutolewa kwa Mungu kwa matumizi yake. Kutengwa na ulimwengu na kuwekwa wakfu kwa Mungu kulionyeshwa kwa njia nyingi.

Kulionekana katika mavazi: mavazi matakatifu, yaliyofanywa kwa mpango wa Mungu mwenyewe, yaliwatia alama kuwa ni wake (Kut. 28). Kulionekana katika amri kuhusu usafi wao wa pekee na kuepukana na maiti na uchafu wote (Law. 11:22). Mengi yaliyoruhusiwa kwa Mwisraeli wa kawaida yalikatazwa kwao. Kulionekana katika agizo kwamba kuhani asiwe na dosari wala waa la mwilini; ukamilifu wa mwili ulikuwa mfano wa utimilifu na utakatifu katika utumishi wa Mungu. Na kulionekana katika mpango ambao kwao kabila za kikuhani zisingekuwa na urithi pamoja na kabila zile nyingine; Mungu ndiye aliyekuwa urithi wao. Maisha yao yalipaswa kuwa ya imani: wakiwa wamewekwa wakfu kwa Mungu, walipaswa kuishi kwake kama vile pia kwa ajili yake.

Haya yote ni ishara ya jinsi tabia ya kuhani wa Agano Jipya inavyopaswa kuwa. Nguvu yetu ya kikuhani mbele za Mungu inategemea maisha yetu binafsi na mwenendo wetu. Ni lazima tuwe miongoni mwa wale ambao juu ya mwenendo wao duniani Yesu asema, “Hawakuyatia mavazi yao uchafu.”

Katika kuacha kile ambacho huenda kikaonekana halali kwa wengine, katika kujitenga kwetu na ulimwengu, ni lazima tuthibitishe kwamba kuwekwa kwetu wakfu ili tuwe watakatifu kwa Bwana ni kwa moyo mzima na kamili. Ukamilifu wa mwili wa kuhani ni lazima uwe na mfano wake katika sisi pia kuwa “bila doa wala waa;” “mtu wa Mungu awe kamili, amekamilishwa apate kutenda kila tendo jema,” “wakamilifu na watimilifu, msiopungukiwa na neno lo lote” (Law. 21:17-21; Efe. 5:27; 2 Tim. 2:7; Yak. 1:4). Na zaidi ya yote, twakubali kuuacha urithi wote duniani; kuacha vyote, na kama Kristo kuwa na Mungu peke yake kama fungu letu: kumiliki kama tusiomiliki, na kushika vyote kwa ajili ya Mungu peke yake: hili ndilo limtiaye alama kuhani wa kweli, mtu ambaye anaishi kwa ajili ya Mungu na jirani zake tu.

Na sasa njia ya kuingia ukuhani. Katika Haruni Mungu alikuwa amewachagua wanawe wote wawe makuhani: kila mmoja wao alikuwa kuhani kwa kuzaliwa. Na hata hivyo hakuweza kuianza kazi yake pasipo tendo maalum la kuwekwa—kuwekwa kwake wakfu. Kila mtoto wa Mungu ni kuhani kwa kuzingatia kuzaliwa kwake, uhusiano wake wa damu na Kuhani Mkuu; lakini hii haitoshi: atautumia uwezo wake tu pale ayakubalipo na kuyatambua kuwekwa kwake wakfu.

Kwa Haruni na wanawe ilitendeka hivi (Kut. 29): Baada ya kuoshwa na kuvikwa, walitiwa mafuta matakatifu. Kisha dhabihu zilitolewa, na kwa ile damu sikio la kuume, mkono wa kuume, na mguu wa kuume viliguswa. Kisha wao na mavazi yao walinyunyiziwa tena damu pamoja na mafuta. Na ndivyo ilivyo kwamba, kadiri mtoto wa Mungu aingiavyo kwa ukamilifu zaidi katika kile ambacho DAMU na ROHO ambaye tayari ni mshiriki wake vilivyo kwake, ndivyo nguvu ya Ukuhani Mtakatifu itakavyotenda kazi ndani yake. Damu itaondoa hisia yote ya kutostahili; Roho, hisia yote ya kutofaa.

Na tuangalie kile kilichokuwa kipya katika kuipaka damu kwa kuhani. Ikiwa wakati wowote, akiwa mwenye kutubu, alikuwa ameleta dhabihu kwa ajili ya dhambi yake, akitafuta msamaha, damu ilinyunyizwa juu ya madhabahu, lakini si juu ya nafsi yake. Lakini sasa, kwa ajili ya kuwekwa wakfu kwa kikuhani, palikuwa na kugusana kwa karibu zaidi na damu; sikio na mkono na mguu kwa tendo maalum vililetwa chini ya nguvu yake, na nafsi nzima ikatwaliwa na kutakaswa kwa ajili ya Mungu. Na ndivyo, mwamini aliyekuwa ameridhika kufikiri hasa juu ya damu iliyonyunyizwa juu ya kiti cha rehema kuwa ndicho ahitajicho kwa ajili ya msamaha, aletwapo kutafuta njia kamili ya kikuhani ya kumkaribia Mungu, huhisi uhitaji wa uzoefu ulio kamili na wa kudumu zaidi wa nguvu ya damu, kama kweli inyunyizavyo na kuitakasa mioyo kutoka dhamiri mbaya, hata asiwe “na dhamiri ya dhambi tena” (Ebr. 10:2) ikitakasa kutoka dhambi yote. Na ni pale aupatapo kuufurahia huu, ndipo hisia huamshwa ya haki yake ya ajabu ya kumkaribia Mungu kwa ukaribu ulio mkuu, na ya hakika kamili kwamba maombezi yake yanakubalika.

Na kama damu itoavyo haki, Roho hutoa nguvu, na kutufaa kwa maombezi ya kuamini. Yeye hutupulizia roho ya kikuhani—upendo uwakao kwa heshima ya Mungu na wokovu wa nafsi. Hutufanya kuwa kitu kimoja na Yesu hata maombi kwa jina lake yawe halisi. Hutuimarisha kwa maombi ya kuamini na ya kudumu. Kadiri Mkristo ajazwavyo kwa kweli Roho wa Kristo, ndivyo kujitoa kwake kwa maisha ya maombezi ya kikuhani kutakavyokuwa kwa hiari zaidi. Enyi ndugu Wakristo wapendwa! Mungu ahitaji, ahitaji sana, makuhani wawezao kumkaribia, waishio mbele zake, na kwa maombezi yao kuvuta chini baraka za neema yake juu ya wengine. Na ulimwengu unahitaji, unahitaji sana, makuhani watakaochukua mzigo wa wanaopotea, na kuwaombea.

Je, uko tayari kujitoa kwa ajili ya kazi hii takatifu? Wajua kujitoa inakotaka—si kitu kidogo kuliko kile kujitoa kwa mfano wa Kristo cha kuacha vyote, ili makusudi ya wokovu ya upendo wa Mungu yatimizwe miongoni mwa wanadamu. Ee, usiwe tena miongoni mwa wale wanaoridhika ikiwa wana wokovu, na kufanya kazi ya kutosha tu kujiweka wenye moto na uzima. Ee, kisiwe na kitu kikuzuiacho usijitoe kuwa makuhani kabisa na tu—si kitu kingine, si kitu kilicho pungufu ya makuhani wa Mungu Aliye Juu. Wazo la kutostahili, la kutofaa, halina haja ya kukuzuia. Katika Damu, nguvu ya nje ya ukombozi ulio kamili hutenda kazi ndani yako: katika Roho uzoefu wake kamili wa ndani na wa binafsi kama uhai wa kimungu unahakikishwa. Damu hutoa ustahili usio na kikomo ili kufanya maombi yako yakubalike sana: Roho hutoa ufaao wa kimungu, akikufundisha kuomba sawasawa na mapenzi ya Mungu. Kila kuhani alijua kwamba alipotoa dhabihu kwa mujibu wa sheria ya patakatifu, ilikubaliwa: chini ya kifuniko cha Damu na Roho una hakika kwamba ahadi zote za ajabu za maombi katika jina la Yesu zitatimizwa ndani yako. Ukikaa katika muungano na Kuhani Mkuu, “ombeni mtakalo lote, nanyi mtatendewa.” Utakuwa na nguvu ya kuomba maombi yenye matokeo ya mwenye haki, yafaayo sana. Hutashiriki tu katika maombi ya jumla ya Kanisa kwa ajili ya ulimwengu, bali utaweza katika eneo lako mwenyewe kutwaa kazi yako ya pekee katika maombi—kama makuhani, kuishughulikia na Mungu, kupokea na kujua jibu, na hivyo kubariki kwa jina lake. Njoo, ndugu, njoo, uwe kuhani, kuhani tu, kuhani kabisa. Tafuta sasa kuenenda mbele za Bwana kwa ufahamu kamili kwamba umetengwa kwa ajili ya Huduma takatifu ya Maombezi. Hii ndiyo heri ya kweli ya kufanana na sura ya Mwana wa Mungu.

“BWANA, UTUFUNDISHE KUOMBA.”

Ee Wewe Kuhani wangu Mkuu uliyebarikiwa, ukubali kuwekwa wakfu ambako kwako nafsi yangu sasa yataka kuitikia ujumbe wako.

Naamini katika UKUHANI MTAKATIFU WA WATAKATIFU WAKO, na kwamba mimi pia ni kuhani, mwenye uwezo wa kufika mbele za Baba, na katika maombi yafaayo sana kuleta chini baraka juu ya wanaopotea walio karibu nami.

Naamini katika NGUVU YA DAMU YAKO ILIYO NA THAMANI ya kutakasa kutoka dhambi yote, kunipa uthabiti kamili mbele za Mungu, na kunileta karibu katika hakika kamili ya imani kwamba maombezi yangu yatasikiwa.

Naamini katika KUTIWA MAFUTA KWA ROHO, kunakoshuka kila siku kutoka kwako, Kuhani wangu Mkuu, kunitakasa, kunijaza ufahamu wa wito wangu wa kikuhani, na upendo kwa nafsi, kunifundisha kilicho sawasawa na mapenzi ya Mungu, na jinsi ya kuomba maombi ya imani.

Naamini kwamba, kama vile Wewe Bwana wangu Yesu ulivyo mwenyewe katika mambo yote uhai wangu, ndivyo Wewe, pia, ulivyo MDHAMINI WA MAISHA YANGU YA MAOMBI, nawe mwenyewe utanivuta juu katika ushirika wa kazi yako ya ajabu ya maombezi.

Katika imani hii najitoa siku hii ya leo kwa Mungu wangu, kama mmoja wa makuhani wake waliotiwa mafuta, ili nisimame mbele za uso wake kuwaombea wenye dhambi, na kutoka nje na kubariki kwa jina lake.

Bwana Yesu Mtakatifu! ukubali na kuutia muhuri kuwekwa kwangu wakfu. Naam, Bwana, uweke mikono yako juu yangu, na Wewe mwenyewe unifanye wakfu kwa ajili ya kazi hii yako takatifu. Na uniache nienende miongoni mwa wanadamu nikiwa na ufahamu na tabia ya kuhani wa Mungu Aliye Juu.

Yeye atupendaye, na kutuosha dhambi zetu KATIKA DAMU YAKE MWENYEWE, NAYE AMETUFANYA kuwa wafalme na makuhani kwa Mungu, naye ni Baba yake; KWAKE uwe utukufu na ukuu hata milele na milele. Amina