Kristo Kuhani Mkuu

“Baba, hao ulionipa nataka wawe pamoja nami po pote nilipo.”—Yohana 17:24.

KATIKA hotuba yake ya kuaga, Yesu awapa wanafunzi wake ufunuo kamili wa jinsi Uzima Mpya ungekuwa, mara ufalme wa Mungu utakapokuja kwa nguvu. Katika kukaa kwa Roho Mtakatifu ndani yao, katika kuungana naye yeye aliye Mzabibu wa mbinguni, katika kwenda kwao kushuhudia na kuteseka kwa ajili yake, ndipo wangepata wito wao na baraka yao. Kati ya kufafanua kwake uzima wao mpya ujao, Bwana alikuwa amewapa tena na tena ahadi zisizo na kikomo kuhusu nguvu ambayo maombi yao yangeweza kuwa nayo. Na sasa katika kuhitimisha, yeye mwenyewe aendelea kuomba. Ili kuwapa wanafunzi wake furaha ya kujua maombezi yake kwa ajili yao mbinguni kama Kuhani wao Mkuu yatakavyokuwa, awapa urithi huu wa thamani wa maombi yake kwa Baba. Afanya hivyo wakati huo huo kwa sababu wao kama makuhani watashiriki katika kazi yake ya maombezi, ili wao na sisi tupate kujua jinsi ya kutimiza kazi hii takatifu. Katika mafundisho ya Bwana wetu usiku huu wa mwisho, tumejifunza kufahamu kwamba ahadi hizi za kushangaza za maombi hazikutolewa kwa faida yetu wenyewe, bali kwa manufaa ya Bwana na ufalme wake: ni kutoka kwa Bwana mwenyewe peke yake ndipo tuwezapo kujifunza maombi katika Jina lake yanavyopaswa kuwa na kupata. Tumefahamu kwamba kuomba katika Jina lake ni kuomba katika umoja mkamilifu naye mwenyewe: maombi hayo ya kikuhani mkuu yatafundisha yote ambayo maombi katika Jina la Yesu yaweza kuomba na kutazamia.

Maombi haya kwa kawaida hugawanywa katika sehemu tatu. Bwana wetu kwanza aomba kwa ajili yake mwenyewe (mst. 1-5), kisha kwa ajili ya wanafunzi wake (6-19), na mwisho kwa ajili ya watu wote waaminio katika vizazi vyote (20-26). Mfuasi wa Yesu, ajitoaye kwa kazi ya maombezi, na apendaye kujaribu ni baraka kiasi gani awezayo kuiombea kwa ajili ya kundi lake katika Jina la Yesu, kwa unyenyekevu wote atajiruhusu aongozwe na Roho ili ayachunguze maombi haya ya ajabu kama mojawapo ya masomo muhimu zaidi ya shule ya maombi.

Kwanza kabisa, Yesu aomba kwa ajili yake mwenyewe, ili atukuzwe, apate hivyo kumtukuza Baba. “Baba! Mtukuze Mwanao. Na sasa, Baba, unitukuze.” Naye aleta mbele misingi ambayo juu yake aomba hivyo. Agano takatifu lilikuwa limefanywa kati ya Baba na Mwana huko mbinguni. Baba alikuwa amemwahidi mamlaka juu ya wote wenye mwili kuwa thawabu ya kazi yake: alikuwa ameimaliza kazi, alikuwa amemtukuza Baba, na kusudi lake moja sasa ni kumtukuza yeye zaidi bado. Kwa ujasiri mkuu kupita yote aomba kwamba Baba amtukuze, ili sasa awe na kufanya kwa ajili ya watu wake yote aliyoyachukua.

Ee mwanafunzi wa Yesu! hapa unalo somo la kwanza katika kazi yako ya maombezi ya kikuhani, la kujifunza kutokana na mfano wa Kuhani wako Mkuu. Kuomba katika Jina la Yesu ni kuomba katika umoja, katika kushirikiana naye. Kama vile Mwana alivyoanza maombi yake kwa kudhihirisha uhusiano wake na Baba, akitoa hoja ya kazi yake na utii wake na shauku yake ya kuona Baba akitukuzwa, wewe nawe fanya vivyo hivyo. Sogea karibu na uje mbele za Baba ukiwa katika Kristo. Toa hoja ya kazi yake iliyokamilika. Sema kwamba wewe u mmoja nayo, kwamba waitegemea, waishi ndani yake. Sema kwamba wewe nawe umejitoa kuimaliza kazi ambayo Baba amekupa uifanye, na kuishi kwa ajili ya utukufu wake peke yake. Kisha uombe kwa ujasiri kwamba Mwana atukuzwe ndani yako. Haya ndiyo kuomba katika Jina, katika maneno yale yale, katika Roho wa Yesu, katika umoja na Yesu mwenyewe. Maombi kama hayo yana nguvu. Ikiwa pamoja na Yesu wamtukuza Baba, Baba atamtukuza Yesu kwa kufanya lile uliombalo katika Jina lake. Ni pale tu uhusiano wako binafsi katika jambo hili, kama wa Kristo, unapokuwa wazi mbele za Mungu, unapomtukuza yeye, na kutafuta yote kwa ajili ya utukufu wake, ndipo, kama Kristo, utakuwa na nguvu ya kuwaombea walio kandokando yako.

Kisha Bwana wetu aomba kwa ajili ya kundi la wanafunzi wake. Anena juu yao kama wale ambao Baba amempa. Alama yao kuu ni kwamba wamelipokea neno la Kristo. Asema juu yao kwamba sasa awatuma waende ulimwenguni mahali pake, kama vile Baba alivyomtuma yeye. Naye awaombea mambo mawili: kwamba Baba awalinde na yule mwovu, na awatakase kwa Neno lake, kwa sababu yeye ajitakasa mwenyewe kwa ajili yao.

Kama vile Bwana, kila mwombezi aaminiye ana kundi lake mwenyewe la karibu ambalo huliombea kwanza. Wazazi wana watoto wao, walimu wanafunzi wao, wachungaji makundi yao, watenda kazi wote wana wajibu wao maalum, waaminio wote wana wale ambao utunzaji wao waelemea mioyoni mwao. Ni jambo la maana sana kwamba maombezi yawe ya binafsi, yaliyoelekezwa, na yaliyo dhahiri. Kisha ombi letu la kwanza sharti liwe daima kwamba wapate kulipokea neno. Lakini ombi hili halitafaa kitu isipokuwa pamoja na Bwana wetu tuseme, “Nimewapa neno lako:” ndilo hili litupalo uhuru na nguvu katika kuiombea roho. Usiwaombee tu, bali unene nao. Nao wakiisha kulipokea neno, na tuombe sana kwa ajili ya kulindwa kwao na yule mwovu, kwa ajili ya kutakaswa kwao kwa neno hilo. Badala ya kukata tamaa au kuhukumu au kuwaacha wale waangukao, na tuliombee kundi letu, “Baba! Uwalinde katika jina lako;” “Uwatakase kwa kweli yako.” Maombi katika Jina la Yesu yafaa sana: “Mtakalo lote nanyi mtatendewa.”

Kisha yafuata maombi ya Bwana wetu kwa ajili ya kundi pana zaidi bado. “Siwaombei hawa peke yao, bali na wale watakaoamini kwa neno lao.” Moyo wake wa kikuhani hujipanua uenee mahali pote na wakati wote, naye aomba kwamba wote walio wake wawe mmoja kila mahali, kuwa uthibitisho wa Mungu kwa ulimwengu wa uungu wa utume wake, na kisha kwamba wawe pamoja naye milele katika utukufu wake. Hata wakati huo “ili pendo lile ulilonipenda liwe ndani yao, nami niwe ndani yao.”

Mwanafunzi wa Yesu, ambaye kwanza katika kundi lake mwenyewe amethibitisha nguvu ya maombi, hawezi kujifungia ndani ya mipaka yake: aliombea Kanisa lote na matawi yake mbalimbali. Aomba hasa kwa ajili ya umoja wa Roho na wa upendo. Aomba lipate kuwa moja katika Kristo, kuwa ushahidi kwa ulimwengu kwamba Kristo, aliyefanya ajabu kubwa kiasi cha kuufanya upendo uushinde ubinafsi na utengano, ni kweli Mwana wa Mungu aliyetumwa kutoka mbinguni. Kila mwaminio yapasa aombe sana ili umoja wa Kanisa, si katika mashirika ya nje, bali katika roho na katika kweli, upate kudhihirishwa.

Hayo yatosha kuhusu jambo la maombi. Sasa kuhusu namna yake. Yesu asema, “BABA! NATAKA.” Kwa msingi wa haki yake kama Mwana, na ahadi ya Baba kwake, na kazi yake iliyokamilika, aweza kufanya hivyo. Baba alikuwa amemwambia, “Uniombe, nami nitakupa.” Yeye alikubali tu kutumia ahadi ya Baba. Yesu ametupa ahadi kama hiyo: “Lo lote mtakalo mtatendewa.” Aniomba mimi katika Jina lake niseme nitakalo. Nikikaa ndani yake, katika umoja hai naye ambamo mwanadamu si kitu na Kristo ni yote, mwaminio ana uhuru wa kulishika neno lile la Kuhani wake Mkuu na, kwa kuitikia swali “Unataka nini?” kusema, “BABA! NATAKA yote uliyoahidi.” Hii si kitu ila imani ya kweli; hii ni kumheshimu Mungu: kuwa na hakika kwamba ujasiri kama huo wa kusema nitakalo kwa kweli wakubalika kwake. Kwa mtazamo wa kwanza, moyo wetu hujikunja mbele ya maneno haya; hatuhisi uhuru wala nguvu ya kunena hivyo. Ni neno ambalo kwa ajili yake tu, katika kujikana kabisa kwa nia yetu, neema itatolewa, lakini ambalo neema kwa hakika kabisa itatolewa kwa kila mtu apotezaye nia yake ndani ya ile ya Bwana wake. Yeye apotezaye nia yake ataiona; yeye aitoaye nia yake kabisa ataiona tena imefanywa upya na kutiwa nguvu kwa Nguvu ya Kimungu. “BABA! NATAKA:” hii ndiyo dhamira kuu ya maombezi ya milele, yatendayo kazi daima, yashindayo yote, ya Bwana wetu mbinguni. Ni katika umoja naye tu ndipo maombi yetu yafaapo; katika umoja naye yafaa sana. Kama tukikaa tu ndani yake, tukiishi, na kutembea, na kufanya mambo yote katika Jina lake; kama tukija tu na kuleta kila ombi peke yake, likiwa limejaribiwa na kuguswa kwa Neno lake na Roho, na kulitupa katika ule mto mkuu wa maombezi upandao kutoka kwake, upate kuchukuliwa juu na kuwekwa mbele za Baba;—tutakuwa na hakika kamili kwamba twapokea maombi tuombayo: ile “Baba! Nataka” itapuliziwa ndani yetu na Roho mwenyewe. Tutajipoteza ndani yake, na kuwa si kitu, ili tuone kwamba katika udhaifu wetu tuna nguvu na twashinda.

Enyi wanafunzi wa Yesu! Mlioitwa kuwa kama Bwana wenu katika maombezi yake ya kikuhani, ni lini, ee ni lini! Tutakapoamka kuuona utukufu, upitao fikira zote, wa hatima yetu hii ya kumsihi na kushinda kwa Mungu kwa ajili ya wanadamu wanaopotea? Ee ni lini tutakapouvua ule ulegevu ujivikao kisingizio cha unyenyekevu, na kujitoa kabisa kwa Roho wa Mungu, ili apate kuzijaza nia zetu nuru na nguvu, tupate kujua, na kuchukua, na kumiliki yote ambayo Mungu wetu angojea kumpa yeye anayeishika nia yake kwake.

“BWANA, UTUFUNDISHE KUOMBA.”

Ee Kuhani wangu Mkuu Mbarikiwa! Mimi ni nani hata unikaribishe hivi kushiriki nawe katika nguvu yako ya maombezi yashindayo! Na kwa nini, ee Bwana wangu! mimi ni mzito wa moyo hivi kuelewa na kuamini na kutumia pendeleo hili la ajabu ambalo kwalo umewakomboa watu wako. Ee Bwana! nipe neema yako ili hili lizidi kuwa kazi ya maisha yangu isiyokoma—katika kuomba bila kukoma nizivute chini baraka za mbinguni juu ya vyote vinivyozunguka duniani.

Bwana Mbarikiwa! Naja sasa kuupokea wito wangu huu. Kwa ajili ya hili ningeacha yote na kukufuata wewe. Mikononi mwako ningejitoa kwa imani nafsi yangu yote: niumbe, nifundishe, niongoze niwe mmoja wa jeshi lako la maombi, wenye kushindana ambao huesha na kujitahidi katika maombi, Waisraeli, wakuu wa Mungu, walio na nguvu na kushinda. Uumiliki moyo wangu, na uujaze shauku ile moja ya utukufu wa Mungu katika kukusanywa, na kutakaswa, na kuunganishwa kwa wale ambao Baba amekupa. Uchukue akili yangu na hili liwe somo langu na hekima yangu, kujua ni lini maombi yaweza kuleta baraka. Unichukue mzima na unifae kama kuhani nisimame daima mbele za Mungu na kubariki katika Jina lake.

Bwana Mbarikiwa! Na iwe hapa, kama katika maisha yote ya kiroho: Wewe yote, mimi si kitu. Na iwe hapa uzoefu wangu pia kwamba yeye asiye na kitu wala asiyetafuta kitu kwa nafsi yake, hupokea yote, hata kufikia ile neema ya ajabu ya kushiriki nawe katika huduma yako ya milele ya maombezi. Amina.