Lengo Kuu la Maombi

‘Mimi naenda kwa Baba. Nanyi mkiomba lo lote kwa jina langu, hilo nitalifanya, ili Baba atukuzwe ndani ya Mwana.’—Yohana 14:13.

ILI Baba atukuzwe ndani ya Mwana: ni kwa ajili ya lengo hili ndipo Yesu, akiwa katika kiti chake cha enzi katika utukufu, atafanya yote tunayoyaomba kwa jina lake. Kila jibu la maombi analotoa litakuwa na lengo hili: pasipo matumaini ya lengo hili kufikiwa, hatajibu. Yafuatia bila shaka kwamba jambo hili lazima liwe kwetu, kama lilivyokuwa kwa Yesu, kiini cha maombi yetu: utukufu wa Baba lazima uwe shabaha na lengo, naam nafsi na uhai wenyewe wa maombi yetu.

Ndivyo ilivyokuwa kwa Yesu alipokuwa hapa duniani. ‘Sitafuti heshima yangu mwenyewe; natafuta heshima yake yeye aliyenituma;’ katika maneno kama hayo tunapata sauti kuu ya maisha yake. Katika maneno ya kwanza ya sala ile ya ukuhani mkuu anaidhihirisha: Baba! Mtukuze Mwanao, ili Mwana wako naye akutukuze wewe. ‘Nimekutukuza wewe hapa duniani; unitukuze mimi pamoja nawe.’ Msingi ambao juu yake anaomba apandishwe katika utukufu ule aliokuwa nao pamoja na Baba, ni wa namna mbili: amemtukuza hapa duniani; ataendelea kumtukuza mbinguni. Anachoomba ni kumwezesha tu amtukuze Baba zaidi. Ni pale tunapoingia katika kuhurumiana na Yesu katika jambo hili, na kumfurahisha kwa kuufanya utukufu wa Baba kuwa lengo letu kuu katika maombi pia, ndipo maombi yetu hayawezi kukosa jibu. Hakuna jambo ambalo Mwana Mpendwa amelisema kwa wazi zaidi kwamba litamtukuza Baba kuliko hili, yeye kufanya kile tunachoomba; kwa hiyo, hataacha nafasi yo yote ipite bila kulitimiza lengo hili. Na tuifanye shabaha yake kuwa yetu: utukufu wa Baba na uwe kiungo kati ya kuomba kwetu na kutenda kwake: maombi kama hayo lazima yashinde.

Neno hili la Yesu kwa kweli linakuja kama upanga mkali wenye makali kuwili, wenye kuchoma hata kuzitenga nafsi na roho, na wepesi wa kuyatambua mawazo na makusudi ya moyo. Yesu, katika sala zake hapa duniani, katika maombezi yake mbinguni, katika ahadi yake ya jibu la maombi yetu kutoka huko, anafanya jambo hili kuwa lengo lake la kwanza—utukufu wa Baba yake. Je, ndivyo ilivyo kwetu pia? Au je, kwa kiasi kikubwa, kujipenda na kufuata matakwa yetu wenyewe si ndizo nia zenye nguvu zaidi zinazotusukuma kuomba? Au, kama hatuwezi kuona kwamba ndivyo ilivyo, je, hatuna budi kukiri kwamba tamaa ile ya wazi na ya kufahamu ya utukufu wa Baba si ndiyo inayoyaamsha maombi yetu? Na hata hivyo lazima iwe hivyo.

Si kwamba mwamini hakitamani jambo hili nyakati fulani. Lakini yampasa aomboleze kwamba amefikia kidogo mno. Naye anaijua sababu ya kushindwa kwake pia. Ilikuwa ni kwa sababu utengano kati ya roho ya maisha ya kila siku na roho ya saa ya maombi ulikuwa mpana mno. Twaanza kuona kwamba tamaa ya utukufu wa Baba si kitu ambacho twaweza kukiamsha na kukiweka mbele za Bwana wetu tunapojiweka tayari kuomba. La! Ni pale tu maisha yote, katika sehemu zake zote, yanapotolewa kwa utukufu wa Mungu, ndipo tunapoweza kweli kuomba kwa utukufu wake pia. ‘Fanyeni yote kwa utukufu wa Mungu,’ na, ‘Ombeni yote kwa utukufu wa Mungu,’—amri hizi pacha haziwezi kutengwa: kuitii ile ya kwanza ndio siri ya neema kwa ile ya pili. Maisha kwa utukufu wa Mungu ndio sharti la maombi yale ambayo Yesu aweza kuyajibu, ‘ili Baba atukuzwe.’

Takwa hili linalohusiana na maombi yenye kushinda—kwamba yawe kwa utukufu wa Mungu—si zaidi ya lililo haki na la asili. Hakuna mwenye utukufu ila Bwana: hakuna utukufu ila wake, na ule anaowawekea viumbe vyake. Uumbaji upo ili kuudhihirisha utukufu wake; yote yasiyo kwa utukufu wake ni dhambi, na giza, na mauti: ni katika kumtukuza Mungu tu ndipo viumbe vinapoweza kupata utukufu. Kile alichokifanya Mwana wa Adamu, cha kujitoa mwenyewe kabisa, maisha yake yote, ili kumtukuza Baba, si kitu kingine ila wajibu ulio rahisi wa kila aliyekombolewa. Na thawabu ya Kristo itakuwa yake pia. Kwa sababu alijitoa kabisa hivyo kwa utukufu wa Baba, Baba alimvika taji ya utukufu na heshima, akitia ufalme mikononi mwake, pamoja na uwezo wa kuomba atakalo, na, akiwa Mwombezi, kuyajibu maombi yetu. Na kadiri tunavyokuwa kitu kimoja na Kristo katika jambo hili, na kadiri maombi yetu yalivyo sehemu ya maisha yaliyojitoa kabisa kwa utukufu wa Mungu, ndivyo Mwokozi atakavyoweza kumtukuza Baba kwetu kwa kuitimiza ile ahadi: ‘Lo lote mtakaloliomba, nitalifanya.’

Maisha kama hayo, yenye utukufu wa Mungu kuwa shabaha yetu pekee, hatuwezi kuyafikia kwa jitihada zetu wenyewe zo zote. Ni katika mtu yule Kristo Yesu tu ndipo maisha kama hayo yanapoweza kuonekana: ndani yake yanapatikana kwa ajili yetu. Naam, Mungu na atukuzwe! Uhai wake ni uhai wetu; alijitoa Mwenyewe kwa ajili yetu; yeye mwenyewe sasa ndiye uhai wetu. Kuigundua, na kuiungama, na kuikataa nafsi, ikiwa imepokonya mahali pa Mungu, ni jambo la lazima—nafsi yenye kujitafuta na kujitegemea—na hata hivyo ni jambo tusiloweza kulitimiza kwa nguvu zetu wenyewe. Ni kuingia na kukaa, ni Uwepo na Utawala moyoni, wa Bwana wetu Yesu aliyemtukuza Baba hapa duniani, na sasa ametukuzwa pamoja naye, ili kutokea hapo apate kumtukuza ndani yetu;—ni Yesu mwenyewe akiingia ndani, awezaye kukitoa nje kila kujitukuza, na kutupa badala yake maisha na Roho wake mwenyewe wenye kumtukuza Mungu. Ni Yesu, atamaniye kumtukuza Baba katika kuyasikia maombi yetu, atakayetufundisha kuishi na kuomba kwa utukufu wa Mungu.

Na ni nia gani, ni nguvu gani iliyopo iwezayo kuisukuma mioyo yetu ya uvivu ijitoe kwa Bwana wetu ili kutenda jambo hili ndani yetu? Bila shaka hakuna kinachohitajiwa zaidi ya kuona jinsi Baba alivyo mtukufu, jinsi alivyostahili utukufu yeye peke yake. Imani yetu na ijifunze katika ibada ya kumsujudu kuinama mbele zake, kumhusisha yeye peke yake ufalme, na nguvu, na utukufu, kujitoa tukae katika nuru yake kama yeye aliyebarikiwa milele, apendaye milele. Bila shaka tutachochewa kusema, ‘Utukufu una yeye peke yake.’ Nasi tutamwelekea Bwana wetu Yesu kwa shauku mpya yenye nguvu ya maisha yanayokataa kuona au kutafuta cho chote ila utukufu wa Mungu. Panapokuwa na maombi machache tu yanayoweza kujibiwa, Baba hatukuzwi. Ni wajibu, kwa ajili ya utukufu wa Mungu, kuishi na kuomba hivi ili maombi yetu yaweze kujibiwa. Kwa ajili ya utukufu wa Mungu, na tujifunze kuomba vyema.

Ni wazo la kunyenyekesha kama nini kwamba mara nyingi kuna maombi ya bidii kwa ajili ya mtoto au rafiki, kwa ajili ya kazi au kikundi, ambamo wazo la furaha yetu au raha yetu lilikuwa na nguvu zaidi sana kuliko shauku yo yote ya utukufu wa Mungu. Si ajabu kwamba yako maombi mengi mno yasiyojibiwa: hapa ndipo tulipo na siri yake. Mungu asingetukuzwa palipokuwa utukufu huo si ndio lengo letu. Yeye atakayeomba ombi la imani, itampasa kujitoa kuishi kwa hakika hivi kwamba Baba katika mambo yote atukuzwe ndani yake. Hili lazima liwe shabaha yake: pasipo hili haiwezi kuwapo ombi la imani. ‘Mwawezaje kuamini,’ akasema Yesu, ‘ninyi mnaopokeana utukufu ninyi kwa ninyi, na utukufu ule utokao kwa Mungu aliye wa pekee hamuutafuti?’ Kila kutafuta utukufu wetu wenyewe mbele za watu hufanya imani isiwezekane: ni kujitoa sadaka kule kwa kina na kwa dhati kunakoacha utukufu wake kwenyewe, na kutafuta utukufu wa Mungu peke yake, ndiko kunakoiamsha katika nafsi hali ile ya kiroho ya kupokea Yaliyo ya Kimungu, ndiyo imani. Kujitoa kwa Mungu ili kutafuta utukufu wake, na kutumaini kwamba ataudhihirisha utukufu wake katika kutusikia, ni kitu kimoja katika msingi wake: yeye atafutaye utukufu wa Mungu atauona katika jibu la ombi lake, naye peke yake.

Nasi, twauliza tena, tutalifikiaje? Na tuanze kwa kuungama. Utukufu wa Mungu umekuwa shauku iliyotumaliza kwa kadiri ndogo kama nini; maisha yetu na maombi yetu yamekuwa yamejaa utukufu huo kwa kadiri ndogo kama nini. Tumeishi katika mfano wa Mwana kwa kadiri ndogo kama nini, na katika kuhurumiana naye—kwa ajili ya Mungu na utukufu wake peke yake. Na tuchukue muda, hata Roho Mtakatifu atakapotudhihirishia jambo hili, nasi tuone jinsi tulivyopungukiwa katika hili. Kujua kweli na kuungama dhambi ndiyo njia ya hakika ya wokovu.

Na kisha na tumtazame Yesu. Ndani yake twaweza kuona ni kwa mauti gani twaweza kumtukuza Mungu. Katika mauti alimtukuza; kwa njia ya mauti alitukuzwa pamoja naye. Ni kwa kufa, kwa kuwa wafu kwa nafsi na kuishi kwa Mungu, ndipo tunapoweza kumtukuza. Na hili—mauti hii kwa nafsi, maisha haya kwa utukufu wa Mungu—ndilo Yesu alitoalo na alikaalo ndani ya kila mmoja awezaye kumtumaini kwa ajili yake. Pasiwe na kitu cha chini ya haya—shauku, uamuzi wa kuishi kwa ajili ya utukufu wa Baba peke yake, kama vile Kristo alivyofanya; kumpokea yeye pamoja na uhai wake na nguvu zake zikitenda ndani yetu; uhakika wa furaha kwamba twaweza kuishi kwa utukufu wa Mungu, kwa sababu Kristo aishi ndani yetu;—hii na iwe roho ya maisha yetu ya kila siku. Yesu asimama kuwa mdhamini wa kuishi kwetu hivi; Roho Mtakatifu ametolewa, naye anangoja kulifanya kuwa uzoefu wetu, tukikubali tu kumtumaini na kumwacha; Ee tusijizuie kwa kutokuamini, bali kwa ujasiri na tuchukue kama kaulimbiu yetu—Yote kwa utukufu wa Mungu! Baba anaukubali utashi, dhabihu inapendeza; Roho Mtakatifu atatutia muhuri ndani kwa fahamu hii, kwamba twaishi kwa ajili ya Mungu na utukufu wake.

Na kisha kutakuwa na amani tulivu na nguvu iliyoje katika maombi yetu, tunapojijua kwa neema yake, tukiwa katika upatano mkamilifu na yeye asemaye kwetu, anapoahidi kufanya kile tunachoomba: ‘Ili Baba atukuzwe ndani ya Mwana.’ Nafsi zetu zote zikijitoa kwa kufahamu kwa uvuvio wa Neno na Roho, tamaa zetu hazitakuwa tena zetu bali zake; lengo lao kuu ni utukufu wa Mungu. Kwa uhuru unaozidi tutaweza kusema katika maombi: Baba! Wewe wajua, twaliomba hili kwa ajili ya utukufu wako tu. Na sharti la kujibiwa kwa maombi, badala ya kuwa kama mlima tusioweza kuupanda, litatupa tu ujasiri mkubwa zaidi kwamba tutasikiwa, kwa sababu tumeona kwamba maombi hayana uzuri au baraka iliyo kuu kuliko hii, kwamba yanamtukuza Baba. Na pendeleo la thamani la maombi litakuwa la thamani mara mbili kwa sababu latuleta katika muungano mkamilifu na Mwana Mpendwa katika ushirika ule wa ajabu anaoupendekeza: ‘Ninyi mwaomba, nami nafanya, ili Baba atukuzwe ndani ya Mwana.’

‘BWANA, UTUFUNDISHE KUSALI.’

Ee Bwana Yesu Mbarikiwa! Naja tena kwako. Kila somo unipalo linanisadikisha kwa kina zaidi jinsi ninavyojua kidogo kuomba ipasavyo. Lakini kila somo pia linanitia moyo wa tumaini kwamba wewe utanifundisha, kwamba unanifundisha si kujua tu maombi yapasavyo kuwa, bali kweli kuomba kama inipasavyo. Ee Bwana wangu! Nakutazama kwa ujasiri wewe, Mwombezi Mkuu, uliyeomba nawe wasikia maombi, ili tu Baba atukuzwe, unifundishe mimi pia kuishi na kuomba kwa utukufu wa Mungu.

Ee Mwokozi! Kwa lengo hili najitoa kwako tena. Ningependa kuwa si kitu. Nimeitoa nafsi, iliyokwisha kusulubiwa pamoja nawe, kwa mauti. Kwa njia ya Roho matendo yake yanafishwa na kufanywa kuwa maiti; uhai wako na upendo wako kwa Baba unanimiliki. Shauku mpya inaanza kuijaza nafsi yangu, kwamba kila siku, kila saa, kwamba katika kila ombi utukufu wa Baba uwe kila kitu kwangu. Ee Bwana wangu! Nipo katika shule yako ili kujifunza hili: wewe unifundishe.

Nawe, Ee Mungu wa utukufu, Baba wa utukufu, Mungu wangu na Baba yangu, ukubali shauku ya mtoto aliyeona kwamba utukufu wako kwa kweli ndio unaostahili kuishi kwa ajili yake peke yake. Ee Bwana! Nionyeshe utukufu wako. Na unifunike. Na uijaze hekalu la moyo wangu. Na nikae ndani yake kama ulivyofunuliwa katika Kristo. Nawe mwenyewe utimize ndani yangu mapenzi yako mema, kwamba mtoto wako apate utukufu wake katika kutafuta utukufu wa Baba yake. Amina.

Tazama katika kidokezo kuhusu George Muller, mwishoni mwa juzuu hili, jinsi alivyoongozwa kuufanya utukufu wa Mungu kuwa lengo lake la kwanza.