Nguvu kwa Ajili ya Kuomba na Kufanya Kazi

‘Amin, amin, nawaambia, Yeye aniaminiye mimi, kazi nizifanyazo yeye naye atazifanya; naam, na kubwa kuliko hizo atafanya, kwa kuwa mimi naenda kwa Baba. Nanyi mkiomba lo lote kwa jina langu, hilo nitalifanya.’—Yohana 14:12, 13.

KAMA vile Mwokozi alivyoifungua huduma yake ya hadhara pamoja na wanafunzi wake kwa Mahubiri ya Mlimani, ndivyo aliivyoihitimisha kwa Hotuba ya Kuaga ambayo Yohana ameituhifadhia. Katika zote mbili anena zaidi ya mara moja juu ya maombi. Lakini kwa tofauti. Katika Mahubiri ya Mlimani ni kama kwa wanafunzi ambao ndio kwanza wameingia shuleni mwake, ambao hawajui vema kwamba Mungu ni Baba yao, na ambao maombi yao hasa yahusu mahitaji yao binafsi. Katika hotuba yake ya kuhitimisha anena na wanafunzi ambao wakati wao wa mafunzo sasa umefika mwisho, na ambao wako tayari kama wajumbe wake kuchukua nafasi yake na kazi yake. Katika ile ya kwanza somo kuu ni: Kuweni kama watoto wadogo, ombeni kwa kuamini, na mmtumaini Baba kwamba atawapa vipawa vyote vyema. Hapa aonyesha jambo lililo juu zaidi: Sasa wao ni rafiki zake ambao amewafunulia yote aliyoyasikia kwa Baba; wajumbe wake, walioingia katika mipango yake, na ambao mikononi mwao utunzaji wa kazi yake na ufalme wake duniani utakabidhiwa. Sasa wanapaswa kwenda na kuzifanya kazi zake, na kwa nguvu za kutukuzwa kwake kunakokaribia, hata kazi kubwa zaidi: maombi sasa yatakuwa mfereji ambao kupitia huo nguvu hizo zitapokelewa kwa ajili ya kazi yao. Kwa kupaa kwa Kristo kwenda kwa Baba enzi mpya huanza kwa kazi yao na maombi yao vyote viwili.

Tazama jinsi uhusiano huu unavyojitokeza wazi katika andiko letu. Kama mwili wake hapa duniani, kama wale walio kitu kimoja naye mbinguni, sasa wanapaswa kufanya kazi kubwa kuliko alizozifanya yeye; mafanikio yao na ushindi wao yatakuwa makubwa kuliko yake. Ataja sababu mbili za hili. Ya kwanza, kwa sababu alikuwa aende kwa Baba, apokee nguvu zote; ya pili, kwa sababu sasa wangeweza kuomba na kutarajia yote kwa jina lake. ‘Kwa kuwa mimi naenda kwa Baba, na—angalia hili na—na, lo lote mtakaloliomba, nitalifanya.’ Kwenda kwake kwa Baba kwa hiyo kungeleta baraka maradufu: wangeomba na kupokea yote kwa jina lake, na kwa matokeo, wangefanya kazi kubwa zaidi. Kutajwa huku kwa kwanza kwa maombi katika maneno ya Mwokozi wetu ya kuaga hivyo hutufundisha mafunzo mawili yaliyo muhimu sana. Yeye atakaye kuzifanya kazi za Yesu lazima aombe kwa jina lake. Yeye atakaye kuomba kwa jina lake lazima afanye kazi kwa jina lake.

Yeye atakaye kufanya kazi lazima aombe: ni katika maombi ambapo nguvu ya kazi hupatikana. Yeye ambaye kwa imani angezifanya kazi ambazo Yesu alizifanya, lazima aombe kwa jina lake. Maadamu Yesu alikuwa hapa duniani, yeye mwenyewe alizifanya kazi kubwa zaidi: pepo ambao wanafunzi hawakuweza kuwatoa, walikimbia kwa neno lake. Alipokwenda kwa Baba, hakuwa tena hapa katika mwili kufanya kazi moja kwa moja. Sasa wanafunzi walikuwa mwili wake: kazi yake yote toka kiti cha enzi mbinguni hapa duniani ilipaswa na iliweza kufanywa kupitia wao. Mtu angeweza kudhani kwamba sasa kwa kuwa alikuwa akiondoka mwenyewe, na angeweza tu kufanya kazi kupitia wawakilishi, kazi zingekuwa chache na dhaifu zaidi. Yeye hutuhakikishia kinyume chake: ‘ Amin, amin, nawaambia, Yeye aniaminiye mimi, kazi nizifanyazo yeye naye atazifanya, naam na kazi kubwa zaidi atafanya.’ Kifo chake kilichokaribia kilipaswa kuwa uvunjaji halisi na ukomeshaji wa nguvu ya dhambi; kwa ufufuo nguvu za Uzima wa Milele zilipaswa kweli kuuchukua milki mwili wa mwanadamu na kupata ukuu juu ya uhai wa mwanadamu; kwa kupaa kwake alipaswa kupokea nguvu ya kumshirikisha Roho Mtakatifu kwa ukamilifu kwa watu wake mwenyewe; muungano, ule umoja kati yake mwenyewe kwenye kiti cha enzi na wao duniani, ulipaswa kuwa mkamilifu wa kiungu na wa nguvu nyingi hivyo, hata alimaanisha kama kweli halisi: ‘Kazi kubwa kuliko hizi atafanya, kwa sababu mimi naenda kwa Baba.’ Na matokeo yalithibitisha jinsi ilivyokuwa kweli. Wakati Yesu, katika miaka mitatu ya kazi yake binafsi duniani, alikusanya wanafunzi zaidi kidogo tu ya mia tano, na wengi wao dhaifu hivi kwamba walikuwa sifa ndogo kwa kazi yake, ilitolewa kwa watu kama Petro na Paulo waziwazi kufanya mambo makubwa kuliko aliyoyafanya yeye. Toka kiti cha enzi angeweza kufanya kupitia wao kile ambacho yeye mwenyewe katika unyenyekevu wake hakuweza bado kukifanya.

Lakini kuna sharti moja: ‘Yeye aniaminiye mimi, atafanya kazi kubwa zaidi, kwa sababu mimi naenda kwa Baba; nanyi mkiomba lo lote kwa jina langu, hilo nitalifanya.’ Kwenda kwake kwa Baba kungempa nguvu mpya ya kusikia maombi. Kwa ajili ya kufanya kazi kubwa zaidi, vitu viwili vilihitajika: kwenda kwake kwa Baba apokee nguvu zote, na maombi yetu kwa jina lake ili tupokee nguvu zote toka kwake tena. Kama vile amwombavyo Baba, hupokea na kutumiminia sisi nguvu ya agano jipya kwa ajili ya kazi kubwa zaidi; kadiri tuaminivyo, na kuomba kwa jina lake, nguvu huja na kutuchukua milki ili tuzifanye kazi kubwa zaidi.

Ole! ni kazi kiasi gani ipo katika kazi ya Mungu, ambamo haionekani chochote au kidogo tu cha nguvu ya kufanya jambo lolote linalofanana na kazi za Kristo, sembuse kazi kubwa zaidi. Kunaweza kuwa na sababu moja tu: kumwamini yeye, maombi ya imani kwa jina lake, hivi ndivyo vinavyopungua sana. Laiti kila mtenda kazi na kiongozi katika kanisa, au shule, katika kazi ya huruma nyumbani au utume wa nchi za mbali angejifunza somo hili: Maombi kwa jina la Yesu ndiyo njia ya kushiriki katika nguvu kuu ambayo Yesu ameipokea kwa Baba kwa ajili ya watu wake, na ni katika nguvu hii peke yake ambapo yeye aaminiye aweza kufanya kazi kubwa zaidi. Kwa kila lalamiko juu ya udhaifu au kutostahili, juu ya matatizo au kukosa mafanikio, Yesu hutoa jibu hili moja: ‘Yeye aaminiye mimi atafanya kazi kubwa zaidi, kwa sababu mimi naenda kwa Baba, na lo lote mtakaloliomba kwa jina langu, hilo nitalifanya.’ Yatupasa kuelewa kwamba jambo la kwanza na kuu kwa kila mtu atakaye kuifanya kazi ya Yesu, ni kuamini, na hivyo kuunganishwa naye, Yeye Mwenye Nguvu Zote, kisha kuomba maombi ya imani kwa jina lake. Bila hili kazi yetu ni ya kibinadamu na ya kimwili tu; yaweza kuwa na manufaa fulani katika kuzuia dhambi, au kuandaa njia kwa baraka, lakini nguvu ya kweli inakosekana. Kutenda kazi kwa matokeo kwahitaji kwanza maombi yenye matokeo.

Na sasa somo la pili: Yeye atakaye kuomba lazima afanye kazi. Ni kwa ajili ya nguvu ya kufanya kazi ndipo maombi yana ahadi kubwa hivyo: ni katika kutenda kazi ndipo nguvu ya maombi yenye matokeo ya imani itakapopatikana. Katika maneno haya ya kuaga ya Bwana wetu mbarikiwa twaona kwamba yeye si chini ya mara sita (Yohana 14:13, 14; 15:7, 16; 16:23, 24) hurudia zile ahadi za maombi zisizo na kikomo ambazo mara nyingi zimeamsha maswali yetu ya wasiwasi juu ya maana yake halisi: ‘lo lote,’ ‘kitu chochote,’ ‘mtakalo,’ ‘ombeni nanyi mtapewa.’ Ni waamini wangapi wamesoma haya kwa furaha na tumaini, na kwa bidii ya ndani ya nafsi wamejaribu kuyaomba kwa ajili ya haja yao wenyewe. Naye ametoka akiwa amekata tamaa. Sababu rahisi ilikuwa hii: alikuwa ameing’oa ahadi toka mazingira yake. Bwana alitoa ahadi ile ya ajabu ya kulitumia jina lake kwa uhuru mbele za Baba kuhusiana na kuzifanya kazi zake. Ni mwanafunzi ambaye hujitoa kabisa kuishi kwa ajili ya kazi na ufalme wa Yesu, kwa ajili ya mapenzi na heshima yake, ndiye ambaye nguvu itamjia kuimiliki ahadi hiyo. Yeye atakaye kuiing’ang’ania ahadi anapotaka kitu maalum sana kwa ajili yake mwenyewe, atakata tamaa, kwa sababu angemfanya Yesu kuwa mtumishi wa faraja yake mwenyewe. Lakini kwake yeye atafutaye kuomba maombi ya imani yenye matokeo, kwa sababu ayahitaji kwa ajili ya kazi ya Bwana, kwake atapewa kujifunza; kwa sababu amejifanya mwenyewe kuwa mtumishi wa mambo ya Bwana wake. Maombi hayafundishi na kutia nguvu tu kwa kazi: kazi hufundisha na kutia nguvu kwa maombi.

Hili linapatana kikamilifu na kile kinachotimia katika ulimwengu wa asili na wa kiroho pia. Kila aliye na kitu, atapewa; au, Yeye aliye mwaminifu katika lililo dogo, ni mwaminifu pia katika lililo kubwa. Na tujitoe kwa Bwana kwa ajili ya kazi yake kwa kile kipimo kidogo cha neema tulichokwisha kupokea: kazi itakuwa kwetu shule halisi ya maombi. Ilikuwa Musa alipolazimika kuchukua uongozi kamili wa taifa lililoasi ndipo alipohisi haja, lakini pia ujasiri, wa kusema kwa Mungu bila woga na kumwomba mambo makubwa (Kutoka 33:12, 15, 18). Kadiri unavyojitoa kabisa kwa Mungu kwa ajili ya kazi yake, utahisi kwamba huhitaji chochote pungufu ya ahadi hizi kubwa, na kwamba huna cha kutarajia kwa uhakika zaidi ya hicho.

Wewe uaminiye Yesu! Umeitwa, umewekwa, kufanya kazi za Yesu, na hata kazi kubwa zaidi, kwa sababu ameenda kwa Baba kupokea nguvu ya kuzifanya ndani yako na kupitia wewe.

Lo lote mtakaloliomba kwa jina langu, hilo nitalifanya. Jitoe, na uishi, kuzifanya kazi za Kristo nawe utajifunza kuomba hata kupata majibu ya ajabu ya maombi. Jitoe, na uishi, kuomba nawe utajifunza kuzifanya kazi alizozifanya, na kazi kubwa zaidi. Pamoja na wanafunzi waliojaa imani kwake mwenyewe, na wenye ujasiri katika maombi kuomba mambo makubwa, Kristo aweza kuushinda ulimwengu.

‘BWANA, UTUFUNDISHE KUOMBA.’

Ee Bwana wangu! Leo tena nimeyasikia maneno kutoka kwako yanayopita ufahamu wangu. Na bado siwezi kufanya lolote ila kwa imani rahisi kama ya mtoto niyapokee na kuyashika kama zawadi yako kwangu mimi pia. Umesema kwamba kwa sababu ya kwenda kwako kwa Baba, yeye akuaminiye wewe atafanya kazi ambazo umezifanya, na kazi kubwa zaidi. Bwana! Nakuabudu wewe kama Yeye Aliyetukuzwa, nami natazamia kutimizwa kwa ahadi yako. Maisha yangu yote na yawe tu ya kuendelea kukuamini wewe. Kwa hiyo takasa na weka wakfu moyo wangu, uufanye uwe na uwezo wa kukuhisi wewe na upendo wako kwa upole, hata kukuamini wewe kuwe uhai wenyewe ambao huupumua.

Nawe umesema kwamba kwa sababu ya kwenda kwako kwa Baba, lo lote tuombalo, wewe utalifanya. Toka kiti chako cha enzi cha nguvu ungewafanya watu wako washiriki nguvu uliyopewa, na kufanya kazi kupitia wao kama viungo vya mwili wako, kwa kuitikia maombi yao ya imani kwa jina lako. Nguvu katika maombi pamoja nawe, na nguvu katika kazi pamoja na wanadamu, ndicho ulichowaahidia watu wako na mimi pia.

Bwana mbarikiwa! Tusamehe yote kwamba tumekuamini wewe na ahadi yako kidogo mno, na tumethibitisha uaminifu wako kidogo mno katika kuitimiza. Ee tusamehe kwamba tumeliheshimu kidogo mno jina lako lishindalo yote mbinguni au duniani.

Bwana! Nifundishe kuomba ili nipate kudhihirisha kwamba jina lako kweli lashinda yote kwa Mungu na wanadamu na pepo. Naam, nifundishe kufanya kazi hivyo na kuomba hivyo hata uweze kujitukuza mwenyewe ndani yangu kama Yeye Mwenye Uwezo Wote, na kufanya kazi yako kuu kupitia mimi pia. Amina.