Jinsi ya Kuwaleta Watu kwa Kristo
Jinsi ya Kuwashughulikia Wale Wenye Matumaini ya Uongo

Sura 6 · dakika 6 za kusoma · dakika 8 za kusikiliza

Jinsi ya Kuwashughulikia Wale Wenye Matumaini ya Uongo

1. Miongoni mwa wale wenye matumaini ya uongo, pengine kundi kubwa kuliko yote ni wale wanaotazamia kuokolewa kwa maisha yao ya haki. Watu hawa hutambulika kwa urahisi kwa maneno kama haya, “Ninafanya kadiri niwezavyo.” “Ninatenda mema mengi kuliko mabaya.” “Mimi si mwenye dhambi mkubwa.” “Sijawahi kufanya jambo baya sana.” Wagalatia 3:10, ni fungu bora sana la kutumia, kwa kuwa linaonyesha kwamba wote wanaotegemea matendo yao wako chini ya laana ya sheria, na kwamba hakuna tumaini lo lote kwa msingi wa sheria kwa mtu ye yote “asiyedumu katika yote yaliyoandikwa katika kitabu cha torati, ayafanye.” Yakobo 2:10 nalo lafaa. Wagalatia 2:16, na Warumi 3:19, 20 yana nguvu sana kwa kuwa yanaonyesha kwamba kwa matendo ya sheria hakuna mwenye mwili atakayehesabiwa haki mbele za Mungu. Mathayo 5:20—Mafungu haya yote yanaonyesha aina ya haki ambayo Mungu anaidai, na kwamba haki ya mtu ye yote haifikii kipimo cha Mungu, na kwamba mtu akitaka kuokolewa ni lazima atafute njia nyingine ya wokovu isiyokuwa matendo yake mwenyewe. Wakati mwingine ni vema, unapotumia mafungu haya, kumwambia mtafutaji: “Huielewi aina ya haki ambayo Mungu anaidai, la sivyo usingesema kama unavyosema. Basi na tuligeukie neno lake tuone ni haki ya namna gani ambayo Mungu anaidai.” Iko njia nyingine ya kulishughulikia kundi hili, kwa kutumia mafungu kama Luka 16:15; Warumi 2:16; 1 Samweli 16:7. Mafungu haya yanaonyesha kwamba Mungu hutazama moyo. Mshikilie mtafutaji palepale kwenye jambo hilo. Kila mtu anapoletwa uso kwa uso na jambo hilo, lazima atetemeke, kwa sababu anajua kwamba, maisha yake ya nje yawe yo yote, moyo wake hautastahimili uchunguzi wa jicho la Mungu. Hata mtu ajione mwenye haki kiasi gani, hatuna haja ya kukata tamaa, kwa maana mahali fulani katika vilindi vya moyo wa kila mtu imo hisia ya dhambi, na tunachopaswa kufanya ni kuendelea kufanya kazi mpaka tuifikie hisia hiyo. Dhamiri ya kila mtu iko upande wetu. Mathayo 22:37, 38 yaweza kutumiwa mtu anaposema “Ninafanya kadiri niwezavyo, au ninatenda mema mengi kuliko mabaya.” Mwambie, “Umekosea sana katika jambo hilo; badala ya kutenda mema mengi kuliko mabaya, je, unajua kwamba umeivunja sheria ya kwanza na iliyo kuu kuliko sheria zote za Mungu?” Kisha mwonyeshe fungu hilo. Waebrania 11:6, Yohana 6:29, yanaonyesha kwamba jambo moja ambalo Mungu anadai ni imani, na kwamba pasipo hiyo haiwezekani kumpendeza Mungu, na Yohana 16:9, linaonyesha kwamba kutomwamini Kristo ndiyo dhambi kuu kuliko zote. Yohana 3:36, linaonyesha kwamba suala la uzima wa milele linategemea tu mtu kumpokea au kumkataa Yesu Kristo, na Waebrania 10:28, 29, kwamba dhambi inayoleta adhabu nzito kuliko zote ni ile ya kumkanyaga Mwana wa Mungu. Kabla ya kutumia fungu hili la mwisho, ingekuwa vema kusema, “Unadhani wewe ni mwema sana, lakini je, unajua kwamba unatenda dhambi ya kutisha kuliko zote ambayo mtu aweza kutenda mbele za Mungu?” Akijibu, “Hapana,” basi sema “Vema, niruhusu nikuonyeshe kutoka katika neno la Mungu kwamba unaitenda;” kisha geukia fungu hili ulisome kwa uzito mkuu na kwa bidii nyingi.

2. Kundi lingine la wale wenye matumaini ya uongo ni wale wanaodhani “Mungu ni mwema mno asiweze kumtupa mtu ye yote jehanamu.”

Mtu ye yote akisema hivi, waweza kujibu, “Hatujui lo lote juu ya wema wa Mungu isipokuwa yale tunayojifunza kutoka katika Biblia, nasi hatuna budi kukiendea kitabu hicho ili tujue wema wa Mungu ni wa tabia gani. Na tugeukie Warumi 2:2, 4, 5.” Ukiisha kusoma mistari hiyo, waweza kusema kitu kama hiki, “Basi, rafiki yangu, unaona kwamba kusudi la wema wa Mungu ni kukuvuta upate kutubu, si kukutia moyo katika dhambi; na tunapoukanyaga wema wake, ndipo tunajiwekea akiba ya hasira kwa siku ile ya hasira, na ya kufunuliwa hukumu ya haki ya Mungu.” Yohana 8:21, 24 na 3:36, yatamwonyesha mtu huyo kwamba, hata Mungu awe mwema kiasi gani, atawakataa wote wanaomkataa Mwanawe. Njia nyingine tena ya kuwashughulikia watu hawa ni kuwaonyesha kutoka Yohana 5:40; 2 Petro 3:9‒11 au Ezekieli 33:11, kwamba si Mungu hasa anayewatupa watu jehanamu, bali ni watu wanaojitupa wenyewe jehanamu licha ya wema wa Mungu, kwa sababu hawataki kuja kwa Kristo na kuupokea uzima unaotolewa bure. Waweza kusema “Mungu hapendi mtu ye yote apotee, naye anakutolea uzima bure, lakini kuna kizuizi kimoja njiani. Na tugeukie Yohana 5:40, tuone kizuizi hicho ni nini.” Kisha soma fungu hilo: “Wala hamtaki kuja kwangu mpate kuwa na uzima,” na useme, “Rafiki yangu, hiki ndicho kizuizi: hutaki kuja; uzima unatolewa kwako bure, lakini usipotaka kuupokea, lazima upotee.” 2 Petro 2:4‒6, 9; Luka 13:3, yanaonyesha jinsi Mungu “mwema” anavyowatendea watu wanaoendelea kudumu katika dhambi. Wakati mwingine fungu hili la mwisho laweza kutumiwa kwa matokeo makubwa kwa njia hii: “Unasema Mungu ni mwema mno asiweze kumtupa mtu ye yote jehanamu. Basi na tuone Mungu mwenyewe anasema nini katika neno lake.” Kisha geukia fungu hilo usome, “Msipotubu, ninyi nyote mtaangamia vivyo hivyo.” Rudia fungu hilo tena na tena mpaka limemwingia moyoni kabisa.

3. Kundi la tatu la wale wenye matumaini ya uongo ni wale wanaosema “Ninajaribu kuwa Mkristo.” Yohana 1:12, litawaonyesha kwamba si “kujaribu” kuwa Mkristo, wala “kujaribu” kuishi maisha bora zaidi, wala “kujaribu” kufanya jambo lo lote ambalo Mungu anatuomba, bali ni kumpokea tu Yesu Kristo, aliyelitenda lote; nawe waweza kumwuliza mtafutaji, “je, utaacha sasa kujaribu kwako na kumpokea tu Yesu kama Mwokozi?” Matendo 16:31, linaonyesha kwamba Mungu hatuombi tujaribu tuwezalo kufanya, bali tumtumaini Yesu na yale aliyoyatenda na atakayoyatenda. Warumi 3:23‒25, linaonyesha kwamba hatuhesabiwi haki kwa kujaribu kutenda, “bali bure kwa neema yake, kwa njia ya ukombozi ulio katika Kristo Yesu” kwa sharti rahisi la imani.

4. Tena kuna kundi lingine la wale wenye matumaini ya uongo, yaani wale wanaosema, “Ninahisi kwamba ninakwenda Mbinguni,” au “Ninahisi kwamba nimeokoka.” Waonyeshe kutoka Yohana 3:36 kwamba si suala la jinsi wanavyohisi, bali la Mungu asemavyo, na Mungu asemavyo waziwazi katika neno lake ni kwamba, “asiyemtii Mwana hataona uzima, bali ghadhabu ya Mungu inamkalia.” Mchana mmoja nilikuwa nikizungumza na mwanamke mmoja ambaye majuma machache kabla alikuwa amefiwa na mtoto wake wa pekee. Wakati mtoto alipokufa alikuwa ameguswa sana, lakini hisia zake nzito kwa sehemu kubwa zilikuwa zimemtoka. Nikamwuliza swali hili, “Je, hutaki kwenda alikokwenda mtoto wako mdogo?” Akajibu mara moja “Ninatazamia kwenda.” “Ni nini kinachokufanya udhani utakwenda?” nikasema. Akajibu, “Ninahisi hivyo, ninahisi kwamba nitakwenda mbinguni nitakapokufa.” Kisha nikamwuliza kama kulikuwa na kitu cho chote katika neno la Mungu ambacho angeweza kukionyesha, kilichompa sababu ya kuamini kwamba atakwenda mbinguni atakapokufa. “Hapana,” akasema, “hakuna.” Kisha akanigeukia akaniuliza, akisema, “Je, wewe unatazamia kwenda mbinguni utakapokufa?” “Ndiyo,” nikajibu, “najua nitakwenda.” “Unajuaje?” akasema. “Una neno lo lote kutoka kwa Mungu juu ya jambo hilo?” “Ndiyo,” nikajibu, nikamfungulia Yohana 3:36. Hivyo akaongozwa kuiona tofauti kati ya imani iliyosimama juu ya hisia zake na imani iliyosimama juu ya neno la Mungu.

Luka 18:9‒14, laweza pia kutumiwa kwa njia ifuatayo; waweza kusema “kulikuwa na mtu katika Biblia aliyehisi kwamba yuko sawa kabisa, lakini alikuwa amekosea kabisa. Niruhusu nikusomee habari zake.” Kisha soma habari za yule Farisayo aliyekuwa na hakika sana kwamba yuko sawa, lakini muda wote alikuwa mwenye dhambi asiyesamehewa; na umfanye mtafutaji aone jinsi hisia zetu zisivyoaminika, na msingi wa uhakika ni nini, yaani: neno la Mungu. Mithali 14:12 laweza pia kutumiwa kuonyesha kwamba “Iko njia ionekanayo kuwa sawa machoni pa mtu, lakini mwisho wake ni njia za mauti.”

5. Kundi la mwisho la wale wenye matumaini ya uongo ni wale wanaosema kwamba wameokoka ingawa wanaishi maisha ya dhambi. Kwa aina nyingi za dhambi, fungu zuri la kutumia ni 1 Wakorintho 6:9‒10. 1 Yohana 2:29 nalo, mara nyingi, litaondolea mbali tumaini hili la uongo. 1 Yohana 5:4‒5 lafaa kwa kuwa linaonyesha kwamba mtu aliyezaliwa na Mungu kweli huushinda ulimwengu, na ukweli kwamba wanaishi katika dhambi na hawaushindi ulimwengu ni ushahidi kwamba hawajazaliwa na Mungu.