Utakatifu na Mwili

‘Hekalu la Mungu ni takatifu, ambalo hekalu hilo ni ninyi. Mwili ni kwa ajili ya Bwana, na Bwana kwa ajili ya mwili. Hamjui ya kuwa mwili wenu ni hekalu la Roho Mtakatifu aliye ndani yenu; kwa hiyo mtukuzeni Mungu katika mwili wenu.’—1 Wakorintho 3:16, 6:13, 19.

‘Yeye asiyeolewa hujishughulisha na mambo ya Bwana, apate kuwa mtakatifu mwilini na rohoni.’—1 Wakorintho 7:34.

‘Itoeni miili yenu iwe dhabihu iliyo hai, takatifu, ya kumpendeza Mungu.’—Warumi 12:1.

Alipokuja ulimwenguni, Bwana wetu Mbarikiwa alinena: ‘Mwili uliniandalia; tazama, naja niyafanye mapenzi yako, Ee Mungu.’ Alipoondoka ulimwenguni tena, ni katika mwili wake mwenyewe alichukua dhambi zetu juu ya mti. Hivyo ilikuwa katika mwili, si chini ya nafsi na roho, ndipo alifanya mapenzi ya Mungu. Na kwa hiyo imesemwa, ‘Kwa mapenzi hayo tumetakaswa, kwa toleo la mwili wa Yesu Kristo mara moja tu.’

Alipowaombea Wathesalonike na utakaso wao, Paulo asema, ‘Naye Mungu wa amani mwenyewe awatakase kabisa; nazo roho zenu na nafsi zenu na miili yenu mhifadhiwe mkiwa kamili, bila lawama, wakati wa kuja kwake Bwana wetu Yesu Kristo.’ Kwa habari yake mwenyewe alikuwa amenena kuwa ‘sikuzote tukiuchukua mwilini kufa kwake Yesu, ili uzima wa Yesu nao udhihirishwe katika mwili wetu. Kwa maana sisi tulio hai sikuzote twatolewa tufe kwa ajili ya Yesu, ili uzima wa Yesu nao udhihirishwe katika mwili wetu upatikanao na mauti.’ Tumaini lake la dhati na taraja lake lilikuwa, ‘kwamba Kristo atukuzwe katika mwili wangu, ikiwa kwa uzima au kwa mauti.’ Uhusiano kati ya mwili na roho ni wa ndani sana, nguvu ya dhambi rohoni hupenya kwa kiasi kikubwa kupitia mwili, mwili ni kwa dhahiri shabaha ya ukombozi wa Kristo na ya ufanyaji upya wa Roho Mtakatifu, hata masomo yetu juu ya utakatifu yatapungukiwa vibaya tusipoyakubali mafundisho ya Maandiko juu ya utakatifu mwilini.

Imesemwa vema kwamba mwili ni, kwa nafsi na roho zinazokaa na kutenda ndani yake, kama kuta za mji. Kupitia kuta hizo adui huingia ndani. Wakati wa vita, kila kitu hujitoa kwa ajili ya ulinzi wa kuta. Mara nyingi ni kwa sababu mwamini hajui umuhimu wa kuzilinda kuta, wa kuutakasa mwili, ndipo ashindwapo kuihifadhi nafsi na roho bila lawama. Au ni kwa sababu haelewi kwamba kulinda na kutakasa mwili katika sehemu zake zote lazima iwe kwa dhahiri kazi ya imani, na moja kwa moja kupitia nguvu kuu ya Yesu na kukaa kwa Roho ndani, kama vile ufanyaji upya wa maisha ya ndani, ndipo maendeleo katika utakatifu yalivyo dhaifu hivyo. Utawala wa mji twaukabidhi kwa Yesu: lakini ulinzi wa kuta twauweka mikononi mwetu wenyewe; Mfalme hatuhifadhi kama tulivyotazamia, wala hatuwezi kuvumbua siri ya kushindwa. Ni Mungu wa amani Mwenyewe, atakasaye kabisa, ndiye apasaye kuihifadhi roho na nafsi na mwili kamili na bila lawama. Hema pamoja na mbao zake, na hekalu pamoja na mawe yake, vilikuwa vitakatifu kama vyote vilivyokuwamo ndani ya kuta zake: watakatifu wa Mungu wauhitaji mwili kuwa mtakatifu.

Ili kufahamu maana kamili ya hili, na tukumbuke jinsi dhambi ilivyoingia kupitia mwili. ‘Mwanamke aliona ya kuwa ule mti wafaa kwa chakula,’ huku ndiko kulikuwa kishawishi katika mwili; kwa njia hii nafsi ilifikiwa, ‘nao wapendeza macho;’ kupitia nafsi kikapita ndani ya roho, ‘na wa kutamanika kwa kumtia mtu akili.’ Katika maelezo ya Yohana ya yaliyomo ulimwenguni (1 Yohana 2:15), twakuta mgawanyiko ule ule wa aina tatu, ‘tamaa ya mwili, na tamaa ya macho, na majivuno ya maisha.’ Nayo majaribu matatu ya Yesu kwa Shetani yalingana sawasawa: kwanza alitafuta kumfikia kupitia mwili, katika pendekezo la kuishibisha njaa yake kwa kufanya mkate; la pili (tazama Luka iv.) liligusa nafsi, katika maono ya falme za ulimwengu huu na utukufu wake; la tatu liligusa roho, katika wito wa kuthibitisha na kudhihirisha Uana wake wa Kimungu kwa kujitupa chini. Hata kwa Mwana wa Mungu jaribu la kwanza lilikuja, kama kwa Adamu na kwa wote walio ulimwenguni, kama tamaa ya mwili, shauku ya kutosheleza hamu ya asili na halali ya njaa. Hatuwezi kuzingatia kwa uangalifu wa kutosha kwamba ilikuwa juu ya swali la kula kile kilichoonekana kuwa chema kwa chakula ndipo dhambi ya kwanza ya mwanadamu ilifanyika, na kwamba swali lilo hilo la kula ili kushibisha njaa lilikuwa uwanja wa vita ambao juu yake mkutano wa kwanza wa Mkombozi na Shetani ulifanyika. Ni juu ya swali la kula na kunywa kilicho chema na halali ndipo Wakristo wengi kuliko wanavyojua wanashindwa na Shetani. Kuwa na kila hamu ya mwili chini ya utawala na uongozi wa Roho Mtakatifu kwaonekana kwa wengine kutokuwa na haja, kwa wengine kugumu mno. Lakini sharti iwe hivyo, kama mwili utakuwa mtakatifu, kama hekalu la Mungu, nasi tumtukuze katika mwili wetu na roho yetu. Njia za kwanza za dhambi hufanywa kupitia mwili: mwilini ndipo ushindi kamili utakapopatikana.

Yale Maandiko yafundishayo kuhusu ukaribu wa uhusiano kati ya mwili na roho, elimu ya viungo vya mwili huyathibitisha. Yale yaonekanayo mwanzoni kuwa makosa ya kimwili tu huacha doa na huwa na uvutano wa kudhalilisha juu ya nafsi, na kupitia nafsi huishusha roho. Na kwa upande mwingine, dhambi za kiroho, dhambi za wazo na fikira na mwelekeo, hupita kupitia nafsi na kuingia mwilini, hujiweka imara katika mfumo wa mishipa ya fahamu, na hujidhihirisha hata katika uso na tabia au mielekeo ya mwili. Dhambi lazima ipiganwe si katika eneo la roho tu: kama tutakamilisha utakatifu, lazima tujitakase nafsi zetu na uchafu wote wa mwili na roho. ‘Kama kwa Roho mkiyafisha matendo ya mwili, mtaishi.’ Kama kweli tutatakaswa kutoka dhambi na kufanywa watakatifu kwa Mungu, mwili, kama boma la nje, lazima uhifadhiwe kwa namna ya pekee kutoka nguvu ya Shetani na ya dhambi.

Na jinsi gani hili litafanyika? Mungu amefanya maandalizi ya pekee sana kwa ajili ya hili. Maandiko Matakatifu yanena kwa uwazi mkubwa juu ya Roho Mtakatifu, Roho aletaye utakatifu, kwa uhusiano na mwili. Kwa mtazamo wa kwanza yaonekana kana kwamba neno hilo, miili yenu, lilitumika tu kwa maana ya, nafsi zenu, ninyi wenyewe. Lakini kadiri ufahamu wa kina zaidi juu ya nguvu ya dhambi mwilini, na uhitaji wa wokovu hasa pale, uamshavyo utambuzi wetu, twaona maana ya mwili kuwa hekalu la Roho Mtakatifu. Twaona jinsi ilivyo kwa namna ya pekee sana kuwa ni juu ya dhambi za mwilini Paulo anena kuwa zinalinajisi hekalu takatifu la Mungu; na jinsi ilivyo kupitia nguvu ya Roho Mtakatifu mwilini atakavyo sisi tumtukuze Mungu. ‘Hamjui ya kuwa mwili wenu ni hekalu la Roho Mtakatifu: kwa hiyo mtukuzeni Mungu, katika nguvu ya Roho Mtakatifu, katika mwili wenu.’ Roho Mtakatifu hana budi si kutumia tu uvutano wa kuzuia na kuongoza juu ya hamu za mwili na kutosheleza kwake, hata ziwe katika kiasi na kujizuia,—huu ni upande hasi tu,—bali sharti kuwe na kipengele cha kiroho chanya, kifanyacho utekelezaji wa kazi za asili kuwa utumishi wa furaha takatifu na uhuru kwa utukufu wa Mungu; usiwe tena kizuizi kitishacho maisha ya utii na ushirika, bali njia ya neema, msaada wa kweli kwa maisha ya kiroho. Ni katika mwili tu uliojaa maisha matakatifu, uliomilikiwa kabisa na Roho wa Mungu, ndipo hili litakapokuwa hivyo.

Na jinsi gani hili laweza kupatikana? Katika maisha ya kweli ya Kikristo, kujikana ndiyo njia ya kufurahia, kujinyima ndiyo njia ya kumiliki, kufa ndiyo njia ya uzima. Maadamu kuna cho chote tunachodhani tuna uhuru na uwezo wa kukitumia au kukifurahia ipasavyo, ikiwa tu twafanya hivyo kwa kiasi, bado hatujaiona wala kuiungama unajisi wetu wenyewe, wala uhitaji wa kufanywa upya kabisa na Roho Mtakatifu. Haitoshi kusema, ‘Kila kiumbe cha Mungu ni chema, kikipokelewa kwa shukrani;’ hatuna budi kukumbuka nyongeza, ‘kwa maana kimetakaswa kwa neno la Mungu na kwa kuomba.’ Kutakaswa huku kwa kila kiumbe na matumizi yake ni jambo halisi na zito kama vile kujitakasa sisi wenyewe. Nalo hili litakuwa tu pale, ikibidi, tutakapoitoa dhabihu ile karama na uhuru wa kuitumia, hata Mungu atupe uwezo wa kuitumia kweli kwa utukufu wake peke yake. Kuhusu mojawapo ya taasisi takatifu kuliko zote za Kimungu, ndoa, Paulo, yeye alaumuye vikali wale wangekataza kuoa, asema wazi kwamba yaweza kuwako hali ambazo kutokuoa kwa hiari kwaweza kuwa njia iliyo salama na yenye kukubalika ya kuwa ‘mtakatifu mwilini na rohoni.’ Wakati kuwa mtakatifu kama Mungu alivyo mtakatifu kunapokuwa kweli shauku kuu na lengo la maisha, kila kitu kitatunzwa au kitaachwa kadiri kiendelezavyo lengo lililo kuu. Uwepo halisi na tendaji wa Roho Mtakatifu katika maisha ya mwili utakuwa moto uwakao daima juu ya madhabahu.

Na jinsi gani hili litafikiwa? Kwa habari ya mwili kama ya roho ni Mungu, Mungu katika Kristo, aliye Mlinzi wetu na Mtakasaji wetu. Ulinzi wa kuta za mji lazima ukabidhiwe kwake yeye atawalaye ndani. ‘Nina hakika kwamba yeye aweza kukilinda kile nilichokiweka amana kwake,’ kukihifadhi kile nilichomkabidhi, lazima kiwe kweli kwa dhahiri kwa habari ya mwili, na kwa habari ya kila kazi yake ambayo twatambua kuwa ndiyo sababu ya shaka au ya kujikwaa, kama kilivyokuwa kweli kwa habari ya nafsi tuliyomkabidhi kwa wokovu. Amana iliyowekwa benki ni fedha iliyotolewa kutoka mikononi mwangu ili ihifadhiwe humo: mwili au sehemu yo yote yake ihitajiyo kufanywa takatifu lazima iwe amana kwa Yesu. Imani lazima itumaini kuikubali kwake na kuilinda kwake; sala na sifa lazima kila siku ziufanye upya uhakika, lazima zithibitishe kutolewa kwa amana, na kudumisha ushirika na Yesu. Tukikaa hivyo ndani yake na ndani ya Utakatifu wake, tutapokea, katika maisha ya kutumaini na furaha, nguvu ya kudhihirisha, hata mwilini, jinsi tulivyo ndani yake kwa ukamilifu na kwa utimilifu, yeye aliyefanywa kwetu utakaso, jinsi Utakatifu wa Mungu ulivyo halisi na wa kweli ndani ya watu wake.

Kuweni watakatifu, kama mimi nilivyo mtakatifu.

Bwana Mbarikiwa! wewe uliye utakaso wangu, naja kwako sasa na ombi la pekee sana. Ee wewe uliyechukua dhambi zetu katika mwili wako mwenyewe juu ya mti, na ambaye juu yake imeandikwa, ‘Tumetakaswa kwa toleo la mwili wa Yesu Kristo mara moja tu,’ upende kunifunulia jinsi mwili wangu unavyoweza kuupata kwa ukamilifu uwezo wa ukombozi wako wa ajabu. Nautamani kwa nafsi na mwili kuwa mtakatifu kwa Bwana.

Bwana! nimefahamu kidogo mno kwamba mwili wangu ni hekalu la Roho Mtakatifu, kwamba hakuna kitu ndani yake kiwezacho kuwa jambo lisilo na maana, kwamba kila hali yake na kila kazi yake yapasa kuwa utakatifu kwa Bwana. Na pale nilipoona kwamba yapasa iwe hivyo, bado nimetafuta mimi mwenyewe kuzilinda kuta hizi za mji kutokana na njia za adui. Nilisahau jinsi sehemu hii ya nafsi yangu nayo iwezavyo kuhifadhiwa na kutakaswa kwa imani peke yake, kwa wewe kuyachukua na kuyatunza yale imani ilikukabidhi.

Bwana Yesu! naja sasa kuujisalimisha mwili huu pamoja na mahitaji yake yote mikononi mwako. Katika uchovu na wasiwasi, katika msisimko na furaha, katika njaa na uhitaji, katika afya na wingi, Ee Mwokozi wangu mtakatifu, mwili wangu na uwe katika ulinzi wako kila dakika. Watuita, ‘tukiwa tumewekwa huru na dhambi, tuvitoe viungo vyetu kuwa watumishi wa haki hata utakaso.’ Mwokozi! katika imani ya uhuru toka dhambi nilio nao ndani yako, nakitoa kila kiungo cha mwili wangu kwako: naamini Roho wa uzima aliye ndani yako hunifanya huru na sheria ya dhambi iliyo katika viungo vyangu. Nikiwa hai au nikifa, wewe utukuzwe katika mwili wangu. Amina.

1. Katika hema na hekalu, sehemu ya vitu ilipasa kupatana na, na kuwa kielelezo cha, utakatifu uliokaa ndani. Kwa hiyo yote ilifanywa kwa kadiri ya kielelezo kilichoonyeshwa mlimani. Katika sura mbili za mwisho za Kutoka, tunayo mara kumi na nane ‘kama Bwana alivyoamuru.’ Kila kitu, hata katika sehemu ya nje, kilikuwa kielelezo cha mapenzi ya Mungu. Vivyo hivyo mwili wetu, kama hekalu la Mungu, lazima katika kila jambo uongozwe na neno la Mungu, uamshwe na kutakaswa na Roho Mtakatifu.

2. Kama sehemu ya utakatifu huu mwilini, Maandiko yataja mavazi. Akinena juu ya ‘kujipamba kwa nje kwa kusuka nywele, kwa kuvaa vito, au kwa kuvaa mavazi,’ kuwa hakupatani na ‘vazi la roho ya upole na utulivu,’ Petro asema, ‘Kwa jinsi hii zamani wanawake watakatifu, waliomtumaini Mungu, walijipamba.’ Utakatifu ulionekana katika mavazi yao; mwili wao ulikuwa hekalu la Roho Mtakatifu.

3. ‘Kama kwa Roho mkiyafisha matendo ya mwili, mtaishi.’ Nguvu yake iamshayo lazima itawale katika yote. Tumezoea sana kuunganisha yaliyo ya kiroho na yaliyo bora na yasiyoonekana, hata itahitaji wakati na fikira na imani kufahamu jinsi yaliyo ya kimwili na yanayohisiwa yavutavyo maisha yetu ya kiroho, na jinsi yapasavyo kuwa chini ya utawala na uvuvio wa Roho wa Mungu. Hata Paulo asema, ‘Nautesa mwili wangu, na kuutia utumwani, isije ikawa mimi mwenyewe nikakataliwa.’

4. Ikiwa Mungu kweli alipuliza Roho wake katika mwili wa Adamu uliofanyizwa kutoka udongo, isidhaniwe kuwa jambo geni kwamba Roho Mtakatifu sasa ayahuishe miili yetu nayo kwa nguvu yake itakasayo.

5. ‘Umwili ndio mwisho wa njia za Mungu.’ Msemo huu wenye kina wa mwanateolojia wa zamani watukumbusha ukweli uliopuuzwa sana. Kazi kuu ya Roho wa Mungu ni kujiunga na maada, na kuiumba iwe mwili wa kiroho uwe makao ya Mungu. Katika mwili wetu Roho Mtakatifu atalitenda hili, akipata umiliki kamili.

6. Ni juu ya ukweli huu wa nguvu ya Roho Mtakatifu mwilini ndipo kile kiitwacho Uponyaji-kwa-Imani kwakaa. Katika enzi zote, katika nyakati za uamsho wa kiroho wa pekee, Mungu amewapa baadhi kuona jinsi Kristo angeufanya, hata hapa, mwili kuwa mshiriki wa uzima na nguvu ya Roho. Kwa wale wauonao, kifungo kati ya Utakatifu na Uponyaji ni cha karibu sana na cha baraka, kadiri Bwana Yesu auchukuavyo mwili kuwa wake mwenyewe.

Siku ya Ishirini na Nne.