Utakatifu na Kweli

‘Uwafanye watakatifu katika ile Kweli: neno lako ni Kweli.’—Yohana 17:17.

‘Mungu aliwachagua mpate wokovu katika utakaso na kuiamini ile Kweli.’—2 Wathesalonike 2:12.

Njia kuu ya utakaso ambayo Mungu huitumia ni neno lake. Na bado, ni kiasi gani cha kusoma na kujifunza, cha kufundisha na kuhubiri neno, ambacho hakina karibu athari yoyote katika kuwafanya watu watakatifu. Si neno linalotakasa; ni Mungu mwenyewe peke yake awezaye kutakasa. Wala si kwa neno tu Mungu hufanya hivyo, bali kwa ile Kweli iliyomo katika neno. Kama njia, neno lina thamani isiyoelezeka, kama chombo kinachoihifadhi kweli, ikiwa Mungu ataitumia; kama njia, halina thamani yoyote, ikiwa Mungu hataitumia. Na tujitahidi kuliunganisha Neno Takatifu la Mungu na Mungu Mtakatifu mwenyewe. Mungu hutakasa katika ile Kweli kwa njia ya neno lake.

Yesu alikuwa ndipo tu amesema, ‘Maneno uliyonipa nimewapa wao.’ Na tujaribu kutambua maana ya jambo hilo. Fikiria juu ya tendo lile kuu katika umilele: Yule Asiye na Ukomo, tumwitaye Mungu, akimpa maneno yake Mwanawe; katika maneno yake akifunua moyo wake, akitoa nia na mapenzi yake, akijidhihirisha mwenyewe na kusudi lake lote na upendo wake. Katika nguvu na uhalisi wa Kimungu unaopita ufahamu wote, Mungu alimpa Kristo maneno yake. Katika nguvu iyo hiyo iliyo hai Kristo aliwapa wanafunzi wake, yote yakiwa yamejaa uhai na nguvu ya Kimungu ya kutenda kazi mioyoni mwao, kadiri walivyoweza kuyapokea. Na kama vile katika maneno ya mtu duniani tunavyotarajia kuona hekima yote au wema wote ulio ndani yake, vivyo hivyo neno la Yule Mtakatifu Mara Tatu limejaa uhai wa Utakatifu wa Mungu. Ule moto wote mtakatifu, wa juhudi yake iwakayo na wa upendo wake uwakao, hukaa katika maneno yake.

Na bado watu waweza kuyashika maneno haya, na kuyachunguza, na kuyanena, hali wakiwa wageni kabisa kwa utakatifu wake, au kwa nguvu yake ya kufanya mtakatifu. Ni Mungu mwenyewe, Yule Mtakatifu, ndiye apasaye kufanya mtakatifu kwa njia ya neno. Kila mbegu, ambamo ndani yake mmo uhai wa mti, huwa na ganda au gamba linaloizunguka, ambalo hulinda na kuuficha uhai wa ndani. Ni pale tu mbegu ipatapo mahali katika udongo unaoifaa, na ganda lipasukapo na kuondolewa, ndipo mbegu iwezapo kuota na kukua. Na ni pale tu ulipo moyo ulio katika upatano na Utakatifu wa Mungu, ukiutamani, ukijisalimisha kwao, ndipo neno litakapofanya mtakatifu kweli kweli. Ni ule moyo usioridhika na neno tu, bali unaomtafuta Yule Aliye Hai, Mtakatifu, ndani ya neno, ambao kwao yeye ataifunua kweli, na ndani yake atajifunua mwenyewe. Ni lile neno tulilopewa na Kristo kama vile Mungu alivyompa, na kupokelewa na sisi kama alivyolipokea yeye, ili litawale na kuujaza uhai wetu, ndilo lenye nguvu ya kufanya mtakatifu.

Lakini yatupasa kuangalia kwa namna ya pekee jinsi Mwokozi wetu asemavyo, Uwatakase, si katika neno, bali katika kweli. Kama vile ndani ya mwanadamu kuna mwili, nafsi, na roho, vivyo hivyo hata katika kweli. Kwanza kuna kweli-ya-neno; mtu aweza kuwa na umbo sahihi la maneno hali asiielewa kweli iliyomo ndani yake. Kisha kuna kweli-ya-fikira; kwaweza kuwako ufahamu wa akili ulio wazi juu ya kweli pasipo kuionja nguvu yake. Biblia hunena juu ya kweli kama uhalisi ulio hai: hii ndiyo kweli-ya-uhai, ambamo Roho hasa wa ile kweli tuikiriyo ameingia na kuumiliki utu wetu wa ndani. Kristo hujiita mwenyewe ile Kweli: yasemekana kwamba amejaa neema na kweli. Uhai wa Kimungu na neema vimo ndani yake kama kuwako halisi kwenye dhati na uhalisi. Yeye hatutendei kwa fikira na shauku tu, bali hutupatia, kama uhalisi, ule uzima wa milele aliotuletea kutoka kwa Baba. Roho Mtakatifu huitwa Roho wa Kweli; ayatoayo yote ni ya kweli na halisi, dhati hasa ya vitu visivyoonekana; huongoza kuingia katika ile Kweli, si kweli-ya-fikira au fundisho tu, bali kweli-ya-uhai, umiliki wa binafsi wa ile Kweli kama ilivyo katika Yesu. Kwa kuwa ni Roho wa Kweli ndiye Roho wa Utakatifu; uhai wa Mungu, ambao ndio Utakatifu wake, hutuletea kama umiliki halisi.

Sasa ni juu ya hii Kweli iliyo hai, ikaayo ndani ya neno, kama vile uhai wa mbegu ukaavyo ndani ya ganda, ndipo Yesu asemapo, ‘Uwafanye watakatifu katika ile Kweli: neno lako ni Kweli.’ Angependa tuone uhusiano wa karibu, pamoja na tofauti iliyo pana, kati ya neno na kweli. Uhusiano huo umependwa na Mungu na umekusudiwa usitengeke. ‘Neno lako ni kweli;’ kwa Mungu vyote ni kimoja. Lakini si kwa mwanadamu. Kama vile walivyokuwako watu waliokuwa na ukaribu na mahusiano ya daima na Yesu, ambao kwao yeye alikuwa mtu tu, wala si zaidi, vivyo hivyo wako Wakristo wanaolijua na kulielewa neno, na bado ni wageni kwa nguvu yake ya kweli ya kiroho. Wana herufi lakini si roho; ile Kweli huwajia katika neno lakini si katika nguvu. Neno haliwafanyi watakatifu, kwa sababu hawalishiki katika Roho na katika Kweli. Kwa wengine, kinyume chake, wajuao maana ya kupokea kweli kwa kuipenda, wanaojisalimisha, katika kushughulika kwao kwote na neno, kwa Roho wa Kweli akaaye ndani yake na ndani yao pia, neno huwajia kweli kama Kweli, kama uhalisi wa Kimungu, ukitoa na kutenda yale linayoyanena. Na ni juu ya matumizi kama hayo ya neno ndipo Mwokozi asemapo, ‘Uwafanye watakatifu katika kweli: neno lako ni kweli.’ Kama vile maneno, ambayo Mungu alimpa, yalivyokuwa yote katika nguvu ya Uzima na Upendo na Mapenzi ya Mungu ya milele, ufunuo na utoaji wa kusudi la Baba, kama vile neno la Mungu lilivyokuwa Kweli kwake na ndani yake, vivyo hivyo laweza kuwa ndani yetu. Na tulipokeavyo hivyo, twafanywa watakatifu katika ile Kweli.

Na sasa ni mafunzo gani tuyapasayo kujifunza hapa kwa ajili ya njia ya Utakatifu? La kwanza ni hili: Na tuhakikishe kwamba katika mahusiano yetu yote na Neno lililobarikiwa la Mungu haturidhiki na kitu chochote pungufu ya kulionja lenyewe, kama kweli ya Mungu, kama roho na kama nguvu. Yesu alisema, ‘Ninyi mkikaa katika neno langu, mtaijua kweli.’ Hakuna uchunguzi uwezao kamwe kuupata au kuuthibitisha uhai wa mbegu: ipande katika udongo wake ufaao, nao ukuaji utaushuhudia uhai. Ni pale tu neno la Mungu lipokelewapo kwa kulipenda, likuavyo na kutenda kazi ndani yetu, ndipo tuwezapo kuijua kweli yake, kujua kwamba ni Kweli ya Mungu. Ni tunapoishi katika maneno ya Yesu, kwa upendo na utii, tukiyashika na kuyatenda, ndipo Kweli itokayo mbinguni, Nguvu ya Uzima wa Kimungu uliomo ndani yake, itakapojifunua kwetu. Kristo ni Kweli; ndani yake upendo na neema, uhai hasa wa Mungu, umeujia ulimwengu kama kuwako kwenye dhati, Nguvu Iliyo Hai, yenye Uweza, kitu kipya ambacho hakikuwako duniani kamwe kabla (Yohana 1:17); na tujisalimishe kwa Kristo Aliye Hai atumiliki na kututawala kama ile Kweli Iliyo Hai, ndipo neno la Mungu litakapokuwa Kweli kwetu na ndani yetu.

Roho wa Kristo ni Roho wa Kweli; ule uhalisi halisi wa mbinguni wa uhai na upendo wa Kimungu ndani ya Kristo, ile Kweli, una Roho, ajaye kuutoa na kuugawa. Na tujihadhari kujaribu kulisoma au kulielewa au kulimiliki neno la Mungu pasipo Roho yule ambaye kwa yeye neno lilinenwa zamani za kale; tutakuta ganda tu, ile kweli au fikira na hisia, ambayo huenda ni nzuri sana, lakini isiyo na nguvu ya kutufanya watakatifu. Ni lazima tuwe na Roho wa ile Kweli ndani yetu. Yeye atatuongoza kuingia katika ile Kweli; tuwapo katika ile Kweli, Mungu hutufanya watakatifu ndani yake na kwa njia yake. Ile Kweli ni lazima iwe ndani yetu, na sisi ndani yake. Mungu hupendezwa na kweli iliyo ndani ya moyo: yatupasa kuwa miongoni mwa watu wale ambao Kristo asema juu yao, ‘Kama mngekuwa wa ile kweli,’ ‘yeye aliye wa ile kweli hunijua.’ Katika uwanja wa chini wa maisha na mwenendo wa kila siku, wa fikira na tendo, ni lazima kuwe na upendo mkuu wa kweli, na utayari wa kudhabihu kila kitu kwa ajili yake; katika maisha ya kiroho, njaa kuu ya kuwa na dini yetu yote kila siku, kila dakika, ikisimama kikamilifu katika kweli ya Mungu. Ni kwa roho ile iliyo nyenyekevu, sahili, kama ya mtoto, ndiyo kweli ya neno itakayofunuliwa na kudhihirishwa. Katika hao Roho wa kweli huja kukaa. Katika hao, wanapongoja kila siku mbele za Yule Mtakatifu kwa ukimya na utupu, kwa unyenyekevu na hofu takatifu, Roho wake Mtakatifu hutenda kazi na kuitoa kweli ndani. Kwa kumtoa hivyo Kristo kama alivyofunuliwa katika neno, katika uhai na upendo wake wa Kimungu, kama uhai wao wenyewe, huwafanya watakatifu kwa utakatifu wa Kristo.

Kuna funzo jingine. Sikiliza sala ile, mwangwi wa kidunia wa ile sala ambayo yeye huishi sikuzote kuiomba, ‘Baba Mtakatifu! uwafanye watakatifu katika kweli.’ Je, wataka kuwa mtakatifu, mwana wa Mungu? jitupe katika mkondo ule wenye nguvu wa maombezi utiririkao daima ndani, ukifikapo daima, kifuani mwa Baba. Uachie ubebwe juu yake hata nafsi yako yote ipige kelele, kwa kuugua kusikoelezeka, kulikojaa kina na hisia zisizowezekana kwa lugha ya wanadamu, ‘Baba Mtakatifu! unifanye mtakatifu katika kweli.’ Umtumainiapo Kristo kama kweli, uhalisi wa yale uyatamaniyo, na maombezi yake yenye kushinda yote; ungojeapo Roho ndani kama Roho wa kweli; mtazame juu Baba, na kutarajia utendaji wake mwenyewe wa moja kwa moja na wenye uweza wa kukufanya mtakatifu. Siri ya utakatifu ni siri ya Yule Utatu-Umoja. Kuingia kwa kina zaidi katika maisha matakatifu kwaketi katika ushirika wa Watatu katika Mmoja. Ni Baba atuthibitishaye katika Kristo, atoaye, katika kutoa kupya kila siku, Roho Mtakatifu; ni kwa Baba, Baba Mtakatifu, ndiko nafsi ipasavyo kutazama juu daima katika sala, ‘Unifanye mtakatifu katika kweli.’

Imenenwa vema kwamba katika neno hili Mtakatifu tunao wazo kuu la ile sala ya ukuhani mkuu. Kama sifa ya Baba (Yohana 17:11), kama kazi ya Mwana kwa ajili yake mwenyewe na yetu (mst. 19), kama kazi ya moja kwa moja ya Baba kwa njia ya Roho (mist. 17, 20), ni ufunuo wa utukufu wa Mungu ndani yake mwenyewe na ndani yetu. Na tuingie Patakatifu pa Patakatifu, na tuinamapo pamoja na Kuhani wetu Mkuu, na kilio kile kirefu, kisichokoma kipande juu kwa ajili ya Kanisa lote la Mungu, ‘Baba Mtakatifu! uwafanye watakatifu katika kweli: neno lako ni kweli.’ Neno ambalo kwalo Mungu hufanya mtakatifu lafupishwa katika hili, Mtakatifu katika Kristo. Mungu na alifanye kuwa kweli ndani yetu!

Kuweni watakatifu, kwa kuwa mimi ni mtakatifu.

Baba uliyebarikiwa! kwa Israeli ulisema, Mimi Bwana ni mtakatifu, nami hufanya watakatifu. Lakini ni katika Mwanao mpendwa peke yake ndipo utukufu kamili wa Utakatifu wako, kama unaotufanya watakatifu, umefunuliwa. Wewe ndiwe Baba yetu Mtakatifu, utufanyaye watakatifu katika kweli yako.

Twakushukuru kwa kuwa Mwanao ametupa maneno yale uliyompa, na kwamba kama vile alivyoyapokea kutoka kwako katika uhai na nguvu, sisi pia twaweza kuyapokea. Ee Baba! kwa moyo wetu wote twayapokea; Roho na ayafanye kuwa kweli na uhai ndani yetu. Ndipo tutakapokujua wewe kama Yule Mtakatifu, uteketezaye dhambi, umfanyaye upya mwenye dhambi.

Twakubariki zaidi ya yote kwa ajili ya Mwanao aliyebarikiwa, Mtakatifu wa Mungu, Neno lililo Hai ambamo ndani yake Kweli hukaa. Twakushukuru kwa kuwa katika maombezi yake yasiyokoma, kilio hiki hukufikia daima, ‘Baba, uwatakase katika kweli yako,’ na kwamba jibu latiririka daima kutoka utukufuni mwako. Baba Mtakatifu! utufanye watakatifu katika kweli yako, katika ufunuo wako wa ajabu wa nafsi yako katika yeye aliye kweli. Roho wako Mtakatifu na atawale hivyo mioyoni mwetu hata Mtoto wako Mtakatifu Yesu, ajitakasaye mwenyewe kwa ajili yetu ili tupate kutakaswa katika kweli, awe kwetu Njia, na Kweli, na Uzima. Na tujue kwamba tumo ndani yake mbele zako, na kwamba neno lako moja katika jibu la sala yetu ya kutufanya watakatifu ni—Mtakatifu katika Kristo. Amina.

1. Mungu ni Mungu wa kweli—si kweli katika kunena tu, au kweli ya fundisho—bali kweli ya kuwako, au uhai katika uhalisi wake wa Kimungu. Na Kristo ni ile kweli; mwili halisi wa uhai huu wa Kimungu. Na kuna ufalme wa kweli, wa hali halisi za Kiroho za Kimungu, ambao Kristo ni Mfalme wake. Na katika kweli hii yote ya Mungu iliyo katika Kristo, dhati yenyewe hasa ni, Roho. Yeye ni Roho wa kweli: hutuongoza kuingia ndani yake, hata tuwe wa ile kweli na kuenenda ndani yake. Katika kweli, uhalisi ulioko ndani ya Mungu, Utakatifu, ndio mzizi ulio na kina zaidi; Roho wa kweli ni Roho Mtakatifu.

2. Ni kazi ya Baba kutufanya watakatifu katika kweli: na tuiname chini sana kwa tumaini kama la mtoto tunapovuta sala: ‘Baba Mtakatifu! utufanye watakatifu katika kweli.’ Yeye atalitenda.

3. Ni maombezi ya Mwana yaombayo na kupata baraka hii: na tuchukue nafasi yetu ndani yake, na kufurahi katika uhakika wa jibu.

4. Ni Roho wa kweli ambaye kwa yeye Baba huifanya kazi hii, hata tukae ndani ya kweli, na kweli ndani yetu. Na tujisalimishe kwa uhuru mwingi na kwa ukamilifu kwa uongozi wa Roho, katika mahusiano yetu na Neno la Mungu, ili, kama Mwana aombavyo, Baba atufanye watakatifu katika kweli.

5. Na sisi, katika nuru ya kazi hii ya Yule Watatu-Mmoja, tusilisome Neno kamwe ila kwa nia hii: kufanywa watakatifu katika kweli na Mungu.

Siku ya Kumi na Saba.