Upako kutoka kwa Mtakatifu

‘Nanyi mnao upako kutoka kwa yule Mtakatifu, nanyi mnajua mambo yote. Nanyi, upako mliopokea kutoka kwake wakaa ndani yenu, wala hamna haja ya mtu kuwafundisha; lakini kama upako wake unavyowafundisha katika mambo yote, nao ni kweli, wala si uongo, na kama ulivyowafundisha, kaeni ndani yake.’—1 Yohana 2:20, 27.

Katika ufunuo aliopewa Musa kuhusu Utakatifu wa Mungu na jinsi yake ya kutakasa, makuhani, na hasa makuhani wakuu, ndio waliokuwa dhihirisho kuu la Utakatifu wa Mungu ndani ya mwanadamu. Katika makuhani wenyewe, mafuta matakatifu ya upako yalikuwa ishara moja kuu ya neema itakasayo. Musa alipaswa kutengeneza mafuta matakatifu ya upako: ‘Nawe utatwaa baadhi ya mafuta ya upako, na kumnyunyizia Haruni na wanawe, naye atatakaswa, yeye na wanawe pamoja naye.’ ‘Haya yatakuwa mafuta matakatifu ya upako kwangu mimi. Hayatamiminwa juu ya mwili wa mwanadamu; wala msifanye mengine mfano wake; ni matakatifu, nayo yatakuwa matakatifu kwenu’ (Kutoka 29:21, 30:25–32). Kwa hayo makuhani, na hasa makuhani wakuu, walipaswa kupakwa na kuwekwa wakfu: ‘Yeye aliye kuhani mkuu kati yenu, ambaye juu ya kichwa chake mafuta ya upako yalimiminwa, hatatoka nje ya mahali patakatifu, wala hatapanajisi mahali patakatifu pa Mungu wake; kwa maana taji ya mafuta ya upako ya Mungu wake i juu yake’ (Mambo ya Walawi 21:10, 12). Na vivyo hivyo yasemwa juu ya Daudi, kama kielelezo cha Masihi, ‘Mfalme wetu ni wa yule Mtakatifu wa Israeli. Nimemwona Daudi, mtumishi wangu; kwa mafuta yangu matakatifu nimemtia mafuta.’

Twajua jinsi jina la Kiebrania Masihi, na la Kiyunani Kristo, linavyohusiana na jambo hili. Basi, katika fungu lililonukuliwa punde, Kiebrania ni, ‘kwa mafuta yangu matakatifu nimemtia mafuta.’ Na vivyo hivyo katika fungu kama Matendo 10:38: ‘Katika habari za Yesu wa Nazareti, jinsi Mungu alivyomtia mafuta kwa Roho Mtakatifu na kwa nguvu.’ Au Zaburi 45: ‘Mungu amekutia mafuta kwa mafuta ya furaha kuliko wenzako;’ katika Waebrania 1:9, ‘Mungu wako amekutia mafuta ya furaha.’ Na hivyo (kama mojawapo ya Katekisimo zetu za Kimatengenezo, ile ya Heidelberg, isemavyo, katika jibu la swali, Kwa nini unaitwa Mkristo?) twaitwa Wakristo, kwa sababu tu washiriki pamoja naye katika kutiwa mafuta kwake, upako wake. Huu ndio upako ambao Yohana anena juu yake, ile chrisma au kutiwa mafuta kwa yule Mtakatifu. Roho Mtakatifu ndiye upako mtakatifu ambao kila mwamini hupokea: yale Mungu aliyomtendea Mwanawe ili kumfanya kuwa Kristo, hunitendea mimi ili kunifanya kuwa Mkristo. ‘Mnao upako kutoka kwa yule Mtakatifu.’

1. Mnao upako kutoka kwa yule Mtakatifu. Ni kwa kuwa yeye ni Mtakatifu ndipo Baba hutoa upako: kile anachotia mafuta huitwa mafuta ya utakatifu, yaani Roho Mtakatifu. Kweli utakatifu ni marhamu ya Kimungu. Kama vile hakuna kitu chenye kupenya na kuenea kama harufu ambayo kwayo marhamu hujaza nyumba, vivyo hivyo utakatifu ni pumzi ya kimbingu isiyoelezeka, ienezayo kila mahali, imwenezayo mtu yule ambaye upako umekaa juu yake. Utakatifu haupo katika matendo fulani: hiyo ni haki. Utakatifu ni uwepo usioonekana na hata hivyo ulio dhahiri wa yule Mtakatifu ukaao juu ya mpakwa mafuta wake. Moja kwa moja kutoka kwa yule Mtakatifu, upako hupokewa peke yake, au afadhali, ni katika ushirika wa kudumu naye ndani ya Kristo tu, aliye yule Mtakatifu wa Mungu.

Na ni nani apokeaye? Ni yeye tu aliyejitoa kabisa kuwa mtakatifu kama Mungu alivyo mtakatifu. Alikuwa kuhani, aliyetengwa kuwa mtakatifu kwa Bwana, ndiye aliyepokea upako: juu ya mwili wa watu wengine haukupaswa kumiminwa. Ni wangapi wangependa kuwa na ile marhamu ya thamani kwa ajili ya harufu yake nzuri kwa nafsi zao! La, ni yeye tu aliyewekwa wakfu kabisa kwa utumishi wa yule Mtakatifu, kwa kazi ya patakatifu, ndiye awezaye kuupokea. Kama mtu ye yote angalisema: Ningependa kuwa na upako, lakini nisifanywe kuhani; sipo tayari kwenda na kuwa daima tayari kwa wito wa wenye dhambi wamtafutao Mungu wao, huyo hangeweza kuwa na sehemu katika upako huo. Utakatifu ni nguvu iishiyo ili kutakasa tu, na kubariki katika kufanya hivyo: upako wa yule Mtakatifu ni kwa ajili ya kuhani, mtumishi wa Mungu Aliye Juu Sana. Ni katika juhudi ya nafsi iliyoamshwa kweli na kujitoa kwa utukufu wa Mungu, ufalme wa Mungu, kazi ya Mungu, ndipo utakatifu unapokuwa halisi. Mavazi matakatifu yalitengenezwa kwa ajili ya makuhani na utumishi wao tu. Katika kutafuta kwetu kote utakatifu, na tukumbuke jambo hili. Kama tunavyojihadhari na kosa la kudhani ya kwamba kazi kwa ajili ya Kristo itatutakasa, na tujihadhari pia na lile lingine, yaani kujikaza kupata utakatifu bila kazi. Ni kuhani aliyetengwa kwa ajili ya utumishi wa mahali patakatifu na yule Mtakatifu, ni mwamini aliye tayari kuishi na kufa ili Utakatifu wa Mungu upate kushinda kati ya watu wanaomzunguka, ndiye atakayepokea upako.

2. ‘Upako huwafundisha.’ Mtu mpya ameumbwa katika maarifa, kama vile katika haki na utakatifu. Kristo amefanywa kwetu hekima, kama vile haki na utakaso. Utumishi wa Mungu na utakatifu wetu, zaidi ya yote, unapaswa kuwa ni kibali cha hiari na kikamilifu, chenye ufahamu na cha utayari mkuu, cha mapenzi yake yaliyobarikiwa. Na hivyo upako, ili kutufaa kwa utumishi wa patakatifu, hutufundisha kujua mambo yote. Kama vile harufu nzuri ya marhamu ni asili iliyofichika kabisa, kitu ambacho hakijapata kuonekana wala kuhisiwa, ila kwa kunuswa, vivyo hivyo kipawa cha kiroho ambacho upako hukitoa ndicho kilichofichika kuliko vyote viwezavyo kuwapo. Hukifanya ‘chepesi cha kunusa katika kumcha Bwana:’ hutufundisha kwa silika ya Kimungu, ambayo kwayo mpakwa mafuta hutambua kilicho na harufu nzuri ya kimbingu ndani yake, na kilicho cha nchi. Ni upako uufanyao Neno na jina la Yesu katika Neno kuwa kweli kama marhamu iliyomiminwa.

Basi alama kuu ya upako ni hii, kufundishika. Ni alama kuu ya Kristo, yule Mtakatifu wa Mungu, yule Mpakwa Mafuta, kwamba yeye husikiliza: ‘Sisemi kwa nafsi yangu; kama nisikiavyo, ndivyo nisemavyo.’ Na ndivyo ilivyo kwa Roho Mtakatifu pia: ‘Hatanena kwa nafsi yake; lo lote atakalolisikia, ndilo atakalolinena.’ Haiwezi kuwa vinginevyo: yeye aliyetiwa mafuta kwa upako wa Kristo huyu, kwa Roho Mtakatifu huyu, atafundishika, atasikiliza ili afundishwe. ‘Upako hufundisha.’ ‘Wala hamna haja ya mtu kuwafundisha: bali upako huwafundisha katika mambo yote.’ ‘Wote watafundishwa na Mungu,’ humhusu kila mwamini. Siri ya utakatifu wa kweli ni uhusiano ulio wa moja kwa moja na wa binafsi na yule Mtakatifu: mafundisho yote kupitia neno au watu yamefanywa kutegemea kabisa na kuwa chini ya mafundisho ya binafsi ya Roho Mtakatifu. Mafundisho huja kupitia upako. Si, kwanza kabisa, katika mawazo au hisia, bali katika ile harufu nzuri ienezayo kila mahali itokayo katika mafuta mapya yaliyoupenya mtu wa ndani mzima.

3. ‘Nao upako wakaa ndani yenu.’ ‘Ndani yenu.’ Katika maisha ya kiroho ni jambo la maana sana kudumisha daima upatano kati ya lililo nje yetu na lililo ndani yetu: Mungu katika Kristo juu yangu, Mungu katika Roho ndani yangu. Ndani yetu, si kama mahali fulani, bali ndani yetu, kama aliye mmoja nasi, akiingia katika sehemu ya siri kabisa ya nafsi zetu, na kuenea kote, akikaa katika mwili wetu wenyewe, upako wakaa ndani yetu, ukiwa sehemu ya nafsi zetu wenyewe. Na hii ni kwa kadiri tu tunavyoujua na kujisalimisha kwao, tunavyongoja na kutulia ili kuiacha ile harufu ya siri ipenye nafsi zetu zote. Na hii, tena, si kwa kukatizwakatizwa, bali kama uzoefu wa kuendelea usiobadilika. Juu ya hali na hisia, ‘upako wakaa.’ Si, kwa kweli, kama hali iliyowekwa au kama kitu kilicho milki yetu wenyewe; bali, kwa kadiri ya sheria ya uzima mpya, katika kutegemea kwa imani kwa yule Mtakatifu, na katika ushirika wa Yesu. ‘Nimetiwa mafuta mapya,’—huu ndio upande wa nje; kila asubuhi mpya mwamini hungoja kufanywa upya kwa kipawa cha Kimungu kutoka kwa Baba. ‘Upako wakaa ndani yenu,’—huu ndio upande wa ndani; maisha matakatifu, maisha ya imani na ushirika, upako, daima, toka dakika hata dakika, ni uhalisi wa kiroho. Mafuta matakatifu ya upako, daima mapya, upako ukaao daima, ndiyo siri ya utakatifu.

4. ‘Na kama ulivyowafundisha, kaeni ndani yake.’ Hapa tunao tena Utatu Mtakatifu: yule Mtakatifu, ambaye kutoka kwake upako mtakatifu huja; Roho Mtakatifu, aliye yeye mwenyewe ndiye upako; na Kristo, yule Mtakatifu wa Mungu, ambaye ndani yake upako hutufundisha kukaa. Katika Kristo utakatifu wa Mungu usioonekana uliwekwa mbele yetu, na kuletwa karibu: ukawa wa kibinadamu, umevikwa asili ya kibinadamu, ili upate kutolewa kwetu. Ndani yetu hukaa na hutenda kazi Roho Mtakatifu, akituvuta kwa Kristo wa Mungu, akituunganisha naye moyoni na mapenzini, akimfunua, akimwumba ndani yetu, hata mfano wake na nia yake vipate kudhihirika ndani yetu. Ni hivyo tunavyokaa ndani ya Kristo: upako mtakatifu wa yule Mtakatifu hutufundisha jambo hili. Ni jambo hili ndilo kipimo cha upako wa kweli: kukaa ndani ya Kristo, kama alivyokusudia, kunakuwa kweli ndani yetu. Hapa ndipo maisha ya utakatifu kama yule Mtakatifu Mara Tatu autoavyo: Baba, wa kwanza, yule Mtakatifu, atakasaye; Mwana, wa pili, yule Mtakatifu wake, ambaye ndani yake tumo; Roho, wa tatu, akaaye ndani yetu, na ambaye kwa yeye tunakaa ndani ya Kristo, na Kristo ndani yetu. Ni hivyo yule Mtakatifu Mara Tatu atutakasavyo.

Na tuutafiti upako wa Kimungu. Watoka kwa yule Mtakatifu. Hakuna mwingine mfano wake. Ni njia ya Mungu ya kututakasa—kutufanya makuhani wake watakatifu. Ni njia ya Mungu ya kutufanya washiriki wa utakatifu ndani ya Kristo. Upako, unaopokewa kwake siku kwa siku, ukikaa ndani yetu, ukitufundisha mambo yote, hasa ukitufundisha kukaa ndani ya Kristo, lazima uwe juu yetu kila siku. Nguvu yake iliyofichika, ienezayo kila mahali, lazima ipite katika maisha yetu yote: harufu ya marhamu lazima ijaze nyumba. Ahimidiwe Mungu, waweza kufanya hivyo! Upako ukaao hufanya kukaa ndani ya Kristo kuwa uhalisi na hakika; na Mungu mwenyewe, yule Mtakatifu, hufanya upako ukaao kuwa uhalisi na hakika pia. Kwa Jina lake Takatifu na uwe sifa!

Kuweni watakatifu, kwa kuwa mimi ni mtakatifu.

Ee Wewe, uliye yule Mtakatifu, naja kwako sasa kwa ajili ya upako uliofanywa upya. Ee Baba! hiki ndicho kipawa kimoja ambacho mtoto wako aweza kukitegemea kwa hakika zaidi—kipawa cha Roho wako Mtakatifu. Nijalie sasa niimbe, ‘Umenipaka kichwa changu mafuta;’ ‘Nimetiwa mafuta mapya.’

Natamani kuungama kwa aibu kuu ya kwamba Roho wako amehuzunishwa na kuvunjiwa heshima vibaya sana. Ni mara ngapi nia ya mwilini imenyakua nafasi yake katika ibada yako! Ni kwa kadiri gani mapenzi ya mwilini yametafuta kufanya kazi yake! Ee Baba yangu! nuru yako na iangaze ndani yangu ili inisadikishe kwa kina sana juu ya jambo hili. Hukumu yako na ije juu ya yote yaliyomo ya kutaka na kupiga mbio kwa kibinadamu.

Baba mbarikiwa! nijalie, kwa kadiri ya utajiri wa utukufu wako, hata sasa nitiwe nguvu kwa uwezo kwa Roho wako katika utu wa ndani. Uitie nguvu imani yangu ili nimwamini Kristo kwa ajili ya sehemu kamili katika upako wake. Ee, nifundishe siku kwa siku kungoja na kupokea upako kwa mafuta mapya!

Ee Baba yangu! tuvute mimi na watoto wako wote tuone ya kwamba kwa ajili ya kukaa ndani ya Kristo twahitaji upako ukaao. Baba! tungependa kuenenda kwa unyenyekevu, katika kutegemea kwa imani, tukiutumainia upako wa ndani ukaao milele. Na tuwe hivyo harufu nzuri ya Kristo kwa wote. Amina.

1. Nadhani sasa naijua sababu ya kwa nini nyakati fulani twashindwa katika kukaa. Twafikiri na kusoma, twasikiliza na kuomba, twajaribu kuamini na kujitahidi kumtazama Yesu peke yake, na hata hivyo twashindwa. Kilichokosekana ni hiki: ‘Upako wake huwafundisha; na kama ulivyowafundisha, kaeni ndani yake;’ mpaka hapo, si zaidi.

2. Kuoshwa daima hutangulia upako: hatuwezi kuwa na upako kama tukishindwa katika kusafishwa. Tukiisha kusafishwa na kutiwa mafuta twafaa kutumika.

3. Je, wataka kuwa na upako ukaao? Jisalimishe kabisa upate kutakaswa na kufanywa unafaa kwa matumizi ya Bwana: kaa katika Patakatifu pa Patakatifu, mbele za Mungu: pokea kila kuadhibiwa kama ushirika katika njia ya mwili uliopasuka: uwe na hakika upako utatiririka katika muungano na Yesu. ‘Ni kama marhamu ya thamani juu ya kichwa cha Haruni, iliyoshuka hata pindo za mavazi yake.’

4. Upako ni dawa ya macho ya Kimungu, ifumbuayo macho ya moyo ili kumjua Yesu. Hivyo hufundisha kukaa ndani yake. Nina hakika Wakristo wengi hawana fahamu juu ya hatari na udanganyifu wa dini ya mawazo, yenye mawazo matamu na ya thamani yatujiayo katika vitabu na mahubiri, na nguvu kidogo. Mafundisho ya Roho Mtakatifu yamo moyoni kwanza; mafundisho ya mwanadamu yamo akilini. Kufikiri kwetu kote na kutuongoze daima tuache kufikiri, na kuufungua moyo na mapenzi kwa Roho ili afundishe humo kwa njia yake mwenyewe ya Kimungu, iliyo na kina kuliko fikira na hisia. Bila kuonekana, ndani ya pazia, Roho Mtakatifu hukaa. Nyamaza na utulie, amini na utazamie, na umng’ang’anie Yesu.

5. Laiti Mungu angeitembelea Kanisa lake, na kuwafundisha watoto wake maana ya kungoja, na kupokea, na kuenenda katika upako kamili, upako ukaao na kufundisha kukaa! Laiti kweli ya uongozi wa binafsi wa Roho Mtakatifu katika kila mwamini ingerudishwa katika Kanisa! Anafanya hivyo; atafanya hivyo.

Siku ya Thelathini na Moja.