Dibaji

Kati ya ahadi zote zinazoshikamana na amri ile, ‘KAENI NDANI YANGU,’ hakuna iliyo juu zaidi, wala hakuna iletayo upesi ungamo lile, ‘Si kwamba nimekwisha kupata, au nimekwisha kuwa mkamilifu,’ kuliko hii: ‘Ninyi mkikaa ndani yangu, ombeni mtakalo lote, nanyi mtatendewa.’ Nguvu mbele za Mungu ndiyo kilele cha juu kabisa cha maisha ya kukaa ndani yake kikamilifu.

Na kati ya sifa zote za maisha yaliyo KAMA KRISTO hakuna iliyo juu zaidi na yenye utukufu zaidi kuliko kufanana naye katika kazi ambayo sasa inamshughulisha bila kukoma mbele za uso wa Baba—maombezi yake yashindayo yote. Kadiri tunavyozidi kukaa ndani yake, na kukua hata mfano wake, ndivyo maisha yake ya kikuhani yatakavyotenda kazi ndani yetu kwa nguvu, na maisha yetu kuwa kama yalivyo yake, maisha yasiyokoma kusihi na kushinda kwa ajili ya wanadamu.

‘Umetufanya sisi kuwa wafalme na makuhani kwa Mungu.’ Katika mfalme na katika kuhani jambo kuu ni nguvu, uvutano, baraka. Katika mfalme ni nguvu ishukayo chini; katika kuhani, ni nguvu ipandayo juu, ishindayo mbele za Mungu. Katika Kuhani-Mfalme wetu mbarikiwa, Yesu Kristo, nguvu ya kifalme imejengwa juu ya ile ya kikuhani ‘Aweza kuwaokoa kabisa, kwa sababu yu hai sikuzote ili awaombee.’ Ndani yetu sisi, makuhani na wafalme wake, si vinginevyo: ni katika maombezi ambako Kanisa litapata na kutumia nguvu yake iliyo kuu kabisa, ambako kila mmoja wa Kanisa atathibitisha uzao wake katika Israeli, ambaye kama mkuu alishindana na Mungu na binadamu, akashinda.

Ni kwa hisia nzito kwamba nafasi na nguvu ya maombi katika maisha ya Kikristo yaeleweka kidogo mno, ndipo kitabu hiki kimeandikwa. Nina hakika kwamba maadamu twaangalia maombi hasa kama njia ya kuyadumisha maisha yetu wenyewe ya Kikristo, hatutajua kikamili yale yaliyokusudiwa kuwa. Lakini tutakapojifunza kuyaona kama sehemu iliyo juu kabisa ya kazi tuliyokabidhiwa, shina na nguvu ya kazi nyingine zote, tutaona kwamba hakuna jambo tunalolihitaji kulijifunza na kulizoea kama ufundi wa kuomba kwa haki. Ikiwa nimefanikiwa kwa kadiri yoyote kuonyesha mafundisho yaendeleayo ya Bwana wetu kuhusu maombi, na jinsi ahadi za ajabu za usiku ule wa mwisho (Yohana 14:16) zinavyoelekea waziwazi kwenye kazi tutakazozitenda kwa Jina lake, kwenye kazi zilizo kubwa zaidi, na kwenye kuzaa matunda mengi, sote tutakiri kwamba ni pale tu Kanisa lijitoapo kwa kazi hii takatifu ya maombezi ndipo tunaweza kutazamia nguvu ya Kristo kujidhihirisha kwa niaba yake. Ni ombi langu kwamba Mungu akitumie kitabu hiki kidogo kuweka wazi zaidi kwa baadhi ya watoto wake nafasi ile ya ajabu ya nguvu na uvutano ambayo anawangoja waikalie, na ambayo ulimwengu uliochoka nao unaungoja.

Kuhusiana na hili kuna kweli nyingine iliyonijia kwa uwazi wa ajabu nilipojifunza mafundisho ya Yesu juu ya maombi. Ni hii: kwamba Baba angoja kusikia kila ombi la imani, ili atupe lolote tutakalo, na lolote tuombalo kwa jina la Yesu. Tumezoea mno kuupunguza upendo wa ajabu na ahadi kubwa za Mungu wetu, hata hatuwezi kuyasoma maneno ya Bwana wetu yaliyo sahili na wazi kabisa bila vifungu vya masharti ambavyo kwavyo twayahifadhi na kuyafafanua. Kama kuna jambo moja ninaloona Kanisa lahitaji kujifunza, ni kwamba Mungu akusudia maombi yawe na jibu, na kwamba halijaingia moyoni mwa mwanadamu kufikiri jambo ambalo Mungu atamtendea mtoto wake ajitoaye kuamini kwamba ombi lake litasikiwa. Mungu husikia maombi; hii ni kweli inayokubaliwa na wote, lakini ni wachache mno waelewao maana yake, au kuionja nguvu yake. Ikiwa niliyoyaandika yatamsukuma msomaji wangu kuyaendea maneno ya Bwana, na kuzitwaa ahadi zake za ajabu kwa unyofu na kwa jinsi zilivyo halisi, kusudi langu limetimizwa.

Kisha jambo moja tu zaidi. Maelfu katika miaka hii ya karibuni wamepata baraka isiyoelezeka kwa kujifunza jinsi Kristo alivyo maisha yetu kwa ukamilifu, na jinsi ajitwikavyo kuwa na kutenda ndani yetu yote tuyahitajiyo. Sijui kama bado tumejifunza kuitumia kweli hii katika maisha yetu ya maombi. Wengi hulalamika kwamba hawana nguvu ya kuomba kwa imani, kuomba ile sala yenye matokeo ifaayo sana. Ujumbe ningependa kuwaletea ni kwamba Yesu mbarikiwa angoja, atamani, kuwafundisha jambo hili. Kristo ndiye maisha yetu: mbinguni yu hai sikuzote ili aombe; maisha yake ndani yetu ni maisha yaombayo daima, tukimtumaini yeye tu kwa hilo. Kristo hutufundisha kuomba si kwa mfano tu, kwa mafundisho, kwa amri, kwa ahadi, bali kwa kujionyesha kwetu YEYE MWENYEWE, Mwombezi aishiye milele, kuwa Maisha yetu. Ni tuaminipo hili, na kwenda kukaa ndani yake kwa ajili ya maisha yetu ya maombi pia, ndipo hofu zetu za kutoweza kuomba kwa haki zitatoweka, nasi kwa furaha na kwa ushindi tutamtumaini Bwana wetu atufundishe kuomba, awe yeye mwenyewe maisha na nguvu ya maombi yetu.

Mungu na atufumbue macho tuone huduma takatifu ya maombezi ambayo, kwa kuwa ukuhani wa kifalme wake, tumetengwa kwa ajili yake. Na atupe moyo mpana na ulio imara kuamini uvutano wenye nguvu ambao maombi yetu yaweza kuutenda. Na hofu yote juu ya kuweza kwetu kuutimiza wito wetu na itoweke tunapomwona Yesu, aishiye milele ili aombe, aishiye ndani yetu ili aombe, na aliye mdhamini wa maisha yetu ya maombi.

ANDREW MURRAY

WELLINGTON, 28^th Oktoba 1885