Hatua ya Kwanza

Wakati huu Kristiana alikuwa amekwisha kuanza safari yake, na Rehema akaenda pamoja naye; hivyo walipokuwa wakienda, watoto wake nao wakiwapo, Kristiana akaanza kunena. Naye akasema, Rehema, naliona hili kuwa fadhili nisiyoitazamia, kwamba wewe utoke nje pamoja nami kunisindikiza kidogo njiani.

Rehema: Ndipo Rehema kijana akasema, (kwa maana alikuwa bado mchanga,) Kama ningalidhani ya kuwa kwenda pamoja nawe kutakuwa na maana, nisingalisogea tena karibu na mji huu kamwe.

Kristiana: Vema, Rehema, akasema Kristiana, tia kura yako pamoja nami; najua vyema mwisho wa safari yetu utakavyokuwa; mume wangu yuko mahali asingependa kuondoka hata kwa dhahabu yote ya machimbo ya Hispania. Wala hutakataliwa, ijapokuwa unakwenda kwa mwaliko wangu tu. Mfalme, aliyenituma mimi na watoto wangu, ni yeye apendezwaye na rehema. Zaidi ya hayo, kama utataka, nitakuajiri, nawe utakwenda pamoja nami kama mtumishi wangu. Lakini tutakuwa na vitu vyote shirika kati yako na mimi; wewe fuatana nami tu.

Rehema: Lakini nitahakikishiwaje ya kuwa mimi nami nitapokelewa? Kama ningalikuwa na tumaini hili kutoka kwa yule awezaye kuniambia, nisingalisita hata kidogo, bali ningalikwenda, nikisaidiwa na Yeye awezaye kusaidia, ijapokuwa njia ingalikuwa yenye kuchosha kadiri gani.

Kristiana: Vema, Rehema mpenzi, nitakuambia utakalofanya; fuatana nami hata Lango Jembamba, na huko nitakuulizia zaidi; na kama huko hutapata moyo wa kutiwa nguvu, nitaridhika kwamba urudi mahali pako; tena nitakulipa kwa ajili ya wema wako uonyeshao kwangu na kwa watoto wangu, kwa kutusindikiza njiani kama ufanyavyo.

Rehema: Basi nitakwenda huko, nami nitakubali litakalofuata; na Bwana na akijalie ya kuwa kura yangu ianguke huko, kadiri Mfalme wa mbinguni atakavyoelekeza moyo wake juu yangu.

Ndipo Kristiana akafurahi moyoni, si kwa sababu alikuwa na mwenzake tu, bali pia kwa kuwa amemshawishi kijana huyu maskini kuupenda wokovu wake mwenyewe. Basi wakaendelea pamoja, na Rehema akaanza kulia. Ndipo Kristiana akasema, Kwa nini dada yangu analia hivi?

Rehema: Ole! akasema, ni nani awezaye kuacha kuomboleza, atakayefikiri sawasawa hali na taabu waliyomo jamaa zangu maskini, ambao bado wamesalia katika mji wetu wenye dhambi? Na lifanyalo huzuni yangu kuwa nzito zaidi ni hili, kwamba hawana mwalimu, wala hakuna yeye awezaye kuwaambia yatakayokuja.

Kristiana: Huruma yawapasa wasafiri; nawe unawalilia rafiki zako, kama vile Mkristo wangu mwema alivyonililia mimi aliponiacha; aliomboleza kwa kuwa mimi sikutaka kumsikiliza wala kumjali; lakini Bwana wake, aliye Bwana wetu pia, alikusanya machozi yake, na kuyatia katika chupa yake; na sasa mimi na wewe, na hawa wachanga wangu wapendwa, tunavuna matunda na faida yake. Nataraji, Rehema, ya kuwa machozi yako haya hayatapotea; kwa maana kweli imesema, ya kwamba “wapandao kwa machozi watavuna kwa furaha.” Na “yeye aendaye zake akilia, akichukua mbegu za thamani, bila shaka atarudi tena kwa furaha, akichukua miganda yake.” Zaburi 126:5,6.

Ndipo Rehema akasema,

“Aliye Mbarikiwa zaidi na awe kiongozi wangu,

Kama ikiwa ni mapenzi yake mabarikiwa,

Hata langoni pake, hata zizini mwake,

Juu hata kilima chake kitakatifu.

Wala asiniache kamwe mimi

Nikengeuke, wala kugeukia kando

Kutoka neema yake ya bure na njia zake takatifu,

Lolote litakalonipata.

Na awakusanye wale walio wangu

Niliowaacha nyuma yangu;

Bwana, uwafanye waombe wapate kuwa wako,

Kwa moyo wao wote na akili zao.”

Basi rafiki yangu mzee akaendelea, akasema, Lakini Kristiana alipofika katika Bwawa la Kukata-Tamaa, akaanza kusimama kwa mashaka; Kwa maana, akasema, hapa ndipo mahali ambapo mume wangu mpendwa alikaribia kusongwa kwa matope. Akatambua pia, ya kuwa pamoja na amri ya Mfalme ya kufanya mahali hapa kuwa pema kwa wasafiri, hata hivyo palikuwa pabaya zaidi kuliko zamani. Basi nikauliza kama hilo lilikuwa kweli. Naam, akasema yule mzee, ni kweli sana; kwa maana wako wengi wanaojidai kuwa vibarua wa Mfalme, na wasemao ya kuwa wamekusudia kutengeneza njia kuu za Mfalme, ambao huleta uchafu na mavi badala ya mawe, na hivyo huharibu badala ya kutengeneza. Basi hapa Kristiana, pamoja na wavulana wake, akasimama. Lakini Rehema akasema, Njoo, na tuthubutu; ila na tuwe waangalifu. Ndipo wakaziangalia sana hatua zao, wakajitahidi kuvuka kwa kupepesuka.

Walakini Kristiana alikaribia kuzama, wala si mara moja au mbili. Basi mara tu walipokwisha kuvuka, wakadhani ya kuwa walisikia maneno yaliyowaambia, “Heri yule aliyesadiki; kwa maana yatatimizwa yale aliyoambiwa na Bwana.” Luka 1:45.

Ndipo wakaendelea tena; na Rehema akamwambia Kristiana, kama ningalikuwa na sababu njema ya kutumaini kupokelewa kwa upendo katika Lango Jembamba kama ulivyo nawe, nadhani hakuna Bwawa la Kukata-Tamaa lingalinivunja moyo.

Vema, akasema yule mwingine, wewe unajua kidonda chako, nami najua changu; na, rafiki mwema, sisi sote tutapata mabaya ya kutosha kabla ya kufika mwisho wa safari yetu. Kwa maana laweza kudhaniwa kwamba watu wanaokusudia kufikia utukufu bora namna hii kama tufanyavyo sisi, na ambao huonewa wivu kwa furaha hiyo kama tuonewavyo sisi, wasingekutana na hofu na mitego ile, na taabu na mateso yale ambayo wale watuchukiao waweza kutushambulia nayo?

Na sasa Bwana Ufahamu akaniacha nimalize ndoto yangu peke yangu. Basi, nikaona kama vile namwona Kristiana, na Rehema, na wale wavulana, wote wakikwea hata langoni; na walipofika, wakajishughulisha na majadiliano mafupi juu ya jinsi watakavyofanya kuita langoni, na yatakayosemwa kwa yeye atakayewafungulia; basi ikaamuliwa, kwa kuwa Kristiana ndiye aliyekuwa mkubwa, kwamba yeye abishe hodi ili kupata kuingia, na kwamba yeye anene na yule atakayefungua, kwa niaba ya wenzake. Basi Kristiana akaanza kubisha hodi, na kama vile mume wake maskini alivyofanya, akabisha na kubisha tena. Lakini badala ya mtu ye yote kujibu, wote wakadhani ya kuwa walisikia kama mbwa akiwabwekea; mbwa, tena mkubwa pia; na jambo hili likawaogofya wanawake na watoto. Wala hawakuthubutu kwa muda kubisha tena, kwa hofu ya kwamba yule mbwa mkubwa asije akawarukia. Basi, kwa hiyo, walikuwa wakiyumbayumba sana nia zao, wala hawakujua la kufanya; kubisha hawakuthubutu, kwa hofu ya mbwa; kurudi nyuma hawakuthubutu, kwa hofu ya kwamba mlinzi wa lango lile asije akawaona wakienda hivyo, akakasirika nao; mwishowe wakaazimu kubisha tena, wakabisha kwa nguvu zaidi kuliko mwanzo. Ndipo mlinzi wa lango akasema, Ni nani yuko hapo? Basi mbwa akaacha kubweka, naye akawafungulia.

Ndipo Kristiana akainama chini kwa unyenyekevu, akasema, Bwana wetu asikasirike na wajakazi wake, kwa kuwa tumebisha hodi katika lango lake la kifalme. Ndipo mlinzi akasema, Mmetoka wapi? Nanyi mnataka nini?

Kristiana akajibu, Tumetoka mahali ambapo Mkristo alitoka, tena kwa shughuli ile ile kama yeye; yaani, ili, kama itakupendeza, tukubaliwe kwa neema kupitia lango hili kuingia katika njia iendayo hata Mji wa Mbinguni. Nami najibu, Bwana wangu, tena, ya kuwa mimi ni Kristiana, aliyekuwa mke wa Mkristo, ambaye sasa amekwisha kwenda juu.

Kwa hayo mlinzi wa lango akastaajabu, akisema, Je! sasa amekuwa msafiri yule ambaye muda mfupi uliopita aliyachukia maisha hayo? Ndipo akainamisha kichwa chake, akasema, Naam; na hivyo ndivyo walivyo hawa wachanga wangu wapendwa pia.

Ndipo akamshika mkono akamwingiza ndani, akasema tena, Waacheni watoto wadogo waje kwangu; na kwa hayo akalifunga lango. Alipokwisha kufanya hivyo, akamwita mpiga tarumbeta aliyekuwa juu, penye lango, ili amkaribishe Kristiana kwa vigelegele, na sauti ya tarumbeta kwa furaha. Basi yule akatii, akapiga, akaijaza hewa kwa nyimbo zake za kupendeza.

Basi wakati huu wote Rehema maskini alikuwa akisimama nje, akitetemeka na kulia, kwa hofu ya kwamba amekataliwa. Lakini Kristiana alipokwisha kupata kuingia yeye mwenyewe na wavulana wake, ndipo akaanza kumwombea Rehema.

Kristiana: Naye akasema, Bwana wangu, ninaye mwenzangu ambaye bado anasimama nje, aliyekuja huku kwa sababu ile ile kama mimi; ni mtu aliyevunjika moyo sana, kwa kuwa anakuja, kama adhaniavyo, pasipo kuitwa; ambapo mimi niliitwa na Mfalme wa mume wangu nije.

Basi Rehema akaanza kukosa saburi sana, na kila dakika ilikuwa kwake ndefu kama saa nzima; kwa hiyo akamzuia Kristiana asiendelee kumwombea zaidi, kwa kubisha hodi langoni yeye mwenyewe. Naye akabisha kwa sauti kubwa hata akamshtua Kristiana. Ndipo mlinzi wa lango akasema, Ni nani yuko hapo? Naye Kristiana akasema, Ni rafiki yangu.

Basi akalifungua lango, akachungulia nje, lakini Rehema alikuwa ameanguka chini nje amezimia, kwa maana alizirai, na aliogopa ya kuwa hakuna lango litakalofunguliwa kwa ajili yake.

Ndipo akamshika mkono, akasema, Kijana, nakuambia inuka.

Ee, bwana, akasema, ninazimia; hakuna uzima uliobaki ndani yangu ila kidogo. Lakini akajibu, ya kwamba mmoja alisema wakati mmoja, “Roho yangu iliponizimia ndani yangu nalimkumbuka Bwana; na kuomba kwangu kulikufikia, hata hekaluni mwako kitakatifu.” Yona 2:7. Usiogope, bali simama kwa miguu yako, uniambie kwa nini umekuja.

Rehema: Nimekuja kwa ajili ya kile ambacho sikualikwa kamwe, kama rafiki yangu Kristiana alivyoalikwa. Wake ulitoka kwa Mfalme, na wangu ulitoka kwake tu. Kwa hiyo naogopa ya kuwa najithubutisha.

Mlinzi: Je! yeye alikutaka wewe uje pamoja naye mahali hapa?

Rehema: Naam; na, kama Bwana wangu aonavyo, nimekuja. Na kama kuna neema na msamaha wa dhambi wo wote uliosalia, naomba ya kwamba mjakazi wako maskini apate kuushiriki.

Ndipo akamshika mkono tena, akamwingiza ndani polepole, akasema, Mimi nawaombea wote wanaoniamini, kwa njia yo yote wanayokuja kwangu. Kisha akawaambia wale waliokuwa wamesimama karibu, Leteni kitu na kumpa Rehema anuse, ili kuzuia kuzimia kwake; basi wakamletea kifungu cha manemane, na baada ya kitambo kidogo akahuishwa.

Na sasa Kristiana na wavulana wake, na Rehema, wakapokelewa na Bwana mwanzoni mwa njia, akasema nao kwa fadhili. Ndipo wakamwambia tena, Tunasikitika kwa ajili ya dhambi zetu, nasi twamsihi Bwana wetu atusamehe, na kutuarifu zaidi tutakayopaswa kufanya.

Nakutolea msamaha, akasema, kwa neno na kwa tendo; kwa neno katika ahadi ya msamaha, kwa tendo katika njia niliyoupata. Upokee wa kwanza toka midomoni mwangu kwa busu, na ule mwingine kama utakavyofunuliwa. Wimbo Ulio Bora 1:2; Yohana 20:20.

Basi nikaona katika ndoto yangu, ya kwamba aliwaambia maneno mema mengi, ambayo kwayo walifurahishwa sana. Tena akawapandisha hata juu ya lango, akawaonyesha ni kwa tendo gani waliokolewa; akawaambia pamoja na hayo, ya kuwa maono yale wangeyaona tena watakapokuwa wakiendelea njiani, kuwa faraja yao.

Basi akawaacha kwa kitambo katika chumba cha mapumziko cha kiangazi kilichokuwa chini, ambapo wakaanza kuzungumza wao kwa wao; na hivyo ndivyo Kristiana alivyoanza. Ee, jinsi ninavyofurahi kwa kuwa tumeingia humu.

Rehema: Nawe wapaswa vema; lakini mimi, kuliko wote, ninayo sababu ya kurukaruka kwa furaha.

Kristiana: Wakati mmoja nilidhani, nilipokuwa nimesimama langoni, kwa sababu nilikuwa nimebisha wala hakuna aliyejibu, ya kuwa taabu yetu yote imepotea bure, hasa yule mbwa mbaya alipotubwekea kwa nguvu namna ile.

Rehema: Lakini hofu yangu mbaya kupita zote ilikuwa baada ya kukuona wewe umepokelewa katika fadhili zake, na mimi nimeachwa nyuma. Sasa, nikadhani, limetimizwa lile lililoandikwa, “Wanawake wawili watakuwa wakisaga penye kinu; mmoja atatwaliwa, na mmoja ataachwa.” Mathayo 24:41. Nilijitahidi sana nisipige kelele, nikisema, Nimeangamia! Nami niliogopa kubisha tena; lakini nilipotazama juu penye yale yaliyoandikwa juu ya lango, nilijipa moyo. Tena nilidhani ya kuwa sina budi ama kubisha tena, ama kufa; basi nikabisha, lakini siwezi kueleza jinsi gani, kwa maana roho yangu wakati ule ilikuwa ikishindana kati ya uzima na mauti.

Kristiana: Je! huwezi kueleza jinsi ulivyobisha? Nina hakika mabishano yako yalikuwa na bidii hata sauti yake yenyewe ikanishtua; nilidhani sijapata kusikia mabishano kama hayo katika maisha yangu yote; nilidhani utaingia kwa mkono wa nguvu, au kuuteka ufalme kwa nguvu. Mathayo 11:12.

Rehema: Ole! kuwa katika hali yangu, ni nani aliyekuwa hivyo asingeweza kufanya vivyo hivyo? Uliona ya kuwa mlango ulikuwa umefungwa juu yangu, na palikuwa na mbwa mkali sana pale karibu. Ni nani, nasema, aliyekuwa mwoga wa moyo kama mimi, asingebisha kwa nguvu zake zote? Lakini niambie, Bwana wangu alisema nini juu ya ufidhuli wangu? Je! hakunikasirikia?

Kristiana: Aliposikia mshindo wako wenye kelele, alitabasamu tabasamu la ajabu lisilo na hatia; naamini ulilolifanya lilimpendeza sana, kwa maana hakuonyesha dalili yo yote ya kinyume. Lakini nastaajabu moyoni mwangu kwa nini anaweka mbwa namna hiyo; kama ningalijua hayo mbeleni, nisingalikuwa na moyo wa kutosha wa kujithubutisha namna hii. Lakini sasa tumeingia, tumeingia, nami nafurahi kwa moyo wangu wote.

Rehema: Nitauliza, kama utakubali, mara ijayo atakaposhuka, kwa nini anaweka mbwa mchafu namna hiyo uani mwake; nataraji hatalichukua vibaya.

Fanya hivyo, wakasema watoto, umsihi amnyonge; kwa maana tunaogopa atatuuma tutakapoondoka hapa.

Basi mwishowe akawashukia tena, na Rehema akaanguka chini kifudifudi mbele yake, akasujudu, akasema, “Bwana wangu na aikubali dhabihu ya sifa ninayomtolea sasa kwa ndama za midomo yangu.”

Basi akamwambia, Amani iwe kwako; simama. Lakini akaendelea kuwa kifudifudi, akasema, “Wewe u mwenye haki, Ee Bwana, ninaposhindana nawe; lakini na niseme nawe katika habari za hukumu zako.” Yeremia 12:1. Mbona unaweka mbwa mkali namna hii uani mwako, ambaye kwa kumwona wanawake na watoto kama sisi wako tayari kutoroka langoni pako kwa hofu?

Akajibu akasema, Mbwa yule ana bwana mwingine; naye afugwa ndani ya shamba la mtu mwingine, ila wasafiri wangu husikia kubweka kwake; ni wa ngome ile uionayo pale mbali, lakini aweza kuja hata kuta za mahali hapa. Amewaogofya wasafiri wengi wanyofu kutoka hali mbaya hata iliyo bora, kwa sauti kuu ya kunguruma kwake. Naam, yeye amilikiye hamfugi kwa nia njema yo yote kwangu mimi wala kwa walio wangu, bali kwa kusudi la kuwazuia wasafiri wasije kwangu, na ili wapate kuogopa kuja na kubisha hodi langoni hapa ili kuingia. Wakati mwingine pia amevunja kifungo, akawaudhi baadhi ya wale niliowapenda; lakini kwa sasa navumilia yote. Tena mimi nawapa wasafiri wangu msaada kwa wakati wake, hata wasitiwe katika uwezo wake, kuwatenda kadiri tabia yake ya kimbwa ingemsukuma. Lakini, uliye mnunuliwa wangu, nadhani, kama ungalijua kadiri gani mbeleni, usingaliogopa mbwa. Ombaomba waendao mlango kwa mlango, badala ya kupoteza sadaka wanayoitazamia, hujihatarisha kwa makelele, na kubweka, na kuumwa pia na mbwa; je! mbwa, mbwa aliye uani mwa mtu mwingine, mbwa ambaye kubweka kwake mimi nakugeuza kuwa faida ya wasafiri, atamzuia mtu ye yote asije kwangu? Mimi nawaokoa na simba, na mpenzi wangu na uwezo wa mbwa. Zaburi 22:21,22.

Rehema: Ndipo Rehema akasema, Naungama ujinga wangu; nilinena nisiyoyafahamu; nakiri ya kuwa wewe hufanya mambo yote vema.

Kristiana: Ndipo Kristiana akaanza kunena juu ya safari yao, na kuuliza habari za njia. Basi akawalisha na kuwaosha miguu yao, akawaweka katika njia ya nyayo zake, kama vile alivyokuwa amemtendea mume wake kwanza.