Roho Mtakatifu

‘Lakini hili alilinena kwa habari ya Roho, ambaye wale waliomwamini watampokea; kwa maana Roho Mtakatifu alikuwa hajaja bado, kwa sababu Yesu alikuwa hajatukuzwa bado.’—Yohana 7:39.

‘Msaidizi, huyo Roho Mtakatifu, ambaye Baba atampeleka kwa jina langu, yeye atawafundisha yote.’—Yohana 14:26.

‘Mungu aliwachagua ninyi kwa wokovu, katika kutakaswa na Roho, na kuiamini kweli.’—2 Wathes. 2:13. (Tazama 1 Petro 1:2.)

Mara nyingine imesemwa kwamba, ijapokuwa Utakatifu wa Mungu unadhihirika zaidi katika Agano la Kale, katika Agano Jipya hulazimika kupisha ufunuo wa upendo wake. Neno hili lisingeweza kusemwa kama tungetambua kikamilifu kwamba Roho ni Mungu, na kwamba anapojitwalia jina Mtakatifu kuwa jina lake mwenyewe, ni ili kutufundisha kwamba sasa Utakatifu wa Mungu unakuja karibu zaidi kuliko wakati wowote, na kudhihirishwa hasa kama nguvu itufanyayo watakatifu. Katika Roho Mtakatifu, Mungu Mtakatifu wa Israeli, na yeye aliyekuwa Mtakatifu wa Mungu, wanakuja karibu kwa ajili ya kutimizwa kwa ile ahadi, ‘Mimi ndimi Bwana niwatakasaye.’ Utakatifu wa Mungu usioonekana na usiokaribika ulikuwa umefunuliwa na kuletwa karibu katika maisha ya Kristo Yesu; yote yaliyotuzuia kushiriki ndani yake yaliondolewa kwa mauti yake. Jina la Roho Mtakatifu latufundisha kwamba ni kazi ya Roho hasa kutupatia utakatifu huo na kuufanya kuwa wetu wenyewe.

Jaribu kutambua maana ya jambo hili; jina lile ambalo katika Agano la Kale lote limekuwa la Mungu Mtakatifu, sasa latwaliwa na Roho yule aliye ndani yako. Utakatifu wa Mungu katika Kristo huwa utakatifu ndani yako, kwa sababu Roho huyu yumo ndani yako. Maneno hayo, na hali za Kimungu ambazo maneno hayo huzieleza, Mtakatifu na Roho, sasa yameunganishwa pasipo kutenganika na milele. Waweza tu kuwa na kiasi cha Roho kadiri ulivyo tayari kuwa na utakatifu. Waweza tu kuwa na utakatifu kadiri unavyokuwa na Roho akaaye ndani yako.

Wako wengine waombao kupewa Roho kwa sababu wanatamani kuwa na nuru yake na furaha yake na nguvu zake. Lakini maombi yao huleta ongezeko dogo la baraka au uwezo. Ni kwa sababu hawamjui wala hawamtamani ipasavyo kama Roho Mtakatifu. Usafi wake uwakao moto, nuru yake ipekuayo na kuhukumu, kuufisha kwake matendo ya mwili, ya nafsi pamoja na mapenzi yake na uwezo wake, kuongoza kwake katika ushirika wa Yesu jinsi alivyoyatoa mapenzi yake na uhai wake kwa Baba,—mambo haya yote hawajayafikiri. Roho hawezi kutenda kwa nguvu ndani yao kwa sababu hawampokei kama Roho Mtakatifu, katika kutakaswa na Roho. Nyakati fulani, katika majira ya uamsho, kama ilivyokuwa kati ya Wakorintho na Wagalatia, aweza kweli kuja pamoja na karama zake na matendo makuu, ilhali nguvu yake ya kutakasa hudhihirika kidogo tu. (1 Kor. 14:4, 13:8, 3:1–3; Gal. 3:3, 5:15–26.) Lakini nguvu ile ya kutakasa isipotambuliwa na kukubaliwa, karama zake zitapotea. Karama zake zijazo juu yetu zimekusudiwa tu kuitengeneza njia kwa ajili ya nguvu ya kutakasa iliyo ndani yetu. Ni lazima tuchukue funzo hili moyoni; twaweza kuwa na kiasi cha Roho kadiri tulivyo tayari kuwa na Utakatifu wake. Kuwa mmejaa Roho, lazima kumaanishe kwetu, Kuwa watakatifu kikamilifu.

Kinyume chake ni kweli vivyo hivyo. Twaweza kuwa na utakatifu kadiri tu tulivyo na Roho. Baadhi ya nafsi hutafuta kwa bidii nyingi kuwa watakatifu, lakini ni kwa nguvu zao wenyewe sana. Watasoma vitabu na kusikiliza mahubiri kwa bidii kubwa; watatumia kila jitihada kuyashika kila wazo, na kuutenda kila ushauri. Lakini ni lazima wakiri kwamba bado ni wageni sana kwa ile raha ya kweli, iliyo ndani, na furaha na nguvu ya kukaa ndani ya Kristo, na kuwa watakatifu ndani yake. Waliutafuta utakatifu kuliko walivyomtafuta Roho. Ni lazima wajifunze jinsi hata utakatifu wote ulio karibu na dhahiri katika Kristo, ulivyo nje ya uwezo wetu, isipokuwa kama Roho Mtakatifu akaapo ndani na kuutoa. Ni lazima wajifunze kumwomba yeye na kutiwa nguvu kwake kwa uweza (Efe. 3:16), kumwaminia (Yohana 4:14, 7:37), kwa imani kujisalimisha kwake akaaye ndani (1 Kor. 3:14, 6:19). Ni lazima wajifunze kuacha jitihada za nafsi katika kufikiri na kuamini, katika kutaka na katika kupiga mbio; kumtumaini Mungu, na kumngoja kwa saburi. Yeye kwa Roho wake Mtakatifu atatufanya watakatifu. Kuwa watakatifu kwamaanisha, Kujazwa na Roho.

Tukiuliza kwa undani zaidi jinsi Roho huyu Mtakatifu afanyavyo watu kuwa watakatifu, jibu ni,—yeye hufunua na kutoa Utakatifu wa Kristo. Maandiko yatuambia: Kristo amefanywa kwetu utakaso. Alijitakasa mwenyewe kwa ajili yetu, ili sisi wenyewe nasi tupate kutakaswa katika kweli. Tumetakaswa kwa kutolewa kwa mwili wa Yesu Kristo mara moja kwa yote. Tumetakaswa katika Kristo Yesu. Kristo mzima aliye hai ni hazina ya utakatifu kwa mwanadamu. Katika maisha yake hapa duniani aligeuza Utakatifu wa Kimungu aliokuwa nao kuwa sarafu itumikayo iliyohitajika kwa ajili ya maisha haya ya kibinadamu ya duniani, yaani utii kwa Baba, na unyenyekevu, na upendo, na juhudi. Kama Mungu, anao utoshelevu wake kwa kila dakika ya maisha ya kila mwaminio.

Lakini bado, yote hayo yako nje ya uwezo wetu, isipokuwa kama Roho Mtakatifu ayaletapo kwetu na kuyahabarisha ndani mwetu. Lakini hii ndiyo kazi ile hasa ambayo kwa ajili yake achukua Jina la Kimungu, Roho Mtakatifu, kumtukuza Yesu, Mtakatifu wa Mungu, ndani yetu, na hivyo kutufanya washiriki wa Utakatifu wake. Aifanya kwa kumfunua Kristo, hata tuanze kuona kilicho ndani yake. Aifanya kwa kuufunua ukosefu wa utakatifu ulio ndani ya asili yetu (Rum. 7:14–23). Aifanya kwa kututia nguvu kwa uweza tuamini, tumpokee Yesu mwenyewe kuwa uhai wetu. Aifanya kwa kutuongoza tukate tamaa kabisa juu ya nafsi, kujisalimisha kikamilifu katika utii kwa Yesu kuwa Bwana, kufikia ujasiri wa hakika wa imani katika nguvu ya Kristo akaaye ndani. Aifanya kwa, katika vilindi vya siri na vya kimya vya moyo na maisha, kutoa tabia na neema za Kristo, hata kutoka katika kitovu cha ndani cha maisha yetu, ambacho kimefanywa upya na kutakaswa katika Kristo, utakatifu utiririke na kuenea kila mahali hata mpaka ukingoni kabisa. Pale ambapo shauku imekwisha amshwa mara moja, na furaha katika sheria ya Mungu kwa utu wa ndani imeumbwa, hapo, kama Roho wa uhai huu ulio katika Kristo Yesu, yeye humweka huru na sheria ya dhambi na mauti iliyo katika viungo, humwongoza katika uhuru wa utukufu wa wana wa Mungu. Kama Mungu aliye ndani yetu, yeye hutoa kile ambacho Mungu katika Kristo amekiandaa.

Na tukiuliza tena mara moja jinsi kazi ya Roho huyu Mtakatifu, ambaye hivyo hufanya watu kuwa watakatifu, itakavyopatikana, jibu ni rahisi sana na dhahiri. Yeye ni Roho wa Baba Mtakatifu, na wa Kristo, Mtakatifu wa Mungu: ni lazima apokewe kutoka kwao. ‘Akanionyesha mto wa maji ya uzima, ukitoka katika kiti cha enzi cha Mungu, na cha Mwana-Kondoo.’ Yesu anena juu ya ‘Roho Mtakatifu, ambaye Baba atampeleka kwa Jina langu.’ Alitufundisha kumwomba Baba. Paulo huwaombea Waefeso: ‘Ninapiga magoti yangu mbele za Baba, ili awajalieni, kwa kadiri ya utajiri wa utukufu wake, mtiwe nguvu kwa uweza kwa Roho wake katika utu wa ndani.’ Ni tunapomtazama Mungu katika Utakatifu wake, na ufunuo wake wote tangu Uumbaji na kuendelea, na kuona jinsi Roho sasa atiririkavyo kutoka katika kiti cha enzi cha Utakatifu wake kama maji ya uzima, ndipo tumaini letu litaamshwa kwamba Mungu atamtoa atende kwa uweza ndani yetu. Na tutakapomwona kisha Yesu akifunua utakatifu ule katika asili ya kibinadamu, akiipasua pazia katika mauti yake ya upatanisho, ili Roho atoke Patakatifu pa Patakatifu na, kama Roho Mtakatifu, awe mwakilishi wake, akimfanya awepo ndani yetu, tutakuwa na ujasiri kwamba imani katika Yesu italeta utimilifu wa Roho. Kama alivyotuambia kumwomba Baba, alituambia kumwamini yeye mwenyewe. ‘Aniaminiye mimi, mito ya maji yaliyo hai itatiririka kutoka ndani yake.’ Na tuiname mbele za Baba katika jina la Kristo, Mwanawe; na tumwamini kwa unyofu mkuu Mwana kuwa yeye ambaye ndani yake tumekubalika mbele za Baba, na ambaye kwa yeye upendo na baraka za Baba hutufikia, nasi twaweza kuwa na hakika kwamba Roho, ambaye tayari yumo ndani yetu, atafanya, kama Roho Mtakatifu, kazi yake kwa nguvu iongezekayo daima. Siri ya utakatifu ni siri ya Utatu: tunapoinama mbele za Baba, tukimwamini Mwana, Roho Mtakatifu atatenda. Nasi tutaona maana ya kweli ya lile Mungu alilolinena katika Israeli: ‘Mimi ni mtakatifu,’ hivyo asema Baba; ‘Kuweni watakatifu,’ kama Mwanangu na ndani ya Mwanangu; ‘Mimi nawatakasa,’ kwa Roho wa Mwanangu akaaye ndani yenu. Nafsi zetu na ziabudu na kupaza sauti, ‘Mtakatifu, Mtakatifu, Mtakatifu, ni Bwana wa majeshi.’

Roho Mtakatifu. Ujuzi wote wa kweli wa Baba katika Utakatifu wake unaostahili kuabudiwa, na wa Mwana katika Utakatifu wake, ambao umekusudiwa kuwa wetu, na kushiriki kwote ndani yake, hutegemea maisha yetu katika Roho, hutegemea kumjua kwetu na kumkiri kuwa akaaye ndani yetu kama Uhai wetu. Ee, laweza kuwaje kwamba, tukiwa na Mungu Mtakatifu Mara Tatu namna hii, Utakatifu wake hauifuniki zaidi Kanisa lake na watoto wake? Roho Mtakatifu yu kati yetu, yumo ndani yetu: lazima ni sisi tunaomhuzunisha na kumpinga. Kama wewe usingependa kufanya hivyo, mara inama goti mbele za Baba, ili akupe matendo ya nguvu ya Roho katika utu wa ndani. Amini kwamba Roho Mtakatifu, mchukuzi kwako wa Utakatifu wote wa Mungu na wa Yesu, kweli yumo ndani yako. Mwache yeye achukue nafasi ya nafsi, pamoja na fikira zake na jitihada zake. Iweke nafsi yako tulivu mbele za Mungu katika ukimya mtakatifu, ili akupe hekima; pumzika, katika utupu na umaskini wa roho, katika imani kwamba atatenda kwa njia yake mwenyewe. Kama vile utakatifu aletao Yesu ulivyo wa Kimungu, ndivyo ilivyo ya Kimungu nguvu ambayo kwayo Roho Mtakatifu huutoa. Jisalimishe siku kwa siku katika kutegemea na utii uzidio, ili kumngoja na kuongozwa naye. Hofu ya Mtakatifu na iwe juu yako: mtakase Bwana Mungu moyoni mwako: yeye na awe hofu yako na utisho wako. Usiogope dhambi tu: ogopa zaidi ya yote nafsi, ijisukumizapo mbele za Mungu pamoja na utumishi wake. Nafsi na ife, kwa kukataa na kuikana kazi yake: Roho Mtakatifu, katika utulivu, na kutegemea, katika kujisalimisha kwa utii na kuamini, na awe na mamlaka, na uwezo wa kuamua kwa uhuru juu ya kila kipawa. Mngoje yeye—aweza, naye atafunua na kutoa kwa uweza Utakatifu wa Baba na wa Mwana.

Kuweni watakatifu, kama mimi nilivyo mtakatifu.

Mtakatifu, Mtakatifu, Mtakatifu, Bwana Mungu wa majeshi! dunia yote imejaa utukufu wako! Utukufu huo na uujaze moyo wa mtoto wako, ainamapo mbele zako. Naja sasa kunywa kutoka katika mto wa maji ya uzima utiririkao toka chini ya kiti cha enzi cha Mungu na cha Mwana-Kondoo. Utukufu na uwe kwa Mungu na kwa Mwana-Kondoo kwa ajili ya kipawa ambacho hakijaingia moyoni mwa mwanadamu kukiwaza—kipawa cha Roho Mtakatifu akaaye ndani.

Ee Baba yangu! katika jina la Yesu nakuomba nitiwe nguvu kwa uweza kwa Roho wako katika utu wa ndani. Nifundishe, nakuomba, kuamini kwamba umekwisha mtoa yeye, kumkubali na kumtazamia aujaze na kuutawala utu wangu wote wa ndani. Nifundishe kujisalimisha kwake; nisitake wala nisipige mbio, nisifikiri wala nisifanye kazi kwa nguvu zangu, bali kwa tumaini la utulivu kungoja na kujua kwamba yeye hutenda ndani yangu. Nifundishe maana ya kutokuwa na tumaini katika mwili, na kukutumikia katika Roho. Nifundishe maana ya kuongozwa katika mambo yote na Roho wako Mtakatifu, Roho wa Utakatifu wako.

Na ujalie, Baba mwenye neema, kwamba kwa yeye nipate kukusikia ukinena na kujidhihirisha kwangu kwa uweza: Mimi ni mtakatifu. Yeye na amtukuze kwangu na ndani yangu, Yesu, ambaye ndani yake amri yako ‘Kuweni watakatifu’ imetimizwa kwa baraka namna hii kwa niaba yangu. Na Roho Mtakatifu anipe upako na kutiwa muhuri kuletako hakika kamilifu kwamba ndani yake ahadi yako inatimizwa kwa utukufu, ‘Nawatakasa ninyi.’ Amina.

1. Yakubalika kote kwamba Roho Mtakatifu hana, katika mafundisho ya Kanisa wala imani ya waaminio, nafasi ile ya heshima na nguvu, impasayo kama Mfunuaji wa Baba na Mwana. Tafuta hakika ya ndani kwamba pasipo Roho Mtakatifu mafundisho yaliyo dhahiri kabisa juu ya utakatifu, shauku zilizo na bidii kuu, hata mausiano yaliyo na baraka kubwa, yatakuwa ya muda tu, hayatazaa matokeo ya kudumu, hayataleta raha idumuyo.

2. Roho Mtakatifu akaa ndani, na hutenda ndani, katika kilindi kilichofichwa cha asili yako. Tafuta zaidi ya kila kitu hakika iliyo dhahiri na ya kawaida kwamba yumo ndani yako, akifanya kazi yake.

3. Kwa ajili hii, jikane nafsi na kazi yake katika kumtumikia Mungu. Uwezo wako mwenyewe wa kufikiri na kuomba na kuamini na kujitahidi—uweke chini yote waziwazi na kwa dhahiri mbele za Mungu; dai, kubali, na uamini matendo yaliyofichwa ya Roho akaaye ndani.

4. Kama vile Mwana alivyonena sikuzote juu ya Baba, ndivyo Roho aelekezavyo sikuzote kwa Kristo. Nafsi ijisalimishayo kwa Roho itajifunza kutoka kwake kujua jinsi Kristo alivyo utakatifu wetu, jinsi tuwezavyo sikuzote kukaa ndani ya Kristo Utakaso wetu. Ni jitihada bure kiasi gani imekuwa mara nyingi pasipo Roho! ‘Kama vile upako ulivyowafundisha, mkae ndani yake.’

5. Katika hekalu la moyo wako, mwaminio mpendwa, kuna mahali pa siri, ndani ya pazia, ambapo akaa, mara nyingi pasipojulikana kabisa, Roho wa Mungu. Inama kwa unyenyekevu mkuu mbele za Baba, na uombe kwamba atende kwa uweza. Mtazamie Roho afanye kazi yake: yeye ataufanya utu wako wa ndani makao yanayofaa, moyo wako kiti cha enzi, kwa ajili ya Yesu, na kumfunua yeye humo.

Siku ya Kumi na Sita.