Kristo Dhabihu

“Akasema, Aba, Baba, yote yawezekana kwako; uniondolee kikombe hiki; walakini, si kama nitakavyo mimi, bali utakavyo wewe.”—Marko 14:36.

NI tofauti kubwa iliyoje ndani ya saa chache! Ni mabadiliko makubwa yaliyoje kutoka ile hali ya utulivu wa hali ya juu, alipoinua macho yake kuelekea mbinguni, akasema, “BABA, NATAKA,” hadi kwa ile hali ya kuanguka chini na kulia kwa uchungu, “Baba yangu! Si kama nitakavyo mimi.” Katika ile ya kwanza tunamwona Kuhani Mkuu ndani ya pazia katika maombezi yake yashindayo yote; katika ile ya pili, dhabihu juu ya madhabahu ikifungua njia kupitia pazia lililopasuka. Lile ombi la kikuhani, “Baba! Nataka,” katika mpangilio wa wakati latangulia lile ombi la kidhabihu, “Baba! Si kama nitakavyo mimi;” lakini hili lilikuwa kwa kutazamia tu, kuonyesha jinsi maombezi yatakavyokuwa mara dhabihu itakapoletwa. Kwa hakika lilikuwa ni lile ombi la madhabahuni, “Baba! Si kama nitakavyo mimi,” ambamo lile ombi mbele ya kiti cha enzi, “Baba! Nataka,” lilipata chanzo chake na nguvu zake. Ni kutokana na kujisalimisha kwake kabisa kwa mapenzi yake mwenyewe huko Gethsemane ndipo Kuhani Mkuu aliye juu ya kiti cha enzi ana nguvu ya kuomba atakalo, ana haki ya kuwafanya watu wake washiriki katika nguvu hiyo pia, na kuomba watakalo.

Kwa wote watakao kujifunza kuomba katika shule ya Yesu, somo hili la Gethsemane ni miongoni mwa yaliyo matakatifu na ya thamani zaidi. Kwa mwanafunzi wa juujuu laweza kuonekana kama laondoa ujasiri wa kuomba kwa imani. Ikiwa hata dua ya bidii ya Mwana haikusikiwa, ikiwa hata Mpendwa ilimbidi kusema, “SI KAMA NITAKAVYO MIMI!” si zaidi sisi tunapaswa kunena hivyo. Na hivyo laonekana haiwezekani kwamba zile ahadi ambazo Bwana alikuwa amezitoa saa chache tu zilizotangulia, “LO LOTE MTAKALOOMBA,” “LO LOTE MTAKALO,” zingekuwa zimekusudiwa kihalisi. Ufahamu wa ndani zaidi wa maana ya Gethsemane ungetufundisha kwamba hapa hasa ndipo tulipo na msingi imara na njia iliyo wazi ya uhakika wa kupata jibu la maombi yetu. Na tukaribie kwa mshangao wa heshima na ibada, ili tuutazame mtazamo huu mkuu—Mwana wa Mungu hivyo akitoa maombi na dua kwa kilio kikuu na machozi, naye asipate anachoomba. Yeye mwenyewe ndiye Mwalimu wetu, naye atatufunulia siri ya dhabihu yake takatifu, kama ilivyofunuliwa katika ombi hili la ajabu.

Ili kulielewa ombi hili, na tuzingatie tofauti isiyo na kikomo kati ya yale Bwana wetu aliyoyaomba muda mfupi uliopita akiwa Kuhani Mkuu wa Kifalme, na yale anayoyadua hapa katika udhaifu wake. Pale aliomba kwa ajili ya kutukuzwa kwa Baba, na kutukuzwa kwake mwenyewe na watu wake kama utimizo wa ahadi dhahiri alizokuwa amepewa. Aliomba kile alichojua kuwa ni sawasawa na neno na mapenzi ya Baba; angeweza kusema kwa ujasiri, “BABA! NATAKA.” Hapa anaomba kwa ajili ya jambo ambalo kwalo mapenzi ya Baba bado hayajawa dhahiri kwake. Kadiri ajuavyo, ni mapenzi ya Baba kwamba anywe kikombe. Alikuwa amewaambia wanafunzi wake habari za kikombe atakachonywa: baadaye kidogo angesema tena, “Kikombe alichonipa Baba, je! Mimi nisikinywe?” Ni kwa ajili ya hili alikuja duniani humu. Lakini alipofikwa, katika uchungu wa nafsi usioelezeka uliomjaa kadiri nguvu za giza zilipomjia, akaanza kuonja matone ya kwanza ya mauti kama ghadhabu ya Mungu dhidi ya dhambi, hali yake ya kibinadamu, ilipotetemeka mbele ya uhalisia wa kutisha wa kufanywa laana, ilitoa katika kilio hiki cha maumivu, shauku yake kwamba, ikiwa kusudi la Mungu lingeweza kutimizwa pasipo hicho, angeweza kuepushwa kikombe hicho cha kutisha: “Kiniondokee kikombe hiki.” Shauku hiyo ilikuwa ushahidi wa uhalisia mkubwa wa ubinadamu wake. Lile “Si kama nitakavyo mimi” lilizuia shauku hiyo isiwe ya dhambi: anaposihi akilia, “Yote yawezekana kwako,” na kurudia tena kwa ombi la bidii zaidi kwamba kikombe kiondolewe, ni lile “SI KAMA NITAKAVYO MIMI” alilolirudia mara tatu ndilo linalounda kiini hasa na thamani ya dhabihu yake. Alikuwa ameomba kwa ajili ya jambo ambalo hakuweza kusema: Najua ni mapenzi yako. Alikuwa amesihi nguvu na upendo wa Mungu, kisha akayaondoa katika lile la mwisho, “MAPENZI YAKO NA YATIMIZWE.” Ombi kwamba kikombe kipite halikuweza kujibiwa; ombi la kunyenyekea kwamba mapenzi ya Mungu yatendeke lilisikiwa, na kujibiwa kwa utukufu katika ushindi wake kwanza juu ya hofu, na kisha juu ya nguvu za mauti.

Ni katika kukataa huku kwa mapenzi yake, kujisalimisha huku kabisa kwa mapenzi yake kwa mapenzi ya Baba, ndipo utii wa Kristo ulipofikia ukamilifu wake wa juu kabisa. Ni kutokana na dhabihu ya mapenzi huko Gethsemane ndipo dhabihu ya uhai juu ya Kalvari inapopata thamani yake. Ni hapa, kama Maandiko yasemavyo, alipojifunza kutii, akawa chanzo cha wokovu wa milele kwa wote wanaomtii. Ni kwa sababu pale, katika ombi lile, alikuwa mtii hata mauti, naam, mauti ya msalaba, ndipo Mungu alimwadhimisha mno, na kumpa nguvu ya kuomba atakalo. Ni katika lile “Baba! Si kama nitakavyo mimi,” ndipo alipopata nguvu kwa ajili ya lile lingine “BABA! Nataka.” Ni kwa kujisalimisha kwa Kristo huko Gethsemane kwamba mapenzi yake yasitendeke, ndipo alipowapatia watu wake haki ya kuambiwa, “Ombeni lo lote mtakalo.”

Na niziangalie tena, siri hizo za ndani ambazo Gethsemane huziweka mbele ya macho yangu. Kuna ya kwanza: Baba anampa Mpendwa wake kikombe, kikombe cha ghadhabu. Ya pili: Mwana, aliye mtii sikuzote, anarudi nyuma, na kusihi kwamba asilazimike kukinywa. Ya tatu: Baba hakumjalia Mwana ombi lake, bali bado anampa kikombe. Kisha ya mwisho: Mwana anaacha mapenzi yake, anaridhika kwamba mapenzi yake yasitendeke, naye anatoka kwenda Kalvari akinywe kikombe. Ee Gethsemane! ndani yako naona jinsi Bwana wangu alivyoweza kunipa uhakika usio na kikomo wa jibu la maombi yangu. Kama mdhamini wangu aliushinda kwa ajili yangu, kwa kukubali kwake kwamba dua yake isijibiwe.

Hili linapatana na mpango wote wa ukombozi. Bwana wetu sikuzote hutushindia kinyume cha kile alichoteseka. Alifungwa ili sisi tuwe huru. Alifanywa dhambi ili sisi tupate kuwa haki ya Mungu. Alikufa ili sisi tuishi. Aliichukua laana ya Mungu ili baraka ya Mungu iwe yetu. Alivumilia kutojibiwa kwa ombi lake, ili maombi yetu yapate jibu. Naam, alinena, “Si kama nitakavyo mimi,” ili apate kutuambia, “Ninyi mkikaa ndani yangu, ombeni mtakalo lo lote; nanyi mtatendewa.”

Naam, “Ninyi mkikaa ndani yangu;” hapa Gethsemane neno hili linapata nguvu na kina kipya. Kristo ni Kichwa chetu, ambaye kama mdhamini anasimama mahali petu, na kubeba yale ambayo sisi ingetupasa kuyabeba milele. Tulistahili kwamba Mungu atugeuzie sikio la kiziwi, wala asisikilize kamwe kilio chetu. Kristo anakuja, na kuteseka hili pia kwa ajili yetu: anateseka yale tuliyostahili; kwa ajili ya dhambi zetu anateseka chini ya mzigo wa ombi hilo lisilojibiwa. Lakini sasa kuteseka kwake hili kwanifaa mimi: yale aliyoyabeba yameondolewa kwa ajili yangu; ustahili wake umenishindia jibu la kila ombi, ikiwa nakaa ndani yake.

Naam, ndani yake, ainamavyo pale Gethsemane, ndipo nipaswapo kukaa. Kama Kichwa changu, hakuteseka kwa ajili yangu mara moja tu, bali anaishi ndani yangu daima, akipuliza na kutenda tabia yake mwenyewe ndani yangu pia. Roho wa milele, ambaye kwa yeye alijitoa mwenyewe kwa Mungu, ndiye Roho anayekaa ndani yangu pia, na kunifanya mshiriki wa utii ule ule, na dhabihu ya mapenzi kwa Mungu. Roho huyo hunifundisha kuyatoa mapenzi yangu kabisa kwa mapenzi ya Baba, kuyaacha hata mauti, katika Kristo niwe nimekufa kwayo. Lo lote lililo akili yangu mwenyewe na wazo na mapenzi, ijapokuwa siyo la dhambi moja kwa moja, hunifundisha kuliogopa na kulikimbia. Hunifungua sikio langu ili ningoje kwa upole mwingi na unyofu wa nafsi wa kufundishika kwa yale ambayo Baba anayo ya kuyanena na kuyafundisha siku kwa siku. Hunifunulia jinsi kuunganika na mapenzi ya Mungu katika kuyapenda kulivyo kuunganika na Mungu mwenyewe; jinsi kujisalimisha kabisa kwa mapenzi ya Mungu kulivyo dai la Baba, kielelezo cha Mwana, na heri ya kweli ya nafsi. Huyaongoza mapenzi yangu katika ushirika wa mauti na ufufuo wa Kristo, mapenzi yangu yanakufa ndani yake, ili ndani yake yahuishwe tena. Huyapulizia, kama mapenzi yaliyofanywa upya na kuhuishwa, ufahamu mtakatifu wa mapenzi makamilifu ya Mungu, furaha takatifu ya kujitoa yenyewe kuwa chombo cha mapenzi hayo, uhuru mtakatifu na nguvu ya kuyashika mapenzi ya Mungu ili kujibu maombi. Kwa mapenzi yangu yote najifunza kuishi kwa ajili ya mambo ya Mungu na ufalme wake, kutumia nguvu ya mapenzi hayo—yaliyosulubiwa lakini yamefufuka tena—katika asili na katika maombi, duniani na mbinguni, kwa wanadamu na kwa Mungu. Kadiri niingiavyo kwa ndani zaidi katika lile “BABA! SI KAMA NITAKAVYO MIMI” la Gethsemane, na ndani yake aliyelinena, ili nikae ndani yake, ndivyo unavyozidi kuwa mkamilifu mwingilio wangu wa kiroho katika nguvu ya lile lake “BABA! NATAKA.” Nayo nafsi hupata kuona kwamba ni mapenzi hayo, yaliyokuwa si kitu ili mapenzi ya Mungu yawe yote, ndiyo sasa yanayovuviwa nguvu ya Kimungu ili yatake kweli kweli yale ayatakayo Mungu, na kudai kile kilichoyaahidiwa katika jina la Kristo.

Ee na tumsikilize Kristo huko Gethsemane, aitavyo, “Ninyi mkikaa ndani yangu, ombeni lo lote mtakalo, nanyi mtatendewa.” Kuwa na nia na roho moja pamoja naye katika kutoa kwake kila kitu kwa mapenzi ya Mungu, kuishi kama yeye katika utii na kujisalimisha kwa Baba; huku ndiko kukaa ndani yake; hii ndiyo siri ya nguvu katika maombi.

“BWANA, UTUFUNDISHE KUOMBA.”

Ee Bwana Yesu Mbarikiwa! Gethsemane ilikuwa shule yako, ambapo ulijifunza kuomba na kutii. Bado ni shule yako, ambapo unawaongoza wanafunzi wako wote wapendao kujifunza kutii na kuomba kama wewe. Bwana! Nifundishe pale kuomba, katika imani kwamba umeyafanyia upatanisho na umeyashinda mapenzi yetu ya nafsi, nawe waweza kweli kutupa neema ya kuomba kama wewe.

Ee Mwanakondoo wa Mungu! Ningekufuata hadi Gethsemane, huko niwe mmoja nawe, na kukaa ndani yako kama vile wewe hadi mauti hasa uyatoavyo mapenzi yako kwa Baba. Pamoja nawe, kwa njia yako, ndani yako, nayatoa mapenzi yangu kwa kujisalimisha kabisa na kikamilifu kwa mapenzi ya Baba. Nikijua udhaifu wangu mwenyewe, na nguvu ya siri ambayo kwayo mapenzi ya nafsi yangejitokeza na kurudia tena kuchukua nafasi yake juu ya kiti cha enzi, nadai kwa imani nguvu ya ushindi wako. Wewe uliushinda na kuniokoa nao. Katika mauti yako ningeishi kila siku; katika uhai wako ningekufa kila siku. Nikikaa ndani yako, mapenzi yangu, kwa nguvu ya Roho wako wa milele, na yawe tu chombo kilichoratibiwa kinachoitika kila mguso wa mapenzi ya Mungu wangu. Kwa nafsi yangu yote nasema pamoja nawe na ndani yako, “Baba! Si kama nitakavyo mimi, bali utakavyo wewe.”

Kisha, Ee Bwana Mbarikiwa! Ufungue moyo wangu na wa watu wako wote, ili tuupokee kwa ukamilifu utukufu wa kweli hii, kwamba mapenzi yaliyotolewa kwa Mungu ni mapenzi yaliyokubaliwa na Mungu ili yatumike katika utumishi wake, kutamani, na kukusudia, na kuazimu, na kutaka kile kilicho sawasawa na mapenzi ya Mungu. Mapenzi ambayo, kwa nguvu ya Roho Mtakatifu, Mungu akaaye ndani, yatatumia haki yake ya kifalme katika maombi, kufungua na kufunga mbinguni na duniani, kuomba lo lote yatakalo, na kusema litatendeka.

Ee Bwana Yesu! Nifundishe kuomba. Amina.