Ujasiri Wetu Katika Maombi

“Na huu ndio ujasiri tulio nao kwake, ya kwamba, tukiomba kitu cho chote sawasawa na mapenzi yake, atusikia. Na kama tukijua kwamba atusikia, lo lote tuombalo, twajua kwamba tunazo zile haja tulizomwomba.”—1 Yohana 5:14-15.

MOJA ya vizuizi vikubwa vya maombi ya imani, bila shaka, kwa wengi ni hiki: hawajui kama wanachokiomba ni sawasawa na mapenzi ya Mungu. Maadamu wana shaka juu ya jambo hili, hawawezi kuwa na ujasiri wa kuomba wakiwa na uhakika ya kwamba hakika watapokea. Nao mara huanza kufikiri kwamba, wakiisha kudhihirisha maombi yao na wasipopata jibu, ni afadhali kumwachia Mungu afanye sawasawa na mapenzi yake mema. Maneno ya Yohana, “Tukiomba kitu sawasawa na mapenzi yake, atusikia,” kama wanavyoyaelewa, huufanya uhakika juu ya kujibiwa kwa maombi kuwa jambo lisilowezekana, kwa sababu hawawezi kuwa na hakika ni nini hasa yaweza kuwa mapenzi ya Mungu. Huyafikiria mapenzi ya Mungu kuwa shauri lake la siri—awezaje mwanadamu kuvumbua ni nini hasa yaweza kuwa kusudi la Mungu mwenye hekima yote.

Hii ni kinyume kabisa cha kile Yohana alichokusudia alipoandika hivi. Alitaka kutuamsha tuwe na ujasiri, tuwe na tumaini, tuwe na uhakika kamili wa imani katika maombi. Asema, “Huu ndio ujasiri tulio nao kwake,” hata tuweze kusema: Baba! Wewe wajua nami najua kwamba naomba sawasawa na mapenzi yako: najua wanisikia. “Huu ndio ujasiri, ya kwamba tukiomba kitu sawasawa na mapenzi yake, atusikia.” Kwa ajili hiyo aongeza mara moja: “Kama tukijua kwamba atusikia lo lote tuombalo, twajua,” kwa njia ya imani hii, kwamba tunazo,” ya kwamba sasa hivi tuombapo twapokea “zile haja,” yale mambo ya pekee, “tulizomwomba.” Yohana adhania ya kwamba tuombapo, kwanza twavumbua kama maombi yetu ni sawasawa na mapenzi ya Mungu. Yaweza kuwa sawasawa na mapenzi ya Mungu, na bado yasije mara moja, wala pasipo maombi ya imani ya kudumu. Ni kwa kusudi la kutupa ujasiri hivyo tudumu na tuwe hodari katika imani, ndipo atwambia: Hili latupa ujasiri au tumaini katika maombi, tukiomba kitu sawasawa na mapenzi yake, atusikia. Ni dhahiri kwamba kama likiwa jambo la kutokuwa na hakika kwetu kama haja zetu ni sawasawa na mapenzi yake, hatuwezi kuwa na faraja ya kile asemacho, “Twajua kwamba tunazo zile haja tulizomwomba.”

Lakini hili ndilo shida hasa. Zaidi ya mwamini mmoja husema: “Sijui kama nikitamanicho ni sawasawa na mapenzi ya Mungu. Mapenzi ya Mungu ni kusudi la hekima yake isiyo na mwisho: haiwezekani kwangu kujua kama huenda asihesabu jambo jingine kuwa bora zaidi kwangu kuliko nikitamanicho, au kama huenda asiwe na sababu za kunizuilia nikiombacho.” Kila mtu ahisi jinsi mawazo kama hayo yanavyofanya maombi ya imani, ambayo juu yake Yesu alisema, “Ye yote atakayeamini ya kwamba hayo asemayo yatatukia, atapewa lo lote asemalo,” kuwa jambo lisilowezekana. Yaweza kuwapo maombi ya kunyenyekea, na ya kutumaini hekima ya Mungu; lakini hayawezi kuwapo maombi ya imani. Kosa kubwa hapa ni kwamba watoto wa Mungu hawaamini kweli kwamba yawezekana kuyajua mapenzi ya Mungu. Au kama wakiamini hili, hawatumii muda wala juhudi kuyavumbua. Tunachokihitaji ni kuona waziwazi ni kwa njia gani Baba amwongozaye mtoto wake anayengoja na anayefundishika ajue kwamba haja yake ni sawasawa na mapenzi yake. Ni kwa njia ya neno takatifu la Mungu, likipokewa na kuwekwa moyoni, maishani, na katika mapenzi; na kwa njia ya Roho Mtakatifu wa Mungu, akikubaliwa katika kukaa kwake ndani yetu na kuongoza kwake, ndipo tutakapojifunza kujua kwamba haja zetu ni sawasawa na mapenzi yake.

Kwa njia ya neno. Yako mapenzi ya siri ya Mungu, ambayo mara nyingi twaogopa maombi yetu yasije yakawa kinyume nayo. Si kwa mapenzi haya ya Mungu, bali kwa mapenzi yake kama yalivyofunuliwa katika neno lake, ndiko tuhusikako katika maombi. Fikira zetu juu ya kile ambacho mapenzi ya siri huenda yameamuru, na juu ya jinsi yawezavyo kufanya majibu ya maombi yetu yasiwezekane, kwa sehemu kubwa zina makosa mengi. Imani kama ya mtoto juu ya kile ambacho yu tayari kuwatendea watoto wake, hushikamana tu na uhakika wa Baba, ya kwamba ni mapenzi yake kusikia maombi na kufanya kile ambacho imani katika neno lake huitamani na kukikubali. Katika neno Baba amefunua kwa njia ya ahadi za jumla kanuni kuu za mapenzi yake kwa watu wake. Mtoto yampasa kuichukua ile ahadi na kuitumia katika hali za pekee za maisha yake ambazo ahadi hiyo yazihusu. Cho chote akiombacho ndani ya mipaka ya mapenzi hayo yaliyofunuliwa, aweza kujua kuwa ni sawasawa na mapenzi ya Mungu, naye aweza kutarajia kwa ujasiri. Katika neno lake, Mungu ametupa ufunuo wa mapenzi yake na mipango yake pamoja nasi, pamoja na watu wake, na pamoja na ulimwengu, pamoja na ahadi za thamani kuu za neema na nguvu ambazo kwa njia ya watu wake atatimiza mipango yake na kufanya kazi yake. Imani ipatapo nguvu na ujasiri wa kutosha kudai utimizo wa ile ahadi ya jumla katika hali ya pekee, twaweza kuwa na uhakika kwamba maombi yetu yamesikiwa: ni sawasawa na mapenzi ya Mungu. Chukua maneno ya Yohana katika mstari unaofuata maandiko yetu kama mfano: “Mtu akimwona ndugu yake anatenda dhambi isiyo ya mauti, ataomba, na Mungu atampa uzima.” Hiyo ndiyo ahadi ya jumla; na mwamini asihiye kwa msingi wa ahadi hii, aomba sawasawa na mapenzi ya Mungu, na Yohana angempa ujasiri wa kujua kwamba anayo haja aiombayo.

Lakini kufahamu huku kwa mapenzi ya Mungu ni jambo la kiroho, na lazima litambulikane kiroho. Si kama jambo la mantiki ambalo twaweza kulibishania: Mungu amesema; sharti nipate. Wala si kila Mkristo aliye na kipawa au wito ule ule. Ingawa mapenzi ya jumla yaliyofunuliwa katika ahadi ni yale yale kwa wote, kwa kila mmoja yako mapenzi ya pekee yaliyo tofauti sawasawa na kusudi la Mungu. Na humu ndimo ilimo hekima ya watakatifu, kuyajua mapenzi haya ya pekee ya Mungu kwa kila mmoja wetu, sawasawa na kipimo cha neema tuliyopewa, na hivyo kuomba katika sala kile hasa Mungu alichokitengeneza na kukifanya kuwezekana kwa kila mmoja. Ni kwa kusudi la kutupatia hekima hii ndipo Roho Mtakatifu akaaye ndani yetu. Kutumia ahadi za jumla za neno kibinafsi kwa mahitaji yetu ya pekee ya binafsi—ni kwa ajili ya hili ndipo uongozi wa Roho Mtakatifu umepewa kwetu.

Ni muungano huu wa mafundisho ya neno na Roho ambao wengi hawauelewi, na hivyo kuna shida ya namna mbili katika kujua ni nini yaweza kuwa mapenzi ya Mungu. Wengine huyatafuta mapenzi ya Mungu katika hisia au sadikisho la ndani, nao wangetaka Roho awaongoze pasipo neno. Wengine huyatafuta katika neno, pasipo uongozi ulio hai wa Roho Mtakatifu. Hivyo viwili sharti viungane: katika neno tu, katika Roho tu, lakini ndani ya hivi kwa hakika zaidi, ndipo twaweza kuyajua mapenzi ya Mungu, na kujifunza kuomba sawasawa nayo. Moyoni ndipo neno na Roho sharti vikutane: ni kwa kukaa ndani tu ndipo twaweza kupata uzoefu wa mafundisho yao. Neno sharti likae, sharti likae ndani yetu: moyo na maisha sharti kila siku viwe chini ya uvutano wake. Si kutoka nje, bali kutoka ndani, ndiko kutokako uhuisho wa neno kwa Roho. Ni yeye tu ajitoaye mwenyewe kabisa katika maisha yake yote kwa ukuu wa neno na mapenzi ya Mungu, ndiye awezaye katika hali za pekee kutarajia kutambua ni nini neno hilo na mapenzi hayo yamruhusuyo aombe kwa ujasiri. Na kama ilivyo kwa neno, ndivyo ilivyo kwa Roho: kama ningetaka uongozi wa Roho katika maombi unihakikishie ni nini mapenzi ya Mungu, maisha yangu yote sharti yajitoe kwa uongozi huo; ni hivyo tu ndipo akili na moyo vyaweza kuwa vya kiroho na vyenye uwezo wa kujua mapenzi matakatifu ya Mungu. Ni yeye ambaye, kwa njia ya neno na Roho, huishi katika mapenzi ya Mungu kwa kuyatenda, ndiye atakayejua kuomba sawasawa na mapenzi hayo katika uhakika ya kwamba atusikia.

Laiti Wakristo wangaliona madhara yasiyo na kipimo wanayojitendea wenyewe kwa wazo la kwamba kwa vile huenda maombi yao si sawasawa na mapenzi ya Mungu, ni lazima waridhike bila jibu. Neno la Mungu latwambia kwamba sababu kuu ya maombi yasiyojibiwa ni kwamba hatuombi sawasawa: “Mwaomba wala hampati kwa sababu mwaomba vibaya.” Kwa kutokuipa jibu, Baba atwambia kwamba kuna kitu kilicho kibaya katika maombi yetu. Ataka kutufundisha tukivumbue na tukiungame, na hivyo kutulea tufikie maombi ya kweli ya imani na ya kushinda. Aweza kufikia kusudi lake tu atuletapo kuona kwamba sisi ndio wa kulaumiwa kwa jibu kuzuiliwa; nia yetu, au imani yetu, au maisha yetu si kama yapasavyo kuwa. Lakini kusudi hili la Mungu huzuiliwa maadamu twaridhika kusema: Labda ni kwa sababu maombi yangu si sawasawa na mapenzi yake ndipo hanisikii. Ee, tusiendelee tena kutupa lawama ya maombi yetu yasiyojibiwa juu ya mapenzi ya siri ya Mungu, bali juu ya kuomba kwetu vibaya. Neno hilo, “Hampati kwa sababu mwaomba vibaya,” na liwe kama taa ya Bwana, ikipekua moyo na maisha ili kuthibitisha kwamba kweli sisi ni miongoni mwa wale ambao Kristo aliwapa ahadi zake za majibu ya hakika. Na tuamini kwamba twaweza kujua kama maombi yetu ni sawasawa na mapenzi ya Mungu. Na tuutoe moyo wetu ili neno la Baba likae humo kwa wingi, ili neno la Kristo likae ndani yetu. Na tuishi siku kwa siku kwa yale mafuta yatufundishayo mambo yote. Na tujitoe pasipo kujizuia kwa Roho Mtakatifu atufundishapo kukaa ndani ya Kristo, kukaa katika uwepo wa Baba, nasi mara tutaelewa jinsi upendo wa Baba unavyotamani kwamba mtoto ajue mapenzi yake, na kwamba, katika uhakika ya kwamba mapenzi hayo yajumuisha yote ambayo nguvu na upendo wake vimeahidi kutenda, ajue pia kwamba asikia zile haja tuzimwombazo. “Huu ndio ujasiri tulio nao, ya kwamba tukiomba kitu sawasawa na mapenzi yake, atusikia.”

“BWANA, UTUFUNDISHE KUOMBA.”

Ee Bwana mwenye baraka! Kwa moyo wangu wote nakushukuru kwa somo hili lenye baraka, ya kwamba njia ya kuelekea maisha yaliyojaa majibu ya maombi ni kupitia mapenzi ya Mungu. Bwana! Nifundishe kuyajua mapenzi haya yenye baraka kwa kuyaishi, kuyapenda, na kuyatenda sikuzote. Ndivyo nitakavyojifunza kutoa maombi sawasawa na mapenzi hayo, na kupata katika upatano wao na mapenzi ya Mungu yenye baraka, ujasiri wangu katika maombi na uhakika wangu wa kukubali jibu.

Baba! ni mapenzi yako kwamba mtoto wako afurahie uwepo wako na baraka yako. Ni mapenzi yako kwamba kila kitu katika maisha ya mtoto wako kiwe sawasawa na mapenzi yako, na kwamba Roho Mtakatifu atende hili ndani yake. Ni mapenzi yako kwamba mtoto wako aishi katika uzoefu wa kila siku wa majibu ya wazi ya maombi, ili afurahie ushirika ulio hai na wa moja kwa moja pamoja nawe. Ni mapenzi yako kwamba Jina lako litukuzwe ndani ya na kwa njia ya watoto wako, na kwamba itakuwa hivyo kwa wale wanaokutumaini. Ee Baba yangu! mapenzi haya yako na yawe uhakika wangu katika yote niyaombayo.

Ee Mwokozi mwenye baraka! Nifundishe kuamini utukufu wa mapenzi haya. Mapenzi hayo ni upendo wa milele, ambao kwa nguvu ya Uungu hutimiza kusudi lake katika kila mapenzi ya mwanadamu yajitoayo kwake. Bwana! Nifundishe hili. Waweza kunifanya nione jinsi kila ahadi na kila amri ya neno ilivyo kweli mapenzi ya Mungu, na kwamba utimizo wake wahakikishwa kwangu na Mungu mwenyewe. Basi mapenzi ya Mungu na yawe kwangu mwamba ulio imara ambao juu yake maombi yangu na uhakika wangu wa jibu hukaa daima. Amina.

MAELEZO.

Mara nyingi kuna machafuko makubwa kuhusu mapenzi ya Mungu. Watu hudhani kwamba kile Mungu akitakacho ni sharti kitukie bila kuepukika. Sivyo hata kidogo. Mungu hutaka baraka nyingi sana kwa watu wake, ambazo kamwe haziwafikii. Huyataka kwa bidii kubwa, lakini wao hawayataki, nazo haziwezi kuwafikia. Hii ndiyo siri kuu ya kuumbwa kwa mwanadamu akiwa na hiari, na pia ya kufanywa upya kwa mapenzi yake katika ukombozi, kwamba Mungu ameutegemeza utekelezaji wa mapenzi yake, katika mambo mengi, juu ya mapenzi ya mwanadamu. Katika mapenzi ya Mungu yaliyofunuliwa katika ahadi zake, kiasi kitakachotimizwa ni kadiri imani yetu iyakubalivyo. Maombi ndiyo nguvu ambayo kwayo hutukia kile ambacho vinginevyo kisingalitukia. Nayo imani, ndiyo nguvu ambayo kwayo huamuliwa ni kiasi gani cha mapenzi ya Mungu kitatendeka ndani yetu. Mungu amfunuliapo nafsi mara moja kile alicho tayari kuitendea, jukumu la utekelezaji wa mapenzi hayo lakaa juu yetu.

Wengine huogopa kwamba hili ni kuweka nguvu nyingi mno mikononi mwa mwanadamu. Lakini nguvu yote imewekwa mikononi mwa mwanadamu ndani ya Kristo Yesu. Ufunguo wa maombi yote na nguvu yote ni wake, nasi tujifunzapo kuelewa kwamba yeye yu pamoja nasi kama vile alivyo pamoja na Baba, na kwamba sisi pia tu kitu kimoja naye kama vile yeye alivyo kitu kimoja na Baba, tutaona jinsi ilivyo kwa asili na kwa haki na kwa usalama kwamba kwa wale wakaao ndani yake kama yeye akaavyo ndani ya Baba, nguvu kama hiyo iwapewe. Ni Kristo Mwana aliye na haki ya kuomba akitakacho: ni kwa njia ya kukaa ndani yake na yeye kukaa ndani yetu (katika uhalisia wa Kiungu ambao tunao ufahamu mdogo mno juu yake) ndipo Roho wake apumuapo ndani yetu kile atakacho kuomba na kupata kwa njia yetu. Twaomba kwa Jina lake: maombi kwa kweli ni yetu na kwa kweli ni yake.

Tena wengine huogopa kwamba kuamini kuwa maombi yana nguvu kama hiyo ni kupunguza uhuru na upendo wa Mungu. Ee laiti tungalijua tu jinsi tunavyopunguza uhuru wake na upendo wake kwa kutomruhusu atende kwa njia ile pekee ambayo achagua kutenda kwayo, sasa kwa kuwa ametutwaa katika ushirika pamoja naye—kwa njia ya maombi yetu na imani yetu. Ndugu mmoja katika huduma aliuliza wakati mmoja, tulipokuwa tukisema juu ya jambo hili, kama hakukuwa na hatari ya sisi kudhani kwamba upendo wetu kwa nafsi za watu na utayari wetu wa kuwaona wakibarikiwa ndivyo vya kuusukuma upendo wa Mungu na utayari wa Mungu wa kuwabariki. Tulikuwa tukipita tu karibu na mabomba makubwa ya maji, ambayo kwayo maji yalikuwa yakichukuliwa juu ya vilima na mabonde kutoka kijito kikubwa cha mlimani hadi mji ulio umbali kidogo. Tazama tu mabomba haya, lilikuwa ndilo jibu; hayakuyafanya maji yawe tayari kutiririka chini kutoka vilimani, wala hayakuyapa nguvu yake ya kubariki na kuburudisha: hii ndiyo asili yake hasa. Yote wayawezayo kufanya ni kuamua mwelekeo wake: kwa njia yake wenyeji wa mji walisema wanaitaka baraka hapo. Na vivyo hivyo, ni asili ya Mungu hasa kupenda na kubariki. Chini na daima chini upendo wake watamani kuja pamoja na vijito vyake vihuishavyo na viburudishavyo. Lakini ameyaachia maombi kusema mahali baraka itakapokuja. Amewakabidhi watu wake waaminio kuyaleta maji yaliyo hai mahali pa jangwa: mapenzi ya Mungu ya kubariki hutegemea mapenzi ya mwanadamu ya kusema mahali baraka inapopaswa kushuka. “Heshima hiyo wanayo watakatifu wake.” “Na huu ndio ujasiri tulio nao kwake, ya kwamba tukiomba kitu sawasawa na mapenzi yake, atusikia. Na kama tukijua kwamba atusikia, lo lote tuombalo, twajua kwamba tunazo zile haja tulizomwomba.”

1Ona jambo hili likionyeshwa katika dondoo za George Müller mwishoni mwa kitabu hiki.