Matendo Mema na Bidii

Matendo Mema

Mara moyo wa mwanadamu unapowekwa chini ya darubini ya Maandiko, nasi tukauona kwa jicho la kiroho, twauona kuwa mchafu mno, hata tuna hakika kwamba ingekuwa vigumu vivyo hivyo kutazamia kuona matendo mema katika mtu asiye na haki, asiyeongoka, kama vile kutumaini kuona moto ukiwaka katikati ya bahari. Mambo hayo mawili yasingepatana. Matendo yetu mema, kama tunayo, huchipuka kutokana na kuongoka kwa kweli; tena zaidi, huchipuka pia kutokana na uvutano wa kiroho wa daima uliofanywa juu yetu, tangu wakati wa kuongoka hata saa ya mauti. Ee, Mkristo, usingekuwa na matendo mema kama usingekuwa na neema mpya siku kwa siku! Usingeiona neema uliyopewa saa ya kwanza kuwa yatosha kuzaa matunda leo. Si kama kupanda mti mioyoni mwetu, ambao kwa asili yake wenyewe huzaa matunda; bali utomvu hupanda kutoka kwenye shina Yesu Kristo. Sisi si miti wenyewe, bali sisi ni matawi yaliyokazwa kwenye Mzabibu ulio hai.

Matendo yetu mema huchipuka kutokana na muungano na Kristo. Kadiri mtu ajuavyo na ahisivyo kuwa ni mmoja na Yesu, ndivyo atakavyozidi kuwa mtakatifu. Kwa nini tabia ya Mkristo hufanana na tabia ya Kristo? Ni kwa sababu hii tu, kwamba ameunganishwa na kuwa mmoja na Bwana Yesu. Kwa nini tawi huzaa zabibu? Ni kwa sababu limepandikizwa katika mzabibu, na kwa hiyo hushiriki asili ya shina. Basi, Mkristo, njia pekee uwezayo kuzaa matunda kwa Mungu ni kwa kupandikizwa katika Kristo na kuungana naye. Kama wadhani waweza kwenda katika utakatifu bila kudumisha ushirika wa daima na Kristo, umekosea sana. Kama utakuwa mtakatifu, sharti uishi karibu na Yesu. Matendo mema huchipuka kutoka huko tu. Kwa hiyo twapata sababu zenye nguvu zaidi dhidi ya jambo lo lote kama kutumainia matendo; kwa maana kwa vile matendo ni kipawa cha Mungu tu, ni jambo lisilowezekana kabisa kwa mtu asiyeongoka kutokeza matendo mema kama hayo ndani yake mwenyewe. Na kama ni vipawa vya Mungu, ni kidogo mno kiasi gani cha sifa yetu kiwezacho kuwamo ndani yake!

Anza Vema

Nimewajua watu waliopiga mbio za dini kwa nguvu zao zote, na hata hivyo wakazikosa kwa sababu hawakuanza vema. Wasema, "Sasa, ni jinsi gani?" Basi, kuna watu wengine ambao kwa ghafula huruka ndani ya dini. Huipata kwa haraka, na kuishika kwa muda, na mwishowe huipoteza kwa sababu hawakuipata dini yao kwa njia iliyo sawa. Wamesikia kwamba kabla mtu hajaweza kuokoka, ni lazima, kwa mafundisho ya Roho Mtakatifu, ahisi uzito wa dhambi, aiungame, aikatae tumaini lote katika matendo yake mwenyewe, na amtazame Yesu Kristo peke yake. Huyaona mambo haya yote kuwa matangulizi yasiyopendeza, na kwa hiyo, kabla hawajashughulikia toba, kabla Roho Mtakatifu hajafanya kazi njema ndani yao, kabla hawajaletwa kuacha kila kitu na kumtumaini Kristo, hufanya ukiri wa dini. Hii ni kama kuanzisha biashara bila bidhaa ghalani, na sharti kuwe na kushindwa. Kama mtu hana rasilimali ya kuanzia, aweza kufanya maonyesho mazuri kwa muda kidogo, lakini yatakuwa kama mtakato wa miiba chini ya sufuria,—kelele nyingi na mwanga mwingi kwa kitambo, lakini utazimika gizani. Ni wangapi walioko wasiodhani kamwe kwamba ni lazima kuwe na kazi ya moyoni ndani! Lakini na tukumbuke, ya kwamba hakukuwako kamwe mtu aliyekuwa na moyo uliobadilika bila kwanza kuwa na moyo wenye taabu. Sharti tupite katika handaki lile jeusi la kushtakiwa dhamiri kabla hatujaweza kutoka juu ya boma refu la furaha takatifu; sharti kwanza tupite katika Bwawa la Kukata Tamaa kabla hatujaweza kupiga mbio kandokando ya Kuta za Wokovu. Sharti kuwe na kulima kabla ya kupanda; sharti kuwe na baridi kali nyingi, na manyunyu makali mengi, kabla ya kuwapo mavuno yo yote. Lakini mara nyingi twatenda kama watoto wadogo wachumao maua kutoka vichakani, na kuyapanda katika bustani zao bila mizizi; kisha husema jinsi bustani yao ndogo ilivyo nzuri na ya kupendeza; lakini ngoja kitambo, na maua yao yote yatanyauka, kwa sababu hayana mizizi. Haya yote ni matokeo ya kutokuanza vema, ya kutokuwa na "shina la jambo." Ina faida gani dini ya nje, ua na jani lake, tusipokuwa na "shina la jambo" ndani yetu—tusipolimwa kwa jembe la Roho, kisha tukapandwa kwa mbegu takatifu ya Injili, kwa tumaini la kuzaa mavuno mengi? Sharti kuwe na mwanzo mzuri katika kupiga mbio za Kikristo, kwa maana hakuna tumaini la kushinda isipokuwa mwanzo uwe sahihi.

Toa kwa Ukarimu

Ee Mkristo, kila uelekeapo kuzuia kwa uchoyo kutoka kwa Kanisa la Mungu, mfikirie Mwokozi wako aliyeyatoa yote aliyokuwa nayo ili akutumikie! Nawe je, waweza basi—uonapo kujikana nafsi kwa hadhi kubwa hivyo—waweza basi kuwa mchoyo, na kuyahesabu matamu yako kuwa ya thamani zaidi kuliko mahitaji yao, wakati madai ya maskini wa kundi yanapokusonga? Mkumbuke Yesu; wadhani unamwona akikutazama, na kusema, "Nilijitoa mwenyewe kwa ajili yako, nawe je, wajizuia nafsi yako usinipe? Kwa maana ukifanya hivyo, hujui upendo wangu katika kimo chake chote, na kina chake, na urefu wake, na upana wake."

Utii kwa Mapenzi ya Mungu

Kwa Mkristo hakuna hoja yenye nguvu kama mapenzi ya Mungu. Mapenzi ya Mungu ni sheria ya mwaminio. Yeye hauliza itamfaidia nini—yatakuwa na matokeo gani mema juu ya wengine, bali husema tu, "Je, Baba yangu ameamuru hivyo?" Na maombi yake ni, "Ee Roho Mtakatifu, nisaidie kutii, si kwa sababu naona jinsi itakavyokuwa njema kwangu, bali kwa sababu tu wewe waamuru." Ni pendeleo la Mkristo kuzitenda amri za Mungu, "Mkiisikiliza sauti ya neno lake."

Amri ya Furaha

"Jifurahishe katika Bwana." Sheria hii ya amri moja si sheria ya mawe iandikwayo juu ya vibao vya jiwe gumu, bali ina agizo, ambalo kwa mng'aro wake wa kumeta lastahili kuandikwa juu ya yakuti na lulu. "Jifurahishe katika Bwana." Furaha inapokuwa wajibu, bila shaka wajibu ni lazima uwe furaha. Inapokuwa wajibu wangu kuwa na furaha, nami nikawa na amri dhahiri ya kufurahi, ni lazima kweli niwe mpumbavu nikizikataa furaha zangu mwenyewe, na kugeuka kando na raha yangu mwenyewe. Ee, ni Mungu wa namna gani tuliye naye, aliyeufanya kuwa wajibu wetu kuwa na furaha! Ni Mungu mwenye neema jinsi gani, asiyehesabu utii wo wote kuwa unastahili kukubaliwa kwake kama utii wa furaha utolewao na moyo wenye shangwe. "Jifurahishe katika Bwana."

Uvivu

Baadhi ya majaribu huwajia wenye bidii, lakini majaribu yote huwashambulia wavivu. Wakristo wavivu hawajaribiwi na ibilisi kiasi kama wao wanavyomshawishi ibilisi awajaribu. Uvivu huweka mlango wa moyo wazi kidogo, na kumwomba Shetani aingie; lakini kama tunashughulika toka asubuhi hata usiku, Shetani akitaka kuingia, sharti auvunje mlango. Chini ya neema kuu, na baada ya imani, hakuna ngao iliyo bora dhidi ya jaribu kuliko kutii lile agizo, kwamba ninyi mwe, "kwa bidii msiwe wavivu; mkiwa na juhudi katika roho; mkimtumikia Bwana."

Manufaa

Kristo, Bwana wangu, huenda huko na huko akitenda mema, na kama ungetaka kutembea pamoja naye, sharti uende huko na huko kwa utume ule ule.

Dini Ionyeshwayo kwa Mfano

Nisingetoa kitu kingi kwa dini yako isipokuwa yaweza kuonekana. Taa hazisemi, lakini huangaza: mnara wa taa haupigi ngoma, wala haupigi upatu; na hata hivyo, mbali kuvuka maji cheche yake ya kirafiki huonekana na baharia. Basi matendo yako na yaiangaze dini yako. Hotuba kuu ya maisha yako na ionyeshwe kwa mwenendo wako wote, nayo haitakosa kung'aa.

Bidii ya Kikristo

Twaona katika Maandiko kwamba mengi ya madhihirisho makuu yaliyofanywa kwa watakatifu mashuhuri yalifanywa walipokuwa na shughuli. Musa alikuwa akichunga kundi la baba yake alipokiona kile kijiti kilichokuwa kikiwaka moto; Yoshua anazunguka mji wa Yeriko akutanapo na malaika wa Bwana; Yakobo yumo katika maombi, na malaika wa Mungu anamtokea; Gideoni anapiga nafaka, na Elisha analima, Bwana anapowaita; Mathayo yuko forodhani, aambiwapo amfuate Yesu; na Yakobo na Yohana wanavua samaki. Yeye Mpenzi Mwenyezi wa nafsi za watu hana desturi ya kujidhihirisha kwa watu wavivu. Yeye aliye mlegevu na asiyefanya kazi, hawezi kutazamia kuwa na uandamani mtamu wa Mwokozi wake.