Wajibu wa Kumpenda Mungu

YOTE yaliyokwisha semwa yadhihirisha wazi kabisa wajibu wa kumpenda Mungu, na haki yake juu ya upendo wetu. Je, hali ikoje kwa asiyeamini? Kama vile asivyomjua Mungu Mwana, ndivyo pia asivyomfahamu Baba wala Roho Mtakatifu; na kama asivyompa utukufu Mwana, vivyo hivyo hamtukuzi Baba aliyemtuma, wala Roho Mtakatifu, kipawa cha wote wawili. Anamfahamu Mungu kwa kiasi kidogo kuliko tunavyomfahamu sisi, kwa hiyo si ajabu kwamba impasa kumpenda kwa kiasi kidogo zaidi. Lakini kuna jambo moja ambalo hakika analijua; ya kwamba kwake yeye aliyemuumba, anadaiwa nafsi yake mwenyewe kwa ukamilifu. Lakini itakuwaje kwangu mimi? Kwa maana siwezi kudai kutokujua. Najua ya kuwa Mungu aliniumba pasipo ustahili wowote wangu, ya kuwa hutosheleza mahitaji yangu yote, hunifariji kwa huruma, na hunitawala kwa uangalizi wa bidii; wala si hivyo tu, bali najua tena ya kuwa yeye ni Mkombozi wangu, Mwanzilishi wa wokovu wangu wa milele, hazina yangu na utukufu wangu. Kama ilivyoandikwa: “Kwake kuna ukombozi tele;” “Kwa damu yake mwenyewe aliingia mara moja katika Patakatifu pa Patakatifu, akiisha kupata ukombozi wa milele.” Hutulinda salama, kama ilivyoandikwa: “Bwana anazijua siku za wanyofu, na urithi wao utakuwa wa milele.” Hututajirisha, kama alivyosema: “Kipimo kizuri, kilichoshindiliwa na kusukwasukwa hata kumwagika, watawapa vifuani mwenu;” na mahali pengine: “Jicho halikuona, Ee Mungu, mambo uliyowaandalia wanaokungoja.” Hutujaza utukufu, kama asemavyo Mtume: “Tunamngojea Mwokozi, Bwana wetu Yesu Kristo, atakayeubadili mwili wetu, ulio duni na hafifu sasa, na kuufanya ufanane na wake mwenyewe, uliojaa utukufu.” Na tena: “Mateso ya wakati huu wa sasa hayastahili kulinganishwa na utukufu utakaofunuliwa kwetu;” na wakati huu wa sasa wa dhiki ya ulimwengu huu (mfupi hivyo, wenye kupita upesi hivyo) hutuzalia (ikiwa tu kwa kuyadharau yanayoonekana twakaza macho yetu juu ya yasiyoonekana) “utukufu wa milele usio na kifani.”

Kwa ajili ya haya yote, nimlipe nini Bwana? Akili na sheria ya Asili vyote pamoja vyanifunga kwa uthabiti nijitoe kwake mwenyewe bila kugawanyika, yeye ambaye kwake ninashikilia yote niliyo nayo, na kuutoa utu wangu wote pia katika kumpenda yeye. Na imani yanifunulia ya kuwa nalazimika kumpenda kuliko ninavyoipenda nafsi yangu mwenyewe, kadiri ninavyozidi kufahamu jinsi ninavyodaiwa na ukarimu wake si kila nilicho tu, bali pia zaidi ya hayo kipawa cha nafsi yake mwenyewe.

Lakini na tutafakari ya kuwa, kabla siku ya imani ya Kikristo haijaja, kabla Mungu hajavaa mwili wetu na kufa msalabani, kushuka kuzimu na kupaa kwa Baba, yaani, kabla utimilifu wa upendo wake kwetu haujaangaza, tangu zamani sana, mwanadamu alikuwa ameamriwa kumpenda Bwana Mungu wake kwa moyo wake wote, kwa nafsi yake yote, kwa nguvu zake zote, yaani, kwa utu wake wote, kwa upendo wote awezao, kama kiumbe kilichojaliwa akili na hiari. Je, ingekuwa dhuluma kwa Mungu kujidai mwenyewe kazi yake na vipawa vyake? Kwa nini kazi isimpende Mungu aliyeitengeneza, ikiwa imepokea pia uwezo wa kupenda; na kwa nini isimpende kwa nguvu zake zote, ikiwa ni kwa Mungu tu ndipo inamiliki nguvu yoyote? Tafakari pia ya kuwa mwanadamu si kwamba tu ameitwa kuwako kutoka katika hali ya kutokuwapo, pasipo dai lolote la kwanza, bali pia ameitwa hivyo ili ainuliwe kwenye hadhi ya juu. Hivyo tutaona wazi zaidi wajibu wetu wa kumpenda kikamilifu, na haki yake juu ya upendo wetu. Zaidi ya hayo, mwanadamu alipokuwa amezama hata kufikia kiwango cha wanyama waangamiao, je, Mungu hakuingilia kati kumrejesha na kumwokoa? Je, hii siyo ajabu ya wema wake na rehema yake? Kwa maana kwa dhambi tulikuwa tumeanguka kutoka hadhi ya uumbaji wetu, hata kuwa kama mnyama, kama ng’ombe alaye majani asiye na nuru ya akili. Ikiwa nadaiwa nafsi yangu yote na Muumba wangu, sitadaiwa nini kwa Mkombozi wangu, na Mkombozi wa namna hiyo! Ilikuwa kazi ndogo sana kuumba, kuliko kukomboa; kwa maana Mungu ilimpasa kunena neno tu na vitu vyote vikaumbwa; lakini kutengeneza anguko la kile ambacho neno moja kilikiumba, ni maajabu gani asiyopaswa kuyafanya, ni ukatili gani, la, ni fedheha gani, asizopaswa kuteswa!

Basi, nimlipe nini Bwana kwa yote aliyonitendea! Kwa kuumba, alinipa mimi kwangu mwenyewe; lakini alinirejesha kwangu mwenyewe alipojitoa nafsi yake kwangu: kwanza nimepewa kisha nimerejeshwa, nadaiwa nafsi yangu kwake mara mbili. Lakini, namdai Mungu nini kwa kipawa cha nafsi yake mwenyewe? Kama ningempa utu wangu wote mara elfu, hilo lingekuwa nini kwa kulinganisha na Mungu?