Mwalimu Pekee

“Ikawa alipokuwa mahali fulani akiomba, alipomaliza, mmoja wa wanafunzi wake akamwambia, ‘Bwana, tufundishe kusali, kama vile Yohana alivyowafundisha wanafunzi wake.’” Luka 11:1.

Wanafunzi walikuwa pamoja na Kristo nao walimwona akiomba. Walikuwa wamejifunza kuelewa kitu fulani juu ya uhusiano uliokuwako kati ya maisha yake ya ajabu mbele ya watu, na maisha yake ya siri ya maombi. Walikuwa wamejifunza kumwamini kuwa Bingwa katika sanaa ya maombi. Hakuna aliyeweza kuomba kama yeye. Kwa hiyo wakamjia kwa ombi hili, ‘Bwana, tufundishe kusali’ (Luka 11:1). Na baada ya miaka, wangetueleza kwamba yalikuwa machache mambo ya ajabu au yenye baraka zaidi aliyowafundisha kuliko masomo yake juu ya maombi. Na hata sasa hutokea, akiwa anaomba mahali fulani, wanafunzi wanaomwona akishughulika hivyo huhisi haja ya kurudia ombi lilo hilo, ‘Bwana, tufundishe kusali’ (Luka 11:1).

Kadiri tunavyokua katika maisha ya Kikristo, wazo na imani juu ya Bwana Mpendwa katika maombezi yake yasiyokoma huzidi kuwa ya thamani, na tumaini la kufanana na Kristo katika maombezi yake hupata mvuto mbele ya yale yasiyojulikana. Na tunapomwona akiomba, na kukumbuka kwamba hakuna awezaye kuomba kama yeye, wala hakuna awezaye kufundisha kama yeye, twahisi kwamba ombi la wanafunzi, ‘Bwana, tufundishe kusali,’ ndilo hasa tunalolihitaji.

Na tunapofikiri jinsi yote alivyo na alivyo navyo, jinsi yeye mwenyewe alivyo mali yetu hasa, jinsi yeye mwenyewe alivyo uzima wetu, twahakikishiwa kwamba yatupasa kuomba tu, naye atafurahi kutupokea katika ushirika wa karibu zaidi pamoja naye na kutufundisha kuomba kama yeye anavyoomba.

Njooni, ndugu zangu! Je, hatutamwendea Bwana Mbarikiwa na kumwomba aandikishe majina yetu pia upya katika shule ile ambayo huiweka wazi sikuzote kwa wale wanaotamani kuendelea na masomo yao katika sanaa ya Kimungu ya maombi na maombezi? Naam, na tumwambie Bwana leo hii, kama walivyofanya wao wakati ule, ‘Bwana, tufundishe kusali.’ Tunapotafakari, tutaona kwamba kila neno la ombi tunaloleta limejaa maana.

‘Bwana, tufundishe kusali.’ Naam, kusali. Hili ndilo tunalohitaji kufundishwa. Ingawa katika mianzo yake maombi ni rahisi kiasi kwamba hata mtoto dhaifu aweza kuomba, wakati huo huo ni kazi iliyo juu na takatifu kuliko zote ambazo mwanadamu aweza kupanda kwazo. Ni ushirika na Yeye asiyeonekana na aliye Mtakatifu zaidi. Nguvu za ulimwengu wa milele zimewekwa mikononi mwake. Ni kiini hasa cha dini ya kweli, mfereji wa baraka zote, siri ya nguvu na uzima. Si kwa ajili yetu tu, bali kwa ajili ya wengine, kwa ajili ya Kanisa, na kwa ajili ya ulimwengu. Ni katika maombi ambamo Mungu ametupa haki ya kumshika yeye na nguvu zake. Ni katika maombi ambamo ahadi zinangojea kutimizwa kwake, ufalme unangojea kuja kwake, na utukufu wa Mungu unangojea kufunuliwa kwake kwa ukamilifu. Kwa kazi hii yenye baraka, jinsi tulivyo wavivu na wasiofaa! Ni Roho wa Mungu peke yake awezaye kutuwezesha kuifanya vema. Jinsi tunavyodanganyika kwa haraka na kupumzika katika umbo la nje, hali nguvu hazipo.

Malezi yetu ya awali, mafundisho ya Kanisa, uvutano wa mazoea, msukumo wa hisia—jinsi mambo haya yanavyoongoza kwa urahisi kwenye maombi yasiyo na nguvu ya kiroho, yasiyofaa ila kidogo. Maombi ya kweli, yale yanayoshika nguvu za Mungu, yanayofaa sana, ambayo kwayo malango ya mbingu hufunguliwa kweli kweli—ni nani asingelia, Laiti kungekuwa na mtu wa kunifundisha jinsi ya kuomba! Yesu amefungua shule, ambamo huwazoeza waliokombolewa wake, hasa wale wanaoitamani, wale wanaotaka kuwa na nguvu katika maombi. Je, hatutaingia ndani yake kwa ombi hili, Bwana! ndilo hasa tunalohitaji kufundishwa! Ee, tufundishe kusali.

‘Bwana, tufundishe kusali.’ Naam, sisi, Bwana. Tumesoma katika Neno lako nguvu ambazo watu wako waaminio walizitumia wakati ule kuomba, na maajabu makubwa yaliyofanyika kwa kuyajibu maombi yao. Na ikiwa hili lilitokea chini ya Agano la Kale, katika kipindi cha maandalizi, si zaidi sana sasa, katika siku hizi za utimilifu, utawapa watu wako ishara hii ya hakika ya uwepo wako katikati yao? Tumesikia ahadi walizopewa mitume wako juu ya nguvu ya maombi katika jina lako, nasi tumeona jinsi walivyoionja kwa utukufu kweli yake. Twajua kwa hakika kwamba zaweza kuwa kweli kwetu sisi pia. Twasikia daima hata katika siku hizi ishara za utukufu za nguvu yako uzitoazo bado kwa wale wanaokutumaini kwa ukamilifu, Bwana! Hawa wote ni watu wenye tabia moja na sisi; tufundishe kusali vivyo hivyo.

Ahadi ni zetu, nguvu na karama za ulimwengu wa mbinguni ni zetu. Tufundishe kusali ili tupokee kwa wingi. Kwetu sisi pia umekabidhi kazi yako, katika maombi yetu pia kuja kwa ufalme wako kwategemea, katika maombi yetu pia utalitukuza jina lako; ‘Bwana, tufundishe kusali.’ Naam, sisi, Bwana; twajitoa wenyewe kama wanafunzi; twataka kweli kufundishwa na wewe. ‘Bwana, tufundishe kusali.’

‘Bwana, tufundishe kusali.’ Naam, sasa twahisi haja ya kufundishwa kusali. Mwanzoni, hakuna kazi ionekanayo rahisi hivyo; baadaye, hakuna iliyo ngumu zaidi; na ungamo lasukumwa kutoka kwetu: Hatujui kuomba ipasavyo. Ni kweli tuna Neno la Mungu, pamoja na ahadi zake zilizo wazi na za hakika; lakini dhambi imezitia giza akili zetu, hata kwamba hatujui sikuzote jinsi ya kulitumia Neno. Katika mambo ya kiroho, hatutafuti sikuzote yale yaliyo ya lazima zaidi, au twashindwa kuomba kwa kadiri ya sheria ya patakatifu.

Katika mambo ya kidunia, tuna uwezo mdogo zaidi wa kujinufaisha na uhuru wa ajabu ambao Baba yetu ametupa wa kuomba tunachohitaji. Na hata tunapojua la kuomba, jinsi bado tunavyohitaji mengi ili kuyafanya maombi yakubalike!

Ni lazima yawe kwa utukufu wa Mungu, katika kujisalimisha kabisa kwa mapenzi yake, katika uhakika kamili wa imani, katika jina la Yesu, na kwa uvumilivu ambao, ikiwa lazima, hukataa kunyimwa. Haya yote yapasa kujifunzwa. Yaweza kujifunzwa tu katika shule ya maombi mengi, kwa maana mazoezi huleta ukamilifu. Katikati ya ufahamu wenye maumivu wa ujinga na kutostahili, katika mapambano kati ya kuamini na kutia shaka, sanaa ya mbinguni ya maombi yenye matokeo hujifunzwa. Kwa sababu, hata tusipoikumbuka, yupo Mmoja, Mwanzilishi na Mkamilishaji wa imani na maombi, ambaye huchunga maombi yetu, na kuhakikisha kwamba katika wote wanaomtumaini kwa ajili yake elimu yao katika shule ya maombi itaendelezwa mpaka ukamilifu. Basi na iwe tu kwamba mlio wa ndani wa maombi yetu yote ni ule utii wa kufundishika utokao katika hisi ya ujinga, na katika imani kwake kama mwalimu mkamilifu, nasi twaweza kuwa na hakika kwamba tutafundishwa, na tutajifunza kuomba kwa nguvu. Naam, twaweza kulitegemea hilo, yeye hutufundisha kusali.

‘Bwana, tufundishe kusali.’ Hakuna awezaye kufundisha kama Yesu, hakuna ila Yesu; kwa hiyo twamwita, ‘Bwana, tufundishe kusali.’ Mwanafunzi ahitaji mwalimu ajuaye kazi yake, mmoja aliye na karama ya kufundisha, ambaye kwa saburi na upendo atashuka mpaka mahitaji ya mwanafunzi. Ahimidiwe Mungu! Yesu ni haya yote na zaidi sana. Yeye ajua maombi ni nini. Ni Yesu, akiomba mwenyewe, ndiye atufundishaye kusali. Yeye ajua maombi ni nini. Aliyajifunza katikati ya majaribu na machozi ya maisha yake ya duniani. Mbinguni bado ni kazi yake apendayo: kuna maombi katika maisha yake. Hakuna kimfurahishacho zaidi kuliko kuwapata wale awezao kuwachukua pamoja naye mbele za uwepo wa Baba, wale awezao kuwavika nguvu za kuombea baraka za Mungu ziwashukie wale walio karibu nao, wale awezao kuwazoeza kuwa watenda kazi pamoja naye katika maombezi ambayo kwayo ufalme utafunuliwa duniani. Yeye ajua jinsi ya kufundisha. Wakati mmoja kwa uzito wa haja iliyohisiwa, wakati mwingine kwa ujasiri ambao furaha huuvuvia. Hapa kwa mafundisho ya Neno, pale kwa ushuhuda wa mwamini mwingine ajuaye maana ya kuombewa na kusikiwa.

Kwa Roho wake Mtakatifu, ana njia ya kuingia mioyoni mwetu naye hutufundisha kusali kwa kutuonyesha dhambi izuiayo maombi au kutupa uhakika kwamba tunampendeza Mungu. Yeye hufundisha, si kwa kutupa mawazo ya la kuomba au jinsi ya kuomba tu, bali kwa kupuliza ndani yetu roho yenyewe ya maombi, kwa kuishi ndani yetu kama Mwombezi Mkuu. Twaweza kweli na kwa furaha kubwa kusema, ‘Ni nani afundishaye kama yeye?’ Yesu hakuwafundisha kamwe wanafunzi wake jinsi ya kuhubiri, ila jinsi ya kuomba tu. Hakusema mengi juu ya kilichohitajika ili kuhubiri vema, bali mengi juu ya kuomba vema. Kujua jinsi ya kusema na Mungu ni zaidi ya kujua jinsi ya kusema na mwanadamu. Si nguvu pamoja na wanadamu, bali nguvu pamoja na Mungu ndilo jambo la kwanza. Yesu hupenda kutufundisha jinsi ya kuomba.

Mwafikirije, wapendwa wanafunzi wenzangu? Je, halingekuwa hasa tunachohitaji, kumwomba Bwana kwa mwezi mmoja atupe mfululizo wa masomo maalumu juu ya sanaa ya maombi? Tunapotafakari maneno aliyoyasema duniani, na tujitoe kwa mafundisho yake katika uhakika kamili kwamba, tukiwa na mwalimu kama huyo, tutasonga mbele. Na tuchukue muda si wa kutafakari tu, bali wa kuomba, wa kukaa chini ya kiti cha enzi, na kuzoezwa katika kazi ya maombezi. Na tufanye hivyo katika uhakika kwamba katikati ya kigugumizi chetu na hofu zetu, yeye anaendeleza kazi yake kwa uzuri mno. Atapuliza uzima wake mwenyewe, ulio maombi matupu, ndani yetu. Kama anavyotufanya washiriki wa haki yake na uzima wake, atatufanya washiriki wa maombezi yake pia. Kama viungo vya mwili wake, kama ukuhani mtakatifu, tutashiriki katika kazi yake ya kikuhani ya kusihi na kushinda mbele za Mungu kwa ajili ya wanadamu. Naam, na tuseme kwa furaha kubwa, ingawa sisi ni wajinga na dhaifu, ‘Bwana, tufundishe kusali.’

Bwana Mbarikiwa! Wapenda kunifanya nishiriki utukufu wako mbinguni, kwamba niombe bila kukoma, na kusimama daima kama kuhani mbele za uwepo wa Mungu wangu. Bwana Yesu! Nakuomba leo hii uandikishe jina langu miongoni mwa wale wanaoungama kwamba hawajui kuomba ipasavyo, na hasa nakuomba mfululizo wa mafundisho juu ya maombi. Bwana, nifundishe kukaa nawe shuleni na kukupa muda wa kunizoeza. Hisi la ndani la ujinga wangu, la fahari ya ajabu na nguvu ya maombi, la haja ya Roho Mtakatifu kama Roho wa maombi, na linisukume nitupilie mbali mawazo yangu ya yale nidhaniyo kuwa nayajua, na kunifanya nipige magoti mbele zako katika kufundishika kwa kweli na umaskini wa roho.

Nijaze, Bwana, uhakika kwamba nikiwa na mwalimu kama wewe, nitajifunza kuomba. Katika uhakika kwamba nina mwalimu wangu, Yesu, ambaye huomba daima kwa Baba, na kwa maombi yake huongoza majaliwa ya Kanisa lake na ya ulimwengu, sitaogopa. Kadiri nihitajivyo kujua juu ya siri za ulimwengu wa maombi, wewe utanifunulia. Na nisipoweza kujua, utanifundisha kuwa imara katika imani, nikimpa Mungu utukufu. Bwana Mbarikiwa! Hutamwaibisha mwanafunzi wako akutumainiye, wala, kwa neema yako, hutafanya hivyo. Amina.