Mwalimu Pekee

‘Ikawa alipokuwa akiomba mahali fulani, alipokwisha, mmoja wa wanafunzi wake akamwambia, Bwana, tufundishe kuomba.’—Luka xi. 1.

WANAFUNZI walikuwa pamoja na Kristo, nao walikuwa wamemwona akiomba. Walikuwa wamejifunza kufahamu kidogo uhusiano uliopo kati ya maisha yake ya ajabu hadharani, na maisha yake ya siri ya maombi. Walikuwa wamejifunza kumwamini kuwa Bwana mwalimu katika sanaa ya maombi—hakuna aliyeweza kuomba kama yeye. Kwa hiyo wakamjia na ombi hili, ‘Bwana, tufundishe kuomba.’ Na katika miaka iliyofuata wangelituambia kwamba ni machache tu yaliyokuwa ya ajabu zaidi au yenye baraka zaidi aliyowafundisha kuliko mafunzo yake juu ya maombi.

Na hata sasa bado hutokea, akiwa anaomba mahali fulani, kwamba wanafunzi wanaomwona hivyo hujihisi kuhitaji kurudia ombi lilo hilo, ‘Bwana, tufundishe kuomba.’ Kadiri tunavyokua katika maisha ya Kikristo, wazo na imani ya Bwana mwalimu Mpendwa katika maombezi yake yasiyokoma huzidi kuwa ya thamani zaidi, nayo tumaini la kuwa Kama Kristo katika maombezi yake hupata mvuto usiojulikana hapo awali. Nasi tunapomwona akiomba, na kukumbuka kwamba hakuna awezaye kuomba kama yeye, wala hakuna awezaye kufundisha kama yeye, twahisi kwamba ombi la wanafunzi, ‘Bwana, tufundishe kuomba,’ ndilo hasa tunalolihitaji. Na tunapofikiri jinsi yote alivyo na alivyo navyo, jinsi yeye mwenyewe alivyo wetu kabisa, jinsi yeye mwenyewe alivyo uzima wetu, twahakikishiwa kwamba hatuna budi ila kuomba tu, naye atafurahia kutupokea katika ushirika wa karibu zaidi pamoja naye, na kutufundisha kuomba kama vile yeye aombavyo.

Njoni, ndugu zangu! Je, hatutakwenda kwa Bwana mwalimu Mbarikiwa na kumwomba aandikishe majina yetu nayo upya katika shule ile ambayo huifungua daima kwa ajili ya wale wanaotamani kuendelea na masomo yao katika sanaa ya Kimungu ya maombi na maombezi? Naam, na tumwambie Bwana mwalimu leo hii, kama walivyofanya wa kale, ‘Bwana, tufundishe kuomba.’ Tunapotafakari, tutaona kila neno la ombi tuletalo limejaa maana.

‘Bwana, tufundishe kuomba.’ Naam, kuomba. Hili ndilo tunalohitaji kufundishwa. Ijapokuwa mwanzoni maombi ni rahisi kiasi kwamba hata mtoto aliye dhaifu kabisa aweza kuomba, lakini wakati huohuo ni kazi iliyo kuu na takatifu kuliko zote ambayo mwanadamu aweza kuinukia. Ni ushirika na Yeye Asiyeonekana na Aliye Mtakatifu kuliko wote. Nguvu za ulimwengu wa milele zimewekwa mikononi mwake. Ni asili hasa ya dini ya kweli, mfereji wa baraka zote, siri ya nguvu na uzima. Si kwa ajili yetu wenyewe tu, bali kwa ajili ya wengine, kwa ajili ya Kanisa, kwa ajili ya ulimwengu, ni kwa maombi ambako Mungu ameipa haki ya kumshika yeye na nguvu zake. Ni juu ya maombi ambapo ahadi zinangojea kutimizwa kwake, ufalme kuja kwake, na utukufu wa Mungu kufunuliwa kwake kwa ukamilifu. Nasi kwa kazi hii yenye baraka, tazama jinsi tulivyo wavivu na wasiofaa. Ni Roho wa Mungu peke yake awezaye kutuwezesha kuifanya sawasawa. Tazama jinsi tunavyodanganywa haraka hata kupumzika katika umbo la nje, huku nguvu zikikosekana. Malezi yetu ya awali, mafundisho ya Kanisa, uvutano wa mazoea, kuchochewa kwa hisia—tazama jinsi mambo haya yanavyoongoza kwa urahisi kwenye maombi yasiyo na nguvu za kiroho, na yasiyofaa kitu ila kidogo. Maombi ya kweli, yanayoishika nguvu ya Mungu, yenye kufaa mengi, ambayo kwayo malango ya mbinguni yamefunguliwa kweli kweli—ni nani asingelia, Laiti angekuwako mtu wa kunifundisha kuomba namna hii?

Yesu amefungua shule, ambamo huwazoeza wale aliowakomboa, wanaoitamani hasa, wapate kuwa na nguvu katika maombi. Je, hatutaingia ndani yake pamoja na ombi hili, Bwana! ni hili hasa tunalohitaji kufundishwa! Ee, tufundishe kuomba.

‘Bwana, tufundishe sisi kuomba.’ Naam, sisi, Bwana. Tumesoma katika Neno lako kwa nguvu gani watu wako waaminio wa kale walivyokuwa wakiomba, na maajabu makuu jinsi gani yalivyofanyika kwa kujibu maombi yao. Na kama hayo yalitokea chini ya Agano la Kale, katika wakati wa maandalizi, si zaidi sana wewe utakavyowapa watu wako sasa, katika siku hizi za utimilifu, ishara hii ya hakika ya kuwapo kwako kati yao. Tumesikia ahadi walizopewa mitume wako juu ya nguvu ya maombi katika jina lako, nasi tumeona kwa utukufu jinsi walivyoionja kweli yake: tunajua kwa hakika, zaweza kuwa kweli kwetu sisi pia. Twasikia daima hata katika siku hizi ishara zenye utukufu jinsi gani za nguvu zako uendelezavyo kuwapa wale wanaokutumaini kwa ukamilifu. Bwana! hawa wote ni watu wenye tabia moja na sisi; tufundishe sisi kuomba vivyo hivyo. Ahadi ni zetu, nguvu na karama za ulimwengu wa mbinguni ni zetu. Ee, tufundishe sisi kuomba ili tupate kupokea kwa wingi. Kwetu sisi nawe umeikabidhi kazi yako, juu ya maombi yetu nako kuja kwa ufalme wako kwategemea, katika maombi yetu nawe waweza kulitukuza jina lako; ‘Bwana, tufundishe kuomba.’ Naam, sisi, Bwana; twajitoa wenyewe kuwa wanafunzi; kwa kweli twataka kufundishwa na wewe. ‘Bwana, tufundishe sisi kuomba.’

‘Bwana, tufundishe kuomba.’ Naam, sasa twahisi haja ya kufundishwa kuomba. Mwanzoni hakuna kazi ionekanayo rahisi hivyo; baadaye, hakuna iliyo ngumu zaidi; na ungamo hili twalazimishwa kulitoa: Hatujui jinsi ya kuomba ipasavyo. Ni kweli tunalo Neno la Mungu, pamoja na ahadi zake zilizo wazi na za hakika; lakini dhambi imezitia giza akili zetu, hata hatujui sikuzote jinsi ya kulitumia neno. Katika mambo ya kiroho hatutafuti sikuzote mambo yaliyo ya lazima zaidi, au twashindwa kuomba sawasawa na sheria ya patakatifu. Katika mambo ya wakati huu twashindwa hata zaidi kujinufaisha na uhuru wa ajabu ambao Baba yetu ametupa wa kuomba yale tunayoyahitaji. Na hata tunapojua la kuomba, tazama jinsi bado kunavyohitajika mengi ili kuyafanya maombi yakubalike. Ni lazima yawe kwa utukufu wa Mungu, katika kujisalimisha kabisa kwa mapenzi yake, katika uthibitisho kamili wa imani, katika jina la Yesu, na kwa uvumilivu ambao, ikiwa lazima, hukataa kunyimwa. Yote haya ni lazima yajifunzwe. Yaweza kujifunzwa tu katika shule ya maombi mengi, kwa maana mazoezi hukamilisha. Katikati ya ufahamu wenye uchungu wa ujinga na kutostahili, katika mapambano kati ya kuamini na kutia shaka, ndiyo sanaa ya mbinguni ya maombi yenye matokeo hujifunzwa. Kwa sababu, hata tusipoikumbuka, yuko Mmoja, Mwanzilishi na Mtimilizaji wa imani na maombi, anayeyalinda maombi yetu, na kuhakikisha kwamba katika wale wote wanaomtumainia kwa ajili hiyo elimu yao katika shule ya maombi itaendelezwa hata ukamilifu. Basi na sauti ya ndani kabisa ya maombi yetu yote iwe ni ule utii wa kufundishika utokao katika kutambua ujinga wetu, na katika kumwamini yeye kuwa mwalimu mkamilifu, nasi twaweza kuwa na hakika tutafundishwa, tutajifunza kuomba kwa nguvu. Naam, twaweza kulitegemea hili, yeye hufundisha kuomba.

‘Bwana, tufundishe kuomba.’ Hakuna awezaye kufundisha kama Yesu, hakuna ila Yesu; kwa hiyo twamlingana, ‘BWANA, tufundishe kuomba.’ Mwanafunzi anahitaji mwalimu, ajuaye kazi yake, aliye na kipawa cha kufundisha, ambaye kwa saburi na upendo atashuka hata kwenye mahitaji ya mwanafunzi. Ahimidiwe Mungu! Yesu ni haya yote na zaidi sana. Ajua maombi ni nini. Ni Yesu, akiomba yeye mwenyewe, ndiye afundishaye kuomba. Ajua maombi ni nini. Aliyajifunza katikati ya majaribu na machozi ya maisha yake ya kidunia. Mbinguni bado ni kazi yake apendayo: maisha yake huko ni maombi. Hakuna kimfurahishacho zaidi ya kuwapata wale awezao kuwachukua pamoja naye mbele za uso wa Baba, awezao kuwavika nguvu ya kuomba baraka ya Mungu ishuke juu ya wale walio karibu nao, awezao kuwazoeza wawe watenda kazi pamoja naye katika maombezi ambayo kwayo ufalme utafunuliwa duniani. Ajua jinsi ya kufundisha. Wakati mmoja kwa uzito wa haja iliyohisiwa, wakati mwingine kwa ujasiri ule ambao furaha huutia. Hapa kwa mafundisho ya Neno, huko kwa ushuhuda wa mwaminio mwingine ajuaye maana ya kusikiwa maombi. Kwa Roho wake Mtakatifu, anao mlango wa kuingia moyoni mwetu, naye hutufundisha kuomba kwa kutuonyesha dhambi izuiayo maombi, au kwa kutupa uhakika kwamba twampendeza Mungu. Hufundisha, kwa kutupa si mawazo tu ya la kuomba au jinsi ya kuomba, bali kwa kutupulizia ndani yetu roho yenyewe ya maombi, kwa kukaa ndani yetu akiwa Mwombezi Mkuu. Kwa kweli twaweza kusema kwa furaha kubwa, ‘Ni nani afundishaye kama yeye?’ Yesu hakuwahi kuwafundisha wanafunzi wake jinsi ya kuhubiri, ila jinsi ya kuomba tu. Hakusema mengi juu ya yaliyohitajika ili kuhubiri vyema, bali mengi juu ya kuomba vyema. Kujua jinsi ya kusema na Mungu ni zaidi ya kujua jinsi ya kusema na mwanadamu. Si nguvu mbele ya watu, bali nguvu mbele ya Mungu ndiyo jambo la kwanza. Yesu hupenda kutufundisha jinsi ya kuomba.

Mwaonaje, wapendwa wanafunzi wenzangu! Je, halitakuwa ndilo hasa tunalolihitaji, kumwomba Bwana mwalimu kwa muda wa mwezi mmoja atupatie mfululizo wa mafunzo maalum juu ya sanaa ya maombi? Tunapotafakari maneno aliyoyanena duniani, na tujitoe kwake tufundishwe naye kwa ujasiri kamili kwamba, kwa mwalimu wa namna hii, tutasonga mbele. Na tutumie wakati si kutafakari tu, bali kuomba, kukawia chini ya kiti cha enzi, na kuzoezwa kazi ya maombezi. Na tufanye hivyo tukiwa na hakika kwamba katikati ya kigugumizi chetu na hofu zetu yeye anaendeleza kazi yake kwa uzuri kabisa. Atapuliza uhai wake mwenyewe, ulio maombi yote, ndani yetu. Kama atakavyotufanya washirika wa haki yake na uzima wake, ndivyo atakavyotufanya washirika wa maombezi yake pia. Tukiwa viungo vya mwili wake, tukiwa ukuhani mtakatifu, tutashiriki katika kazi yake ya kikuhani ya kusihi na kushinda mbele za Mungu kwa ajili ya wanadamu. Naam, na tuseme kwa furaha kubwa, ijapokuwa tu wajinga na dhaifu, ‘Bwana, tufundishe kuomba.’

‘BWANA, TUFUNDISHE KUOMBA.’

Bwana Mbarikiwa! wewe uishiye siku zote ili kuomba, waweza kunifundisha mimi nami kuomba, mimi nami kuishi siku zote ili kuomba. Katika hili wapenda kunishirikisha utukufu wako wa mbinguni, ili niombe bila kukoma, na kusimama daima kama kuhani mbele za uso wa Mungu wangu.

Bwana Yesu! nakuomba leo hii uandikishe jina langu miongoni mwa wale wanaoungama kwamba hawajui jinsi ya kuomba ipasavyo, na hasa nakuomba unipatie mfululizo wa mafunzo ya maombi. Bwana! nifundishe kukawia pamoja nawe shuleni, na kukupa wakati wa kunizoeza. Ufahamu wa ndani wa ujinga wangu, wa fadhila ya ajabu na nguvu ya maombi, wa haja ya Roho Mtakatifu akiwa Roho wa maombi, na uniongoze kuyatupilia mbali mawazo yangu ya yale ninayodhani ninayajua, na unifanye nipige magoti mbele zako katika kufundishika kwa kweli na umaskini wa roho.

Nawe unijaze, Bwana, ujasiri kwamba kwa mwalimu wa namna uliyo wewe nitajifunza kuomba. Nikiwa na hakika kwamba ninaye mwalimu wangu, Yesu ambaye huomba daima kwa Baba, na kwa maombi yake huziongoza hatima za Kanisa lake na za ulimwengu, sitaogopa. Kadiri ninavyohitaji kujua juu ya siri za ulimwengu wa maombi, wewe utanifunulia. Nami nisipojua, wewe utanifundisha kuwa hodari katika imani, nikimpa Mungu utukufu.

Bwana Mbarikiwa! wewe hutamwaibisha mwanafunzi wako akutumainiye, wala, kwa neema yako, yeye hatakuaibisha wewe pia. Amina.