Utakatifu na Utii

‘Mmeona niliyowatendea Wamisri, na jinsi nilivyowachukua juu ya mbawa za tai, nikawaleta kwangu mimi. Basi sasa, kama mtaisikiza sauti yangu kweli kweli, na kulishika agano langu, mtakuwa tunu yangu ya pekee kuliko mataifa yote: mtakuwa kwangu taifa takatifu.’—Kut. 19:4–6.

Israeli imefika Horebu. Sheria itatolewa na agano litafanywa. Haya ndiyo maneno ya kwanza ya Mungu kwa watu; Anazungumza juu ya ukombozi na baraka yake, ushirika naye Mwenyewe: ‘Mmeona jinsi nilivyowaleta kwangu mimi.’ Anazungumza juu ya utakatifu kama kusudi lake katika ukombozi: ‘Mtakuwa kwangu taifa takatifu.’ Na kama kiungo kati ya haya mawili Anaweka utii: ‘Kama kweli mtaitii sauti yangu, mtakuwa kwangu taifa takatifu.’ Mapenzi ya Mungu ni dhihirisho la utakatifu wake; tunapotenda mapenzi yake, tunagusana na utakatifu wake. Kiungo kati ya Ukombozi na Utakatifu ni Utii.

Hili linaturudisha kwa yale tuliyoyaona katika Paradiso. Mungu aliitakasa siku ya saba kama wakati wa kumtakasa mwanadamu. Na jambo la kwanza alilolitenda kwa kusudi hili lilikuwa nini? Alimpa amri. Utii kwa amri hiyo ungelifungua mlango, ungelikuwa lango, la kuingia katika Utakatifu wa Mungu. Utakatifu ni sifa ya kimaadili; na chenye maadili ni kile ambacho utashi ulio huru hukichagua na kujiamulia chenyewe. Kile ambacho Mungu huumba na kutoa ni chema kwa asili tu; kile ambacho mwanadamu hutaka kupokea kutoka kwa Mungu na mapenzi yake, na kukifanya kuwa chake kweli, kina thamani ya kimaadili, nacho huongoza kwenye utakatifu. Katika uumbaji Mungu alidhihirisha mapenzi yake ya hekima na wema. Mapenzi yake matakatifu Anayanena katika amri zake. Mapenzi hayo matakatifu yanapoingia katika utashi wa mwanadamu, utashi wa mwanadamu unapoyakubali na kujiunganisha na mapenzi ya Mungu, anakuwa mtakatifu. Baada ya uumbaji, katika siku ya saba, Mungu alimchukua mwanadamu ndani ya kazi yake ya utakaso ili kumfanya mtakatifu. Utii ndiyo njia ya utakatifu, kwa sababu ndiyo njia ya kuungana na mapenzi matakatifu ya Mungu; kwa mwanadamu asiyeanguka, kama ilivyo kwa mwanadamu aliyeanguka, katika ukombozi hapa na katika utukufu wa juu, katika malaika wote watakatifu, katika Kristo Mtakatifu wa Mungu Mwenyewe, utii ndiyo njia ya utakatifu. Wenyewe si utakatifu: bali utashi unapojifungua kuyakubali na kuyatenda mapenzi ya Mungu, Mungu hujitoa Mwenyewe na Utakatifu wake. Kuisikiza sauti yake ni kumfuata anapoongoza katika njia ya kujidhihirisha na kujitoa kikamilifu Mwenyewe na asili yake iliyobarikiwa kama Mtakatifu.

Utii. Si kuyajua mapenzi ya Mungu, wala si hata kuyakubali, wala si hata kutaka kuyatenda, bali ni kuyatenda kwenyewe. Maarifa, na kukubali, na utashi lazima viongoze kwenye tendo; mapenzi ya Mungu lazima yatendeke. ‘Kama kweli mkiisikiza sauti yangu, mtakuwa kwangu taifa takatifu.’ Si imani, wala si ibada, wala si ukiri, ambao Mungu hapa huutaka kwanza kutoka kwa watu wake anaponena juu ya utakatifu; ni utii. Mapenzi ya Mungu lazima yatendeke duniani, kama mbinguni. ‘Kumbukeni na kuzitenda amri zangu zote, mpate kuwa watakatifu kwa Mungu wenu’ (Hesabu 15:40). ‘Basi jitakaseni, mwe watakatifu; nanyi mtazishika amri zangu na kuzitenda. Mimi ndimi Bwana niwatakasaye’ (Mambo ya Walawi 20:7, 8). ‘Kwa hiyo mtazishika amri zangu na kuzitenda: Mimi ndimi Bwana: nami nitatakaswa kati ya wana wa Israeli: Mimi ndimi Bwana niwatakasaye, niliyewatoa katika nchi ya Misri’ (22:21, 33).

Kutafakari kwa kitambo kutatufanya sababu ya hili iwe wazi kwetu. Ni katika kazi ya mtu ndipo huonyesha yeye ni nini. Naweza kujua lililo jema, na bado nisilikubali. Naweza kukubali, na bado nisilitake. Naweza kwa namna fulani kulitaka, na bado nikapungukiwa na nguvu, au kujitoa dhabihu, au uwezo utakaochochea na kulitenda jambo. Kufikiri ni rahisi kuliko kutaka, na kutaka ni rahisi kuliko kutenda. Tendo peke yake ndilo lithibitishalo kama lengo la shauku yangu limenimiliki kabisa. Mungu anataka mapenzi yake yatendeke. Huu peke yake ndio utii. Katika hili peke yake ndipo huonekana kama moyo wote, pamoja na nguvu zake zote na utashi wake, umejitoa kwa mapenzi ya Mungu; kama tunayaishi, na tuko tayari kwa dhabihu yoyote kuyafanya kuwa yetu kwa kuyatenda. Mungu hana njia nyingine ya kutufanya watakatifu. ‘Mtazishika amri zangu na kuzitenda: Mimi ndimi Bwana niwatakasaye.’

Kwa wote watafutao utakatifu hili ni somo la umuhimu mkubwa. Utii si utakatifu; utakatifu ni kitu cha juu zaidi, kitu kitokacho kwa Mungu kuja kwetu, au afadhali, kitu cha Mungu kiingiacho ndani yetu. Lakini utii ni wa lazima kabisa kwa utakatifu: haiwezekani kuwepo pasipo huo. Basi, wakati moyo wako unapotafuta kufuata mafundisho ya neno la Mungu, na kutazama kwa imani yale Mungu aliyoyatenda, kama alivyokufanya mtakatifu katika Kristo, na yale Mungu bado atakayoyatenda kwa Roho wa Utakatifu anapotimiza ahadi, ‘Mungu wa amani mwenyewe awatakase kabisa,’ usisahau hata kwa dakika moja kuwa mtiifu. ‘Kama kweli mkiisikiza sauti yangu, mtakuwa taifa takatifu kwangu.’ Anza kwa kutenda mara moja lolote lionekanalo kuwa jema kufanya. Acha mara moja lolote ambalo dhamiri yako inakuambia huthubutu kusema kuwa ni sawa na mapenzi ya Mungu. Usiombe tu nuru na nguvu, bali tenda; fanya lile Mungu asemalo. ‘Yeye afanyaye mapenzi ya Mungu ni ndugu yangu,’ Yesu asema. Kila mwana wa Mungu amezaliwa kwa mapenzi ya Mungu: ndani yake ana uzima wake. Kufanya mapenzi ya Baba ndicho chakula, nguvu, na alama, ya kila mwana wa Mungu.

Si kitu pungufu ya kujisalimisha kwa maisha kama hayo ya utii mtupu na kamili ndicho kinachomaanishwa katika kuwa Mkristo. Wapo, ole! Wakristo wengi mno ambao, kwa kukosa ama mafundisho yanayostahili, au kutokuzingatia ipasavyo mafundisho ya neno la Mungu, hawajapata kamwe kutambua nafasi ya umuhimu wa juu kabisa ambayo utii huchukua katika maisha ya Kikristo. Hawajui kwamba Kristo, na ukombozi, na imani vyote huongoza kwao, kwa sababu kupitia huo peke yake ndiyo njia ya kuufikia ushirika wa Upendo, na Mfano, na Utukufu wa Mungu. Sisi sote, huenda, tumeteseka kwa jambo hili wenyewe: katika maombi yetu na jitihada zetu za kutafuta amani kamili na pumziko la imani, kutafuta furaha idumuyo na nguvu iongezekayo ya maisha ya Kikristo, kumekuwapo na kitu cha siri kikizuia baraka, au kusababisha kupotea haraka kwa kile kilichokuwa kimeshikwa. Dhana potofu kuhusu ulazima kamili wa utii yaelekea ndiyo iliyokuwa sababu. Haiwezi kusisitizwa kwa dhati ya kutosha kwamba uhuru na nguvu kuu ya neema ina hili kama lengo lake tangu wongofu wetu na kuendelea, kuturudisha kwenye utii wa vitendo na upatano na mapenzi ya Mungu ambao tulikuwa tumeanguka kutoka kwao kwa njia ya dhambi ya kwanza katika Paradiso. Utii huongoza kwa Mungu na Utakatifu wake. Ni katika utii ndipo utashi hufinyangwa, na tabia huundwa, na mtu wa ndani hujengwa ambaye Mungu aweza kumvika na kumpamba kwa uzuri wa utakatifu.

Mkristo anapogundua kwamba hiki ndicho kimekuwa kiungo kilichokosekana, sababu ya kushindwa na giza, hakuna la kufanya isipokuwa, katika tendo kuu la kujisalimisha, kwa makusudi kuchagua utii, utii wa kila upande, wa moyo wote, kuwa sheria ya maisha yake katika nguvu ya Roho Mtakatifu. Asiogope kuyafanya kuwa yake maneno ya Israeli huko Sinai, katika kujibu ujumbe wa Mungu tunaoutafakari: ‘Yote aliyoyanena Bwana, tutayatenda;’ ‘Yote aliyoyasema Bwana tutayatenda, nasi tutatii.’ Lile ambalo sheria haikuweza kulitenda, kwa kuwa ilikuwa dhaifu kwa sababu ya mwili, Mungu amelitenda kwa kipawa cha Mwana wake na Roho. Kutolewa kwa sheria kule Sinai juu ya mbao za mawe kumefuatwa na kutolewa kwa sheria na Roho juu ya kibao cha moyo: Roho Mtakatifu ndiye nguvu ya utii, na hivyo ndiye Roho wa Utakatifu, ambaye, katika utii, huitayarisha mioyo yetu iwe makao ya Mtakatifu. Katika imani hii na tujitoe kwenye maisha ya utii: ndiyo njia ya Agano Jipya ya kutimia kwa ahadi: ‘Kama kweli mtaitii sauti yangu, mtakuwa kwangu taifa takatifu.’

Tumekwisha kuona jinsi utakatifu katika asili yake yenyewe hudhania uhusiano wa kibinafsi na Mungu, uwepo wake wa kibinafsi. ‘Nimewaleta kwangu mimi; kama mkitii, mtakuwa kwangu taifa takatifu.’ Ni tunapoelewa na kushika sana kipengele hiki cha kibinafsi ndipo utii utakapowezekana, nao utaongoza kwenye utakatifu. Yaangalie vizuri maneno ya Mungu: ‘Kama mtaisikiza sauti yangu, na kulishika agano langu.’ Sauti ni zaidi ya sheria au kitabu; daima huashiria mtu aliye hai na mawasiliano naye. Hili ndilo siri ya utii wa injili: kuisikia sauti na kufuata mwongozo wa Yesu kama rafiki wa kibinafsi, Mwokozi aliye hai. Ni kuongozwa na Roho wa Mungu, kuwa naye ili kufunua Uwepo, na Mapenzi, na Upendo wa Baba, atakayefanya kazi ndani yetu uhusiano ule wa kibinafsi ambao Agano Jipya humaanisha linaponena juu ya kufanya kila kitu kwa Bwana, kama kumpendeza Mungu.

Utii kama huo ndiyo njia ya utakatifu. Kila tendo lake ni kiungo kwa Mungu aliye hai, kujisalimisha kwa nafsi kwa ajili ya mapenzi ya Mungu, ili Mungu Mwenyewe achukue milki. Katika mchakato wa kufyonzwa, wa polepole lakini wa hakika, ambao kwao mapenzi ya Mungu, kama chakula cha roho zetu, huchukuliwa ndani ya utu wetu wa ndani kabisa, asili yetu ya kiroho hutiwa nguvu, huwa ya kiroho, ikikua na kuwa hekalu takatifu ambamo Mungu aweza kujifunua Mwenyewe na kufanya makao yake.

Kila mwamini na ajitahidi kutambua hili. Mungu alipoitakasa siku ya saba kama kipindi chake cha kufanya takatifu, alitufundisha kwamba hangeweza kulifanya mara moja. Ufunuo na utoaji wa utakatifu lazima uwe wa taratibu, kadiri mwanadamu anavyoandaliwa kuupokea. Kazi ya Mungu ya kutakasa kwa kila mmoja wetu, kama ilivyo kwa jamii nzima, huhitaji wakati. Wakati unaohitajika na kutafutwa ni maisha ya utii wa kila siku, wa kila saa. Yote yanayotumiwa katika utashi binafsi, wala si katika uhusiano ulio hai na Bwana, hupotea. Lakini moyo unapotafuta siku baada ya siku kuisikiliza sauti na kuitii, Mtakatifu Mwenyewe huyalinda maneno yake ili kuyatimiza: ‘Mtakuwa kwangu taifa takatifu.’ Kwa namna ambayo roho mapema haiwezi kuwa na fahamu ila kidogo tu, Mungu atatanda kivuli na kufanya makao yake katika moyo mtiifu. Tabia ya kuisikiliza sauti daima na kuitii itakuwa ni kujenga hekalu tu: Mungu aliye hai Mwenyewe, Mtakatifu, atakuja kufanya makao yake. Utukufu wa Bwana utaijaza nyumba, na ahadi itatimizwa, ‘Nitaitakasa kwa utukufu wangu.’

‘Nimewaleta kwangu mimi; kama mtaisikiza sauti yangu kwa vitendo, mtakuwa kwangu taifa takatifu.’ Enyi watafutao utakatifu! Mungu amewaleta kwake Mwenyewe. Na sasa sauti yake huwanenea mawazo yote ya moyo wake, ili mnapoyapokea, na kuyafanya kuwa yenu, na kuyafanya mapenzi yake kuwa yenu kwa kuyaishi na kuyatenda, mpate kuingia katika muungano ulio kamili kabisa naye Mwenyewe, muungano wa utashi pamoja na wa uzima, na hivyo kuwa watu watakatifu kwake. Utii, kule kuisikiliza na kuyatenda mapenzi ya Mungu, na uwe furaha na utukufu wa maisha yenu; utawapa nafasi ya kuingia katika Utakatifu wa Mungu.

Kuweni watakatifu, kama nilivyo mtakatifu.

Ee Mungu wangu! Umenikomboa kwa ajili yako Mwenyewe, ili unipate mimi kabisa niwe wako, ukimiliki, ukijaza utu wangu wa ndani kabisa kwa mfano wako Mwenyewe, mapenzi yako makamilifu, na utukufu wa Utakatifu wako. Nawe unatafuta kunizoeza, katika nguvu ya utashi ulio huru na wenye upendo, kuyachukua mapenzi yako na kuyafanya kuwa yangu, ili katikati kabisa ya nafsi yangu niwe na ukamilifu wako Mwenyewe ukikaa ndani yangu. Na katika maneno yako wadhihirisha mapenzi yako, ili niyakubalipo na kuyashika niweze kuyamiliki maudhui yake ya Kimungu, na kutaka yote uyatakayo.

Ee Mungu wangu! Niache niishi siku baada ya siku katika ushirika kama huo nawe, ili kweli katika kila jambo niisikie sauti yako, sauti hai ya Mungu aliye hai ikinena nami. Roho Mtakatifu, Roho wa Utakatifu wako, na awe kwangu sauti yako akiniongoza katika njia ya utii mtupu, wa kitoto. Nakubariki kwa kuwa nimeona kwamba Kristo, ambaye ndani yake mimi ni mtakatifu, alikuwa ndiye mtiifu, kwamba katika utii alijitakasa Mwenyewe ili kuwa utakaso wangu, na kwamba kukaa ndani yake, Mtoto wako mtiifu, mtakatifu, ni kukaa ndani ya mapenzi yako kama yalivyotendwa naye zamani, na sasa yatakayotendwa nami. Ee Mungu wangu! Kweli nitayatii mapenzi yako: unifanye mimi kuwa mmoja wa taifa lako takatifu, tunu ya pekee kuliko mataifa yote. Amina.

1. ‘Alikuwa mtiifu hata mauti.’ ‘Ijapokuwa alikuwa Mwana, alijifunza kutii kwa mateso hayo aliyoyapata.’ ‘Nimekuja kuyafanya mapenzi yako.’ ‘Katika mapenzi hayo tumetakaswa.’ Kielelezo cha Kristo hutufundisha kwamba utii ndiyo njia pekee ya kuufikia Utakatifu au utukufu wa Mungu. Hili na liwe wakfu wako: kujisalimisha katika kila jambo kutafuta na kuyatenda mapenzi ya Mungu.

2. Sisi tu ‘watakatifu katika Kristo’—katika Kristo huyu aliyeyafanya mapenzi ya Mungu na aliyekuwa mtiifu hata mautini. Ndani yake ndipo tulipo; ndani yake sisi ni watakatifu. Utii wake ndio udongo ambamo tumepandwa, na ni lazima tuwe na mizizi ndani yake. ‘Chakula changu ni kuyafanya mapenzi yake;’ utii ulikuwa riziki ya maisha yake; kwa kuyafanya mapenzi ya Mungu alishusha chakula cha Kimungu; ni lazima iwe hivyo kwetu sisi pia.

3. Unapotafakari maana ya kuwa na kukaa ndani ya Kristo, unapofurahi kuwa uko ndani yake, kumbuka daima ni Kristo aliyetii ambaye ndani yake Mungu amekupanda.

4. Ikiwa wakati wowote unahisi kutatanishwa juu ya utakatifu, jisalimishe tu tena kuyatenda mapenzi ya Mungu, kisha nenda ukayatende. Ni juu yetu kutii, ni juu ya Mungu kutakasa.

5. Mtakatifu katika Kristo. Kristo alijitakasa Mwenyewe kwa utii, kwa kuyafanya mapenzi ya Mungu, na katika mapenzi hayo, kama yalivyotendwa naye, sisi tumetakaswa. Kwa kuyakubali mapenzi hayo kama yalivyotendwa naye, kwa kumkubali yeye, mimi ni mtakatifu. Kwa kuyakubali mapenzi hayo ya Mungu, kama yatakavyotendwa nami, mimi ninakuwa mtakatifu. Mimi niko ndani yake; katika kila tendo la utii ulio hai, ninaingia katika ushirika ulio hai naye, nami navuta nguvu ya uzima wake ndani ya wangu.

6. Utii hutegemea kuisikia sauti. Usidhani unayajua mapenzi ya Mungu. Omba na ungoje mafundisho ya ndani ya Roho.

Siku ya Nane.

---