Hatua ya Pili na ya Tatu ya Upendo

KWANZA, basi, mwanadamu ana upendo fulani kwa Mungu kwa ajili yake mwenyewe, si kwa ajili ya Mungu. Tayari ni jambo la maana kuhisi mipaka ya uwezo wake mwenyewe, kujua asichoweza kufanya bila msaada wa Mungu, na kudumu katika uhusiano mwema na Yeye anayeutegemeza uhai na nguvu zake. Lakini, iwapo msururu wa misiba utampata na kumlazimisha kumwendea Mungu daima, naye bado apate msaada anaouhitaji, moyo wake lazima uwe wa shaba au marmari usiweze hatimaye kuguswa na wema wa msaidizi wake, usianze mwishowe kumpenda Yeye kwa ajili yake Mwenyewe. Wingi wa majaribu na utulete mara kwa mara miguuni pa Mungu; hakika haiwezekani ila tuanze kumjua Yeye, na, tukimjua, tufikie kutambua utamu wake. Punde si punde inafuata kwamba twaletwa kumpenda Yeye ipasavyo, zaidi sana kwa ajili ya utamu na uzuri tunaoupata ndani yake kuliko kwa ajili ya faida yetu wenyewe. Kama walivyosema Wasamaria kwa yule mwanamke: “ Sasa twaamini, si kwa sababu ya maneno yako; kwa maana sisi wenyewe tumemsikia, na twajua ya kuwa hakika huyu ndiye Mwokozi wa ulimwengu.” Vivyo hivyo, twafikia kuiambia nafsi yetu ya kimaumbile: Si kwa sababu yako sisi twampenda Bwana, bali sisi wenyewe tumeonja, na tumeona jinsi alivyo mtamu. Mahitaji ya maisha haya ni namna fulani ya lugha itangazayo kwa furaha kuu na shukrani baraka ambazo yametufundisha thamani yake. Jambo hili likishajifunzwa, ni rahisi vya kutosha kuitii amri na kumpenda jirani yetu kama nafsi yetu; kwa maana, tukimpenda Mungu kweli, twapenda vyote vilivyo vyake, na tangu sasa ni rahisi kuinyenyekea amri: “ Takaseni mioyo yenu katika kuutii upendo, kwa upendo wa kidugu.” Twapaswa kuitimiza kwa hiari amri iliyo ya haki hivyo, tena amri iliyojaa faida kwa sababu haitafuti manufaa binafsi. Ni upendo ulio safi kabisa, kwa maana waonyeshwa tu katika matendo matakatifu na kweli; ulio wa haki kabisa, kwa maana warudisha kile unachokipokea. Yeyote apendaye kwa upendo huu, hupenda kama apendwavyo, wala hatafuti tena mambo yake mwenyewe, bali mambo ya Yesu Kristo, kama vile Yesu Kristo alivyotutafuta sisi. Humu twaona upendo kama ule uliosema, “ Mshukuruni Bwana kwa kuwa ni mwema.” Yeye ampendaye Mungu kwa sababu ni mwema, si kwake yeye, bali ndani yake Mwenyewe, humpenda Mungu kweli kwa ajili ya Mungu, wala si kama yule ambaye Maandiko yasema juu yake: “ Atakusifu utakapomtendea mema.”