Dua Ishindayo Yote

‘Lo lote mtakaloomba kwa jina langu, hilo nitalifanya. Mkiniomba neno lo lote kwa jina langu, hilo nitalifanya. Ili lo lote mtakalomwomba Baba kwa jina langu, awapeni. Amin, amin, nawaambia, Mkimwomba Baba neno lo lote, atawapa kwa jina langu. Hata sasa hamkuomba neno lo lote kwa jina langu: ombeni, nanyi mtapata. Siku ile mtaomba kwa jina langu.’—Yohana 14:13, 14; 15:16; 16:23, 24, 26.

HATA SASA wanafunzi walikuwa hawajaomba kwa jina la Kristo, wala Yeye mwenyewe hakuwa amewahi kutumia maneno hayo. Lililokaribia zaidi ni, ‘tumekutana kwa jina langu.’ Hapa katika maneno yake ya kuaga, anarudia neno hili bila kukoma pamoja na zile ahadi zenye maana isiyo na mipaka, ‘Lo lote,’ ‘Neno lo lote,’ ‘Mtakalo,’ ili kuwafundisha wao na sisi kwamba Jina lake ndilo dua yetu pekee, lakini pia dua yetu itoshayo kabisa. Nguvu ya maombi na jibu lake vinategemea matumizi sahihi ya Jina.

Jina la mtu ni nini? Ni lile neno au usemi ambao kwa huo mtu huletwa akilini au kuwakilishwa kwetu. Ninapotaja au kusikia jina, huniletea mbele yangu mtu mzima, yale niyajuayo juu yake, na pia hisia aliyoiacha ndani yangu. Jina la mfalme lajumuisha heshima yake, nguvu yake, ufalme wake. Jina lake ni ishara ya nguvu yake. Vivyo hivyo kila jina la Mungu lajumuisha na kuwakilisha sehemu fulani ya utukufu wa Yule Asiyeonekana. Na Jina la Kristo ni usemi wa yote aliyoyafanya na yote alivyo na anayoishi kuyafanya akiwa Mpatanishi wetu.

Na kufanya jambo kwa jina la mwingine ni nini? Ni kuja kwa nguvu na mamlaka ya huyo mwingine, ukiwa mwakilishi na badala yake. Twajua jinsi matumizi kama hayo ya jina la mwingine daima yanavyodhania kuwapo kwa masilahi ya pamoja. Hakuna mtu ambaye angempa mwingine uhuru wa kutumia jina lake bila kwanza kuhakikishiwa kwamba heshima yake na masilahi yake yapo salama mikononi mwa huyo mwingine kama vile yalivyo salama kwake mwenyewe.

Na ni nini basi Yesu anapotupa nguvu juu ya Jina lake, uhuru wa kulitumia, pamoja na uhakikisho kwamba lo lote tuombalo kwalo tutapewa? Ule ulinganisho wa kawaida wa mtu mmoja kumpa mwingine, katika tukio fulani maalum, uhuru wa kuomba kitu kwa jina lake, hautoshi hata kidogo hapa,—Yesu kwa dhati anawapa wote wanafunzi wake nguvu ya jumla isiyo na kikomo ya kulitumia Jina lake kwa uhuru nyakati zote kwa ajili ya yote wayatakayo. Asingeliweza kufanya hivi kama asingelijua kwamba angeweza kutukabidhi masilahi yake, kwamba heshima yake ingekuwa salama mikononi mwetu. Kutumia kwa uhuru jina la mwingine daima ni alama ya imani kubwa, ya muungano wa karibu. Yeye ampaye mwingine jina lake hujitenga kando, ili amwache huyo mwingine amtendee; naye alichukuaye jina la mwingine huacha jina lake mwenyewe kana kwamba halina thamani. Ninapokwenda kwa jina la mwingine, najikana mwenyewe, sichukui jina lake tu, bali yeye mwenyewe na yote alivyo, badala yangu mwenyewe na yote nilivyo.

Matumizi kama hayo ya jina la mtu yaweza kuwa kwa msingi wa muungano wa kisheria. Mfanyabiashara aondokaye nyumbani na kazini kwake, humpa karani wake mkuu mamlaka ya jumla, ambayo kwayo aweza kutoa maelfu ya pauni kwa jina la yule mfanyabiashara. Karani hufanya hivi, si kwa ajili yake mwenyewe, bali kwa ajili ya masilahi ya biashara tu. Ni kwa sababu mfanyabiashara amjua na kumtumaini kama aliyejitoa kabisa kwa masilahi na biashara yake, ndipo athubutu kuweka jina lake na mali yake chini ya uangalizi wake. Bwana Yesu alipokwenda mbinguni, aliiacha kazi yake, uendeshaji wa ufalme wake hapa duniani, mikononi mwa watumishi wake. Hakuweza kufanya vinginevyo ila pia kuwapa Jina lake ili watoe mahitaji yote waliyoyahitaji kwa uendeshaji ufaao wa biashara yake. Nao wana nguvu ya kiroho ya kujinufaisha na Jina la Yesu kwa kadiri tu wanavyojitoa kuishi kwa ajili ya masilahi na kazi ya Bwana peke yake. Kutumia Jina daima kwadhania kujitoa kwa masilahi yetu kwake yule tunayemwakilisha.

Au matumizi kama hayo ya jina yaweza kuwa kwa msingi wa muungano wa uzima. Katika habari ya mfanyabiashara na karani wake, muungano huo ni wa muda. Lakini twajua jinsi umoja wa uzima hapa duniani utoavyo umoja wa jina: mtoto ana jina la baba yake kwa sababu ana uzima wake. Na mara nyingi mtoto wa baba mwema ameheshimiwa au kusaidiwa na wengine kwa ajili ya jina alilolichukua. Lakini hili lisingedumu kwa muda mrefu kama ingalionekana kwamba lilikuwa jina tu, na kwamba tabia ya baba haikuwapo. Jina na tabia au roho lazima vipatane. Ikiwa ndivyo, mtoto atakuwa na haki maradufu juu ya rafiki za baba yake: tabia huthibitisha na kuongeza upendo na heshima iliyotolewa kwanza kwa ajili ya jina. Ndivyo ilivyo kwa Yesu na mwaminio: sisi ni kitu kimoja, tuna uzima mmoja, Roho mmoja pamoja naye; kwa sababu hii twaweza kuja kwa Jina lake. Nguvu yetu ya kulitumia Jina hilo, iwe mbele za Mungu, au watu, au mashetani, hutegemea kadiri ya muungano wetu wa kiroho wa uzima. Matumizi ya jina yategemea umoja wa uzima; Jina na Roho wa Yesu ni kitu kimoja.

Au muungano uwezeshao kutumia Jina waweza kuwa muungano wa upendo. Bibi-arusi ambaye maisha yake yamekuwa ya umaskini, aunganwapo na bwana-arusi, huacha jina lake mwenyewe, ili aitwe kwa jina lake bwana-arusi, na sasa ana haki kamili ya kulitumia. Hununua kwa jina lake, wala jina hilo halikataliwi. Na hili hufanyika kwa sababu bwana-arusi amemchagua awe wake, akimtegemea kutunza masilahi yake: sasa wamekuwa mmoja. Vivyo hivyo Bwana-arusi wa Mbinguni hakuweza kufanya pungufu ya hayo; kwa kuwa ametupenda na kutufanya kuwa kitu kimoja pamoja naye, angeweza kufanya nini ila kuwapa wale walichukuao Jina lake haki ya kulileta mbele za Baba, au kuja nalo kwake kwa ajili ya yote wayahitajiyo. Wala hakuna mtu ambaye hujitoa kweli kuishi katika Jina la Yesu, ambaye hapokei kwa kadiri iongezekayo daima uwezo wa kiroho wa kuomba na kupokea katika Jina hilo lo lote atakalo. Kulichukua jina la mwingine kwadhania kwamba nimeacha langu mwenyewe, na pamoja nalo maisha yangu mwenyewe ya kujitegemea; lakini basi, kwa hakika ile ile, kupata kwangu yote yaliyomo katika jina nililolichukua badala ya langu mwenyewe.

Mifano kama hii yatuonyesha jinsi maoni ya kawaida yalivyopungukiwa, ya mjumbe aliyetumwa kuomba kwa jina la mwingine, au mwenye hatia aombaye kwa jina la mdhamini. La, Yesu mwenyewe yuko pamoja na Baba; si mtu asiyekuwapo ambaye kwa jina lake twakuja. Hata tumwombapo Yesu mwenyewe, lazima iwe kwa Jina lake. Jina lamwakilisha mtu; kuomba kwa Jina ni kuomba katika muungano kamili wa masilahi na uzima na upendo pamoja naye mwenyewe, kama mtu aishiye ndani yake na kwa ajili yake. Jina la Yesu na liwe na ukuu usiogawanyika ndani ya moyo wangu na maisha yangu, imani yangu itakua hata kufikia uhakikisho kwamba nilombalo kwa Jina hilo haliwezi kukataliwa. Jina na nguvu ya kuomba huenda pamoja: Jina la Yesu litakapokuwa nguvu itawalayo maisha yangu, nguvu yake katika maombi mbele za Mungu itaonekana pia.

Basi twaona kwamba kila kitu chategemea uhusiano wetu wenyewe na Jina: nguvu ilionayo juu ya maisha yangu ndiyo nguvu itakayokuwa nayo katika maombi yangu. Kuna usemi zaidi ya mmoja katika Maandiko uwezao kutufafanulia hili. Usemapo, ‘Fanyeni yote kwa jina la Bwana Yesu,’ twaona jinsi huu ulivyo mwenzake wa ule mwingine, ‘Ombeni yote.’ Kufanya yote na kuomba yote kwa Jina lake, haya huenda pamoja. Tusomapo, ‘Tutakwenda kwa jina la Mungu wetu,’ twaona jinsi nguvu ya Jina ilivyopaswa kutawala katika maisha yote; ndipo tu itakapokuwa na nguvu katika maombi. Si midomoni bali kwenye maisha Mungu atazamapo aone Jina ni nini kwetu. Maandiko yanenapo juu ya ‘watu waliozitoa nafsi zao kwa ajili ya jina la Bwana Yesu,’ au juu ya mtu ‘aliye tayari kufa kwa ajili ya jina la Bwana Yesu,’ twaona uhusiano wetu na Jina unavyopaswa kuwa: litakapokuwa kila kitu kwangu, litanipatia kila kitu. Nikiliacha liwe na vyote nilivyo navyo, litaniacha niwe na vyote lilivyo navyo.

‘LO LOTE mtakaloomba kwa jina langu, hilo nitalifanya.’ Yesu amaanisha ahadi hii kihalisi. Wakristo wamejaribu kuiwekea mipaka: ilionekana kuwa huru mno; haikuwa salama sana kumwamini mwanadamu bila masharti hivyo. Hatukufahamu kwamba neno lile ‘kwa jina langu’ ndilo kinga yake yenyewe. Ni nguvu ya kiroho ambayo hakuna mtu awezaye kuitumia zaidi ya kadiri apatayo uwezo wake, kwa kuishi na kutenda katika Jina hilo. Kadiri tulichukuavyo Jina hilo mbele za watu, twapata nguvu ya kulitumia mbele za Mungu. Basi na tumwombe Roho Mtakatifu wa Mungu atuonyeshe Jina lina maana gani, na matumizi yake sahihi ni yapi. Ni kwa njia ya Roho ndipo Jina, lililo juu ya kila jina mbinguni, litakapopata mahali pa ukuu ndani ya moyo wetu na maisha yetu pia.

Enyi wanafunzi wa Yesu! Mafunzo ya siku hii na yaingie ndani sana ndani ya mioyo yenu. Bwana asema: Ombeni tu kwa jina langu; lo lote mtakaloomba mtapewa. Mbingu imefunguliwa kwenu; hazina na nguvu za ulimwengu wa roho zimewekwa mikononi mwenu kwa ajili ya watu walio karibu nanyi. Njooni basi, na tujifunze kuomba kwa Jina la Yesu. Kama alivyowaambia wanafunzi, atwambia sisi, ‘Hata sasa hamkuomba kwa jina langu: ombeni, nanyi mtapata.’ Kila mwanafunzi wa Yesu na atake kujinufaisha na haki za ukuhani wake wa kifalme, na atumie nguvu iliyowekwa mikononi mwake kwa ajili ya mazingira yake na kazi yake. Wakristo na waamke, na wasikie ujumbe: maombi yenu yaweza kupata kile ambacho vinginevyo kingezuiliwa, yaweza kutimiza kile ambacho vinginevyo kingebaki bila kutimizwa. Ee amkeni, na mtumie jina la Yesu kufungua hazina za mbinguni kwa ajili ya ulimwengu huu unaopotea. Jifunzeni kama watumishi wa Mfalme kutumia Jina lake: ‘LO LOTE mtakaloomba kwa jina langu, HILO NITALIFANYA.’

‘BWANA, TUFUNDISHE KUOMBA.’

Ee Bwana mbarikiwa! Ni kana kwamba kila somo unipalo lina utimilifu na vilindi vya maana namna hii, hata nikiweza kujifunza lile moja tu, nitajua jinsi ya kuomba ipasavyo. Siku hii nahisi tena kana kwamba nahitaji ombi moja tu kila siku: Bwana! Nifundishe maana ya kuomba kwa Jina lako. Nifundishe kuishi na kutenda, kutembea na kunena, hata kufanya yote kwa Jina la Yesu, hata ombi langu lisiweze kuwa jambo jingine ila kuwa katika Jina hilo mbarikiwa pia.

Na unifundishe, Bwana! kuishika sana ile ahadi ya thamani kwamba LO LOTE tuombalo kwa Jina lako, Wewe utalifanya, Baba atalitoa. Ijapokuwa bado sijafahamu kikamilifu, wala sijaufikia kikamilifu zaidi, ule muungano wa ajabu uumaanishao usemapo, KWA JINA LANGU, ningali nataka kuishika ahadi hiyo hata itakapoujaza moyo wangu uhakikisho usio na shaka: Lo lote katika Jina la Yesu.

Ee Bwana wangu! Roho wako Mtakatifu na anifundishe hili. Ulisema juu yake, ‘Msaidizi, ambaye Baba atampeleka KWA JINA LANGU.’ Yeye ajua maana ya kutumwa kutoka mbinguni kwa Jina lako, kudhihirisha na kuheshimu nguvu ya Jina hilo katika watumishi wako, kutumia Jina hilo peke yake, na hivyo kukutukuza Wewe. Bwana Yesu! Roho wako na akae ndani yangu, na anijaze. Nataka, naam nautoa utu wangu wote kwa utawala na uongozi wake. Jina lako na Roho wako ni kitu kimoja; kwa njia yake Jina lako litakuwa nguvu ya maisha yangu na maombi yangu. Ndipo nitakapoweza kwa ajili ya Jina lako kuacha vyote, kwa Jina lako kusema na watu na Mungu, na kuthibitisha kwamba hili ndilo kweli Jina lililo juu ya kila jina.

Bwana Yesu! Ee nifundishe kwa Roho wako Mtakatifu kuomba kwa Jina lako. Amina.

TANBIHI.

‘Ina maana gani kuomba kwa jina la Kristo? Haiwezi kumaanisha tu kutokea mbele za Mungu kwa imani katika upatanisho wa Mwokozi. Wanafunzi walipomwomba Yesu awafundishe kuomba, aliwapa maombi. Na baadaye Yesu akawaambia, “Hata sasa hamkuomba neno kwa jina langu.” Hata Roho alipokuja, yale maombi saba ya sala ya Bwana yalikaa kama yaliyolala ndani yao. Kristo alipoteremka mioyoni mwao kwa Roho Mtakatifu, walitamani baraka zile zile ambazo Kristo akiwa Kuhani wetu Mkuu hutupatia kwa maombi yake kwa Baba. Na maombi kama hayo hujibiwa daima. Baba yu tayari sikuzote kutoa kile Kristo aombacho. Roho wa Kristo daima hutufundisha na kutushawishi kutoa yale maombi ambayo Kristo huyathibitisha na kuyaleta kwa Baba. Basi kuomba kwa jina la Kristo ni kuwa kitu kimoja na Kristo kwa habari ya haki yetu, na kuwa kitu kimoja na Kristo katika tamaa zetu kwa kukaa kwake Roho Mtakatifu ndani yetu. Kuomba katika Roho, kuomba kwa kadiri ya mapenzi ya Baba, kuomba kwa jina la Kristo, ni semi zenye maana moja. Baba mwenyewe atupenda, naye yu tayari kutusikia: waombezi wawili, Kristo Mtetezi wa juu, na Roho Mtakatifu, Mtetezi wa ndani, ni vipawa vya upendo wake.

‘Maoni haya yaweza kuonekana mwanzoni kuwa yenye kufariji kidogo kuliko yale yaliyoenea zaidi, ambayo huhusisha kuomba kwa jina la Kristo hasa na tumaini letu katika ustahili wa Kristo. Kasoro ya maoni haya ni kwamba hayaunganishi maombezi ya Mwokozi na mapenzi ya Baba, na msaada wa Roho akaaye ndani katika maombi. Wala hayauelewi kikamilifu upatanisho wa Kristo; kwa maana upatanisho hauhusu tu kwamba kwa ajili ya Kristo Baba Mtakatifu aweza kunitazama mimi na maombi yangu; bali pia, kwamba Kristo mwenyewe huyaleta maombi yangu kama maombi yake, aliyoyatamani kwa ajili yangu, kama vile baraka zote zinavyonunuliwa kwa ajili yangu kwa damu yake ya thamani.

‘Katika maombi yote, sharti moja la lazima ni kwamba tuweze kuyatoa kwa jina la Yesu, kwa kadiri ya tamaa yake kwa ajili yetu, kwa kadiri ya mapenzi ya Baba, kwa kadiri ya mafundisho ya Roho. Na hivyo kuomba kwa jina la Kristo hakuwezekani pasipo kujichunguza, pasipo kutafakari, pasipo kujikana; kwa kifupi, pasipo msaada wa Roho.’—Saphir, Sala ya Bwana, kur. 411, 142.