Wito wa Mungu kwa Utakatifu

‘Kama vile yeye aliyewaita alivyo mtakatifu, ninyi nanyi kuweni watakatifu katika mwenendo wenu wote; kwa sababu imeandikwa, Kuweni watakatifu, kwa kuwa mimi ni mtakatifu.’—1 Petro 1:15, 16.

Wito wa Mungu ni udhihirisho katika wakati wa kusudi la milele: ‘Wale aliowachagua tangu asili, hao pia akawaita.’ Waaminio ni ‘wale walioitwa kwa kadiri ya kusudi lake.’ Katika wito wake anatufunulia mawazo yake na mapenzi yake juu yetu ni nini, na maisha gani anayotualika. Katika wito wake anatuwekea wazi tumaini la wito wetu ni nini; kadiri tunavyolifahamu kiroho na kuingia ndani yake, maisha yetu hapa duniani yatakuwa kielelezo cha kusudi lake la milele.

Maandiko Matakatifu hutumia zaidi ya neno moja kuonyesha lengo au shabaha ya wito wetu, lakini hakuna lililo la mara kwa mara kuliko lile Petro anasema hapa—Mungu ametuita tuwe watakatifu kama yeye alivyo mtakatifu. Paulo huwaita waaminio mara mbili ‘walioitwa kuwa watakatifu’ (Warumi 1:7; 1 Wakorintho 1:2). ‘Mungu hakutuita’, asema, ‘kwa uchafu, bali katika utakaso’ (1 Wathesalonike 4:7). Aandikapo, ‘Mungu wa amani na awatakase kabisa,’ huongeza, ‘Yeye awaitaye ni mwaminifu, naye ndiye atakayefanya hayo’ (1 Wathesalonike 5:24). Wito wenyewe unatajwa kuwa ‘wito mtakatifu.’ Kusudi la milele ambalo wito ni tunda lake, daima huhusishwa pia na utakatifu kama shabaha yake. ‘Alituchagua katika yeye, ili tuwe watakatifu, tusio na hatia’ (Waefeso 1:4). ‘Ambao Mungu aliwachagua tangu mwanzo mpaka wokovu katika utakaso’ (2 Wathesalonike 2:12). ‘Wateule kwa kadiri ya kujua kwake Baba tangu asili, katika utakaso wa Roho’ (1 Petro 1:2). Wito ni ufunuo wa kusudi ambalo Baba tangu milele aliliwekea moyo wake: kwamba tuwe watakatifu.

Haihitaji uthibitisho kwamba ni jambo la maana isiyo na kikomo kujua sawasawa Mungu ametuita kwa ajili ya nini. Kutoelewa hapa kwaweza kuleta madhara ya kuangamiza. Yamkini umesikia kwamba Mungu anakuita kwenye wokovu au kwenye furaha, kupokea msamaha au kupata mbingu, wala hukutambua kamwe kwamba haya yote ni ya daraja la chini. Ilikuwa ni kwa ‘wokovu katika utakaso,’ ilikuwa ni kwa Utakatifu kwanza kabisa, kama kile kiini ambacho ndani yake wokovu na mbingu hupatikana. Malalamiko ya Wakristo wengi kuhusu kupungukiwa na furaha na nguvu, kuhusu kushindwa na kukosa kukua, yanatokana tu na hili—nafasi ambayo Mungu aliipa Utakatifu katika wito wake, wao hawajaipa katika jibu lao. Mungu na wao hawajawahi kufikia mapatano juu ya jambo hili.

Si ajabu kwamba Paulo, katika sura ile ambayo alikuwa amewaambia Waefeso juu ya kuwa kwao ‘wateule ili wawe watakatifu’ aliomba kwamba waaminio wapewe roho ya hekima na ya ufunuo katika kumjua Mungu, ili wapate kujua ‘tumaini la wito wao’ (1:17, 18). Sisi sote, tunaohisi kwamba tumelitambua kidogo mno kuwa tumeitwa kwenye Utakatifu, na tuombe sala hii. Ndicho hasa tunachohitaji. Na tumwombe Mungu atuonyeshe jinsi, kama vile yeye aliyetuita alivyo mtakatifu, vivyo hivyo nasi twapaswa kuwa watakatifu; wito wetu ni wito mtakatifu, wito ulio mbele na juu ya kila kitu, wa kuelekea Utakatifu. Na tumwombe atuonyeshe Utakatifu ni nini, Utakatifu wake kwanza, kisha Utakatifu wetu; atuonyeshe jinsi alivyouwekea moyo wake kama jambo pekee analotaka kuliona ndani yetu, kwa kuwa ni mfano na sura yake mwenyewe; atuonyeshe pia baraka na utukufu usioelezeka wa kushiriki pamoja na Kristo katika Utakatifu wake. Ee! laiti Mungu kwa Roho wake angetufundisha maana yake kuwa tumeitwa kuwa watakatifu kama yeye alivyo mtakatifu. Twaweza kufahamu kwa urahisi ni ushawishi wenye nguvu kiasi gani ambao jambo hili lingekuwa nao.

‘Kama vile yeye aliyewaita alivyo mtakatifu, ninyi nanyi kuweni watakatifu’. Jinsi wito huu wa Mungu unavyotuonyesha nia ya kweli ya Utakatifu. ‘Kuweni watakatifu, kwa kuwa mimi ni mtakatifu.’ Ni kama Mungu alisema, Utakatifu ni baraka yangu na utukufu wangu: pasipo huu huwezi, kwa asili ya mambo yenyewe, kuniona au kunifurahia. Utakatifu ni baraka yangu na utukufu wangu: hakuna kilicho juu zaidi kiwezacho kuwaziwa; nakualika ushiriki nami ndani yake, nakualika kufanana nami mwenyewe: ‘Kuweni watakatifu, kwa kuwa mimi ni mtakatifu.’ Je, haitoshi, je, haina mvuto, je, halikuvuti na kukusukuma kwa nguvu, tumaini la kuwa pamoja nami, washiriki wa Utakatifu wangu? Sina kitu kilicho bora zaidi cha kutoa—najitoa mimi mwenyewe: ‘Kuweni watakatifu, kwa kuwa mimi ni mtakatifu.’ Je, hatutamlilia Mungu kwa bidii atuonyeshe utukufu wa Utakatifu wake, ili roho zetu zifanywe tayari kutoa kila kitu katika kuitikia wito huu wa ajabu?

Tunaposikiliza wito, unatuonyesha pia asili ya Utakatifu wa kweli. ‘Kama vile yeye alivyo mtakatifu, vivyo hivyo kuweni watakatifu na ninyi.’ Kuwa mtakatifu ni kufanana na Mungu, kuwa na tabia, mapenzi, na moyo kama wa Mungu. Wazo hili karibu laonekana kama kufuru, hata tunaposikiliza tena, ‘Alituchagua katika Kristo ili tuwe watakatifu.’ Katika Kristo Utakatifu wa Mungu ulidhihirika katika maisha ya kibinadamu: katika kielelezo cha Kristo, katika nia yake na Roho yake, tunao Utakatifu wa yule Asiyeonekana ukiwa umefasiriwa katika namna za maisha na mwenendo wa kibinadamu. Kufanana na Kristo ni kufanana na Mungu; kufanana na Kristo ni kuwa mtakatifu kama Mungu alivyo mtakatifu.

Wito vilevile unadhihirisha nguvu ya Utakatifu. ‘Hakuna aliye mtakatifu kama Bwana;’ hakuna Utakatifu ila ule alio nao, au afadhali ule alio yeye, na autoao. Utakatifu si kitu tufanyacho au tukifikiacho: ni kupewa kwa uzima wa Kimungu, kupuliziwa kwa asili ya Kimungu, nguvu ya Uwepo wa Kimungu ukikaa juu yetu. Na nguvu yetu ya kuwa watakatifu hupatikana katika wito wa Mungu: Mtakatifu anatuita kwake mwenyewe, ili atufanye watakatifu kwa kumpata yeye mwenyewe. Hasemi tu ‘Mimi ni mtakatifu,’ bali ‘Mimi ni Bwana, niwatakasaye.’ Ni kwa sababu wito wa kuelekea Utakatifu unatoka kwa Mungu wa Nguvu na Upendo usio na kikomo ndipo twaweza kuwa na ujasiri: twaweza kuwa watakatifu.

Wito vilevile unadhihirisha kipimo cha Utakatifu. ‘Kama vile yeye alivyo mtakatifu, vivyo hivyo nanyi wenyewe,’ au (kama ilivyo pembezoni, R.V.), ‘Kama yule Mtakatifu, awaitaye, ninyi nanyi kuweni watakatifu.’ Hakuna kipimo kimoja cha Utakatifu kwa Mungu na kingine kwa mwanadamu. Asili ya nuru ni ileile, tuionapo katika jua au katika mshumaa: asili ya Utakatifu hubaki bila kubadilika, awe Mungu au mwanadamu ndani yake akaaye. Bwana Yesu hangeweza kusema kilicho pungufu ila, ‘Kuweni wakamilifu, kama Baba yenu wa mbinguni alivyo mkamilifu.’ Mungu anapotuita kwenye Utakatifu, anatuita kwake mwenyewe na kwa uzima wake mwenyewe: kadiri tunavyosikiliza kwa makini sauti hiyo, na kuiacha izame mioyoni mwetu, ndivyo vipimo vyote vya kibinadamu vitakavyoanguka, na maneno haya peke yake yatakayosikika, Mtakatifu, kama mimi nilivyo mtakatifu.

Na wito unatuonyesha njia ya kuelekea Utakatifu. Wito wa Mungu ni wenye ufanisi mkuu, ni wito wenye kutimiza. Ee! na tuusikilize tu, na tumsikilize tu yeye, na wito huo kwa nguvu ya Kimungu utafanya kile unachotoa. Yeye huviita vitu visivyokuwako kana kwamba vinakuwako: wito wake huupa uzima kwa wafu, na utakatifu kwa wale aliowahuisha. Anatuita tusikilize anaponena juu ya Utakatifu wake, na juu ya utakatifu wetu ulio kama wake. Anatuita kwake mwenyewe, ili tujifunze, kuogopa, kupenda, na kudai Utakatifu wake. Anatuita kwa Kristo, ambaye ndani yake Utakatifu wa Kimungu ulikuwa Utakatifu wa kibinadamu, ili tuone na kustaajabu, kutamani na kukubali kile chote kilicho kwa ajili yetu. Anatuita kwenye kukaa ndani na mafundisho ya Roho wa Utakatifu, ili tujisalimishe apate kutuletea na kutuvuvia ndani yetu kile kilicho chetu katika Kristo. Ee Mkristo! msikilize Mungu akikuita kwenye Utakatifu. Njoo ujifunze Utakatifu wake ni nini, na wako ni nini na unavyopaswa kuwa.

Naam, nyamaza kabisa na usikilize. Mungu alipomwita Abrahamu, alijibu, Mimi hapa. Mungu alipomwita Musa kutoka kile kichaka, alijibu, Mimi hapa, naye akaufunika uso wake, kwa maana aliogopa kumtazama Mungu. Mungu anakuita wewe kwenye Utakatifu, kwake mwenyewe yeye Mtakatifu, ili akufanye mtakatifu. Nafsi yako yote na ijibu, Mimi hapa, Bwana! Nena, Bwana! Jidhihirishe, Bwana! Mimi hapa. Unaposikiliza, sauti itasikika ikizidi kuwa ya ndani zaidi na tulivu zaidi: Kuwa mtakatifu, kama mimi nilivyo mtakatifu. Kuwa mtakatifu, kwa kuwa mimi ni mtakatifu. Utasikia sauti ikitoka katika umilele mkuu, kutoka chumba cha shauri cha ukombozi, na utakaponasa mnong’ono wake wa mbali, itakuwa, Kuwa mtakatifu, mimi ni mtakatifu. Utasikia sauti kutoka Paradiso, Muumba akiifanya siku ya saba kuwa takatifu kwa ajili ya mwanadamu aliyemuumba, akisema, Kuwa mtakatifu. Utasikia sauti kutoka Sinai, katikati ya ngurumo na umeme, na bado ni, Kuwa mtakatifu, kama mimi nilivyo mtakatifu. Utasikia sauti kutoka Kalvari, na hapo zaidi ya yote ni, Kuwa mtakatifu, kwa kuwa mimi ni mtakatifu.

Mwana wa Mungu, je, umewahi kulitambua, Baba yetu anatuita kwake mwenyewe, tuwe watakatifu kama yeye alivyo mtakatifu? Je, hatuna budi kukiri kwamba furaha imekuwa kwetu bora kuliko utakatifu, wokovu kuliko utakaso? Ee! bado si kuchelewa kurekebisha kosa hilo. Sasa na tujiunge pamoja tuisikilize sauti iitayo, tukaribie, na kugundua na kujua Utakatifu ni nini, au afadhali, tugundue na kumjua yeye mwenyewe Mtakatifu. Na ikiwa kumkaribia kwetu kwa mara ya kwanza kwatujaza aibu na fadhaa, kwatufanya tuogope na kurudi nyuma, na tuendelee kuisikiliza Sauti na Wito, ‘Kuwa mtakatifu, kama mimi nilivyo mtakatifu.’ ‘Yeye aitaye ni mwaminifu, naye ndiye atakayefanya hayo.’ Hofu zetu zote na maswali yetu yatakabiliwa na Mtakatifu aliyeudhihirisha Utakatifu wake, kwa kusudi hili moja, kwamba tupate kuushiriki pamoja naye. Tunapojisalimisha katika utulivu wa ndani wa nafsi ili kuisikiliza Sauti Takatifu inayotuita, itaamsha ndani yetu shauku mpya na imani thabiti, na lililo la thamani kuliko ahadi zote litakuwa kwetu neno hili la amri ya Kimungu:

Kuwa mtakatifu, kwa kuwa mimi ni mtakatifu.

Ee Bwana! wewe uliye Mtakatifu peke yako, umetuita tuwe watakatifu, kama vile wewe ulivyo mtakatifu. Bwana! twawezaje, usipotufunulia Utakatifu wako. Tuonyeshe, twakuomba, jinsi ulivyo mtakatifu, jinsi ulivyo mtakatifu kabisa, Utakatifu wako ni nini, ili tupate kujua jinsi tunavyopaswa kuwa watakatifu, jinsi tunavyopaswa kuwa watakatifu kabisa. Na wakati kuuona Utakatifu wako kunapotuonyesha zaidi jinsi tusivyo watakatifu, tufundishe kwamba wewe huwafanya washiriki wa Utakatifu wako mwenyewe wale wanaokuja kwako kwa ajili yake.

Ee Mungu! twakuja kwako, wewe Mtakatifu. Ni katika kukujua na kukupata na kuwa nawe, ndipo nafsi hupata Utakatifu. Twakusihi, tunapokuja kwako sasa, ulithibitishe katika mawazo ya mioyo yetu, kwamba lengo pekee la kutuita kwako, na la kuja kwetu kwako, ni Utakatifu. Ungependa tuwe kama wewe, washiriki wa Utakatifu wako. Kama mioyo yetu wakati wowote ikiogopa, kana kwamba ni jambo la juu mno, au ikitosheka na wokovu ulio pungufu ya Utakatifu, Ee Mungu Mbarikiwa! na tuisikie sauti yako ikiita tena, Kuwa mtakatifu, mimi ni mtakatifu. Wito huo na uwe nia yetu na nguvu yetu, kwa sababu yeye aitaye ni mwaminifu, naye ndiye atakayefanya hayo. Wito huo na uweke alama ya kipimo chetu na njia yetu; ee! maisha yetu na yawe kama vile uwezavyo kuyafanya.

Baba Mtakatifu! Nainama katika ibada ya unyenyekevu na kimya mbele zako. Sasa sauti yako mwenyewe na isikike vilindini mwa moyo wangu ikiniita, Kuwa mtakatifu, kama mimi nilivyo mtakatifu. Amina.

1. Na nimsihi kila msomaji wa kitabu hiki kidogo, kwamba kama kitamsaidia katika kuufuatilia Utakatifu, sharti aanze na Mungu Mwenyewe. Sharti uende kwake yeye akuitaye. Ni katika ufunuo wa binafsi wa Mungu kwako tu, anaponena, Mimi ni mtakatifu, ndipo ile amri, Kuweni watakatifu, iwezapo kuwa na uzima au nguvu.

2. Kumbuka, kama mwamini, tayari umeukubali wito wa Mungu, ijapokuwa hukuuelewa kikamilifu. Na liwe jambo lililoamuliwa, kwamba lolote utakaloliona kuwa ndiyo maana ya wito, utalikubali na kulitekeleza mara moja. Kama Mungu ananiita niwe mtakatifu, mtakatifu nitakuwa.

3. Lishike imara neno hili: ‘Mungu wa amani na awatakase kabisa: yeye awaitaye ni mwaminifu, naye ndiye atakayefanya hayo.’ Katika imani hiyo msikilize Mungu akikuita.

4. Tulia sasa, na umsikilize Baba yako akikuita. Omba na umtegemee Roho Mtakatifu, Roho wa Utakatifu, aufungue moyo wako uelewe wito huu mtakatifu. Kisha useme wazi jibu ulilo nalo la kutoa kwa wito huu.

Siku ya Pili.