Katika Kristo Utakaso Wetu

‘Bali kwa yeye ninyi mmo katika Kristo Yesu, aliyefanywa kwetu hekima itokayo kwa Mungu, na haki, na utakaso, na ukombozi; ili, kama ilivyoandikwa, Yeye aonaye fahari, na aone fahari katika Bwana.’—1 Wakorintho 1:30, 31.

Maneno haya sasa yanatuongoza hadi kiini hasa cha ufunuo wa Mungu juu ya njia ya utakatifu. Tunazijua hatua za njia inayotuleta hapa. Yeye ni mtakatifu, na utakatifu ni wake. Hutakasa kwa kukaribia. Uwepo wake ni utakatifu. Katika uzima wa Kristo, ule utakatifu ambao ulikuwa umefunuliwa katika ishara tu, na kama ahadi ya mema yatakayokuja, kwa kweli ulikuwa umeumiliki utashi wa kibinadamu, na kufanywa kuwa kitu kimoja na asili ya kweli ya kibinadamu. Katika mauti yake kila kizuizi kilichoweza kuzuia utolewaji wa asili ile takatifu kwetu kilikuwa kimeondolewa: Kristo alikuwa amekuwa kweli utakaso wetu. Katika Roho Mtakatifu utolewaji halisi wa utakatifu ule ulitokea. Na sasa twataka kufahamu ni kazi gani ile ambayo Roho Mtakatifu huifanya, na jinsi anavyotupatia asili hii takatifu: uhusiano wetu na Kristo kama utakaso wetu ni upi, na msimamo tunaopaswa kuuchukua mbele yake, ili katika utimilifu wake na nguvu zake uweze kutufanyia kazi yake.

Jibu la Kimungu la swali hili ni, ‘Kwa yeye ninyi mmo katika Kristo.’ Jambo moja tunalohitaji kulielewa ni, msimamo huu wetu na uzima wetu katika Kristo ni nini, na jinsi msimamo huo na uzima huo unavyoweza kukubaliwa na kudumishwa kwa upande wetu. Juu ya jambo hili twaweza kuwa na hakika, ya kwamba si kitu kilicho juu na nje ya ufikiaji wetu. Hakuna haja ya jitihada ichoshayo wala ya kuugua bila tumaini, ‘Ni nani atakayepanda mbinguni, yaani, kumshusha Kristo kutoka juu?’ Ni uzima uliokusudiwa kwa ajili ya wenye dhambi na waliochoka, kwa ajili ya wasiostahili na wasio na uwezo. Ni uzima ulio zawadi ya upendo wa Baba, na ambao yeye mwenyewe atauonyesha katika kila mmoja aendaye kwake kwa imani kama ya mtoto. Ni uzima uliokusudiwa kwa ajili ya maisha yetu ya kila siku, ambao katika kila hali na mazingira yanayobadilika utatufanya na kutuweka watakatifu.

‘Kwa yeye ninyi mmo katika Kristo.’ Kabla Bwana wetu Mbarikiwa hajaondoka ulimwenguni, alinena: Tazama, mimi nipo pamoja nanyi siku zote, hata ukamilifu wa dahari. Na imeandikwa juu yake: ‘Yeye aliyeshuka ndiye yeye yule aliyepaa juu sana kupita mbingu zote, ili avijaze vitu vyote.’ ‘Kanisa ndilo mwili wake, ukamilifu wake yeye avijazaye vyote katika vyote.’ Katika Roho Mtakatifu Bwana Yesu yupo pamoja na watu wake hapa duniani. Ijapokuwa haonekani, wala hayupo katika mwili, Uwepo wake wa Nafsi yake ni halisi duniani kama vile alipotembea na wanafunzi wake. Katika kuzaliwa upya mwamini huondolewa mahali pake pa zamani ‘katika mwili;’ hayupo tena katika mwili, bali katika roho (Warumi 8:9); yeye yumo kweli kweli katika Kristo. Kristo aliye hai yumo kumzunguka kwa Uwepo wake mtakatifu. Popote alipo na hali yoyote aliyo nayo, hata awe hajui msimamo wake au hata asiwe mwaminifu kwao, huko yumo katika Kristo. Kwa tendo la neema ya Kimungu na yenye uweza wote, amepandwa ndani ya Kristo, akizungukwa kila upande na Nguvu na Upendo wa yeye avijazaye vitu vyote, ambaye utimilifu wake hukaa hasa katika mwili wake hapa chini, yaani Kanisa.

Na awezaje yeye anayetamani kumjua Kristo kikamilifu kama utakaso wake, kuja kuishi kile ambacho Mungu anakusudia na amekiandaa katika hili—‘katika Kristo’? Jambo la kwanza linalopaswa kukumbukwa ni kwamba ni jambo la imani wala si la hisia. Ahadi ya kukaa ndani na ya kuhuisha kwake Mtakatifu ni kwa wanyenyekevu na wenye toba. Hasa ninapohisi kwa kina kabisa kwamba mimi si mtakatifu, na siwezi kufanya lolote kujitakasa mwenyewe, ninapojiona aibu, ndipo hasa wakati wa kujigeuza kutoka nafsini na kwa utulivu mkubwa kusema: Mimi nimo katika Kristo. Hapa yeye yu kunizunguka pande zote. Kama hewa inayonizunguka, kama nuru inayoniangazia, hapa yupo Bwana wangu Yesu pamoja nami katika uwepo wake uliofichika lakini wa Kimungu na ulio halisi kabisa. Imani yangu lazima kwa pumziko la utulivu na tumaini isujudu mbele za Baba, ambaye kwake na kwa Neema yake Kuu mimi nimo katika Kristo: yeye atanifunulia jambo hili kwa uwazi na nguvu zizidizo daima. Hulifanya hilo kadiri niaminivyo, na katika kuamini kuufungua moyo wangu wote upokee kile kinachomaanishwa ndani yake: hisia ya udhambi na kutokuwa mtakatifu lazima iwe nguvu ya tumaini langu na kutegemea kwangu. Katika imani kama hiyo mimi nakaa ndani ya Kristo.

Lakini kwa sababu ni jambo la imani, kwa hiyo ni jambo la Roho Mtakatifu. Kwa Mungu ninyi mmo katika Kristo. Si kana kwamba Mungu alitutia na kutupanda katika Kristo, kisha akatuachia sisi sasa kuudumisha muungano huo. La, Mungu ni yeye wa Milele, Mungu wa uzima wa milele, atendaye kazi kila dakika kwa nguvu isiyokoma hata kwa dakika moja. Kile Mungu akitoacho, huendelea kukitoa kwa utoaji usiokoma kamwe. Ni yeye ambaye kwa Roho Mtakatifu huufanya uzima huu katika Kristo kuwa uhalisi uliobarikiwa katika ufahamu wetu. ‘Tumepokea Roho atokaye kwa Mungu, ili tupate kuyajua mambo tuliyokirimiwa na Mungu.’ Imani haitegemei Mungu kwa ajili ya kipawa itakachokipokea tu, bali pia kwa ajili ya nguvu ya kupokea. Imani haihitaji Mwana kuwa ujazo wake na chakula chake tu; huhitaji Roho kuwa nguvu yake ya kupokea na kushika. Na hivyo umiliki uliobarikiwa wa yote yaliyo na maana ya kuwa katika Kristo utakaso wetu huja tunapojifunza kusujudu mbele za Mungu katika maombi ya imani kwa ajili ya matendo makuu ya Roho, na katika tumaini la kina kama la mtoto kwamba yeye atamfunua na kumtukuza ndani yetu huyu Kristo utakaso wetu ambaye ndani yake tumo.

Naye Roho atamfunuaje huyu Kristo ambaye ndani yake tumo? Itakuwa hasa kama yeye Aliye Hai, Rafiki na Bwana wa Nafsi. Kristo si Kielelezo chetu na Kigezo chetu tu. Uzima wake si mazingira na msukumo tu, kama tunavyonena juu ya mtu atuathiriye kwa nguvu kwa maandishi yake. Kristo si hazina na ukamilifu wa neema na nguvu tu, ambao Roho atatuongoza ndani yake. Bali Kristo ni Mwokozi Aliye Hai, mwenye moyo upigao kwa upendo ulio wa kibinadamu kwa wororo mkubwa, na hata hivyo wa Kimungu. Ni katika upendo huu ndio hukaribia, na katika upendo huu hutupokea, Baba atupandapo ndani yake. Kwa nguvu ya upendo wa nafsi hutaka kutumia uvutano, na kutufunga kwake mwenyewe. Katika upendo huo wake tuna dhamana kwamba Utakatifu wake utaingia ndani yetu; katika upendo huo mna nguvu ile kuu ambayo kwayo huingia. Kadiri Roho anavyotufunulia mahali tunapokaa, ndani ya Kristo na upendo wake, na kwamba huyu Kristo ni Bwana na Mwokozi aliye hai, huamka ndani yetu shauku ya kushikamana kwa nafsi, na kujitoa kwa uaminifu wa upendo, vinavyotufanya kuwa wake kabisa. Nayo huwa yamkini kwetu kuamini kwamba twaweza kuwa watakatifu: twahisi hakika kwamba katika njia ya utakatifu twaweza kwenda toka nguvu hata nguvu.

Ufahamu huo wa kiimani juu ya uhusiano wetu na Kristo kwamba tumo ndani yake, na kushikamana huko kwa nafsi na yeye aliyetupokea katika upendo wake na kutuweka tukikaa humo, huwa chemchemi ya utii mpya. Mapenzi ya Mungu hutujia katika nuru ya uzima wa Kristo na upendo wake—kila amri ikitimizwa kwanza na yeye, kisha ikikabidhiwa kwetu kama msaada ulio hakika na uliobarikiwa mno kuelekea ushirika ulio kamili zaidi na Baba na Utakatifu wake. Kristo huwa Bwana na Mfalme ndani ya nafsi, kwa nguvu ya Roho Mtakatifu, akiuongoza utashi katika mapenzi yote makamilifu ya Mungu, na kujithibitisha kuwa utakaso wake, akiuvika taji utii wake kwa mfuriko uzidio kuwa mkubwa wa Uwepo na Utakatifu wa Mungu.

Je, yupo mtoto mpendwa yeyote wa Mungu aliye tayari kukata tamaa afikiripo ni mtu wa namna gani anayepaswa kuwa katika kuishi kote kwa utakatifu, na nimwite yeye ajipe moyo. Je, angeweza Mungu kubuni kitu cha ajabu zaidi au chema zaidi kwa ajili ya viumbe kama hivyo wenye dhambi na wasio na uwezo? Fikiri tu, Kristo, Mwana wa Mungu mwenyewe, amefanywa kuwa utakaso kwako. Kristo Mwenye Nguvu, Mwenye Upendo, Mtakatifu, aliyetakaswa kwa njia ya mateso ili apate kuhurumiana nawe, ametolewa akutakase. Ungetamani nini zaidi? Naam, kuna zaidi: ‘Kwa yeye ninyi mmo ndani yake.’ Uelewe au usielewe, hata uliitambue kwa udhaifu kiasi gani, jambo lipo, jambo lililo kweli na halisi kwa jinsi ya Kimungu kabisa. Wewe u ndani ya Kristo, kwa tendo la Uweza wa Mungu mwenyewe. Na huko, katika Kristo, Mungu mwenyewe atamani kukuimarisha na kukuthibitisha hata mwisho. Nawe unao, ajabu iliyo kuu kuliko zote, Roho Mtakatifu ndani yako akufundishe kujua, na kuamini, na kupokea, yote yaliyomo katika Kristo kwa ajili yako. Nawe ukikiri tu kwamba hakuna ndani yako hekima wala nguvu kwa ajili ya utakatifu, hata kidogo, na kumruhusu Kristo, ‘Hekima ya Mungu na Nguvu ya Mungu,’ kwa Roho Mtakatifu aliye ndani yako, akuongoze mbele, na kudhihirisha jinsi kwa ukamilifu, jinsi kwa uaminifu, jinsi kwa nguvu, awezavyo kuwa utakaso wako, atalifanya hilo kwa utukufu mkuu.

Ee ndugu yangu! njoo ukubali kwa ukamilifu zaidi njia ya Mungu ya utakatifu. Mwache Kristo awe utakaso wako. Si Kristo aliye mbali umtazamaye, bali Kristo aliye karibu sana, akuzungukaye pande zote, ambaye ndani yake wewe umo. Si Kristo wa jinsi ya mwili, Kristo wa zamani zilizopita, bali Kristo aliye hapa sasa katika nguvu za Roho Mtakatifu. Si Kristo umwezaye kumjua kwa hekima yako, bali Kristo wa Mungu, aliye Roho, na ambaye Roho aliye ndani yako, ukiifisha mwili na nafsi, atamfunua kwa nguvu. Si Kristo ambaye mawazo yako madogo yaweza kumfanyia dhana, bali Kristo kwa kadiri ya ukuu wa moyo na upendo wa Mungu. Ee, njoo umpokee huyu Kristo, na ufurahi ndani yake! Uwe radhi sasa kumwachia yeye udhaifu wako wote, na upumbavu wako, na kutokuamini kwako, katika matumaini ya utulivu kwamba atakufanyia zaidi ya uwezavyo kufikiri. Na hivyo na iwe tangu sasa, kama ilivyoandikwa, Yeye aonaye fahari, na aone fahari katika Bwana.

Kuweni watakatifu, kama mimi nilivyo mtakatifu.

Ee Baba Mbarikiwa kuliko wote! Nasujudu kwa ibada isiyo na maneno mbele ya siri takatifu ya Upendo wako wa Kimungu….

Ee, unisamehe, kwa kuwa nimeujua na kuuamini kwa kiasi kidogo mno kuliko unavyostahili kujulikana na kuaminiwa.

Ukubali sifa yangu kwa yale niliyoyaona na kuyaonja ya heri yake ya Kimungu. Ukubali, Ee Bwana Mungu! sifa ya moyo wenye furaha na upendo ambao wajua tu kwamba hauwezi kamwe kukusifu ipasavyo.

Nawe uyasikie maombi yangu, Ee Baba yangu! kwamba kwa nguvu ya Roho wako Mtakatifu, akaaye ndani yangu, nipate kila siku kukubali na kuishi kwa ukamilifu kile ulichonipa katika Kristo utakaso wangu. Utajiri usiochunguzika ulio ndani yake na uwe riziki ya kila siku kwa kila hitaji langu. Utakatifu wake, furaha yake katika mapenzi yako, kwa kweli na uwe wangu. Nifundishe, zaidi ya yote, jinsi jambo hili liwezavyo kuwa kwa hakika kabisa, kwa sababu mimi nimo, kwa kazi ya Uweza wako wa kuhuisha, ndani yake, nikiwekwa humo na wewe mwenyewe. Baba yangu! imani yangu yalia kwa sauti: Naweza kuwa mtakatifu, na ahimidiwe Bwana wangu Yesu!

Katika imani hii najisalimisha kwako, Bwana Yesu, Mfalme wangu na Bwana wangu, nifanye mapenzi yako peke yake. Katika kila nifanyalo, kubwa au dogo, ningependa kutenda kama mtu aliyetakaswa katika Yesu, aliyeunganishwa na mapenzi ya Mungu ndani yake. Ni wewe peke yako uwezaye kunifundisha kufanya hivi, uwezaye kunipa nguvu ya kulitimiza. Lakini nakutumaini wewe—je, wewe si Kristo utakaso wangu? Ee Bwana Mbarikiwa! Nakutumaini kweli. Amina.

1. Kristo, kama alivyoishi na kufa duniani, ndiye utakaso wetu. Uzima wake, Roho wa uzima wake, ndicho kinachofanya utakatifu wetu. Kupatana kikamilifu na Kristo, kuwa na nia yake, ndiko kuwa mtakatifu.

2. Utakatifu wa Kristo ulikuwa na pande mbili. Mungu alimtakasa kwa Roho wake: Kristo alijitakasa mwenyewe kwa kufuata mwongozo wa Roho, kwa kuyatoa mapenzi yake kwa Mungu katika kila jambo. Vivyo hivyo Mungu ametutakasa sisi katika Kristo; na hivyo twaufuatilia na kuukamilisha utakatifu kwa kujisalimisha kwa Roho wa Mungu, kwa kuyatoa mapenzi yetu na kuishi katika mapenzi ya Mungu.

3. Ni vyema tuupokee kila upande wa kile ambacho Mungu ameufunua juu ya utakatifu katika neno lake. Lakini tusijichoshe kamwe kwa kutaka kuyafahamu yote kikamilifu. Bali na turudi hata kwenye unyofu ulio katika Yesu. Kusujudu miguuni pake, kuamini kwamba yeye anajua yote tunayohitaji, na anayo yote, na apenda kuyatoa yote, ndiko pumziko. Nao utakatifu ni kupumzika katika Yesu, pumziko la Mungu. Mawazo yetu yote na yakusanywe katika hili moja: Yesu, Yesu Mbarikiwa.

4. Uzima huu mtakatifu katika Kristo ni kwa ajili ya leo, unaposoma haya. Kwa maana leo amefanywa na Mungu kuwa utakaso kwako: leo yeye kwa kweli atakuwa utakatifu wako. Mwamini yeye kwa ajili yake; mtumaini, msifu. Na ukumbuke: wewe u ndani yake.

Siku ya Ishirini na Tatu.