Mimbari Iombayo Huzaa Viti vya Waombao

Naona ya kuwa maombi yangu yana nguvu zaidi ya Ibilisi mwenyewe; kama isingekuwa hivyo, Luther angepatwa na mambo tofauti zamani sana kabla ya haya. Lakini watu hawataki kuona na kukiri maajabu makuu au miujiza aitendayo Mungu kwa ajili yangu. Kama ningeacha kuomba hata siku moja tu, ningepoteza sehemu kubwa ya moto wa imani.—Martin Luther

Mitume waliweza kupata mng’aro tu wa umuhimu mkuu wa maombi kabla ya Pentekoste. Lakini kuja kwa Roho na kujaza kwake siku ya Pentekoste kuliyainua maombi hata nafasi yake iliyo hai na yenye kuamuru yote katika Injili ya Kristo. Mwito wa maombi sasa kwa kila mtakatifu ndio mwito wa Roho ulio na sauti kuu na wa dharura kuliko yote. Utauwa wa utakatifu hufanywa, na husafishwa, na hukamilishwa, kwa maombi. Injili husonga kwa mwendo wa polepole na woga wakati watakatifu hawako katika maombi yao asubuhi na jioni na kwa muda mrefu.

Wako wapi viongozi wa Kikristo wawezao kuwafundisha watakatifu wa kisasa jinsi ya kuomba na kuwaweka katika kufanya hivyo? Je, twajua ya kuwa twainua kizazi cha watakatifu wasio na maombi? Wako wapi viongozi wa kitume wawezao kuwaweka watu wa Mungu katika kuomba? Na waje mbele wakaifanye kazi, nayo itakuwa kazi kuu kuliko zote iwezayo kufanywa. Kuongezeka kwa vifaa vya elimu na kuongezeka kukuu kwa nguvu ya fedha kutakuwa laana kali kuliko zote kwa dini kama havitakuwa vimetakaswa kwa maombi mengi na bora zaidi kuliko tunavyofanya. Maombi zaidi hayatakuja kama jambo la kawaida. Kampeni ya mfuko wa karne ya ishirini au ya thelathini haitasaidia maombi yetu bali itazuia kama hatutakuwa waangalifu. Hakuna cho chote ila juhudi mahususi kutoka uongozi uombao kitakachofaa. Wakuu sharti waongoze katika juhudi ya kitume ya kuukita umuhimu ulio hai na uhalisi wa maombi katika moyo na maisha ya Kanisa. Hakuna ila viongozi waombao wawezao kuwa na wafuasi waombao. Mitume waombao watazaa watakatifu waombao. Mimbari iombayo itazaa viti vya waombao. Twahitaji sana mtu awezaye kuwaweka watakatifu katika shughuli hii ya kuomba. Sisi si kizazi cha watakatifu waombao. Watakatifu wasio na maombi ni kundi la kimaskini la watakatifu wasio na moto wala uzuri wala nguvu za watakatifu. Ni nani atakayeliziba pengo hili? Atakuwa mkuu kuliko wote wa wana-marekebisho na mitume, awezaye kuliweka Kanisa katika kuomba.

Twaliweka kama hukumu yetu iliyo makini kuliko zote kwamba haja kuu ya Kanisa katika zama hizi na zama zote ni watu wa imani yenye kuamuru namna hiyo, wa utakatifu usio na waa namna hiyo, wa nguvu ya kiroho iliyo dhahiri na bidii iteketezayo namna hiyo, hata maombi yao, na imani yao, na maisha yao, na huduma yao yatakuwa ya namna iliyo na msingi na yenye ushindani kiasi cha kufanya mapinduzi ya kiroho yatakayounda vipindi katika maisha ya mtu binafsi na ya Kanisa.

Hatumaanishi watu wanaozua msisimko wa kushtua kwa mbinu za kigeni, wala wale wavutao kwa burudani ipendezayo; bali watu wawezao kutikisa mambo, na kufanya mapinduzi kwa kuhubiri Neno la Mungu na kwa nguvu za Roho Mtakatifu, mapinduzi yaugeuzayo mkondo mzima wa mambo.

Uwezo wa asili na faida za elimu havihesabiwi kuwa sababu katika jambo hili; bali uwezo wa kuamini, na uwezo wa kuomba, na nguvu ya kujiweka wakfu kwa ukamili, na uwezo wa kujiona mdogo, na kujipoteza kabisa katika utukufu wa Mungu, na shauku na kutafuta kusikoshiba na kuwapo daima kwa utimilifu wote wa Mungu—watu wawezao kuliwasha Kanisa moto kwa ajili ya Mungu; si kwa namna ya kelele na maonyesho, bali kwa joto kali na tulivu liyeyushalo na kusogeza kila kitu kwa ajili ya Mungu.

Mungu aweza kutenda maajabu kama aweza kumpata mtu anayefaa. Watu waweza kutenda maajabu kama waweza kumpata Mungu awaongoze. Ukirimu kamili wa roho iliyoupindua ulimwengu juu chini ungekuwa wa manufaa makubwa katika siku hizi za mwisho. Watu wawezao kutikisa mambo kwa nguvu kwa ajili ya Mungu, ambao mapinduzi yao ya kiroho yaugeuzao mwonekano mzima wa mambo, ndio haja ya Kanisa kila mahali.

Kanisa halijapata kuwa bila watu hawa; hulipamba historia yake; ndio miujiza idumuyo ya umungu wa Kanisa; kielelezo chao na historia yao ni chachu na baraka isiyokoma. Kuongezeka kwa idadi yao na nguvu yao kunapaswa kuwa maombi yetu.

Lile lililokwisha tendeka katika mambo ya kiroho laweza kutendeka tena, na kutendeka vema zaidi. Huu ndio ulikuwa mtazamo wa Kristo. Alisema, “Amin, amin, nawaambia, Yeye aniaminiye mimi, kazi nizifanyazo yeye naye atazifanya; naam, na kubwa kuliko hizo atafanya, kwa sababu mimi naenda kwa Baba.” Yaliyopita hayajamaliza uwezekano wala madai ya kutenda mambo makuu kwa ajili ya Mungu. Kanisa litegemealo historia yake iliyopita kwa miujiza yake ya nguvu na neema ni Kanisa lililoanguka.

Mungu awataka watu wateule—watu ambao nafsi na dunia vimewatoka kwa kusulubiwa kukali, kwa ufilisi ulioiharibu kabisa nafsi na dunia hata pasiwe na tumaini wala tamaa ya kupona; watu ambao kwa ufilisi huu na kusulubiwa huku wamemgeuzia Mungu mioyo mikamilifu.

Na tuombe kwa bidii ili ahadi ya Mungu kwa maombi ipate kutimizwa kupita kiasi.